ཉེ་ཆར་ཞཱིས་ཀྱིས་ཚོགས་སྡེ་གཞན་དག་གིས་དྲང་བདེན་བརྗོད་པའི་བློ་སྟོབས་བསྐྱེད་དགོས་ལ། དམར་ཤོག་པས་སྐྱོན་བརྗོད་དང་ལེན་དགོས་སྐོར་བརྗོད་འདུག
ཟླ་འདིའི་ཕྱི་ཚེས་ ༦ ཉིན། རྒྱ་གཞུང་དམར་ཤོག་ཚོགས་པ་ཕུད་ཚོགས་སྡེ་གཞན་ཁག་གི་འདུ་འཛོམས་ཚོགས་འདུ་ཞིག་གི་སྟེང་། ཞཱིས་ཅིན་ཕེན་གྱིས་ “དམར་ཤོག་མ་ཡིན་པའི་ཚོགས་སྡེ་ཁག་གི་མི་སྣས། ངེས་པར་དུ་བློ་སྟོབས་ཆེན་པོས་སྐད་ཆ་དྲང་བདེན་དང་བསམ་ཚུལ་འདོན་ཐུབ་པ་བྱེད་དགོས་ལ། གལ་སྲིད་རྣ་བར་སྙན་པོ་མེད་ནའང་། བདེན་པ་བདེན་ཐུབ་ཀྱིས་མང་ཚོགས་ཀྱི་བསམ་ཚུལ་འདོན་ཐུབ་དགོས།” ཞེས་བརྗོད་ཡོད་པ་མ་ཟད། ཞཱིས་ཅིན་ཕེན་གྱིས་དམར་ཤོག་པའི་རྩ་འཛུགས་ཀྱི་ངོས་ནས་ཀྱང་། ཚོགས་སྡེ་གཞན་དག་གི་བསམ་ཚུལ་དང་སྐྱོན་བརྗོད་དག་ “འབད་པ་ཆེན་པོས་དང་ལེན” དང་ “སེམས་གཏིང་ནས་དགའ་བསུ” བྱེད་དགོས་པའི་རེ་བ་བཏོན་ཡོད་འདུག
ཞིན་ཐང་རཱན་བརྙན་འཕྲིན་གསར་ཁང་གི་དྲ་བའི་སྟེང་གནས་ཚུལ་སྤེལ་བ་ལྟར་ན། དམར་ཤོག་དང་སྲིད་གཞུང་གི་མི་སྣར་སྐྱོན་བརྗོད་བྱེད་མཁན་རྣམས་འཇུ་བཟུང་དང་བཀག་ཉར་དང་། གསར་ཤོག་དང་རྩོམ་དེབ། དྲ་རྒྱའི་བརྒྱུད་ལམ་བཅས་ལ་བསྔོག་བཤེར་བཀག་སྡོམ་བྱེད་རྒྱུ་བཅས་ནི་རྒྱ་གཞུང་དམར་ཤོག་པའི་རྒྱུན་ལྡན་གྱི་བྱ་སྤྱོད་ཅིག་ཏུ་གྱུར་ཡོད་སྟབས། དམར་ཤོག་དང་གཞུང་ལ་སྐྱོན་བརྗོད་བྱ་རྒྱུར་ཡོངས་བསྒྲགས་རྒྱབ་སྐྱོར་གྱི་ཞཱིས་ཅིན་ཕེན་གྱི་སྐད་ཆ་དེ་དག དུས་ཐུང་ནང་གནས་འཕྲིན་དྲ་རྒྱའི་ཐོག་ཁྱབ་བརྡལ་དུ་སོང་སྟེ་སྤྱི་ཚོགས་ནང་དོ་སྣང་ཤུགས་ཆེན་པོ་བསླེབས་བཞིན་ཡོད་འདུག
ཚོགས་ཆེན་བཅོ་བརྒྱད་པའི་སྟེང་ཞཱིས་ཅིན་ཕེན་རྒྱ་ནག་དམར་ཤོག་པའི་སྤྱི་ཁྱབ་དྲུང་ཆེར་བསྐོ་འཇོག་བྱུང་རྗེས། ཁོས་རྒྱ་གཞུང་གི་དམག་ཁུལ་དང་སྲིད་འཛིན་ཁྱབ་ཁོངས་ཀྱི་དཔོན་རིགས་ཚོའི་རུལ་སུངས་ཤུགས་ཆེན་པོས་གླེང་སློང་བྱས་པར་བརྟེན། རྒྱ་ནག་སྤྱི་ཚོགས་ཁྲོད་གཡོ་འགུལ་དང་གླེང་ཕྱོགས་འདྲ་མིན་བྱུང་བཞིན་ཡོད་པ་རེད།
སྲིད་དོན་དབྱེ་ཞིབ་པ་ཁག་ཅིག་གིས། ཚོགས་ཆེན་བཅོ་བརྒྱད་པའི་ཐོག་ཅཱང་ཤོག་ཁག་གིས་སྟངས་འཛིན་བྱས་ཡོད་པའི་སྲིད་ཁྲིམས་ལྷན་ཁང་གི་གནས་བབས་མར་ཕབ་ཡོད་ནའང་། སྔར་བཞིན་ཅང་ཤོག་ཁག་གིས་རྒྱ་གཞུང་གི་དྲིལ་བསྒྲགས་ཁྱབ་ཁོངས་ཡོངས་རྫོགས་དབང་འཛིན་བྱས་ཡོད་སྟབས། ཞཱིས་ཅིན་ཕིན་གྱིས་རང་ཕྱོགས་ཀྱི་དྲིལ་བསྒྲགས་ཤོག་ཁག་ཅིག་སྒྲིག་སྟེ། རྒྱ་གཞུང་དྲིལ་བསྒྲགས་ལྷན་ཁང་གི་སྟངས་འཛིན་ལས་གཡོལ་ཐབས་བྱས་ཏེ། གནས་འཕྲིན་དྲ་རྒྱ་བརྒྱུད་སོ་སོའི་རྣམ་འགྱུར་ཕྱིར་སྒྲོག་ཐབས་བྱེད་བཞིན་ཡོད་པ་དང་། ཉེ་ཆར་ཞཱིས་དང་འབྲེལ་བའི་གནས་ཚུལ་དང་པར་རིས་ཁག་གནས་འཕྲིན་དྲ་རྒྱའི་སྟེང་ཐོན་བཞིན་པ་དེ་དག་ནི་ཞཱིས་ཀྱི་ཤོག་སྒྲིལ་ཚོགས་པའི་སྤེལ་བཞིན་པའི་ངོས་འཛིན་བྱས་ཡོད་འདུག
གསར་འགོད་པ། ཚེ་རིང་རྒྱལ།
