རི་ཉིལ་བྱུང་སྟེ་མི་ ༨༣ ས་འོག་ཏུ་བཅུག

རྒྱ་གཞུང་དབུས་བརྙན་འཕྲིན་ཁང་གི་གསར་འགྱུར་དྲ་སྐུད། http://www.chinatibetnews.com/shiting/2013-03/30/content_1203979.htm

རྒྱ་གཞུང་དབུས་བརྙན་འཕྲིན་ཁང་ཨང་ ༡༣ པས་བསྒྲགས་དོན། ས་ཁུལ་དེའི་མཚོ་ངོས་ལས་མཐོ་ཚད་དམའ་ཤོས་རྨིད་ ༤༠༠༠ དང་མཐོ་ཤོས་རྨིད་ ༥༣༠༠ བརྒལ་ཡོད་པ་དང་། མཁའ་དབུགས་ཁྲོད་ཀྱི་དབྱང་དབུགས་ཀྱི་འདུས་ཚད་ནང་ལོག་ས་ཁུལ་གྱི་ལྡབ་ ༤ ནས་ ༦ ལྷག་ཡིན་ལ། མཁའ་དབུགས་ཀྱི་གནས་བབ་ཧ་ཅང་ཛ་དྲག་ཡིན་སྟབས། རང་བྱུང་གནོད་འཚེ་རང་བཞིན་གྱིས་འབྱུང་སླ་བ་ཡིན། ཅེས་ས་གནས་མི་མང་དང་རྒྱལ་སྤྱིར་མགོ་གཡོགས་མགོ་སྐོར་གཏོང་ཐབས་བྱས་འདུག
ས་ཁུལ་འདིར་དེ་སྔོན་ནས་རྒྱ་གཞུང་གིས་གཏེར་ཁ་སྣ་ཚོགས་བཙན་ཤུགས་ཀྱིས་བསྔོག་འདོན་བྱས་པར་བརྟེན། ས་གནས་བོད་རིགས་མང་ཚོགས་ཀྱིས་རང་བྱུང་ཁོར་ཡུག་ལ་གཏོར་སྐྱོན་ཐེབས་བཞིན་པའི་ཐད་ནས་རྒྱ་གཞུང་ལ་ཞུ་གཏུགས་གང་མང་བྱས་ཀྱང་། རྒྱ་གཞུང་གིས་ཉན་འཇོག་རྩ་བ་ནས་མ་བྱས་པར་གང་བྱུང་གཏེར་ཁ་བསྔོག་འདོན་བྱས་ཡོད་པ་རེད། གཅིག་བྱས་ན་རྒྱ་གཞུང་གིས་ཁུལ་དེར་རི་ཁོག་བཀྲུས་ནས་གསང་བའི་དམག་གི་རྟེན་གཞི་དེ་འདྲའང་བཙུགས་ཡོད་ན་ཐང་།

རི་ཉིལ་སའི་ས་གནས། མལ་གྲོ་གུང་དཀར་རྫོང་བཀྲ་ཤིས་སྒང་ཞང་གཟུ་སྦུག་སྡེ་བའི་ཉེ་ཁུལ་གྱི་ཡང་རི་ཞེས་པ་དེ་ཁུལ་ཞིག་ཡིན་པ་འདྲ།
གཏེར་བརྐོ་མཁན་ནི་ཀྲུང་གོ་གསེར་གཏེར་བཟོ་ཚོང་ཚོགས་སྡེ་ཡི་ཁོངས་གཏོགས་དཔལ་ཐེ་ལོང་གཏེར་ལས་གསེར་སྤེལ་ཚད་ཡོད་བཟོ་ཚོང་ཁང་རྒྱ་མ་གཏེར་ཁུལ་ཡིན་འདུག
རི་ཉིལ་བའི་སའི་རྒྱ་ཁྱོན་ནི་རིང་ཚད་སྤྱི་ལེ་ ༣ དང་། རི་ཉིལ་བའི་བོངས་ཚད་ལ་རྨིད་རྒྱ་དཔང་གྲུ་བཞི་མ་ཁྲི་ ༢༠༠ ལྷག་ཡོད་པར་བཤད།
བོད་རང་སྐྱོང་ལྗོངས་ཀྱི་དམར་ཤོག་སྤྱི་ཁྱབ་དྲུང་ཆེ་ཁྲིན་ཆོན་ཀའོ་ཡིས། གནོད་སྐྱོན་ཕོག་མཁན་དག་གི་ནང་མིའི་ཐད་ཀྱི་ལས་ཀ་རྣམས་ཧ་ཅང་ཞིབ་ཚགས་པོ་དང་གཏིང་ཟབ་སྤེལ་ཏེ། ཞི་འཇམ་འོས་མཚམས་ཀྱི་སྒོ་ནས་ཐག་གཅོད་བྱས་རྗེས། བརྟན་ལྷིང་བདེ་འཇགས་ཀྱི་ལས་དོན་ཁག་ལག་བསྟར་བྱས་ཏེ། སྤྱི་ཚོགས་ཁྱོན་ཡོངས་ནས་བརྟན་ལྷིང་ཡོང་བར་འགན་སྲུང་བྱ་དགོས། ཅེས་བརྗོད་འདུག
དེ་བཞིན། ཞིས་ཅིན་ཕེན་དང་ལི་ཁི་ཆིང་། ལིག་ཡོན་ཧྲན་སོགས་གཙོས་རྒྱ་ནག་དབུས་གཞུང་གི་མགོ་ཁྲིད་དག་གིས་ཀྱང་དོ་སྣང་ཆེན་པོས་སྐད་རྒྱག་དགོས་བྱུང་འདུག་པ་མ་ཟད། བོད་རང་སྐྱོང་ལྗོངས་དམག་ཁུལ་གྱི་དམག་སྤྱི་ཡཱང་ཅིན་ཧྲན་སོགས་ཀྱིས་བྲེལ་མྱུར་གྱི་ཛ་དྲག་ཚོགས་འདུ་བསྡུས་ཏེ། རྒུད་སྐྱོབ་དང་ཉེན་སྲུང་གི་ལས་དོན་ཁག་གོ་སྒྲིག་བྱས་ཡོད་པ་མ་ཟད། དམག་སྤྱི་གཞོན་པ་ལཱིག་ཡུག་ཁྲོན་གྱིས་དམག་དཔུང་གི་སྣེ་ཁྲིད་དེ་དོན་རྐྱེན་བྱུང་ཡུལ་ས་གནས་དངོས་ལ་ཕྱིན་འདུག
གོང་གསལ་རྒྱ་གཞུང་གི་གནས་ཚུལ་སྤེལ་སྟངས་འདིར་བལྟས་ན། ས་ཁུལ་དེའི་གྲོང་སྡེ་བོད་མི་མང་པོ་ཞིག་ལ་གནོན་འཚེ་བཟོས་ཡོད་པ་མ་ཟད། གཏེར་ཁུངས་དེ་ནི་གསང་བ་དམ་པོ་བྱེད་དགོས་པའི་གནད་དོན་ཞིག་ཆགས་ལོས་ཡོད་བསམ་པ་ཞིག་འདུག