དེ་རིང་ཞོགས་པའི་ཆུ་ཚོད་ ༥ ཙམ་ལ་རྒྱ་གར་རྒྱལ་ས་ལྡི་ལི་བོད་སྒར་བསམ་ཡས་གླིང་གི་རྒྱབ་ལོགས་གཞུང་ལམ་སྟེང་གི་ལྕག་ཟམ་ཟུར་གྱི་བོད་པའི་ཁང་པ་ཞིག་ལ་མེ་སྐྱོན་བྱུང་ཡོད་འདུག
གསར་འགོད་པས་ཁ་པར་བརྒྱུད་ལྡི་ལི་བོད་སྒར་བསམ་ཡས་གླིང་གི་ས་གནས་གཞིས་མགོ་ལེགས་སྐྱེས་རྡོ་རྗེ་ལགས་སུ་བཀའ་འདྲི་ཞུས་པར་ཁོང་གིས། “ ང་ཚོར་ད་སྔ་ལན་སྐྱེལ་མཁན་བྱུང་མ་སོང་། ཡིན་ནའང་ཁང་པ་མེར་ཤོར་བ་དངོས་ཡོད་རེད། དེ་རིང་ཞོགས་པའི་ཆུ་ཚོད་ ༥ པ་ཙམ་ལ་མེ་སྐྱོན་བྱུང་འདུག འོག་ཚོང་ཁང་རེད། ཉིས་ཐོག་དེ་གུར་དང་རས་ཆ་ཚེམ་བུ་རྒྱག་མཁན་དེ་འདྲ་ཞིག་རེད། ཉིས་ཐོག་དང་སུམ་ཐོག་གཉིས་ལ་མེ་སྐྱོན་བྱུང་འདུག ཕལ་ཆེར་ཅ་དངོས་ཚང་མ་འཚིག་འདུག མི་ལ་རྨས་སྐྱོན་སོགས་གང་ཡང་བྱུང་ཡོད་ས་མ་རེད” ཅེས་བརྗོད་བྱུང་།
ཡང་ཁོང་ལ་མེ་སྐྱོན་དེ་ཇི་ལྟར་བྱུང་མིན་ཧ་གོ་ཡོད་མེད་དྲིས་པར། “ དེ་ད་དུང་གསལ་བོ་ཧ་གོ་ཐུབ་ཀྱི་མི་འདུག རྒྱ་གར་ཉེན་རྟོག་པས་བརྟག་དཔྱད་བྱེད་ཀྱིན་འདུག ང་ཚོས་གློག་ཨེ་ཡིན་ན་བསམ་ཡང་། ཁང་བདག་གིས་གློག་མ་རེད་ལབ་སོང་། ” ཅེས་བརྗོད་སོང་། ཞོགས་པ་སྔ་བོར་མེ་སྐྱོན་བྱུང་མ་ཐག་ཉེ་འཁོར་གྱི་བོད་མི་ཚོས་མེ་གསོད་ཐབས་བྱས་ཡོད་པ་དང་། ཆུ་ཚོད་ཕྱེད་ཙམ་གྱི་རྗེས་སུ་རྒྱ་གར་མེ་གསོད་རུ་ཁག་འབྱོར་སྐབས། མི་མང་གིས་མེ་ཚང་མ་བསད་ཚར་ཡོད་འདུག
