ན་གཞོན་རྩོམ་པ་པོ་ཚ་བ་མདའ་སྨྱུག་ལགས་བོར་བརླག་ཏུ་ཕྱིན་ཏེ་ད་བར་ལོ ༥ འགོར་ཡོད་ཀྱང་། ཁོང་གི་ཤི་གསོན་གནས་སྟངས་མི་སུས་ཀྱང་ཤེས་རྟོགས་མ་ཐུབ་པར་ལྷག་ཡོད།
རྩོམ་པ་པོ་ཚ་བ་མདའ་སྨྱུག་ལགས་དང་དུས་རྒྱུན་འབྲེལ་འདྲིས་ཟབ་མོ་ཡོད་མཁན་སུད་སིར་གནས་བཞིགས་ཀརྨ་རབ་གསལ་ལགས་ཀྱིས་གནས་ཚུལ་ཁོ་སྤྲོད་གནང་པ་ལྟར་ན། གཞིས་བཞུགས་རྩོམ་པ་པོ་ཚ་བ་མདའ་སྨྱུག་གམ་དངོས་མིང་ལ་གྲྭ་བློ་གྲོས་དཔལ་ལྡན་ཞུ་བ་ཁོང་ནི། ཡོངས་གྲཊ་ཐོག་བོད་ནང་གི་རྩོམ་པ་པོ་ཞོཊ་དུང་ལཊ་ཀྱི་ལྟ་བ་དང་ལངས་ཕྱོཊ་ལ་མཐའ་གཅིག་ཏུ་རྒྱབ་སྐྱོར་བྱེད་མཁན་ཞིག་དང་། བོད་ཀྱི་ཆོས་དང་རིག་གཞུང་འཛིན་སྐྱོང་སྤེལ་གསུམ་ཐད་རྙིང་ཞེན་དང་གུ་དོག་གི་བསམ་བློ་འཛིན་མཁན་ཚོར་ཁ་གཏད་དུ་ལངས་མཁན་ཞིག་ཡིན་པར་མ་ཟད། རྒྱ་གཞུང་གི་དྲང་བདེན་མིན་པའི་དབང་སྒྱུར་སྲིད་བྱུས་ལ་ཐད་ཀར་སྐྱོན་བརྗོད་བྱེད་མཁན་གྱི་ན་གཞོན་རྩོམ་པ་པོ་ཞིག་ཀྱང་ཡིན་འདུག ཚ་བ་མདའ་སྨྱུག་ལགས་ཀྱི་མངོན་སུམ་འཛེམ་མེད་ཀྱི་གཤིས་ཀ་དེས། ཧ་ཅང་རྙིང་ཞེན་ཆེ་བའི་བོད་ཀྱི་སེར་མོ་བ་རྒན་རབས་པ་ཁག་ཅིག་ལ་ཕོག་ཐུག་ཕྱིན་ཡོད་པ་མ་ཟད། གཞན། ཁོང་གི་ལ་ཞེན་དང་བདེན་དོན་སྐྱོང་བའི་རང་གཤིས་དེས་རྒྱ་གཞུང་གི་དཔོན་རིགས་ཚོའང་ཕོག་ཐུག་བཟོས་ཡོད་འདུག
ཀརྨ་རབ་གསལ་ལགས་ཀྱི་གནས་ཚུལ་ནང་བཀོད་པར། ཚ་བ་མདའ་སྨྱུག་ལགས་ནི་རང་གི་ཕ་ཡུལ་དུ་གཏན་སྡོད་བྱེད་མཁན་ཞིག་མིན་པར་ནམ་རྒྱུན་ཡར་མར་སློབ་གཉེར་དུ་སྐྱོད་ཀྱི་ཡོད་ཅིང་། མཚམས་རེར་ཁོང་གིས་ནང་མིར་འབྲེལ་བ་བྱེད་ཀྱི་ཡོད་ནའང་ནང་མི་ཚོས་ཁོང་གང་དུ་སྡོད་པ་དང་ཕྱག་ལས་ག་རེ་གནང་གི་ཡོད་མེད་ལྐོག་གྱུར་ཡིན་འདུག ཚ་བ་མདའ་སྨྱུག་ལགས་ཀྱིས་མཚམས་རེར་གྲོགས་པོ་རེ་ཟུང་དང་ཕྱི་རྒྱལ་དུ་ཡོད་པའི་ངོ་ཤེས་ཚོར་ཁ་པར་དང་དྲ་ཐོག་སོགས་སུ་འབྲེལ་བ་བྱེད་ཀྱི་ཡོད་འདུག ༢༠༠༨ ལོའི་ཕྱི་ཟླ་ ༣ ཚེས་ ༢༧ ཡས་མས་ནས་ཚ་བ་མདའ་སྨྱུག་ལགས་ཁོང་གི་གྲོཊ་པོ་ཚོའི་མཐོང་ལམ་ནས་གློ་བུར་དུ་བོར་བརླག་ཏུ་ཕྱིན་ཡོད་པ་དང་། ཁ་པར་དང་དྲ་ཐོག་སོགས་ནས་ཀྱང་འབྲེལ་ལམ་ཆད་ཡོད་འདུག ཁོང་བོར་བརླག་ཏུ་ཕྱིན་ཏེ་ལོ་ ༥ ཙམ་འགྲོ་བཞིན་ཡོད་སྟབས་ནང་མི་དང་དགའ་ཉེ་གྲོཊ་པོ་ཚོས་ཁོའི་འཆི་གསོན་གནས་སྟངས་ཐོག་སེམས་འཚབ་ཆེན་པོ་གནང་གི་ཡོད་འདུག
ཚ་བ་མདའ་སྨྱུག་ལགས་ནི། ༡༩༧༤ ལོར་ཚ་བ་དཔའ་ཤོད་ཁུལ་གྱི་དབེན་མདའ་ཞེས་པའི་འབྲོག་ཁྱིམ་དཀྱུས་མ་ཞིག་ཏུ། ཕ་ཟ་སུ་དགེ་ལེཊ་དང་མ་དཔེ་རུ་མ་ཡེ་ཤེས་དབང་མོ་ལཊ་གཉིས་ཀྱི་བུ་རུ་སྐྱེས་ཤིང་། ༡༩༨༧ ལོར་བོད་ལྗོང་ནང་བསྟན་སློབ་གླིང་ནས་སློབ་མཐར་ཕྱིན་པའི་མཁན་པོ་ཀརྨ་རྡོ་རྗེ་ལཊ་ཀྱི་དྲུང་དུ་བོད་ཀྱི་བརྡ་སྤྲོད་སྐོར་གསན་ཉན་གནང་ཡོད་ཅིང་། ༡༩༩༠ ལོར་ཕ་ཡུལ་དུ་ཡེ་ཆེན་དགོན་དུ་གཞུང་ཆེན་སློབ་གཉེར། ༡༩༩༢ ལོར་ཟུར་མང་ནས་ཕེབས་པའི་བླ་མ་ཀརྨ་སེང་གེ་ལཊ་ཀྱི་མདུན་ནས་སྡོམ་གསུམ་གསན་ཞིང་། ༡༩༩༦ ལོར་འཛོ་རྫི་དགོན་དུ་གཞུང་ཆེན་སློབ་གཉེར། དེ་བཞིན་ ༡༩༩༨ ལོར་སྡེ་དགེ་རྫོང་གསར་དུ་སློབ་གཉེར་བཅས་གནང་ཡོད་འདུག
ཚ་བ་མདའ་སྨྱུག་ལགས་ནི་བོད་ཀྱི་ནང་པའི་ཆོས་བརྒྱུད་ཆེན་པོ་བཞི་ལས་བཀའ་བརྒྱུད་ཀརྨ་ཀམ་ཚང་དུ་གཏོགས་ཤིང་། ཁོང་གིས་བོད་ཀྱི་རྒྱལ་ས་ལྷ་ས་གཙོས་ཁམས་ཀྱི་སྡེ་དགེ་སོཊ་དང་། མདོ་སྨད་རེབ་གོང་རོང་བོ་དགོན་ཆེན། རྔ་པ་ཀིརྟི་དགོན་པ། མཛོད་དགེ་བཅས་སུ་བྱ་བྲལ་གྱི་རྣམ་པའི་ཐོག་ཕེབས་ཏེ། བོད་ཀྱི་ཆོས་ལུགས་དང་ཆོས་བརྒྱུད་རིས་མེད་ཀྱི་གཞུང་ཆེན་ཁག་ལ་སློབ་གཉེར་དང་དོཊ་དཔྱོད་ཡང་ཡང་གནང་ཡོད་འདུག་ལ། ཁོང་གི་གུ་ཡངས་ཀྱི་གཞུང་ཆེན་སློབ་གཉེར་གནང་སྟངས་དེས། སྐབས་རེར་ཁོང་ལ་ལྟ་ལོག་ཅེས་པའི་མིང་ཐོ་འདོགས་མཁན་ཡང་བྱུང་ཡོད་འདུག
རྩོམ་པ་པོ་ཚ་བ་མདའ་སྨྱུག་ལགས་ཀྱིས་རྒྱལ་སྤྱིའི་ཨོ་རྩལ་འགྲན་ཚོགས་རྒྱ་ནག་ཏུ་མ་ཚོགས་གོང་ཙམ་ལ། ཁོང་གི་ཚ་བ་སྒང་བའི་འབྲོག་ཁྱིམ་ཟིན་བྲིས་སྟེང་། “རྩོམ་ཡིག་མགོ་བརྗོད་ལ་རྒྱ་གར་ཡུལ་དུ་རྔམ་སྟོན་ཁྲོམ་སྐོར་བྱེད་པའི་དུས། རྒྱ་ནག་ཡུལ་ལ་དགའ་སྟོན་བྱེད་པའི་དུས། ཚ་བ་མདའ་སྨྱུག་བཤམ་སྟོན་བྱེད་པའི་དུས” ཞེས་སོགས་བྲིས་ཡོད་པ་དེ་ནི་ཁོང་གི་དྲ་ཐོག་ཏུ་བྲིས་པའི་རྩོམ་ཡིག་མཐའ་མ་དེ་ཆགས་ཡོད་འདུག ཚ་བ་མདའ་སྨྱུག་ལགས་ནི་བདག་དཔེ་ཚོཊ་ཀྱིས་དཔར་སྐྲུན་བྱས་པའི་༼ ཕྱིར་རྟོག ༽ཅེས་པའི་དཔེ་དེབ་ཀྱི་རྩོམ་པ་པོ་དང་། བོད་ནང་གི་གཞོན་སྐྱེས་རྩོམ་པ་པོ་དང་ཀློག་པ་པོ་ཚོས་ཧ་ཅང་དགའ་མོས་བྱེད་ཡུལ་གྱི་དྲ་ཐོག་རྩོམ་པ་པོ་སྐད་གྲགས་ཅན་ཞིག་ཡིན།
ཁོང་འདི་ལྟར་བོར་སོང་བ་རེད།བོར་ནས་མི་ལོ་ལྔ་འགོར་འདུག ད་ཁོང་གང་ན་ཡོད་ན།ང་ཚོ་གངས་ལྗོངས་གསར་བ་འཛུག་བསྐྲུན་བྱས་པ་ལ་ཤེས་ཡོན་གྱི་ཕྱུག་པའི་མི་བུ་འདི་དག་ང་ཚོ་ལ་མཁོ།
ཁ་སང་དུས་ཚོད་ཀྱིས་རྐྱེན་པས་གསར་འགྱུར་འགོད་ནོར་འདུག་པ་ཁག་གསལ་སྟོན་བྱེད་ཁོམས་མ་བྱུང་བས་དེ་རིང་དོན་གནད་གཉིས་ལ་གསལ་ཁ་བཟོ་གི་ཡིན། ༡༽(༡༩༩༠ ལོར་ཕ་ཡུལ་དུ་ཡེ་ཆེན་དགོན་དུ་གཞུང་ཆེན་སློབ་གཉེར།)སྐབས་དེར་ཡེ་ཆེན་དགོན་དུ་ཆོ་ག་ཕྱག་ལེན་ཙམ་ལས་གཞུང་ཆེན་སློབ་གཉེར་བྱ་སའི་བཤད་གྲ་ལྟ་བུ་མེད། ༢༽(རྩོམ་པ་པོ་ཚ་བ་མདའ་སྨྱུག་ལགས་ཀྱིས་རྒྱལ་སྤྱིའི་ཨོ་རྩལ་འགྲན་ཚོགས་རྒྱ་ནག་ཏུ་མ་ཚོགས་གོང་ཙམ་ལ། ཁོང་གི་ཚ་བ་སྒང་བའི་འབྲོག་ཁྱིམ་ཟིན་བྲིས་སྟེང་། “རྩོམ་ཡིག་མགོ་བརྗོད་ལ་རྒྱ་གར་ཡུལ་དུ་རྔམ་སྟོན་ཁྲོམ་སྐོར་བྱེད་པའི་དུས། རྒྱ་ནག་ཡུལ་ལ་དགའ་སྟོན་བྱེད་པའི་དུས། ཚ་བ་མདའ་སྨྱུག་བཤམ་སྟོན་བྱེད་པའི་དུས” ཞེས་སོགས་བྲིས་ཡོད་པ་དེ་ནི་ཁོང་གི་དྲ་ཐོག་ཏུ་བྲིས་པའི་རྩོམ་ཡིག་མཐའ་མ་དེ་ཆགས་ཡོད་འདུག) འདི་ནི་ཐ་མ་མ་ཡིན་པར་ཐོག་མ་ཡིན་ལ་རྒྱ་གར་ཡུལ་ལ་རྔམ་སྟོན་ཟེར་བའི་མཚམས་སུ་ཁྲོམ་སྐོར་ཟེར་བ་མེད། གསལ་བཤད་ཙམ་ཡིན།
ངས་བདུན་ཕྲག་ཁ་ཤས་སྔོན་ལ་གནས་ཚུལ་འདི་དུས་བབ་ཚགས་པར་སྟེང་ནས་མཐོང་མ་ཐག་ཧང་སང་སོང་། གང་ཡིན་ཟེར་ན། མི་སྣ་འདི་འདྲའི་རྩ་ཆེན་པོ་ཞིག་བོར་བརླག་ཏུ་སོང་སྟེ་དུས་ཚོད་རྒྱུན་རིང་པོ་འཕྱིན་ཚར་ནའང་དེ་ལ་ཐུགས་འཁུར་བྱེད་མཁན་དང་གླེང་སློང་བྱེད་མཁན་མ་བྱུང་བ་དེ་ག་རེ་ཡིན་ན་བསམ་སོང་།
དང་ཐོག་ཚ་བ་མདའ་སྨྱུག་བོར་བརླག་ཏུ་སོང་མ་ཐག་མཛངས་མ་འཇམ་དབྱངས་སྐྱིད་ལགས་ཀྱིས་ཕྱི་བསྒྲགས་གནང་སོང་། ཡིན་ནསི།བྲོས་བྱོལ་བ་ཚོས་ཁོང་ལ་ཆོས་དད་ཡོད་མེད་ཅིག་གླེང་བ་ལས་ཁོང་གི་བདེ་སྡུག་དང་ཤི་གསོན་སྐོར་གླེང་མ་སོང་བས། དེ་ལྟར་ལྷག་སོང་བ་ཞིག་རེད། གང་ལྟར་ཚ་བ་མདས་སྨྱུག་ཁོང་བོད་མི་རྣལ་མ་ཞིག་དང་རང་དབང་ལ་མོས་མཁན་ཞིག་ཡིན་པས། ཁོང་གི་ཤི་གསོན་བརྩད་གཅོད་ཐུབ་མིན་ནི་བྲོས་བྱོལ་སྤྱི་ཚོགས་འདི་བཞིན་དོན་དངོས་སུ་བོད་ལ་ཤ་ཞེན་ཡོད་མེད་དེ་མཚོན་གྱི་ཡོད་ན། དེ་ལྟར་བསྡོམས་ཚིག་ལ་སྒུག་ཆོག་གི་རེད།
དུས་བབ་རྩོམ་སྒྲིག་པ་ལགས། ཐོག་མར་ཁྱེད་ཀྱིས་མདའ་སྨྱུག་གི་སྐོར་བཀོད་པར་བཀྲིན་ཆེ་ཞུ་རྒྱུ་དང་ལྷན་དུ་གུས་པས་བསྐུར་བའི་ཡི་གེའི་ནང་དོན་དང་ཅུང་ཟད་མི་འདྲ་བ་འགའ་བཀོད་འདུག་པས་གསལ་བཤད་ཀྱི་ཚུལ་དུ་འདིར་མ་དཔེ་འགོད་རྒྱུ་ཡིན་པས་རྒྱ་ཆེའི་ཀློག་པ་ཚོར་ཐུགས་བློ་ཅུང་ཟད་ཁེང་པའི་རེ་བ་ཡོད།ཚ་སྒང་བློ་གྲོས་དཔལ་ལྡན་ནམ་ཚ་བ་མདའ་སྨྱུག་གི་ངོ་སྤྲོད་མདོར་བསྡུས། ཕྲན་ནི་རྩོམ་པ་པོ་ཞིག་མིན་ཀྱང་མི་སྣ་འདི་དང་ཐོག་མཐའ་གཉིས་ཀར་་འབྲེལ་
འདྲེས་ཆེ་ཤོས་ཤིག་ཏུ་ཡིན་བཟོ་འདུག་ལ་ཉེ་ཆར་ཕྱོགས་མཐའ་ཀུན་ནས་ཁོ་ལ་
བཟང་ངན་ཅི་རིགས་སུ་གཟིགས་བཞིན་པའི་ཤེས་ལྡན་གྱི་མི་སྣ་མང་པོས་ཁོའི་
ལོ་རྒྱུས་ཤེས་འདོད་ཡོད་པ་གོ་ཐོས་བྱུང་ལ་བློ་དཀར་འགས་ངོ་སྤྲོད་ཅིག་འགོད་ན་
དགེ་མཚན་ཆེ་ཚུལ་བརྗོད་བྱུང་བས་བརྗོད་བྱ་དང་བརྗོད་བྱེད་གང་གི་ཆ་ནས་སྙན་ཞིང་ཡིད་དུ་འཐད་པ་ཞིག་འདྲི་མི་ཤེས་ཀྱང་མཐོང་ཐོས་དངོས་བྱུང་གང་ཤེས་མདོར་བསྡུས་ཤིག་ཡིག་ཐོག་ཏུ་འགོད་རྒྱུ་ལས་བཟང་ངན་གྱི་དབྱེ་ཞིབ་གང་ཡང་བྱ་རྒྱུ་མིན། དེ་ཡང་ཁོང་ནི་བོད་ཆོལ་ཁ་གསུམ་གྱི་ཡ་གྱལ་མདོ་སྟོད་བར་ཁམས་ཚ་བ་དཔའ་ཤོད་དམ་སྒང་དྲུག་གི་ཡ་གྱལ་ཚ་བ་སྒང། དེར་འབྲོག་སྡེ་སྟོད་སྨད་གཉིས་ལས་སྒང་སྟོད་
སྐུ་ལྷ་ངང་ཡག་ཅེས་པའི་གནས་རི་དང་ཉེ་བའི་གྲོང་སྡེ་དབེན་མདའ་ཞེས་པར་ཕ་ཟ་སུ་དགེ་ལེགས་དང་མ་དཔེ་རུ་མ་ཡེ་ཤེས་དབང་མོ་གཉིས་ཀྱི་རིགས་སུ་རབ་བྱུང་
བཅུ་དྲུག་ཤིང་ཕོ་སྟག་གི་ལོར་སྐྱེས། ཕ་འདི་ས་གནས་དེ་གའི་མི་མ་ཡིན་པར་
སྒང་སྨད་ཚ་བའི་སྨུག་མོ་ཞེས་པའི་གནས་རི་དང་ཐག་ཉེ་སའི་འབྲོག་སྡེ་དབུས་གྲོང་ཟེར་བ་ནས་མག་པ་ཡོང་བ་དང་། བློ་ཁོག་ཆེ་ཞིང་སྤྱོད་པ་རྩིང་ལ་ཕྲུག་གུར་རྡུང་སྡིག་
མང་པོ་གཏོང་དགོས་མཁན་ཞིག་ཡིན། མ་ནི་གཤིས་ཀ་མཇམ་ཞིང་ཀུན་ལ་བསྟུན་
མཁས་དང་ཕྲུ་གུར་བྱམས་སྐྱོང་བྱེད་མཁན་ཞིག་ཡིན་པ་མ་ཟད་དཔེ་རུ་མ་ཟེར་བའི་བླ་བརྒྱུད་བཅུ་གསུམ་ཟམ་མ་ཆད་པ་བྱུང་བའི་ལོ་རྒྱུས་ཅན་དང་ཡུལ་མིས་དད་གོས་དང་མཐོང་ཆེན་བྱེད་སའི་ཁྱིམ་ཚང་ཞིག་ནས་ཡིན་ལ་བཤད་སྲོལ་ལ་དཔེ་རུ་མ་ཞེས་པའི་རིགས་རྒྱུད་དམ་རུས་རྒྱུད་འདིའི་མིར་དམིགས་བསལ་གྱི་རིག་སྟོབས་ཡོད་པར་གླེང་། འོན་ཀྱང་དེང་སྐབས་ཆེ་མཐོང་ཡོངས་སུ་ཉམ་ཏེ་ལྟ་ལོག་སོགས་ཀྱི་ཞ་མོ་
ནག་པོ་གྱོན་ནས་གནས་ཡོད། ཁོ་ལ་སྤུན་བུ་མོ་གཅིག་དང་བུ་དྲུག་ཡོད་པའི་
ནང་ནས་ཁོ་ཨང་བདུན་པ་དེ་ཡིན་ཞིང་ཆུང་དུས་ནས་ཡི་གེ་ཀློག་འདོན་ལ་གཙོ་བོར་བྲེལ། མི་ལོ་གསུམ་ཙམ་རིང་སྐ་རགས་བཅིང་མྱོང་མེད་ཅེས་ཟེར། དེའི་དོན་
ནི། མི་ལོ་གསུམ་ལ་ཡི་གེ་ཀློག་ཏེ་ནང་དུ་སྡོད་པ་ལས་སྐ་རགས་བཅིངས་ནས་ཕྱི་རོལ་
ཏུ་འགྲོ་ཆོག་པའི་གནང་བ་མ་རགས་པ་རེད་ལ་དེ་གའི་རིང་ཕ་རྒན་འགྲམ་ནས་རྟག་ཏུ་རྡུང་སྡིག་ཕོག་བཞིན་ཡོད་པ་གྲོང་རོགས་ཚོར་ཆ་རྒྱུས་ཡོད་པ་ཞིག་རེད། དེའི་རྐྱེན་པས་ཡིག་རྩ་ཧ་ཅང་གི་བཟང་ཞིང་ཀློག་བདེ་ལ་མྱུར། ཐེངས་ཤིག་ཁོང་
གཅིག་པུས་རྒྱལ་བའི་བཀའ་འགྱུར་ཉིན་བཞིན་པོད་རེ་བྱས་ཏེ་ཀློག་ཡོད་ལ་རྗེས་སུ་ཁོང་ཆོས་ཞུགས་བྱ་སའི་དགོན་དུ་སྤྲུལ་སྐུ་ཞིག་དང་ལྷན་དུ་བཀའ་འགྱུར་ཚར་གཅིག་ཀློག་ཡོད་འདུག གང་ལྟར་ཀློག་བདེ་བ་ནི་ཕུལ་དུ་ཕྱིན་པ་རེད། སྤྱིར་གཏང་
ཡུལ་འདིའི་གཞོན་སྐྱེས་སྐྱ་སེར་སུ་ཡིན་རུང་ཀློག་པ་ཙམ་ནི་མི་ཤེས་པ་ཕ་ཆེར་མེད། དེ་ནི་སློབ་གྲྭ་སོགས་ཀྱི་མཐུན་རྐྱེན་གང་ཡང་མེད་ཀྱང་ཕ་མ་ཚོར་ཀློག་སློབ་ཏུ་འཇུག་རྒྱུའི་གོམས་གཤིས་ཤིག་སྔར་ནས་ཡོད་འདུག་ལ་མུ་མཐུད་རྒྱུན་འཛིན་བྱེད་བཞིན་ཡོད། ༡༩༨༧ ཡས་མས་ཤིག་ཏུ་ཁོ་དང་ན་མཉམ་གྱི་གཞོན་སྐྱེས་ཁ་ཤས་ལྷན་དུ་
གནས་ཆུང་སློབ་གྲ་ནས་སློབ་མཐར་ཕྱིན་པའི་ཞིང་གཤེགས་མཁན་པོ་ཀརྨ་རྡོ་རྗེ་ཞུ་བའི་དྲུང་ནས་སུམ་རྟགས་ཀྱི་འཆད་ཁྲིད་ཐེངས་གཅིག་ཞུ་མྱོང་ཡོད། ༡༩༩༠ལྕགས་རྟ་ལོར་
ཐོག་མར་ཕ་ཡིས་ས་གནས་དེར་ཡོད་པའི་དགོན་པ་ཀོ་དགོན་ནམ་ཐུབ་བསྟན་དཔལ་འབར་བཀྲིས་ཆོས་གླིང་དགོན་ཟེར་བ་དེར་འཇུག་རྒྱུ་བྱས་ཡོད་ཀྱང་ཡེ་ཆེན་སྤྲུལ་སྐུ་ཞུ་བ་ཁོང་དང་ཉེ་འབྲེལ་ཡིན་པའི་སྤྲུལ་སྐུ་དེས་ཁོང་གིས་གཟིགས་སྐྱོང་གནང་སའི་ཡུལ་དགོན་ཡེ་ཆེན་དགོན་ཞེས་པ་སྒང་སྨད་དུ་ཆགས་པའི་དགོན་དེར་ཁྲིད། སྤྱིར་གཏང་ཡུལ་འདིའི་མིས་སྐྲ་ཕུད་ཕུལ་ཚར་ན་གྲྭ་པར་བརྩི་བཞིན་ཡོད་པས་འདི་ཡང་ཆུང་དུས་ནས་སྐྲ་ཕུད་འབུལ་ཚར་མཁན་ཞིག་ཡིན་ཀྱང་བླ་མ་སུར་ཕུལ་མིན་མི་ཤེས། ༡༩༩༢ ཙམ་ལ་སྐྱེ་རེ་དགོན་པའི་བླ་མ་ཀརྨ་སེང་གེ་ཞུ་བའི་མདུན་
ནས་ཡག་དགོན་དུ་མངའ་རིས་ལོ་ཙཱ་བས་མཛད་པའི་སྡོམ་གསུམ་རྣམ་ངེས་ཀྱི་འཆད་ཁྲིད་ཞུས། སྐབས་དེ་དག་ཏུ་དགོན་འདིར་ཆོ་ག་དང་ཆོས་སྤྱོད་སོགས་ཀྱི་
ལག་ལེན་ལས་གཞུང་ལུགས་དང་བརྡ་སྤྲོད་སྦྱོང་སའི་འཛིན་གྲྭ་ལྟ་བུ་གང་ཡང་མེད་པས་ཁོ་ཡང་སྤྱི་མཚུངས་ལྟར་ཆོ་ག་སོགས་སྦྱང་ཏེ་དགེ་གཡོགས་ཀྱང་གནང་འདུག ཡུལ་འདིའི་མིར་ཡི་གེ་ཀློག་འདོན་ཙམ་ལས་བརྡ་སྤྲོད་སོགས་རིག་གནས་ཀྱི་ཆུ་ཚད་ཧ་ཅང་སྐྱོ་བས་སྐབས་ཤིག་ཏུ་སྤྲུལ་སྐུ་ཞིག་ཁྲི་སྟོན་མཛད་སྒོའི་སྐབས་ཁོས་ཕུན་སུམ་ཚོགས་པ་ལྔ་ལྡན་གྱི་སྒོ་ནས་མཎྜལ་གྱི་བཤད་པ་ཞིག་བྲིས་ཏེ་ཀློག་ཡོད་ཅིང་སྐྱ་སེར་ཀུན་ཡིད་སྨོན་ཤོར་འདུག དེ་ཁོས་རང་སྟོབས་ཀྱིས་བྲིས་སམ་དཔེ་བཤུས་བྱས་པ་ཡིན་ཆ་མ་འཚལ། ༡༩༩༥ ལོར་དགོན་དེར་རྒྱལ་གཅེས་ཆོས་གཅེས་ཀྱི་སློབ་གསོ་ཟླ་གཅིག་མ་ཟིན་ཙམ་སྤེལ་ཏེ་མཐའ་བསྡོམས་རྒྱུག་སྤྲོད་ལྟ་བུ་གྲྭ་པ་རེ་ནས་གཏམ་རེ་བཤད་དགོས་སྟབས་གྲྭ་པ་ཚོས་དངོས་ཡོད་བོད་ཀྱི་རྒྱལ་རབས་དང་ལོ་རྒྱུས་ནི་མ་ཤེས། ཉིན་ཤས་རིང་སྦྱང་པའི་རྒྱ་གཞུང་གིས་བརྫུན་བསྒྲིགས་ཀྱི་གཏམ་དེ་བསྐྱར་བཟློས་བྱེད་མ་ནུས་ནས་འུ་ཐུག་པའི་སྐབས་ཁོས་བོད་གཙན་པོའི་དུས་རབས་ནས་བཟུང་སྟེ་༡༩༥༠ བར་གྱི་རྒྱལ་རབས་ལྟ་བུ་ཆུ་ཚོད་ཁ་ཤས་རིང་བཤད་སྐབས་རྒྱ་གཞུང་གི་ལས་བྱེད་ཚོས་རྒྱལ་རབས་མི་ཤེས་སྟབས་ཁོ་ཉིན་ཤས་ལས་སློབ་གསོར་ཡོང་མེད་ཀྱང་འདི་ལྟར་ཤེས་པ་དཔེ་མེད་རེད་ཟེར་བ་ཙམ་ལས་ཆབ་སྲིད་ཀྱི་ནག་ཉེས་གང་ཡང་གཡོག་མི་འདུག། དེར་ཡོད་འདུས་མང་ལའང་ངལ་གསོའི་དབུག་ཅིག་ཐོབ་འདུག དེ་དུས་དགོན་པའི་ཉིན་རེའི་བྱེད་སྒོ་ལས་བརྒལ་ཏེ་རང་ངོས་ནས་རྒྱལ་རབས་དང་ལོ་རྒྱུས། བརྡ་སྤྲོད་སོགས་ཀྱི་དེབ་འདྲ་མིན་དུས་ཚོད་སྟོང་པ་ནམ་ཡིན་ལ་ཀློག་བཞིན་ཡོད་ཅིང་ཅུང་ཟད་རིག་གནས་ལ་དུངས་པའི་གྲྭ་གཞོན་འགའ་དང་ལྷན་དུ་བསམ་ཚུལ་བགྲོ་གླེང་བྱེད་བཞིན་ཡོད། ཁོང་གི་སྡོད་ཤག་ནི་དཔེ་མཛོད་ཁང་ལྟར་དེབ་ཧ་ཅང་མང་ཚུལ་གྲོགས་ཚོས་གླེང་། སྐབས་དེ་དུས་ནས་རྩོམ་ཡིག་འབྲི་རྒྱུར་ཧ་ཅང་གི་དགའ་མོས་ཡོད་པ་ཡིན། ཚོགས་སུ་སྐྱབས་ཐོ་དང་སྐྱབས་ཞུ་ལྟ་བུ་འབྲི་སྐབས་ཀྱང་རྟག་ཏུ་སྙན་ཞིང་འཇེབས་ལ་རྒྱས་ཤིང་མ་ཚང་བ་མེད་པ་འབྲི་ཞིང་དག་ཆ་ཚུན་ཆད་ལ་ཧ་ཅང་གིས་ནན་ཏན་བྱེད་བཞིན་ཡོད། སྐབས་འདི་ནི་མདའ་སྨྱུག་རླུང་རྟ་དར་བཞིན་པའི་སྒང་ཡིན་པས་སྐྱ་སེར་སུ་ཡིན་རུང་འདིར་ཡིན་སྨོན་མ་ཤོར་བ་མེད་པ་ལྟ་བུ་རེད། འབྲོག་སྡེ་འདིར་ཀམ་ཚང་བཀའ་བརྒྱུད་ཀྱི་དགོན་ཁག་བཞི་དང་འབྲུག་པ་བཀའ་བརྒྱུད་ཀྱི་དགོན་ཁག་གསུམ། ཉེ་འཁོར་དུ་དཔའ་ཤོད་དགོན་ཆེན་དང་སྤོམ་མདའ་དགོན་སོགས་དགེ་ལུགས་པའི་དགོན་པའང་ཡོད་ལ་ཁོང་ཞུགས་སའི་དགོན་ནི་ཀམ་ཚང་བཀའ་བརྒྱུད་དགོན་པ་ཡིན།
སློབ་སྦྱོང་བྱེད་སའི་སྟི་གནས་ཤིག་ལ་སྔར་ནས་འགྲོ་འདོད་ཡོད་ཀྱང་དགོན་བདག་སྤྲུལ་སྐུས་དང་ལེན་མ་གནང་སྟབས་ལོ་ཤས་ལུས། ༡༩༩༦ ལོར་འཛོ་རྫི་དགོན་དུ་ལོ་གཅིག་དང་ཕྱེ་ཙམ་རིང་སྤྱོད་འཇུག་སོགས་ཀྱི་བཤད་ཁྲིད་མི་ཉུང་བ་ཐོབ་ཡོད་འདུག ༡༩༩༨ ལོ་མཇུག་ལ་དགོན་བདག་སྤྲུལ་སྐུ་ལ་མ་ཞུས་པར་གསང་སྟབས་ཀྱིས་ཁམས་ཤར་ཕྱོགས་སྡེ་དགེ་རྫོང་གསར་བཤད་གྲྭར་སོང་། དེ་སྐབས་དགོན་པའི་གྲྭ་ཤག་མ་རེག་པར་ཟུར་དུ་ཤིང་ཁང་རླུང་ལྷག་མི་ཁོག་སར་ཨུ་ཚུགས་ཀྱིས་བསྡད་དེ་ཚོགས་ཆོས་འགྲིམས། ལྟོ་ཚད་ལྡན་མེད་ཅིང་ཉལ་ཆས་ཀྱང་མེད་སྟབས་མཁན་པོ་ཕུན་ཚོགས་རྣམ་རྒྱལ་ཞུ་བས་ཁོང་གི་མ་ཡུམ་མའི་ལུག་ལྤགས་ཀྱི་སླག་པ་རྙིང་པ་ཞིག་གནང་འདུག མཐུན་རྐྱེན་ཧ་ཅང་སྐྱོ་བས་གྲང་འབམ་གྱི་ནད་ཡོད་པ་ཇེ་སྡུག་དུ་སོང་ཡང་འཚོ་བའི་མཐུན་རྐྱེན་མེད་སྟབས་ལོ་དེ་གའི་དབྱར་མཚམས་སྐབས་ལག་གཉིས་མཁར་བ་ལ་བརྟེན་ནས་རྒྱུས་མེད་ཀྱི་རི་ལུང་མང་པོ་བརྒལ་ཏེ་སློང་ལ་སོང་བས་མར་དང་སྐྱུ་ར་སོགས་མི་ཉུང་བ་རེག་འདུག དེ་སྐབས་རྫོང་གསར་བློ་གྲོས་ཟེར་བའི་སྨན་པས་སྨན་བཅོས་བྱས་ཏེ་ཅུང་ཟད་དྲག་སྐྱེད་བྱུང་། མུ་མཐུད་སློབ་གཉེར་གནང་། ལོ་གཅིག་དང་ཕྱེད་ཙམ་ལ་ཕ་ཡུལ་དུ་གཉེན་འཕྲད་ལ་ཁྱུག་ཙམ་ཕེབས། ཕྱི་ལོ་༢༠༠༠ སྤྱི་ཟླ་༦་ཙམ་དུ་སླར་ཡང་རྗོང་གསར་བཤད་གྲྭར་ཕེབས་ཏེ་སྔར་རྒྱུན་བསྲིངས། ༢༠༠༡ ལོར་དགོན་དེའི་བདག་པོ་རྗོང་གསར་མཁྱེན་བརྩེ་རིན་པོ་ཆེ་བོད་དུ་ཕེབས་སྐབས་བརྒལ་བརྟག་ཀྱི་བགྲོ་གླེང་གི་མི་སྣ་རུ་ཁོང་དང་གསེར་གཞུང་བསམ་འགྲུབ་ཞུ་བ་གཉིས་གྲྭ་མང་ནས་གདམས་ཏེ་བགྲོ་གླེང་གནད་དུ་འཁེལ་བ་་གནང་བས་བླ་མ་ཧ་ཅང་གི་ཐུགས་མཉེས་པོ་བྱུང་འདུག དེ་རྗེས་ཙམ་ལ་རྫོང་གསར་དགོན་དུ་མཁན་ཆེན་པདྨ་དམ་ཆོས་མཆོག་གིས་ལམ་འབྲས་ཀྱི་བཀའ་ཁྲིད་གནང་བར་ཞུས། སྤྱིར་ན་སྐུ་གཟུགས་ཐང་པོ་མེད་ཁར་བཤད་གྲྭའི་སྒྲིག་ལམ་ཡང་ཧ་ཅང་དམ་པོ་ཡོད་འདུག་ཀྱང་སློབ་ཚན་ལ་བརྩོན་པ་ལྷོད་མེད་ཐོག་སྒྲིག་ལམ་བརྩི་སྲུང་ཆེ་ཞིང་བློ་རིག་ཧ་ཅང་གི་བཀྲ་བས་སྐབས་དེའི་མཁན་པོ་ལས་ཐོག་པ་ཚེ་བསྟན་ཞུ་བས་ཧ་ཅང་གི་ཐུག་བརྩིས་ཆེན་པོ་གནང་ཡོད་འདུག་ལ་སྒེའུ་ཁུང་ལྕགས་རིའི་ཕྱི་རོལ་དུ་ཁ་ཕྱོགས་པའི་གྲྭ་ཤག་གཉིས་ཡོད་པ་ལས་གཅིག་འདི་དང་གཞན་དེ་གསེར་གཞུང་བསམ་འགྲུབ་ཞུ་བ་བཞུགས་གཅུག་འདུག་ལ་འདིའང་ཆེ་མཐོང་ལྟ་བུ་ཡིན་འདུག ནམ་རྒྱུན་ཁོང་གིས་ཟུར་ཁྲིད་གནང་སའི་སློབ་མ་མང་པོ་ཡོད་འདུག ༢༠༠༢ ནང་བསྐྱར་དུ་ཕ་ཡུལ་ལ་ཟླ་ཤས་རིང་བཞུགས་རྗེས་ཕྱིར་བཤད་གྲྭར་ཕེབས་ཏེ་༢༠༠༣ གི་ལོ་དཀྱིལ་ཙམ་བར་དུ་སློབ་གཉེར་གྱི་རྒྱུན་མཐུད། དེ་རྗེས་གནས་དོན་གང་ཡིན་གསལ་པོ་མ་ཤེས་ཀྱང་བཤད་གྲྭ་དེ་ནས་ཁ་བྲལ་ཅིང་ལྷོ་ཁ་ལྡིང་པོ་ཆེ་དགོན་པར་སོང་སྟེ་འབྲུག་པ་བཀའ་བརྒྱུད་ཀྱི་ཆོས་བརྒྱུད་འཛིན་པ་མཁན་པོ་བསྟན་པ་རབ་རྒྱས་ཞུ་བ་བསྟེན་ཏེ་དབུ་མའི་བསྟན་བཅོས་ལུང་རིགས་འབྲུག་སྒྲ་དང་བོད་མཁས་པའི་སྙན་ངག་གཉིས་ཀྱི་བཤད་ཁྲིད་ཆ་ཚང་ཞུས་པ་མ་ཟད་གོ་རམས་པའི་གསུང་ཡོངས་འདུས་རབ་གསལ་ལ་དོགས་དཔྱོད་ཞུས། ངག་དབང་ཤེས་རབ་ཞུ་བའི་མདུན་ནས་ཚད་མའི་བསྟན་བཅོས་དབྱང་ཅན་མགྲིན་གླུའི་བཤད་ཁྲིད་ཞུས་ཏེ་ཟླ་ཤས་བཞུགས། དེ་རྗེས་ལྷ་སར་ཟླ་ཤས་རིང་སྨན་བཅོས་གནང་སྟེ་མདོ་སྨད་རེབ་གོང་དུ་ཕེབས་ཤིང་རོང་པོ་དགོན་ཆེན་དུ་ཟུར་བཞུགས་ལྟ་བུ་བསྡད་ཡོད་བཟོ་འདུག་ཀྱང་གནས་ཚུལ་གསལ་པོ་ནི་ནང་མི་དང་སྤུན་མཆེད་ལའང་གསུངས་མེད། ༢༠༠༥ ཙམ་ལ་ཁམས་ཏྲེ་ཧོར་ནས་བཀའ་བརྒྱུད་བན་རྒན་དགོན་པའི་གནད་ཡོད་མི་སྣ་རྗོང་གསར་བཤད་གྲར་ཕེབས་ཏེ་མཁན་པོ་ཞིག་གནང་རོགས་ཞེས་སྐྱབས་འཇུག་ཞུས་པར་རྫོང་གསར་མཁན་པོས་ཚ་སྒང་བློ་གྲོས་དཔལ་ལྡན་འཚོལ་ན་བཟང་ཚུལ་གྱི་ལམ་སྟོན་འོག་ཁོང་ཚོས་རེབ་གོང་དུ་ཡོད་པ་ཤེས་རྟོགས་བྱུང་རྗེས་དགོན་བདག་དང་ཕྱག་མཛོད་གཉིས་གླང་འཁོར་ཆུང་ཆུང་ཞིག་ཁྲིད་ནས་རེབ་གོང་དུ་ཆེད་དུ་ཕེབས་ཏེ་ཁོང་ཚོའི་དགོན་དུ་མཁན་པོ་ཕེབས་རོགས་ཞུས་ཀྱང་ཁོང་གིས་དང་ལེན་གནང་མི་འདུག འོན་ཀྱང་ཨུ་ཚུགས་ཆེ་སྟབས་ཧ་ཅང་གི་སུན་སྣང་བྱུང་གསུངས། སྐབས་དེ་ནས་དེར་བཞུགས་མ་འདོད་པར་གསང་སྟབས་ཀྱིས་རྔ་པ་ཀིར་ཏི་དགོན་པར་ཕེབས། དེ་སྐབས་གསང་བ་བྱ་དོན་ནི་གོང་བཀོད་ལྟར་གང་ཟག་གཞན་པའི་རེ་བ་དང་ལེན་གནང་མི་ཐུབ་པས་ཡིན། དེ་ནས་བཟུང་སྟེ་ཁོང་གིས་ནང་མི་ལའང་ང་ཨ་མདོར་ཡོད་གསུངས་པ་ཙམ་ལས་གར་ཡོད་གསལ་པོ་གཏན་ནས་གསུངས་མེད། སྐབས་དེར་ང་དང་ཁ་དཔར་བརྒྱུད་ནས་འབྲེལ་བ་ཡང་ཡང་བྱུང་། སྐབས་ཤིག་ལ་ཁོང་ལ་རྩོམ་པོ་པོ་ཤེས་རབ་དར་རྒྱས་ལགས་ཀྱིས་བརྩམས་པའི་ནུབ་ཕྱོགས་འགྲིམས་པའི་གཏམ་དགོས་ཚུལ་གསུངས་ཤིང་བསྐུར་ཡུལ་གྱི་རྐྱེན་པས་ངས་དེ་སྐབས་ཁོང་གར་ཡོད་ཤེས་རྟོགས་བྱུང་ཡང་ནང་མིར་མ་བཤད་གསུངས་བྱུང་། དེ་སྐབས་ཀྱང་ཀིར་ཏིའི་དགོན་དུ་ཟུར་ཞུགས་ལྟ་བུའམ་སྒྲིག་ཁོངས་སུ་ཡོད་མེད་སོགས་ཀྱི་གསལ་ཁ་ཕྲན་ལ་གང་ཡང་མེད། ཉིན་ཞིག་ཁོང་གིས་ངར་ཁ་དཔར་བརྒྱུད་གསུང་རྒྱུར། ང་དེ་རིང་ཀིར་ཏི་དགོན་པའི་དགེ་བཤེས་གྲགས་ཅན་ག་གེ་མོ་ཞིག་དང་བགྲོ་གླེང་བྱས་ཡིན། ངས་ཁོང་ལ་ (ཨ་ལགས་དགེ་བཤེས། དེ་རིང་ངས་རླུང་འཕྲིན་བརྒྱུད་༧གོང་ས་མཆོག་གིས་ཨ་རིའི་མཐོ་རིམ་སློབ་གྲྭ་ཞིག་ཏུ་བཀའ་སློབ་གནང་བ་ཞིག་གོ་བྱུང་། དེ་སྐབས་ཁོང་གིས་མཛོད་གནས་གཉིས་པའི་བསྟན་དོན་དེ་མེད་པ་གསལ་པོ་ཆགས་ཟིན་པས་ང་ཚོས་ཨུ་ཚུགས་བྱས་ན་ལྐུག་པ་རེད། དུས་རབས་ཉེར་གཅིག་ཏུ་ཀུན་མཁྱེན་དབྱིག་གཉེན་བསྐྱར་དུ་ཕེབས་ན་མཛོད་གནས་གཉིས་པ་གསར་རྩོམ་གནང་དགོས་རེད་ཅེས་གསུངས་བྱུང་བས་དེའི་ཐད་ཨ་ལགས་ལ་དགོངས་ཚུལ་ག་རེ་ཡོད། དགེ་བཤེས་ལགས་ཀྱིས། ཁྱོད་ཀྱིས་དེ་ལྟར་མ་བཤད། ཁྱོད་ཀྱིས་དེ་ལྟར་གསུངས་བྱུང་ཟེར་བར་ཡིད་ཆེས་རྒྱུ་ལྟ་ཞོག་ང་རང་གིས་དངོས་སུ་ཐོས་ནའང་ང་རང་ལས་སྣང་མ་དག་པས་དེ་ལྟར་ཐོས་པ་ལས་ཁོང་གིས་དེ་ལྟར་གསུངས་ག་ལ་སྲིད་བསམ་ས་རེད།) ཟེར། ཁོང་གཉིས་བར་གྱི་དྲི་བ་དྲི་ལན་དེ་ང་ལ་ཡ་མཚན་མཚན་གནང་ནས་གསུངས་བྱུང་། གོང་དུ་བཀོད་པ་དེ་ཚིག་ཇི་མ་ཇི་བཞིན་ཡིན་མིན་མ་ཤེས་ཀྱང་དོན་ནི་དེ་ག་རེད་འདུག དེ་སྐབས་དགོན་དུ་ཁོང་ལ་ལྟ་སྟངས་གཏན་ནས་ཡག་པོ་མེད་བཟོ་འདུག ཁམས་ཀྱི་མི་འཁྱམ་ལྟ་ལོག་ཅན་དེ་དང་འབྲེལ་བ་མ་བྱེད་མ་གཏོགས་ལོག་ལྟ་སྐྱེ་བའི་ཉེན་ཡོད་ཚུལ་དགེ་བཤེས་དང་སླབ་པ་རྒན་གྲས་འགས་གསུངས་ཚུལ་ཁོང་གིས་ཐོས་འདུག དེ་ནས་གནས་དབྱུང་བཏང་བའམ་རང་དགར་ཐོན་པ་མ་ངེས་ཀྱང་མཛོད་དགེ་དཔེ་མཛོད་ཁང་ཆེན་པོ་ཡོད་ས་དེར་ཕེབས་ཏེ་ཉེ་འགྲམ་གྱི་དུད་ཚང་ཞིག་གི་ཁང་མིག་ཅིག་གླས་ཏེ་ཉིན་ལྟར་དཔེ་མཛོད་ཁང་དུ་དེབ་ཀློག་སར་ཕེབས་ཡོད། ཟླ་འོད་གཞོན་ནུའི་འཁྲི་ཤིང་གི་མགོ་བརྗོད་ཀྱི་རྩོམ་བྱང་དུ་མེ་ཁྱི་ཟླ་བ་གསུམ་པའི་ཚེས་ཉེར་བརྒྱད་ཉིན་ཞེས་གསལ་བར་གཞིགས་ན་༢༠༠༦་ནས་མཛོད་དགེར་ཡོད་འདུག་པས་ཀིར་ཏིའི་དགོན་དུ་རྒ
བོད་ཀྱི་དུས་བབ་དྲ་བས་གནས་ཚུལ་འདི་ཁྱབ་བསྒྲགས་གནང་བར་ཐུགས་རྗེ་ཆེ། དུས་བབ་ཚགས་པར་སྟེང་གནས་ཚུལ་འདི་སྔོན་མ་ནས་བཀོད་འདུག་ཀྱང་། ཚགས་པར་ཡང་སྤེལ་རྒྱུར་རེ་བསྒུག་བྱས་བསྡད་པ་ཡིན། དྲ་རྒྱའི་སྟེང་སྤེལ་ཏེ་ཁྱབ་བསྒྲགས་ཤུགས་ཆེན་པོ་བྱས་ན་མཁས་དབང་ཁོང་གར་བཞུགས་གར་འགྲོ་ཡི་ཁུངས་སྣེ་རེ་བརྙེད་སྲིད་པ་རེད། སྔོན་ཆད་བོད་ནང་གི་བོད་ཡིག་དྲ་གནས་མང་པོ་ཞིག་ལ་ཁོང་གི་སྐོར་སྤེལ་ཏེ་གླེང་སློང་ཤུགས་ཆེན་པོ་བྱས་སོང་མོད། བཙན་བྱོལ་ནང་ནས་སྣང་མེད་དུ་བཞག་པ་འདྲ་བོ་ཆགས་སོང་བས། ད་རེས་ཚང་མས་ཁོང་གི་སྐོར་ལ་གླེང་སློང་རེ་ཡོང་བའི་རེ་བ་ཞུ་བཞིན་ཡོད།