________རང་དབང་གི་ཆེད་དུ་མེར་བསྲེགས་བརྒྱར་ལོན་པར་རྗེས་དྲན་དུ་ཕུལ།
མིག་མི་འཛུམ།
བོད་ཀྱི་ལོ་རྒྱུས་དེབ་ཐེར་མང་བོའི་ཁྲོད་སངས་རྒྱས་ཀྱི་བསྟན་པའི་མེ་རོ་མདོ་ཁམས་སྨད་ནས་གསོས་ཞེས་བཀོད་ཡོད་པ་མང་དུ་མཐོང་མྱོང་བ་དང་། དེ་ནི་སུས་ཀྱང་བཀའ་དྲིན་དུ་མི་འདོད་པའམ་མི་འཐད་པ་མེད་པ་ནི་ཡི་གེ་ཀློག་མཁན་ ཚང་མར་གསལ་བ་ལྟར་ཡིན་ཏེ། དེང་གི་དུས་ན་ཡང་བོད་རང་དབང་གི་མེ་རོ་དེ་མདོ་ཁམས་སྨད་ནས་གསོ་བཞིན་པའང་གོང་དང་ཅིས་མི་མཚུངས། སྤྱིར་བཏང་གིས་སྟོད་སྨད་བར་གསུམ་གྱི་སྐད་ཆ་བཤད་བདེ་མེད་ཀྱང་། དོན་དངོས་ཀྱི་སྟེང་ནས་སྐད་ཆ་དེ་བཤད་པར་གནོད་པ་གང་ཡང་མེད་པར་མཐོང་སྟེ། ཉིས་སྟོང་བཅུ་གཉིས་ལོ་ནས་རྒྱ་ནག་གི་ཕྱོགས་ནས་མེར་བསྲེགས་རེ་རེའི་མཇུག་ཏུ་བཙོན་འཇུག་དང་ལོ་ཚད་བཟོ་བ། ཚེ་བཙོན་དང་སྲོག་ཁྲིམས་བཅད་པའི་གནས་ཚུལ་རེ་རེ་བཞིན་ཐོན་པ་འདིས། མདོ་ཁམས་སྨད་ན་དཀའ་ངལ་སྡུག་བསྔལ་ཅི་ཙམ་མྱོང་གི་ཡོད་པ་འུ་ཅག་གི་ཆུ་བུར་མིག་གིས་མཐོང་གིན་པས་ན། ཀློག་མཁན་སུ་ཞིག་དང་ཉན་མཁན་གང་འདྲ་ཞིག་ཡིན་ནའང་ཕྱོགས་རིས་དང་ངན་པའི་རང་བསྟོད་དུ་མི་འགྲོ་སྟབས། བདག་གིས་དེ་རིང་ཆེད་དུ་གཤེགས་ཟིན་པའི་དཔའ་བོ་དཔའ་མོ་དག་ལ་དྲན་གསོའི་ཆེད་དུ་རང་དབང་གི་མེ་རོ་མདོ་ཁམས་སྨད་ནས་གསོ་བཞིན་པའི་སྐོར་གྱི་ཁ་བརྡ་ཐུང་ཐུང་ཞིག་བྱ་བར་འདོད།
བདག་གིས་ཤེས་གསལ་ལྟར། བོད་དབུས་ནས་དུས་རབས་གོང་མའི་ལོ་རབས་བརྒྱད་ཅུ་བའི་ནང་སྟེ་ཕྱི་ལོ་ ༡༩༨༧ ལོ་ནས་རང་དབང་གི་འབོད་སྒྲ་འཛམ་བུ་གླིང་ལ་བསྒྲགས་ཤིང་། དེ་ཡི་ཆེད་དུ་ཕྱི་མའི་འཕྲང་རིང་འགྲིམ་པ་སོགས་རྩིས་ན་གྲངས་ཀྱིས་ག་ལ་ཟིན། བདག་གིས་རྒྱུས་ལོན་བྱས་པ་ལྟར་ན་སྐབས་དེ་དུས་ནས་བཟུང་དེ་རིང་ལ་ཐུག་གི་བར་དུ་བོད་དབུས་ཀྱི་ལྷ་སའི་གྲོང་ཁྱེར་གྱི་བྱང་ངོས་སུ་ཡོད་པའི་གྲྭ་བཞི་བཙོན་ཁང་དུ་ཆབ་སྲིད་བཙོན་པ་(ཕོ་མོ་གཉིས་ཆ་རྩིས་པའི།)བཞི་བརྒྱའི་འོག་ཏུ་ལྷུང་མ་མྱོང་བའང་རང་དབང་གི་ཆེད་དུ་ལོས་རེ་ཡིན། དེ་བས་ཀྱང་འུ་ཅག་གི་དོ་སྣང་གི་ཡུལ་དུ་མ་བྱུང་བ་ཞིག་ནི་བརྒྱད་ཅུ་གྱ་གྲངས་ནས་དེ་རིང་ལ་ཐུག་གི་བར་དུ་ལྷ་སའི་བར་སྐོར་གླིང་ནས་གྲྭ་བ་དང་བཙུན་མ། མི་སྐྱ་དབྱེར་མེད་ཀྱིས་ཕལ་ཆེར་ཟླ་བ་རེར་རྒྱ་གཞུང་ལ་ངོ་རྒོལ་སྐད་འབོད་ཀྱི་འབོད་སྒྲ་ཆད་མ་མྱོང་བར་བརྗོད་ཀྱང་མི་ཆོག་པ་ག་ལ་ཡོད། དེ་ལ་རྒྱ་གཞུང་གིས་འཇམ་རྩུབ་ཅི་རིགས་ཀྱིས་དཀའ་ངལ་རབས་དང་རིམ་པ་སྤྲད་ཡོད།
དེའི་རྗེས་ཀྱི་ ༢༠༠༨ ལོར་བོད་ཡུལ་གང་ས་གང་ནས་ངོ་རྒོལ་སྐད་འབོད་དང་ལས་འགུལ་སྣ་ཚོགས་སྤེལ་བས། དགྲ་བོའི་དྲག་གནོན་གྱིས་བོད་ཁ་བ་ཅན་ལ་སྡུག་གི་འཁོར་ལོ་བསྐོར་ཞིང་མིག་ཆུའི་རྒྱ་མཚོ་སྐྱིལ་ཡོད། དེ་བས་ཀྱང་འབུར་དུ་ཐོན་པ་ཞིག་ལ། ཉིས་སྟོང་བརྒྱད་ཀྱི་རྗེས་ནས་བཟུང་མདོ་ཁམས་ཕྱོགས་སུ་མི་མང་དཀྱུས་མ་ནས་ཤེས་ཡོན་པའི་སྡེ་ཡི་བར་དུ་དགྲ་བོའི་མེ་མདའི་ལན་དུ་ཚིག་གི་མེ་ཏོག་གཏོར་བའི་རྒོལ་ལན་སློག་རྒྱུའི་དབུ་བརྙེས་ཤིང་། མིག་གིས་བལྟས་བལྟས་རིག་རིག་ལ་ཤེས་ཡོན་པ་ང་ཡིན་དང་རྩོམ་པ་པོ་ང་ཡིན་ཟེར་མཁན་མང་བོ་ཞིག་ཁྲི་མུན་དོང་ལ་གཡུག་པ་དང་ལོ་ཚད་སྣ་ཚོགས་བཟོས་ནས་ང་ཚོའི་ཆེད་དུ་སྡུག་བསྔལ་མྱོང་གི་ཡོད། དེ་དང་སྟབས་བསྟུན་ནས་དཔའ་བོ་བཀྲ་བྷེས་དབུ་བཙུགས་ནས་འུ་ཅག་གི་ཆེད་དུ་རང་ལུས་མེར་བསྲེགས་གཏོང་རྒྱུའི་མགོ་བཙུགས་ཏེ་ཨ་མདོ་རྔ་པའི་མཁའ་དབྱིངས་ལ་དཔའ་བོའི་རང་སྲེག་གི་དུད་སྤྲིན་གྱིས་སྤྲས་ཤིང་། དེ་ནས་མཆེད་པའི་མེ་སྟག་གི་དུམ་བུ་རེ་རེ་བླ་བྲང་དང་རེབ་གོང་བརྒྱུད་མདོ་སྨད་ཀྱི་ཡུལ་ཕྱོགས་སོ་སོར་མཆེད། (དེའི་བར་ནས་ཁམས་རྟའུ་དང་ནགས་ཆུ་སོགས་ནས་ཀྱང་གཅིག་རྗེས་གཉིས་མཐུད་ཀྱིས་མཆེད་མྱོང་།) ན་ནིང་དགྲ་བོས་ཆེད་དུ་མེར་བསྲེགས་ཀྱི་རྗེས་ནས་དེའི་མཚན་གནས་རྗེས་འབྲེལ་ཚང་མ་འཛིན་བཟུང་དང་ཁྲིམས་ཆད་བཏང་བ་མ་ཟད། ཁ་ཤས་ལ་སྲོག་ཁྲིམས་ཚུན་ཆད་བཅད་ནའང་། ཉིས་སྟོང་བཅུ་གསུམ་ཚེས་མ་ཐག་ཡང་བསྐྱར་མེ་ལྕེ་མཆེད་བྱུང་བ་འདིས། འདས་པའི་དཔའ་བོ་དཔའ་མོ་དག་གི་དགོངས་གཞི་མ་འགྲུབ་བར་དུ་ད་དུང་མུ་མཐུད་ནས་ འབར་ངེས་པ་དེ་གསལ་བཤད་གནང་གི་ཡོད།
ཡ་ཁོག་ན་སྙིང་ཡོད་པ་ཞིག་ཡིན་ཚེ་བསམ་བློ་ཐོངས་དང་། དཔའ་བོ་འདི་དག་གི་བློས་གཏོང་ཆེན་པོ་འདི་ཧ་ལས་པ་དང་ཧོན་འཐོར་བ་ཞིག་མ་རེད་དམ། དེའི་ཕྱིར་བདག་གིས་དེ་རིང་ལོ་རྒྱུས་གསེར་ཡིག་གིས་འབྲི་འོས་ཤིང་རྗེས་དྲན་གསེར་སྡོང་བཞེངས་འོས་པའི་དཔའ་བོ་དཔའ་མོ་འདི་དག་གི་བྱས་པ་ཆུད་ཟོས་སུ་མི་འགྲོ་བའི་སླད་དུ་མ་འོངས་བོད་ཀྱི་ལོ་རྒྱུས་དེབ་ཐེར་གྱི་ཁྲོད་དུ་ཇི་ལྟར་འགོད་འོས་མིན་སྐོར་ནས་བསམ་ཚུལ་ཐུང་ངུ་འདི་ཕུལ་བ་ཡིན། འདི་དག་གི་བཀའ་དྲིན་གྱིས་ད་ལྟའི་བོད་ཀྱི་གནས་བབ་འདི་རྒྱལ་སྤྱིའི་སྒང་ན་ཚད་ཇེ་མཐོར་འགྲོ་ཡི་ཡོད་པ་མ་ཚད། བོད་རང་གི་མཐུན་སྒྲིལ་དང་འཐབ་རྩོད་ཀྱི་རྣམ་པ་ལ་ཡང་ཚད་ཇེ་མཐོར་འགྲོ་ཡི་ཡོད། བདག་གི་ཚོད་དཔག་ནོར་མེད་ན། ད་དུང་བོད་ནང་གི་སྐྱེས་མཆོག་དག་གིས་རང་ཉིད་ཀྱི་ལུས་ལ་སྣུམ་བྱུགས་ནས་མེ་རུ་སྦར་ཏེ་ས་ཡ་དྲུག་གི་མངོན་འདོད་འགྲུབ་པར་རམ་འདེགས་དང་སྡུག་བསྔལ་སེལ་བར་དཀའ་ལས་རྒྱག་རྒྱུ་ཡིན་པ་གདོན་མི་ཟ་བས་ན། རང་གི་རིགས་ལ་ཞེན་པ་དཀར་བའི་རྒྱ་ཆེའི་མི་མང་གིས་དོ་སྣང་དང་གདུང་སེམས་མཉམ་སྐྱེད་གནང་བའི་རེ་བ་དང་བཅས།
ཕྱི་ལོ་ ༢༠༡༣ ཟླ་ ༢ ཚེས་ ༡༦ ལ་བྲིས།
ཨ་ཆེན་ཁ་བ། — གཞས་ཚིག་ཏུ་བྲིས།
སྲོང་བཙན་སྒམ་པོ་ཡི་ཆོས་འཁོར་ཟབ་མོ། ཨ་ཆེན་གྱི་ཁ་བ་དང་འགྲོགས་ཏེ། མདོ་ལ་རིང་མོའི་རི་རྒྱུད་དུ་བབས་དུས། དཀར་འཇམ་ཡུག་གཅིག་གི་ཆོས་ཀྱི་བདག་པོ་ཡིན།
གསུང་རབ་ཀྱི་ཆོས་གཙིགས་ས་ལ་བརྡབས་པའི་དུས་ཁ་སང་། དད་བརྩོན་གྱི་ཕ་ཁྱིམ་ལ། བསྟན་རྩ་ཡི་མེ་རོ་གསོ་མཁན། མདོ་ཁམས་པ། ངའི་ཕ་ཡུལ་ལགས།
ཁྲི་སྲོང་ལྡེ་བཙན་གྱི་བཀའ་དབང་གཉན་པོ། ཨ་ཆེན་གྱི་གངས་རྩེ་ནས་མཆེད་དེ། མདོ་ལ་རིང་མོའི་རི་རྒྱུད་དུ་བསྒྲགས་དུས། བཙན་པོའི་བློ་འགེལ་གྱི་ལྕགས་རི་བརྟན་པོ་ཡིན། ལོ་རྒྱུས་ཀྱི་ཀི་སྒྲ་རླུང་གིས་ཁུར་བའི་དུས་དེ་རིང་། གདོང་དམར་བའི་ས་ཞིང་ལ། ང་རྒྱལ་གྱི་སོན་རྩ་འདེབས་མཁན། མདོ་ཁམས་པ། ངའི་ཕ་ཡུལ་ལགས།
མངའ་བདག་ཁྲི་རལ་གྱི་ཐུགས་རྒྱ་ཡངས་མོ། ཨ་ཆེན་གྱི་ཆར་ཆུ་ཡིས་དྲངས་ཏེ། མདོ་ལ་རིང་མོའི་རི་རྒྱུད་དུ་འཁྱིལ་དུས། མཐུན་སྒྲིལ་གཡུང་དྲུང་གི་ཕྱག་རྒྱ་དམ་པོ་ཡིན། དྲག་དམག་གི་སོ་ཁ་ཤུགས་ཀྱིས་གདེང་བའི་དུས་སང་ཉིན། ཤ་འཁོན་གྱི་གཤིན་ཐང་ལ། རྒྱལ་ཁ་ཡི་དཔའ་དར་ཕྱར་མཁན། མདོ་ཁམས་པ། ངའི་ཕ་ཡུལ་ལགས།
༢༠༡༢/༤/༡༣ཉིན་རྡ་རམ་ས་ལར་གཙང་ཞོལ་བདེ་གསལ་གྱིས།