ཁམས་སེར་ཤུལ་རྫོང་རྫ་སྨད་གྲོང་རྡལ་དབོན་པོ་དགོན་པའི་དགེ་འདུན་པ་ ༩ བོར་བརླག་སོང་སྟེ་ཡུན་རིང་འགོར་ཡོད་པ་དང་། ཉེ་ཆར་དགེ་འདུན་པ་ ༦ རོང་བྲག་རྫོང་གི་བཙོན་ཁང་དུ་ཡོད་པ་ཤེས་རྟོཊ་བྱུང་འདུག
རྒྱ་གར་ལྷོ་ཕྱོགས་སེ་ར་དགོན་གྱི་གྲྭ་བྱམས་པ་ཡོན་ཏན་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། འདས་ལོའི་ཕྱི་ཟླ་ ༡༠ ཚེས་ ༡༥ ནས་ ༢༤ ཉིན་བར་རྒྱ་གཞུང་གིས་ཁམས་སེར་ཤུལ་རྫོང་རྫ་སྨད་གྲོང་རྡལ། དབོན་པོ་དགོན་གྲོང་གཉིས་ནས་སེར་སྐྱ་མི་མང་ ༢༧ ཡས་མས་འཛིན་བཟུང་བཀག་ཉར་བྱས་པ་དང་། སྐབས་དེར་དབོན་པོ་དགོན་གྱི་དགེ་འདུན་པ་ ༩ གར་ཡོད་ཅི་བྱུང་མེད་པར་གྱུར་ཏེ་ཡུན་རིང་ལྷག་རྗེས། ཉེ་ཆར་དགེ་འདུན་པ་ ༦ རོང་བྲག་རྫོང་གི་བཙོན་ཁང་དུ་བཅུག་ཡོད་པ་རྩད་ཆོད་ཡོད་ཀྱང་། གཞན་རྣམས་ད་དུང་གར་ཡོད་ཤེས་རྟོགས་བྱུང་མི་འདུག
རྒྱ་གཞུང་གིས་ཁོ་ཚོ་འཛིན་བཟུང་བྱེད་དགོས་པའི་རྒྱུ་རྐྱེན་སོགས་གསལ་བཤད་བྱས་མེད་ཀྱང་། ས་གནས་མི་མང་གིས། འདས་ལོའི་ཕྱི་ཟླ་ ༢ ནང་དབོན་པོ་ཡུལ་ཚོའི་སློབ་གྲྭ་རུ་རྒྱ་ནག་གི་རྒྱལ་དར་མར་ཕབ་སྟེ། བོད་ཀྱི་རྒྱལ་དར་བསྒྲེངས་འཛུགས་བྱས་པ་དང་། བོད་དོན་དང་འབྲེལ་བའི་ཡིག་ཆ་གཏོར་འགྲེམས་བྱས་པ་སོགས་སྔ་རྗེས་སུ་རྒྱ་གཞུང་གི་བཙན་གནོན་ལ་ཞི་བའི་ངོ་རྒོལ་བྱས་པར་འབྲེལ་བ་ཡོད་པའི་ཉེས་མིང་འོག་བཙོན་འཇུག་བྱས་པར་ངོས་འཛིན་བྱེད་ཀྱི་ཡོད་འདུག
ཡུན་རིང་བོར་བརླག་ཏུ་གྱུར་བའི་དགེ་འདུན་པ་ ༩ ནི་ཆོས་དར་ལོ་ ༤༧ དང་། སྐྱབས་བྷེ་ལོ ༢༧ ། བློ་བཟང་མི་འཁྲུགས་ལོ་ ༢༥ ། བསྟན་འཛིན་དགེ་འདུན་ལོ་ ༢༤ ། བསོད་ནམས་ཆོས་དར་ལོ་ ༢༢ ། བསོད་ནམས་མགོན་པོ་ལོ་ ༢༢ ། བློ་བཟང་མཁས་གྲུབ་ལོ་ ༢༢ ། བློ་བཟང་ནོར་བུ་ལོ་ ༢༠ ། བློ་བཟང་དབྱིག་གཉེན་ལོ ༡༩ བཅས་ཡིན་འདུག
གར་ཡོད་ཤེས་རྟོགས་བྱུང་བའི་དགེ་འདུན་པ་ ༦ དེ་སུ་ཡིན་ད་དུང་ཁ་གསལ་བྱུང་མེད་ཀྱང་། དགུང་ལོ་ཆེ་ཤོས་དང་སྔོན་ཆད་རྒྱ་གར་ནས་སློབ་གཉེར་གནང་མྱོང་མཁན་གྲྭ་ཆོས་དར་ལགས་དེ་ཚོའི་གྲས་སུ་མེད་པ་གསལ་བོ་བྱུང་འདུག
