རྒྱ་གཞུང་གིས་བོད་རང་སྐྱོང་ལྗོངས་ལྷུན་གྲུབ་རྫོང་དུ་གཏེར་ཁ་སྔོག་འདོན་གྱི་ལས་གཞི་སྤེལ་ཏེ། མི་མང་ལ་དཀའ་ངལ་རབ་དང་རིམ་པ་འཕྲད་ཀྱིན་པ་ལྟར། ཁ་སང་འབྲེལ་ཡོད་བརྒྱུད་དེ་སྔོན་ས་གནས་མི་མང་གིས་རྒྱ་གཞུང་ལ་ཕུལ་བའི་སྙན་ཞུ་ཡི་གེ་ཞིག་ལག་སོན་བྱུང་ཡོད།
རེ་སྐུལ་ཞུ་ཡིག་འདི་ནི་ཕྱི་ལོ་ ༢༠༠༤ ལོ་ནས་བཟུང་རྒྱ་གཞུང་གིས་ས་གནས་སུ་གཏེར་ཁ་སྔོག་འདོན་བྱེད་མགོ་བཙུགས་ཏེ། ས་གནས་བོད་མི་ཚོ་དཀའ་ངལ་རབ་དང་རིམ་པ་འཕྲད་སྟབས། ༢༠༠༦ ལོའི་ཟླ་ ༨ པའི་ཚེས་ ༣༠ ཉིན་ལྷུན་གྲུབ་རྫོང་མཁར་རྩེ་ཤང་རྭ་མ་ཕུའི་མདུང་གྲོང་ཚོའི་མི་མང་ཨུ་ཡོན་ལྷན་ཁང་གི་གྲོང་མི་ཡོངས་ནས་རྒྱ་ནག་གཞུང་ལ་རེ་སྐུལ་སྙན་ཞུ་ཕུལ་བའི་མ་ཡིག་ཅིག་ཡིན་འདུག་ལ། རེ་སྐུལ་སྙན་ཞུ་དེའི་ནང་། གུས་བཀུར་འོས་པའི་གོང་རིམ་འབྲེལ་ཡོད་དབུ་ཁྲིད་ལྷན་རྒྱས་ཀྱི་ཞབས་དྲུང་དུ། ཞུ་གསོལ་འདེབས་སྙིང་། ཏང་གི་ཡང་དག་སྲིད་ཇུས་བཟང་པོ་ལ་བརྟེན་ནས་ཞིང་འབྲོག་མི་དམངས་རྣམས་དབུལ་བཅོས་ཕྱུག་འགྱུར་གྱི་ལམ་དུ་བསྐྱོད་རྒྱུ་ནི། རླབས་ཆེན་ཏང་གི་ཞིང་འབྲོག་མི་དམངས་ལ་བསྩལ་བའི་བཀའ་དྲིན་གྱི་སྙིང་བཅུད་དེ་ཡིན་ལ། ཞིང་འབྲོག་མི་དམངས་རྣམས་ཀྱིས་རྟག་ཏུ་ཡིད་ལ་བཅངས་པའི་རེ་འདུན་དེ་རང་ཡིན། དེ་ན་ཞིང་འབྲོག་མི་དམངས་རྣམས་ཀྱིས་ཏང་གི་སྲིད་ཇུས་བཟང་པོ་ལ་བརྟེན་ནས་བློ་བདེ་བག་ཕེབས་ངང་རང་གི་ཕ་ཡུལ་འཛུགས་སྐྲུན་དང་དབུལ་བཅོས་ཕྱུག་འགྱུར། དེ་བཞིན་ཏང་དང་མི་དམངས་ཡོངས་ཀྱི་ལོ་བརྒྱའི་ཇུས་ཆེན་དུ་འགྱུར་བའི་ཁོར་ཡུག་སྲུང་སྐྱོབ་སོགས་བྱ་བཞག་གང་སར་འབད་འཐབ་ལྷོད་མེད་ཞུ་བཞིན་པའི་སྐབས་འདིར། ང་ཚོ་ལྷུན་གྲུབ་རྫོང་མཁར་རྩེ་ཤང་ཁོངས་སུ་ཡོད་པའི་རྭ་མ་ཕུའི་མདུང་གྲོང་ཚོ་དང་ལོ་འབྲོག་པ། ཤིང་དཀར་གྲོང་ཚོ་སོངས་ཀྱི་ནང་ལྕགས་རྡོ་འདོན་མཁན་ཁག་ཉི་ཤུ་ཙམ་དང་། འཕྲུལ་འཁོར་ཆེ་ཆུང་སྣ་ཚོགས་བརྒྱ་ཕྲག་མང་པོ་བསླེབས་ཏེ་གང་སར་ཁྲིམས་མེད་ཀྱིས་ལྕགས་རྡོ་སྔོག་ནས་མི་རབས་ནས་མི་རབས་བར་ཞིང་འབྲོག་མི་དམངས་ ༣༠༠༠ ལྷག་ཙམ་དང་། ཕྱུགས་རིགས་སྒོ་གྲངས་ ༢༠༠༠༠ ལྷག་ཙམ་གྱི་འཚོ་རྟེན་དུ་གྱུར་བའི་རྩྭ་ཐང་དང་ཤིང་ནགས་འབོར་ཆེན་རྩ་གཏོར་བཏང་ཏེ་ཕྱུགས་རིགས་རྣམས་འཚོ་ཐབས་བྲལ་བཞིན་པ་མ་ཟད། འབྲོག་པ་ཁྱིམ་ཚང་གསུམ་གྱི་ཕྱུགས་རིགས་ ༡༠༠༠ ལྷག་གི་ལྷས་རྭ་ཡང་རྩ་གཏོར་བཏང་སྟེ་ད་ལྟ་འབྲོག་པ་རྣམས་སྡོད་ཐབས་མ་ཤེས་པ་ཞིག་བཟོས་སོང་། ཞེས་བཀོད་ཡོད་འདུག
ཡང་སྙན་ཞུའི་ནང་། དེང་སྐབས་གཏེར་ཁ་སྔོག་སའི་ས་ཆ་དེར་ལྕགས་རྡོ་ལས་སྣོན་བྱེད་སའི་བཟོ་གྲྭ་ཁག་གཉིས་ཙམ་རྒྱག་རྩིས་བྱེད་ཀྱི་འདུག ས་ཆ་དེ་དག་ལས་མང་ཆེ་བ་འཕན་པོ་དང་ལྷ་སའི་གཙང་བོ་ཆུ་མགོ་ཞིང་འབྲོག་མི་དམངས་རྣམས་ཀྱི་འཐུང་ཆུ། དཔྱིད་ཀ་ཕྱུགས་རིགས་ཤ་ཤེད་སྐྱོ་བའི་དུས་གསོ་ཚགས་བྱེད་སའི་རྩྭ་ར་དང་ནགས་རི་གལ་ཆེན་དག་ཡིན་པས། དེ་དག་མུ་མཐུད་གཏོར་བཤིག་བཏང་ན་སླད་ཞིང་འབྲོག་མི་དམངས་ཀྱི་ཕྱུགས་རིགས་རྣམས་འཚོ་རྟེན་མེད་པར་འགྱུར་རྒྱུ་མ་ཟད། ཡུལ་འདིའི་ཕུ་མདའ་གང་སར་གནས་བཅའ་བའི་རྒྱལ་ཁབ་ཀྱི་རྩ་ཆེའི་སྲོག་ཆགས་ཤྭ་བ་དང་རྣ་གཡག གཟིག སྲམ། ཨི། གོང་མོ། ཁྲུང་ཁྲུང་སྐེ་ནག་སོགས་དང་། ད་དུང་གླ་བ་དང་དགོ་བ། ཝ་མོ་སོགས་རྒྱལ་ཁབ་རིམ་པའི་རྩ་ཆའི་སྲོག་ཆགས་དེ་རྣམས་སྔར་ཡུལ་དེའི་ཕུ་མདའ་གང་སར་གང་དགའ་གང་སྐྱིད་ངང་ནས་གནས་བཞིན་པ་དེ་དག་ཀྱང་། ཉིན་ལྟར་རྫས་མེ་དང་འཕྲུལ་རིགས་སྣ་ཚོགས་ཀྱི་སྐད་སྒྲ་ལ་བརྟེན་ནས་གནས་ཐབས་བྲལ་བ་ཞིག་ཏུ་འགྱུར་རྒྱུ་ནི་ཐེ་ཚོམ་མི་འདུག ཅེས་བཀོད་འདུག
གསར་འགོད་པ། དོན་གོ
