རྒྱ་ནག་གཞུང་གིས་རྨ་ཆུ་རྫོང་མུ་རྭ་དགོན་པའི་གྲྭ་གསུང་རབ་རྒྱ་མཚོ་ལཊ་ཀློད་གྲོལ་བཏང་སྟེ་ཕྱིར་རང་ཁྱིམ་དུ་འབྱོར་ཡོད་ཀྱང་། བཙོན་ཁང་དུ་མནར་གཅོད་ཚད་མེད་བཏང་སྟེ་མཁལ་མ་སྐྱོན་ཤོར་ཡོད་འདུག
ཆབ་སྲིད་བཙོན་ཟུར་ལྷ་མོ་སྐྱབས་ལཊ་ཀྱིས་འདིར་གར་གནས་ཚུལ་མཁོ་སྤྲོད་གནང་བ་ལྟར་ན། རྒྱ་ནག་གཞུང་གིས་ཀན་ལྷོ་ཁུལ་རྨ་ཆུ་རྫོང་མུ་རྭ་ཞང་བསམ་གཏན་ཆོས་འཁོར་གླིང་དགོན་པའི་གྲྭ་གསུང་རབ་རྒྱ་མཚོ་ལཊ། སྔ་ཕྱི་ཐེངས་གསུམ་རིང་ཉེས་འཛུཊ་འདྲ་མིན་བྱས་ཏེ་ལོ་ ༣ ཀྱིས་ཙོན་འཇུག་ཁྲིམས་ཐག་བཅད་ཡོད་པ་ལྟར། ཟླ་འདིའི་ཕྱི་ཚེས་ ༢༡ ཉིན་ཁོང་བཙོན་གྲོལ་ཐོབ་སྟེ་ས་གནས་དགོན་གྲོང་གཉིས་ཀྱིས་ཁོང་ལ་ཕེབས་བསུའི་ཁྲོད་ཕྱིར་རང་ཡུལ་དུ་ལོག་ཡོད་འདུག་མོད། ས་གནས་འབྲེལ་ཡོད་མི་སྣས་བརྗོད་པ་ལྟར་ན་རྒྱ་གཞུང་གིས་ཁོང་ལ་སྡུག་སྦྱོང་མནར་གཅོད་བཏང་སྟེ་ད་ཆར་ཁོང་གི་མཁལ་མ་སྐྱོན་ཤོར་ཡོད་འདུག
རང་ལོ་ ༣༧ ཡིན་པའི་གྲྭ་གསུང་རབ་རྒྱ་མཚོ་ལགས་ནི། ཀན་ལྷོ་ཁུལ་རྨ་ཆུ་རྫོང་མུ་རྭ་དགོན་པའི་གྲྭ་བ་ཡིན་ཞིང་། དེ་སྔོན་ས་གནས་ཀྱི་༼རེ་བའི་རྐང་ལམ༽ཚགས་པར་གྱི་རྩོམ་སྒྲིག་འགན་འཁུར་བ་དང་བོད་ཨ་མའི་རང་སྐད་སླར་གསོ་ཚོགས་པའི་ཚོགས་མི། རྩྭ་ཐང་བོད་ཡིག་རྨོངས་སེལ་སློབ་གྲྭའི་རྐང་འཛིན་དགེ་རྒན་བཅས་ཀྱི་འགན་འཁུར་ཡོད་འདུག ༢༠༠༨ ལོའི་ཟླ་ ༣ ཚེས་ ༡༧ ཉིན་ རྨ་ཆུ་རྫོང་ཉེན་རྟོག་པས་ནག་ཉེས་ཅི་ཡིན་གསལ་ཁ་མེད་པའི་ཐོག་འཇུ་བཟུང་གིས་དུས་ཐུང་བཀག་ཉར་བྱས་རྗེས་ཀློད་གྲོལ་དང་། ༢༠༠༨ ལོའི་ཟླ་ ༥ ཚེས་ ༡༨ ཉིན་རྔ་བ་ཁུལ་ནས་འཇུ་བཟུང་ཐེངས་གཉིས་པ་བྱས་ཏེ་ཀློད་གྲོལ་བཏང་ཡོད་ཀྱང་། ༢༠༡༠ ལོའི་ཟླ་ ༣ ཚེས་ ༢༥ ཉིན་ཁོང་ ༢༠༠༨ ལོའི་རྨ་ཆུ་རྫོང་ཁོངས་ཀྱི་བོད་མིའི་ཞི་རྒོལ་དང༌། ༢༠༡༠ ལོའི་རྨ་ཆུ་རྫོང་བོད་རིགས་སློབ་འབྲིང་གི་སློབ་མའི་ཁྲོམ་སྐོར་ལས་འགུལ་སོགས་ཀྱི་སྣེ་ཁྲིད་བྱེད་མཁན་གྱི་དོགས་གཞིའི་འོག་འཇུ་བཟུང་ཐེངས་གསུམ་པ་བྱས་ཡོད་པ་མ་ཟད། ༢༠༡༠ ལོའི་ཟླ་ ༡༠ ཚེས་ ༡༦ ཉིན་ ཀན་ལྷོ་གཙོས་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་རྒྱལ་ཁབ་ཀྱི་གསང་བ་ཕྱིར་བསྒྲགས་བྱེད་མཁན་གྱི་ཉེས་མིང་འོག་ལོ་ ༣ དུས་བཀག་བཙོན་འཇུག་གི་ཁྲིམས་ཐག་བཅད་དེ། ད་ལྟའི་བར་ཀན་སུའུ་ལན་ཀྲུའུ་གྲོང་ཁྱེར་ནས་མཚོ་སྔོན་ཞིང་ཆེན་ཟི་ལིང་གྲོང་ཁྱེར་གྱིར་ལམ་བར་དུ་ཡོད་པའི་ཏིན་ཧྲི་ཞེས་པའི་བཙོན་ཁང་དུ་བཙོན་འཇུག་བཀག་ཉར་བྱས་ཡོད་འདུག
གསར་འགོད་པ། དོན་གོ
