རྒྱ་ནག་གཞུང་གིས་ཁམས་བྲག་མགོ་རྫོང་གི་བོད་མི་ལྔ་ལ་ལོ་བཅུ་ནས་བཅུ་བཞི་བར་གྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག
རྒྱ་ནག་གཞུང་གིས་བོད་ནང་གི་བོད་མི་ཚོར་མེར་བསྲེཊ་དང་ཞི་བའི་ངོ་རྒོལ་སོགས་ཀྱི་དོན་རྐྱེན་དང་འབྲེལ་བ་ཡོད་པའི་ཉེས་འཛུགས་འོག་བོད་མི་ཚོར་གང་བྱུང་ཁྲིམས་ཆད་དང་བཙོན་འཇུག་བྱེད་བཞིན་པ་ལྟར། ཟླ་སྔོན་མའི་ཕྱི་ཚེས་ ༢༦ ཉིན་དཀར་མཛེས་བོད་རིགས་རང་སྐྱོང་ཁུལ་བྲག་མགོ་རྫོང་འབྲིང་རིམ་མི་དམངས་ཁྲིམས་ཁང་གིས། བྲག་མགོ་མི་མང་གི་ཞི་བའི་ངོ་རྒོལ་གྱི་སྣེ་འཁྲིད་མཁན་དང་། གཞུང་གི་དངུལ་ཁང་གཏོར་བཅོམ་བྱེད་མཁན་བཅས་ཀྱི་ཉེས་འཛུགས་འོག བྲག་མགོ་དགོན་པའི་གྲྭ་བཀྲ་ཤིས་དར་རྒྱས་དང་གྲྭ་རྣམ་རྒྱལ་དོན་འགྲུབ། མི་སྐྱ་འཕྲིན་ལས། གཞན་མིང་དང་ལོ་རྒྱུས་གསལ་བོ་མི་ཤེས་པའི་བོད་མི་ ༢ བཅས་བོད་མི་ལྔ་ལ་ལོ་ ༡༠ ནས་ ༡༤ བར་གྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག
གྲྭ་ངག་དབང་མཁྱེན་རབ་ལགས་ཀྱིས་གསར་ལམ་དུ་གནས་ཚུལ་མཁོ་སྤྲོད་གནང་བ་ལྟར་ན། རྒྱ་གཞུང་གིས་བྲག་མགོ་དགོན་པའི་གྲྭ་བཀྲ་ཤིས་དར་རྒྱས་དང་གྲྭ་རྣམ་རྒྱལ་དོན་འགྲུབ་གཉིས། ༢༠༠༨ ལོའི་ས་གནས་ཀྱི་ཞི་རྒོལ་སྐབས་མཉམ་ཞུགས་དང་། ༢༠༡༢ ལོའི་ཕྱི་ཟླ་ ༡ པོའི་ཚེས་ ༢༣ ཉིན་གྱི་ཞི་རྒོལ་བཅས་སུ་མཉམ་ཞུགས་ཀྱིས་མི་མང་གི་སྣེ་འཁྲིད་དང་སྐུལ་སློང་བྱེད་མཁན་གཙོ་བོ་ཡིན་པའི་ཉེས་འཛུགས་འོག་སྔར་ལོའི་དཔྱིད་གསར་དུས་ཆེན་རྗེས་སུ་འཛིན་བཟུང་བྱས་ཡོད་པ་མ་ཟད། འདི་ལོའི་ཕྱི་ཟླ་ ༡ ཚེས་ ༢༦ ཉིན་བྲག་མགོ་རྫོང་མི་དམངས་ཁྲིམས་ཁང་གིས་ཕ་ཨ་ལོ་དང་མ་ཚེ་གོ་གཉིས་ཀྱི་བུ། བྲག་མགོ་དགོན་པའི་རང་ལོ་ ༣༠ ཡིན་པའི་གྲྭ་བཀྲ་ཤིས་དར་རྒྱས་ལགས་ལ་ལོ་ ༡༤ དང་། ཕ་ལོ་ཚེ་དང་མ་ལྷ་མོ་གཉིས་ཀྱི་བུ། བྲག་མགོ་དགོན་པའི་གྲྭ་རྣམ་རྒྱལ་དོན་འགྲུབ་ལོ་ ༡༤ དུས་བཀག་བཙོན་འཇུག་གི་ཁྲིམས་ཐག་བཅད་འདུག
དེ་བཞིན། བྲག་མགོ་གཡུ་ཉག་གྲོང་ཚོའི་ཕ་སངས་རྒྱས་རྒྱལ་དང་མ་ཚེ་ལོ་གཉིས་ཀྱི་བུ་འཕྲིན་ལས་ལགས་སུ། སྔར་ལོའི་ས་གནས་ཀྱི་ཞི་རྒོལ་སྐབས་དངུལ་ཁང་གཏོང་བཅོམ་བྱེད་མཁན་དང་ཁ་བྲལ་བའི་ཉེས་མིང་འོག འདི་ལོའི་ཕྱི་ཟླ་ ༡ ཚེས་ ༢༦ ཉིན་བྲག་མགོ་རྫོང་མི་དམངས་ཁྲིམས་ཁང་གིས་ལོ་ ༡༠ ཡི་དུས་བཀག་བཙོན་འཇུག་གི་ཁྲིམས་ཐག་དང་། བྲག་མགོ་མདའ་མདོ་ཞང་གི་བོད་མི་གཉིས་ལ་ལོ་ ༡༡ རེའི་དུས་བཀག་བཙོན་འཇུག་གི་ཁྲིམས་ཐག་བཅས་བཅད་ཡོད་ཀྱང་། བོད་མི་ཁོང་གཉིས་ཀྱི་མིང་དང་ལོ་རྒྱུས་གསལ་བོ་མ་ཤེས་པར་ལྷག་ཡོད་འདུག
གསར་འགོད་པ། དོན་གོ
