འཚོ་གནས་དང་བསམ་བློ།

གཉན་པོ།

མིའི་རིགས་ནི་འགྲོ་བ་སེམས་ཅན་ཡོད་རྒུ་ལས་འཚོ་གནས་རྩོད་སྒྲུབ་བྱེད་པར་གཞན་ལས་ཁྱད་པར་དུ་འཕགས་པ་ཞིག་ཡིན་པ་རེད། ལྐོག་གྱུར་ལྷ་ཀླུ་སོགས་ངར་རབ་དང་རྒྱན་ཚུལ་མ་བཤད།  བདག་གིས་མིག་མཐོང་མངོན་འགྱུར་གྱི་དོན་དག་ལས་གཞན་གླེང་རྩིས་མེད། འཚོ་གནས་ཞེས་པ་ནི་མི་ཞིག་འཇིག་རྟེན་འདི་ནས་འཚོ་ཞིང་གནས་ལ།    དེ་ཡི་ཆེད་དུ་ཇི་ལྟར་རྩོད་སྒྲུབ་བགྱི་བའི་ཚུལ་ལ་ཟེར་བ་རེད། དུས་རབས་འདི་ནི་འཚོ་གནས་འགྲན་རྩོད་ཆེ་ཞིང་།     འཇིག་རྟེན་འཕེལ་རྒྱས་མགྱོགས་པའི་སྐབས་ཤིག་ཡིན་པ་བརྡ་འཕྲིན་དང་འཕྲུལ་རིགས་ཁོ་ནས་ཀྱང་མཚོན་པ་རེད།    དེ་ཡང་རྒྱལ་རྒྱུད་རིང་ལུགས་དང་སྒེར་གཅོད་པ་མང་བོའི་ལས་སྐལ་ཁད་ཀྱིས་རྫོགས་ཏེ་འཇིག་རྟེན་འདི་ཡིས་རང་གི་ངོ་གདོང་ལ་ལྟ་ཤེས་ཤིང་། མིག་ལྡན་འགྲོ་བ་དག་གིས་དམངས་གཙོ་དང་། འགྲོ་མིའི་ཐོབ་ཐང་སོགས་ཀྱི་སྐད་སྒྲ་གླིང་ལ་བསྒྲགས་ཏེ་འཛམ་གླིང་དཔལ་ཡོན་གྱི་ཕྱོགས་སུ་འགྲོ་བར་གྲ་སྒྲིག་སྟ་གོན་བགྱི་བཞིན་འདུག  

     ཡིན་ན་ཡང་། རྒྱལ་ཁབ་རེ་རེ་དང་།  མི་རིགས་རེ་རེ།  ཡང་ན་མི་སྒེར་རེ་རེར་མཚོན་ན་སོ་སོའི་གཙོ་རྒྱུག་རིག་གནས་མི་འདྲ་བ་དང་།  འཚོ་བའི་གནས་བབ་མི་འདྲ་བ།  མཛེས་དཔྱོད་ཀྱི་བསམ་བློ་དང་འཇིག་རྟེན་གྱི་ལྟ་ཚུལ་བཅས་མི་མཚུངས་པས་ན་ཁོ་ཚོས་འཚོ་གནས་དོན་གཉེར་བྱེད་སྟངས་ཀྱང་འདྲ་མིན་སྣ་ཚོགས་ཤིག་འབྱུང་གིན་ཡོད་པ་དངོས་ཚུལ་རེད།   བྱ་བ་གང་ཞིག་སྒྲུབ་རུང་།  དེ་ལ་རྒྱུས་མངའ་ཡོད་ཅིང་གནས་ཚུལ་ཤེས་མཁན་དག་གིས་ལས་དེ་སྒྲུབ་པར་གཞན་དང་བསྡུར་ན་དཀའ་ལས་ཆེན་པོ་མེད་པ་འདྲ།  དེ་བས་འགྲོ་བ་མིའི་རིགས་ལ་མཚོན་ན་འཚོ་གནས་གཉེར་བའམ་འཚོ་བ་ཇི་ལྟར་ཕུན་སུམ་ཚོགས་པོ་ཞིག་ཡོང་བའི་ཆེད་དུ་འཚོ་བའི་ཐད་ནས་ཤེས་རྟོགས་མང་བོ་ཞིག་ཡོད་དགོས་པར་མ་ཟད།  འཚོ་བ་ཞེས་པ་འདི་ལ་ངོས་འཛིན་དང་ལྟ་སྟངས་ཡང་དག་པ་ཞིག་དགོས་པ་རེད།   ད་དུང་འཚོ་གནས་ཀྱི་དོན་སྙིང་དང་རིན་ཐང་ཐད་ལ་མཐོང་སྣང་ལེགས་པོ་ཞིག་ཡོད་ན། དགའ་སྐྱོ་ཆགས་སྡང་གིས་གྲུབ་པའི་མི་ཞིག་གི་འཚོ་གནས་ལ་ངེས་པར་དུ་འགྱུར་ལྡོག་གསར་བ་འབྱུང་ངེས།

འཚོ་གནས་ལེགས་པོ་ཞིག་ཡོང་དགོས་ན།  མི་དེ་ལ་བསམ་བློའི་སྤུས་ཚད་ལེགས་པོ་ཞིག་ཡོད་དགོས་པ་རེད།       ཅིས་ཕྱིར་ཟེར་ན།  འཚོ་གནས་ནི་འགྲོ་མིའི་བདེ་སྐྱིད་ཀྱི་ས་བོན་འདེབས་སའི་གཤིན་ས་ཡིན་ཞིང་།   མི་སུ་ཡིན་རུང་བསམ་བློ་ཡག་པོ་ཞིག་མེད་ཚེ་འཚོ་གནས་ཀྱི་དོན་སྙིང་ངོས་ཟིན་དཀའ་བ་རེད།  དེ་བས་བདག་འདྲ་བས་བལྟས་ན་བསམ་བློ་ནི་ཡོད་ཚད་རེད་ལ། བསམ་བློ་ནི་འཚོ་གནས་རྩོད་སྒྲུབ་ཀྱི་གཙོ་བོ་རེད། འུ་ཚོས་ཤེས་བྱ་ཡོན་ཏན་མང་བོ་ཞིག་སྦྱང་བའི་དགོས་པ་ཡང་རགས་བཤད་རྒྱབ་ན་འཚོ་གནས་དང་བསམ་བློའི་ཆེད་དུ་མ་རེད་དམ། འོན་ཏེ།  འུ་ཚོའི་ལོ་རྒྱུས་སུ་ཕྱི་མིག་འཕངས་ན་འཚོ་བ་ནི་སྐྱོ་གར་འབའ་ཞིག་རེད་ཅིང་། དངོས་གནས“དུག་སྦྲུལ་གྱི་ཚང”དུ་བཟོས་ཡོད་པ་རེད།  

  གོང་དུ་གླེང་བ་བཞིན་འཚོ་གནས་ཀྱི་ལེགས་ཉེས་ནི་མི་རང་རང་གི་རིག་གནས་དང་གནས་བབ་ལ་འབྲེལ་བ་ངེས་ཅན་ཡོད་པ་རེད།  བོད་རང་གི་རིག་གནས་བང་མཛོད་ཁྲོད་དུ་ཡང་མིའི་རིགས་ལ་འཚོ་བ་རོལ་བྱེད་ཀྱི་རིག་གནས་ཡོད་པ་རེད།   ཡིན་ན་ཡང་།  འཚོ་བ་ལ་ངོས་འཛིན་བྱེད་སྟངས་དང་།  འཚོ་གནས་ཀྱི་དོན་སྙིང་ལ་ལྟ་སྟངས་གཞན་དང་མི་འདྲ་ས་མང་རྒྱུ་རེད།  འུ་ཚོ་ཕལ་མོ་ཆེའི་སེམས་ནས་མི་ཚེ་འདི་གཅིག་པུའི་བདེ་སྐྱིད་དང་འཚོ་བ་ནི་དེ་འདྲའི་དོན་སྙིང་ཅན་ཞིག་ཏུ་མི་བསམ།  འཇིག་རྟེན་འདིའི་བདེ་སྡུག་ནི་ལྟར་སྣང་དང་ཡུན་བརྟན་མིན་པ།  འགྱུར་སླ་ཞིང་ཤོར་སྐྱེན་པ་བཅས་ཡིན་ཚང་། གཏན་གྱི་བདེ་བ་དང་།  ཡང་ན་ཐར་བའི་གོ་འཕང་། དེ་མིན་ཚེ་ཚེ་རབས་རབས་ཀྱི་བསམ་པའི་འཚོལ་སྙེག་སོགས་ལ་བསྡུར་ཚེ་སྔ་མ་དག་དོན་དག་ཆུང་ཆུང་འབའ་ཞིག་ཡིན་པ་རེད།  

འདི་ལྟ་བུ་རྒྱང་རིང་བའི་འཇིག་རྟེན་ལྟ་ཚུལ་ཞིག་བོད་མི་ཀུན་པོར་ཡོད་མི་སྲིད་རུང་།  མི་རང་ཉིད་ཇི་ལྟར་གསོན་པའི་སྐབས་ཀྱི་འཚོ་གནས་ཙམ་ལས་ཇི་ལྟར་འཆི་བའི་རྗེས་ཀྱི་རྣམ་སྨིན་ཐད་ལ་སེམས་ཁྲལ་དང་འདང་རྒྱག་ཆེ་བའི་གཤིས་དེ་སྒང་ཚང་གི་སྐྱེ་བོ་རེ་རེར་ཁྱབ་མཉམ་དུ་ཡོད་ཨང་། དེ་བས་འུ་ཚོ་ནི་ཁ་ནས་མ་ཎི་མི་འདོར་ལ།  ལག་ནས་ཕྲེང་ཀོག་མི་གཏོང་བའི་མི་སྡེ་དམིགས་བསལ་བ་དེ་ཡིན་ཞིང་།  ཁོམ་དུས་ཕྱག་འཚལ་ཞིང་དལ་དུས་སྐོར་བར་འགྲོ་དགོས་པའི་རིགས་གཅིག་པུ་དེ་ཡང་ལོས་ཡིན་འདོད།  དེང་གི་སྐབས་སུ་ཤར་ནུབ་རིག་གནས་ཀྱི་ཚ་རླབས་དང་འཇིག་རྟེན་འཕེལ་འགྱུར་གྱི་སྒུལ་ཤུགས་ཀྱིས་འུ་ཚོ་འགའ་ཞིག་གི་འཚོ་གནས་ཀྱི“རིགས” སད་ཀྱི་ཡོད་ན་མ་གཏོགས་འུ་ཚང་ཁྱོན་ཡོངས་ནས་དེ་དང་འདྲ་བོ་འདྲ་བོ་རེད། 

འཚོ་གནས་རིག་པ་ཟེར་བ་ཞིག་ཡོད་རུང་མེད་རུང་།  རིག་གནས་མང་བོ་ཞིག་ནི་དོན་གྱིས་མི་ཡི་འཚོ་གནས་ལ་ཉེར་བར་འབྲེལ་བའི་ཤེས་བྱ་རྐྱང་ཡིན་པ་རེད།  འདི་ཡི་ཐད་ནས་ནུབ་ཕྱོགས་པ་ཚོར་རིག་གནས་ཕུན་སུམ་ཚོགས་པོ་རེད་ཅེས་ན་ཐལ་ཆ་མེད་པར་སྙམ།  ཆེ་བ་རྒྱལ་ཁབ་སྐྱོང་ལུགས་ནས། མི་རིགས་དར་ཚུལ།  ཡང་ན་མི་སྒེར་རེ་རེའི་འཚོ་བ་དང་ཆགས་འཇིག་བདེ་སྡུག་བཅས་ནི་ཁོ་ཚོའི་རིག་གནས་སུ་ཤིན་ཏུ་གལ་ཆེན་ཡིན་པར་མ་ཟད།       འདི་དག་གི་ཆེད་དུ་གསར་གཏོད་བྱས་ཤིང་གསར་བརྗེ་བསླངས།  ཞིབ་འཇུག་བགྱིས་ཤིང་དཔྱད་བསྡུར་གནང་སྟེ་ལོ་ཡི་འཕྲེང་རིང་རྒྱུད་ནས་ཡོང་ཡོད་པ་རེད།  འདི་ཡི་ཐད་ནས་ཁོང་ཚོར་བྱས་པ་བགྲང་དུ་རུང་བ་ཡིན་ཏེ།  དེང་གི་དུས་འདིར་ནུབ་ཕྱོགས་པའི་འཇིག་རྟེན་དཔལ་ཡོན་གྱི་རྨང་རྡོ་ཚན་རྩལ་རིག་གནས་དང་། ཤར་ཕྱོགས་པའི་ཚེ་སྲོག་སེམས་ཁམས་ཀྱི་བླ་སྲོག་ཐུབ་བསྟན་རིག་གནས་གཉིས་པོ་ནི་སྲིད་ན་མངོན་པར་མཐོ་བའི་མིའི་རིགས་ཀྱི་ལོངས་སྤྱོད་ཉག་ཅིག་ཏུ་ལྟ་བ་རེད། 

འོན་ཀྱང་།  འུ་ཚང་གི་སྨྱོན་པ་སྐོར་ཞིག་གིས་ང་ཚོ་རབས་གསར་བ་འདི་ཤར་དང་ནུབ་ཀྱི་གད་སྙིགས་ཁོ་ན་འཐུ་བའི་བྱེད་པོར་འགྱུར་ཀྱིན་འདུག་ཅེས་གཟུ་ལམ་གྱི་གཏམ་སྨྲ་བར་ཡོད་མོད།  ང་ཚོ་འཇིག་རྟེན་སྲིད་ལུགས་ཀྱི་མཚོན་རྟགས་དམངས་གཙོ་དང་།  མི་སྡེ་འདྲ་མཉམ།  འགྲོ་བ་མིའི་ཐོབ་ཐང་དང་ཆོས་དད་རང་དབང་སོགས་ཀྱིས་མཚོན་པའི་མི་སྡེ་སྤྱི་ཚོགས་ལ་ངེས་པར་མཁོ་ཞིང་།  འཇིག་རྟེན་འཚོ་གནས་ཐད་མེད་ཐབས་བྲལ་བའི་རིག་གནས་དག་ལ་འགྲམ་ཆུ་ལྡིང་གིན་ཡོད་པ་ལས་ཅི་ཞིག་རྒྱུ་མཚན་མེད་པར་གཏོར་རྒྱུ་དང་།  གང་དག་གནས་ལུགས་མེད་པར་སྣུབ་རྒྱུར་དགའ་སོང་བ་ནི་གཏན་ནས་ཡིན་མི་སྲིད།  ཀུན་ལ་བཤད་སྲོལ་ཡོད་པ་བཞིན།  རིག་གནས་གང་ཞིག་ཡིན་རུང་མི་ཡིས་སྐྲུན་པ་ཡིན་ངེས་པས་དེ་ལ་བཅོས་བསྒྱུར་གདམས་གསེས་བྱེད་རྒྱུ་ནི་མི་ཡི་འོས་འགན་ཞིག་ཅི་ལ་མིན་ཨང་། 

དེང་སང་འུ་ཚོའི་སྤྱི་ཚོགས་འདི་རུ་བགྲོ་གླེང་གྲོས་བསྡུར་ཅི་ཞིག་བྱས་རུང་།  མང་ཆེ་བས་ནི་དོན་དག་འགའ་ཞིག་བསྐྱར་ཟློས་ཡང་ཟློས་བྱས་ནས་བསྡད་ཡོད་པ་རེད།  ཡང་ན་ཆབ་སྲིད་མ་ཡིན་པའི་ཆབ་སྲིད་དང་ཚོགས་པ་ཁག་གི་ལངས་ཕྱོགས་ཟེར་བ་ཞིག་གླེང་གི་རེད།   དེ་དག་གླེང་བར་དགེ་མཚན་གཏན་ནས་མེད་པ་དེ་འདྲ་ཡིན་མི་སྲིད་མོད།  འུ་ཚོས་མི་ཆོས་བསམ་བློ་དང་།  རིག་གནས་ཁ་ཕྱོགས།  ཤེས་ཡོན་སློབ་གསོ། འཚོ་བའི་དགའ་སྣང་སོགས་ནི་ཕལ་བར་བཞག་སྟེ་ཡལ་བར་འདོར་གྱིན་ཡོད།  འདི་དག་གི་ཆེད་དུ་བགྲོ་གླེང་སྦྱང་བཤད་བགྱིས་ན་ཅིས་མི་ཆོག་གམ། ཉན་མཁན་མེད་རུང་ངས་སྔོན་ཆད་ནས་གླེང་མྱོང་། ད་ནི་ང་ཚོས་འུ་ཚོ་མི་རེ་རེ་ཡི་འཇིག་རྟེན་བསམ་བློ་དང་སྤྱི་ཚོགས་འགན་འཁྲི།  འཚོ་བའི་གོ་རྟོགས་བཅས་ཡར་རྒྱས་གོང་འཕེལ་དུ་གཏོང་བའི་སློབ་གསོ་ཞིག་ལ་རེ་སྙེག་བྱེད་དགོས་ཀྱིན་འདུག  བསམ་བློ་དང་ཤེས་ཡོན།  དཔལ་འབྱོར་སོགས་ཀྱིས་ཀུན་ནས་འཕུང་བའི་མི་རིགས་ཤིག་གིས་དུས་ཀྱི་འགྲན་རྩོད་དྲག་པོའི་ཁྲོད་ནས་ཅི་ཞིག་སྒྲུབ་ཐུབ་བམ།

བོད་མི་རིགས་ལ་མཚོན་ན་འཚོ་གནས་རྩོད་སྒྲུབ་ཀྱི་བསམ་བློའི་འདུ་ཤེས་ཞན་པ་དང་།  འཇིག་རྟེན་རིག་གནས་ཀྱི་དཔལ་ཡོན་ཡོངས་དར་བྱས་མེད་པས།  ང་ཚོས་ད་དུང་སུ་ཞིག་སྐྱབས་སུ་འབོད་ཀྱིན་ཡོད་པ་རེད།  གང་དག་གི་ལོངས་སྤྱོད་ལ་སྒུག་ནས་བསྡད་ཡོད་པ་རེད།  ད་དུང་འུ་ཚོར་འཇིག་རྟེན་མི་ཆོས་རིག་གནས་ཀྱི་བསམ་བློའི་འདུ་ཤེས་ལེགས་པོ་ཞིག་སྐྲུན་ཐུབ་མེད་པས་ན། ང་ཚོ་མི་ཡི་སྒེར་ཚུགས་ཀྱི་སྟེང་ནས་ལངས་ཐུབ་ཀྱིན་མེད་པ་རེད།       དེ་བས་ང་ཚོའི་མིག་ལམ་དུ་འཇིག་རྟེན་པ་ཞིག་གི་ཁྱད་ཆོས་ལས་ཆོས་པ་ཞིག་གི་ཁྱད་ཆོས་མཐོང་ན་གུས་སྨོན་སྐྱེ་བཞིན་ཡོད་པ་རེད།  འདི་ནི་འུ་ཚོའི་ཤེས་ཡོན་པར་ཁས་འཆས་པ་དེ་ཚོའི་བསམ་བློའི་འདུ་ཤེས་ཀྱི་ངོས་སུ་ཡང་ཡོད་པ་རེད།      

འུ་ཚོ་བོད་མི་རིགས་ཀྱང་འཛམ་གླིང་མི་རིགས་གཞན་དག་དང་དཔུང་བ་མཉམ་གཤིབ་བྱས་ནས་འགྲོ་དགོས་པ་རེད།  འཚོ་བའི་འཕེལ་ཤུགས་དང་དུས་རབས་ཀྱི་འགྱུར་འགྲོས་ལ་བསྟུན་ནས་འགྲོ་དགོས་པ་རེད།  དེ་དག་ལ་བསམ་ན་མི་ཆོས་རིག་གནས་དང་།  འཚོ་གནས་ཐད་ཀྱི་གོ་རྟོགས། ཤེས་ཡོན་སློབ་གསོ།   དཔལ་ཡོན་དང་སྲིད་ལུགས་སོགས་ལ་འུ་ཚོའི་སྤྱི་ཚོགས་ཁྱོན་ཡོངས་ཀྱིས་རྩོད་ལེན་བྱེད་རྒྱུ་དེ་དོན་ཆེན་ནང་གི་འགངས་ཆེན་རེད།               ང་ཚོ་ནམ་ཡང་རྨོངས་དད་ཅན་དང་བྲན་འབངས་བྱས་ནས་སྡོད་ཐབས་མེད་པ་རེད།  འདི་འདྲའི་གནད་འགག་མང་བོ་ཞིག་བདོག་པའི་ཆ་ནས་གསར་གཏོད་དང་།  ཆིག་སྒྲིལ།  རང་མགོ་རང་ཐོན་བཅས་ཀྱི་ལམ་ཡང་སྟོན་བཞིན་པ་དེ་ལྟར་རེད།  དེ་བས་ད་ནི་ང་ཚོའི་ལས་འགན་ཆེན་པོ་ཞིག་ནི་མི་རང་རང་གི་ངོས་ནས་སམ།  ཡང་ན་འུ་ཚོའི་སྤྱི་ཚོགས་འདིས་མི་ཆོས་རིག་གནས་ཀྱི་བསམ་བློ་འཚོལ་རྙེད་བྱེད་རྒྱུ་དེ་རེད་ཅིང་།  འཚོ་གནས་དཔལ་ཡོན་དང་ལྟ་བ་མཉམ་གནས་བཅས་ཀྱི་ཕྱོགས་སུ་གོམ་པ་རིམ་སྤོ་བྱེད་རྒྱུ་དེ་རེད།

མི་རིགས་མང་བོའི་བར་དུ་འཚོ་གནས་དང་བསམ་བློའི་ཁྱད་པར་ཆེན་པོ་ཤོར་སོང་བའི་རྐྱེན་གྱིས། ཤར་དང་ནུབ་ཀྱི་མི་སྡེ་སོ་སོའི་འཚོ་བའི་གནས་བབ་དང་འཇིག་རྟེན་དར་ལུགས་མ་འདྲ་བ་རེད་ལ། དེང་གི་ཆར་ནུབ་ཀྱི་མགོ་སེར་མང་བོས་ཆབ་དཔལ་རིག་གསུམ་གྱི་ངོས་ཐད་ནས་འཛམ་གླིང་གི་ཡུལ་གྲུ་མང་བོེར་རོགས་དན་མཛད་དེ།    འགྲོ་བ་མིའི་ཐོབ་ཐང་ཞེས་པ་དང་།   དམངས་ཀྱི་སྲིད་དབང་ཞེས་པ། ལྟ་བ་མཉམ་གནས་ཞེས་པ་སོགས་མི་སྡེ་སྤྱི་ཚོགས་སུ་དགོས་གལ་ཆེ་བའི་རིག་གནས་དག་དར་སྤེལ་ཆེད་བརྟུན་པ་གནང་གིན་ཡོད། དེ་བས་མགོ་སེར་ཚོས་རྒྱལ་ཁབ་གཞན་གྱི་དོན་དག་ཁོ་ཚོས་རོགས་འདེགས་བཀོད་འདོམས་བྱས་ཏེ་སྒྲུབ་ཀྱིན་པ་མང་ལ། འུ་ཚོའི་མཐོ་དམའ་བར་གསུམ་གྱི་མི་མང་བོ་ཞིག་གིས་ཀྱང་མགོ་སེར་ཚོའི་གཞིས་ཁྱིམ་སྙེག་ཏེ་དགའ་དགའ་དུངས་དུངས་ཀྱིས་ཕེབས་བཞིན་ཡོད།

བོད་མིའི་སྤྱི་ཚོགས་འདི་ནི་གནའ་ནས་ད་བར་སེར་མོ་བ་དང་ཆོས་ལུགས་པ་འབའ་ཞིག་གིས་དབང་བསྒྱུར་བྱས་ཏེ་ཡོང་བ་འུ་ཚོ་རང་རང་གི་སེམས་སུ་ཡོད་ལེ་ཆེ། སངས་རྒྱས་ཀྱི་གསུང་རབ་ལ་ཐོས་བསམ་སློབ་སྦྱོང་བྱེད་པ་དང་།   ཐུབ་པའི་བསྟན་པ་དར་སྤེལ་རྒྱས་གསུམ་གནང་བ་འུ་ཚོ་ལས་ལྷག་ཅིག་མེད་པས།  དེའི་ངོས་ནས་མི་རིགས་འདི་ལ་བྱས་པ་ཡོད་པ་གསལ་བོ་རེད། འོན་ཀྱང་འུ་ཚོར་མཚོན་ན་འཚོ་གནས་བསམ་བློ་དང་མི་ཆོས་རིག་གནས་ཀྱིས་ཤིན་ཏུ་འཕུང་ནས་ཡོད་པར་མ་ཟད།  འཛམ་གླིང་གི་འཕེལ་ཤུགས་དང་།  དུས་རབས་ཀྱི་འགྱུར་འགྲོས་ལ་ཞིབ་ཏུ་གཞིག་ནས་བསམ་ན།  ང་ཚོ་ད་དུང་གང་ཞིག་ན་དལ་ལྷོད་དང་ཧད་འཐོམ་གྱི་ངང་དུ་ལུས་ཡོད་པ་རེད།     

ཉེ་སྔོན་ཕྲན་གྱིས་རྒན་པ་སྐོར་ཞིག་ལ་ཁ་བརྡ་བྱས་པ་ཡིན།  ཁོང་རྣམས་ཀྱིས་གསུང་ན།  འུ་ཚོའི་གཞོན་སྐྱེས་ཚོར་ཨ་གསར་ཆེ་བ་མང་དྲགས་འདུག   དེང་སང་རྩོམ་ཡིག་མང་བོ་ཞིག་ཏུ་ལུང་དང་ཁུངས་ཤིག་འདྲེན་ཚེ་ཡང་ནུབ་ཕྱོགས་པའི་བཤད་སྲོལ་ཞིག་དྲུད་ནས་ཡོང་གི་ཟེར།   ངས་བལྟས་ན་དེ་ཨ་གསར་ཙམ་མ་ཡིན་པར། རབས་གསར་བ་འདིའི་སེམས་སུ་འཚོ་གནས་འདུ་ཤེས་དང་འཇིག་རྟེན་པའི་རིག་གནས་ལ་སྔོན་མ་ལས་ཅུང་གོ་ས་ཆེ་བ་ཡོད་སོང་བ་རེད།  ཁོ་ཚོས་འཚོ་གནས་བསམ་བློའི་སྐོར་ནས་དོན་དག་ཅིག་གླེང་དགོས་སྐབས། ནུབ་ཕྱོགས་པའི་གཙོ་རྒྱུག་རིག་གནས་སམ།   མི་ཆོས་རིག་གནས་ཀྱི་བདག་པོ་དང་འཚོ་གནས་སྨྲ་བ་ཚོའི་སྲོག་ཤིང་དག་གི་གསུང་དང་རིན་ཐང་ཁྱེར་ནས་ལོས་ཡོང་།  དེ་མ་གཏོགས་འཚོ་གནས་ཀྱི་དོན་སྙིང་གླེང་སྐབས། ཡང་ན་མི་ཆོས་ཀྱི་གནད་འགག་བཤད་དུས།   འཁོར་བ་དུག་སྦྲུལ་གྱི་ཚང་ལྟ་བུ་ཡིན་ཚུལ་དང་། འཁོར་བ་ཁབ་ཀྱི་རྩེ་མོ་ན།  བདེ་བ་ནམ་ཡང་ཡོད་མ་ཡིན།།  སོགས་བཤད་ན་ག་འདྲ་ཡོང་ངམ། 

                                                                                            ༢༠༡༣  ། ༠༣ ། ༠༣ ལ་གྲུབ།