ཁ་སང་ཕྱི་ཚེས་ ༡༠ ཉིན་འཛམ་གླིང་ཡུལ་གྲུ་གང་སར་གནས་སྡོད་བོད་མི་ཚོས། ༡༩༥༩ ལོར་རྒྱལ་ས་ལྷ་སར་བོད་མིའི་ཞི་བའི་སྒེར་ལངས་བྱས་ཏེ་མི་ལོ་ ༥༤ འཁོར་བའི་དུས་དྲན་དང་རྒྱལ་གཅེས་དཔའ་བོ་དཔའ་མོའི་ཉིན་མོ་སྲུང་གཙི་གནང་ཡོད་པ་ལྟར། ཁ་སང་སྔ་དྲོའི་ཆུ་ཚོད་ ༡༡།༠༠ སྟེང་སྦེལ་ཇེམ་རྒྱལ་ས་སྦེལ་སེལ་རུ་བོད་མིའི་སྒྲིག་འཛུགས་ཕྱི་དྲིལ་བཀའ་བློན་བདེ་སྐྱིད་ཆོས་དབྱིངས་མཆོག་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་མཆོག བཀའ་ཟུར་ཀིརྟི་རིན་པོ་ཆེ་མཆོག ཡུ་རོབ་དམིགས་བསལ་སྐུ་ཚབ་སྐལ་བཟང་རྒྱལ་མཚན་མཆོག་བཅས་གཙོས། ཡུ་རོབ་རྒྱལ་ཁབ་ ༡༣ ཙམ་ནས་ཕེབས་པའི་བོད་མི་དང་བོད་དོན་རྒྱབ་སྐྱོར་བ་བཅས་མི་ ༥༠༠༠ ལྷག་རྒྱལ་སྦེལ་སེལ་བྱང་ཕྱོགས་ཀྱི་མེ་འཁོར་ས་ཚིགས་གྷི་རེ་ཊོ་ནོ་ཌི་ (Gare du Nord) ཉེ་འཁྲིས་སུ་འདུ་འཛོམས་གནང་ཡོད་པ་མ་ཟད། ཕྱི་དྲིལ་བཀའ་བློན་དང་སྤྱི་འཐུས་ཚོགས་གཙོ་རྣམ་གཉིས་གཙོས་པའི་གནད་ཡོད་མི་སྣས་སྣེ་འཁྲིད་འོག དུས་ཡུན་ཆུ་ཚོད་ ༢ ཙམ་གྱི་རིང་སྦེལ་སེལ་གྲོང་ཁྱེར་དབུས་ཀྱི་ཐང་ཆེན་ (Le Mont des Art) བར་གོམ་བགྲོད་གནང་ཡོད་འདུག
དངོས་གཞིའི་མཛད་སྒོའི་ཐོག་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་མོའི་རྒྱལ་གླུ་དང་བདེན་ཚིག་སྨོན་ལམ་གྱེར་འདོན། བོད་བསྟན་སྲིད་ཆེད་རང་སྲོག་རང་སྲོག་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་སྐར་མ་གཉིས་རིང་ངག་བཅད་མྱ་ངན་བཅས་གནང་རྗེས། སྦེལ་སིལ་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་གསུམ་དུས་ཐེངས་ ༥༤ པའི་བཀའ་ཤག་གི་གསུང་འཕྲིན་སྒྲོགས་སྦྱོང་དང་། སྦེལ་ཇེམ་ཧྥུ་ལ་མི་ཞི་མངའ་སྡེ་གྲོས་ཚོགས་འཐུས་མི་མེར་ཁི་ཧེན་ཊེར་ཁི་སི (Marc Hendrickx) དང་སྤྱིི་འཐུས་ཚོགས་གཙོ་སྤེན་པ་ཚེ་རིང་མཆོག ཡུ་རོབ་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་ཚོགས་ཆུང་གི་ཚོགས་གཙོ་སྐུ་ཞབས་ཐོ་མ་སི་མན་ (Thomas Mann)། རྒྱལ་སྤྱིའི་བོད་དོན་ལས་འགུལ་ཁང་སྦེལ་སིལ་ཡན་ལག་ལས་ཁང་གི་འགན་འཛིན་སྐུ་ཞབས་ཝེ་སེན་ཁྲི་མེལ་ཁྲིན་ (Vincent Metten)། དབུས་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་བདེ་སྐྱིད་ཆོས་དབྱིངས། ཡོ་རོབ་དཔལ་འབྱོར་དང་སྤྱི་ཚོགས་ལས་དོན་ཚོགས་ཆུང་གི་འཐུས་མི་སྐུ་ཞབསཧེན་རེ་མེལ་ལོ་སི ་(Henri Malosse) བཅས་རིམ་པས་བོད་དོན་གཏམ་བཤད་གནང་བ་དང་། གཞས་མ་གྲགས་ཅན་རྣམ་རྒྱལ་ལྷ་མོ་དང་གཞས་བ་སྣེ་ལུང་ཚེ་རིང་སྟོབས་ལྡན། གཞས་མ་གཏམ་གཏོང་མཁན་གྲགས་ཅན་ཀརྨ་ཨེ་ཆིས་བཅས་ཀྱིས་གླུ་གཞས་བཏང་ཡོད་འདུག
དེའི་རྗེས་རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་འགན་འཛིན་ཚེ་རིང་བྱམས་པ་ལགས་ཀྱིས་གཙོ་སྐྱོང་འོག བཀའ་ཟུར་ཀིརྟི་རིན་པོ་ཆེ་མཆོག་དང་། ཡུ་རོབ་གྲོས་ཚོགས་འཐུས་མི་ (Leonidas Donski)། རྒྱ་རིགས་རྩོམ་པ་པོ་དང་སྒྱུ་རྩལ་བ་མོ་ནྰ་ཐང་། ཡུ་རོབ་དམིགས་བསལ་སྐུ་ཚབ་སྐལ་བཟང་རྒྱལ་མཚན། རྒྱལ་སྤྱིའི་གྲོས་ཚོགས་བོད་དོན་འབྲེལ་མཐུད་དྲ་བའི་ཚོགས་གཙོ་ (Matteo Mecacci)། ཡུ་རོབ་མཉམ་འབྲེལ་གྲོས་ཚོགས་ཀྱི་ཚོགས་གཙོ་གཞོན་པ་ (Edward McMillan Scott) མཆོག་གི་ཕྱག་རོགས་ (Alexanda Clark) བཅས་ཀྱིས་བོད་དོན་གཏམ་བཤད་གནང་ཡོད་པ་མ་ཟད། སྦེལ་ཇེམ་བོད་རིགས་ཚོགས་པའི་ཚོགས་གཞོན་ཆོས་རིག་ལགས་ཀྱིས་སྙན་ངག་གྱེར་འདོན་དང་། གཞས་པ་གཞས་མ་ཁག་ཅིག་གིས་ ༼མིག་ཆུ༽ དང་ ༼ང་ཡིས་སྤུན་ཟླ་འབར་བཞིན་འདུག༽ ཞེས་པའི་མྱ་ངན་གྱི་གླུ་གཞས་ཁག་ཅིག་བཏང་སྟེ་དུས་དྲན་སྲུང་གཙི་གནང་ཡོད་འདུག
