ཁ་སང་ཕྱི་ཚེས་ ༣༠ ཉིན་བོད་རང་སྐྱོང་ལྗོངས་ཆབ་མདོ་ས་ཁུལ་ཆབ་མདོ་རྫོང་ལྷ་ཐོག་ཡུལ་ཚོ་རྒྱ་རུ་སྡེ་བའི་མཁར་མདོ་གྲོང་གི་ཧོར་ཆ་ཚང་དང་སྐོར་བསྡུས་གྲོང་ཚོ་གཉིས་བར་ས་རྩོད་བྱུང་སྟེ་མི་ ༣ རྐྱེན་ལམ་དུ་ཕྱིན་ཡོད་འདུག
བསོད་ནམས་ལགས་ཀྱིས་གནས་ཚུལ་བཏང་འབྱོར་བྱུང་བ་ལྟར་ན། ཉེ་བའི་ལོ་ ༣ རིང་ཧོར་ཚ་ཚང་དང་སྐོར་བསྡུས་གྲོང་བར་ས་རྩོད་བྱུང་ཡོད་པའི་ཐད། ས་གནས་ཀྱི་བླ་མ་དང་མགོ་ཁྲིད་ཚོས་ཐེངས་མང་པོར་འདུམ་སྒྲིག་བྱས་ཀྱང་། སྐོར་བསྡུས་གྲོང་ཚོར་མེ་མདའ་མང་པོ་ཡོད་པའི་ཉེས་འགེལ་སོགས་བྱས་སྟབས། རྒྱ་ནག་གི་ཉེན་རྟོག་པས་སྐོར་བསྡུས་གྲོང་ཚོའི་ཚེ་སྟོབས་སོགས་མི་ ༩ འཛིན་བཟུང་བྱས་ཏེ་ཟླ་ ༣ ཙམ་འགྲོ་བཞིན་ཡོད་འདུག
ཉེ་ལམ་ཡུལ་མི་ཚོས་དབྱར་རྩྭ་དགུན་འབུ་བརྐོ་སྐབས་ཁོང་རྣམས་ཀློད་གྲོལ་གཏོང་དགོས་པའི་རེ་སྐུལ་ཞུས་ཡོད་པ་དང་། ཁ་སང་ཚེས་ ༣༠ ཉིན་སྐོར་བསྡུས་གྲོང་ཚོའི་ཚེ་སྟོབས་ཀྱི་ནུ་བོ་དགེ་འདུན་ཟེར་བས་ལུང་སྟོང་ཞིག་ཏུ་ཧོར་ཚ་ཆོས་དགེ་དང་གྲི་རྒྱག་རེས་བྱས་ཏེ། ཕན་ཚུན་གཉིས་ཀ་གྲོངས་ཡོད་པ་དང་། མདང་ནུབ་ཕྱོགས་གཉིས་ཀྱི་ནང་མིས་བེམ་པོ་རྙེད་རྗེས། ཧོར་ཚ་ཚང་གི་བུ་ལྔ་ལྐོག་ནས་སྐོར་བསྡུས་གྲོང་ཚོར་ཡོང་སྟེ། ཚེ་བརྟན་བློ་གྲོས་ཀྱི་བུ་ཆུང་བ་སྙན་གྲགས་ལ་མེ་མདའ་བརྒྱབ་སྟེ་བསད་ཡོད་འདུག
གཞན། ཉེ་སྔོན་ལྷ་ཐོག་སྤྱི་ཁྲི་གྲོང་དང་དགོང་ཤིས་གྲོང་གཉིས་བར་ས་རྩོད་ཤོར་ཏེ། དགོང་ཤིས་གྲོང་མི་རྣམས་ཀྱིས་སྤྱི་ཁྲི་གྲོང་གི་ཚེ་རིང་མགོན་པོ་ཟེར་བ་བསད་ཡོད་སྟབས། དགོང་ཤིས་གྲོང་གི་མི་ ༡༢ ཉེན་རྟོག་པས་འཛིན་བཟུང་བྱས་ཡོད་པ་མ་ཟད། མི་རེར་ལོ་ ༡༠ རེ་ཁྲིམས་ཐག་བཅད་ཡོད་ཀྱང་། དེའི་རྗེས་ནང་ཁུལ་འདུམ་འགྲིག་གིས་དགོང་ཤིས་གྲོང་ཚོའི་ཚེ་རིང་མགོན་པོའི་ཐད་རྒྱ་སྒོར་ཁྲི་ ༢༠༠ སྟོང་འཇལ་བྱ་རྒྱུ་བཅས་ཐག་གཅོད་བྱུང་ཡོད་འདུག
ཕྱི་ལོ་ ༢༠༠༠ ལོ་ནས་ད་བར་ལྷ་ཐོག་ཡུལ་ཚོའི་ནང་རྩྭ་ས་རྩོད་གླེང་གི་རྐྱེན་པས་མི་ ༤༠ ཙམ་འདས་གྲོངས་སུ་ཕྱིན་ཡོད་འདུག
གསར་འགོད་པ། དོན་གོ
ཡ །ས་རྩོད་དགོས་ས་མི་རྩོད་ནང་ཁུལ་རྩོད་པ་ནི་ངོ་མ་བློ་ཕམ་ཞིག་རེད །