ཨ་རིའི་སྲིད་འཛིན་གྱི་དམ་འབུལ།

ཁ་སང་གཟའ་ཉི་མའི་ཉིན་ཨ་རིའི་སྲིད་ཨོ་བྷ་མས་ཕོ་བྲག་དཀར་པོའི་ནང་གཞུང་འབྲེལ་ཐོག་སྐབས་གཉིས་པའི་སྲིད་འཛིན་ལས་ཁུར་གྱི་དམ་འབུལ་ཞུས་འདུག

ཁ་སང་ཕྱི་ཚེས་ ༢༠ ཉིན་རྒྱབ་ཨ་རིའི་ཕོ་བྲང་དཀར་པོའི་ཚོམས་ཆེན་སྔོན་པོའི་ནང་། སྲིད་འཛིན་ཨོ་བྷ་མས་ཨ་རིའི་ཆེ་མཐོའི་ཁྲིམས་དཔོན་ཇོན་རོ་བྷར་ཊི་(John Roberts) ཡི་མདུན་ནས་སྲིད་འཛིན་སྐབས་གཉིས་པའི་ལས་ཁུར་དམ་བཅའ་ཕུལ་ཡོད་པ་དང་། སྲིད་འཛིན་གཞོན་པ་ཇའོ་བྷ་ཌེན་གྱིས་ཀྱང་ཁོང་གི་ལས་ཁུངས་ནས་དངོས་སུ་སྲིད་འཛིན་གཞོན་པའི་ལས་ཁུར་དམ་བཅའ་ཕུལ་ཡོད་འདུག

ཨ་རིའི་རྩ་ཁྲིམས་ནང་སྲིད་འཛིན་དམ་འབུལ་གྱི་ཉིན་མོ་ནི་ཕྱི་ཟླ་ ༡ ཚེས་ ༢༠ གསལ་ཡོད་ཀྱང་། ད་ལོའི་ཕྱི་ཟླ་ ༡ ཚེས་ ༢༠ ཉིན་ནི་གཟའ་ཉི་མར་འཁེལ་ཡོད་སྟབས། སྲིད་འཛིན་ཨོ་བྷ་མ་དང་སྲིད་འཛིན་གཞོན་པ་ཇའོ་བྷ་ཌེན་གཉིས་ཀྱིས་རྩ་ཁྲིམས་ཀྱི་དགོངས་དོན་ལྟར་ཉིན་དེར་སོ་སོའི་ནང་མི་མཉམ་ཞུགས་ཐོག་གཞུང་འབྲེལ་ཐོག་སྲིད་འཛིན་དང་སྲིད་འཛིན་གཞོན་པའི་ལས་ཁུར་དམ་འབུལ་གྱི་རྟེན་འབྲེལ་ཙམ་བྱས་ཡོད་པ་ལས། རྒྱལ་ཡོངས་རང་བཞིན་གྱི་སྲིད་འཛིན་དམ་འབུལ་གྱི་མཛད་སྒོ་དངོས་གཞི་ཡུལ་དེའི་ཕྱི་ཚེས་ ༢༡ གཟའ་ཟླ་བའི་ཉིན་འཚོགས་རྒྱུ་ཡིན་འདུག

དོ་ནུབ་ཨ་རིའི་རྒྱལ་ས་ཝ་ཞིན་ཊོན་ཌེ་སེ་(Washington DC)གྱི་ཕོ་བྲང་དཀར་པོའི་མདུན་ཐང་དུ་སྲིད་འཛིན་ཨོ་བྷ་མའི་ལས་འཁུར་དམ་འབུལ་མཛད་སྒོའི་ཐོག མི་མང་འབུམ་ ༦ ནས་འབུམ་ ༨ བར་འདུ་འཛོམས་ཡོང་རྒྱུར་ཚོད་དཔག་བྱེད་ཀྱི་ཡོད་ཀྱང་། ༢༠༠༩ ལོའི་ཁོང་གི་སྲིད་འཛིན་དམ་འབུལ་སྐབས་ཝ་ཤིན་ཊོན་ཌེ་སེ་ལ་མི་གྲངས་ས་ཡ་ ༢ ཙམ་འདུ་འཛོམས་བྱུང་སྟེ། ཨ་རིའ་སྲིད་འཛིན་རིམ་བྱོན་གྱི་ལས་འཁུལ་དམ་འབུལ་མཛད་སྒོའི་མི་གྲངས་མང་ཤོས་དེ་ཆགས་ཡོད་པ་རེད།

ཕྱི་ཚེས་ ༢༡ ཉིན་གྱི་སྲིད་འཛིན་དམ་འབུལ་གྱི་གཞུང་འབྲེལ་མཛད་སྒོ་དེ་ནི། ཨོ་བྷ་མའི་འདས་པའི་ལོ་བཞི་རིང་གི་ལས་དོན་དང་དཀའ་རྙོག་རིགས་གཞི་ལ་བཞག་སྟེ། འབྱུང་འགྱུར་ལོ་བཞིའི་རིང་གི་སྲིད་ཇུས་རང་བཞིན་གྱི་ལས་དོན་གཙོ་ཕལ་གང་དག་ཐོག་ཤུགས་གནོན་རྒྱག་འཆར་ཡོད་མེད་ཕྱི་བསྒྲགས་གནང་རྒྱུ་ཡིན་སྟབས། དོ་ནུབ་ཀྱི་ཨོ་བྷ་མའི་གཏམ་བཤད་དེ་ནི་ཨ་རི་བ་ཙམ་མ་ཡིན་པར་འཛམ་གླིང་གང་སར་དོ་སྣང་ཆེན་པོ་བྱེད་ཀྱི་ཡོད།

གསར་འགོད་པ། བནྡེ་སྐྱབས།