ཉེ་ལམ་སི་ཁྲོན་ཁྲིན་ཏུའུ་ཡི་ཁྲིམས་ཁང་ཞིག་ནས་བོད་མི་རྡོར་ཕྲུག་ཞུ་བ་ཞིག་ལ་ལོ་ ༡༠ ཡི་བཙོན་འཇུག་ཁྲིམས་ཐག་བཅད་འདུག
འདས་ལོའི་ཕྱི་ཟླ་ ༡༢ ཚེས་ ༣ ཉིན། མགོ་ལོག་པདྨ་རྫོང་སེ་ལེ་ཐང་ཡུལ་ཚོའི་པད་ནག་དགོན་ཀ་དག་སྤྲོས་བྲལ་གླིང་གི་གྲྭ་བློ་བཟང་དགེ་འདུན་ལགས་ཀྱིས་རང་ལུས་མེར་བསྲེགས་གནང་བའི་ཉིན་དེར། རྒྱ་གཞུང་ཉེན་རྟོག་པས་མགོ་ལོག་ཁུལ་པད་མ་རྫོང་ནས་ཡིན་པའི་ཝ་ཤུལ་རྡོར་ཕྲུག་ཞུ་བ་ཞིག་འཛིན་བཟུང་བྱས་ཡོད་པ་དང་། དེ་ནས་བཟུང་ཁོང་གར་ཡོད་ཅི་བྱུང་གི་གནས་ཚུལ་ཤེས་རྟོགས་མེད་པར་ཡུན་རིང་ལྷག་ཡོད་ཀྱང་། ཟླ་ ༥ ཚེས་ ༢༠ ཉིན་སི་ཁྲོན་ཁྲིན་ཏུའུ་ཡི་ཁྲིམས་ཁང་ཞིག་ནས། བློ་བཟང་དགེ་འདུན་ལགས་ཀྱིས་རང་ལུས་མེར་བསྲེགས་སྐབས་ཁོང་གིས་ཉེན་རྟོག་པས་སྐུ་ཕུང་བཙན་འཁྱེར་བྱེད་པར་བཀག་འགོག་བྱས་པ་དང་། ༢༠༠༨ དང་ ༢༠༠༩ ལོའི་བོད་མིའི་ཞི་རྒོལ་ནང་མཉམ་ཞུགས་བྱས་པ་བཅས་ཀྱི་ཉེས་མིང་འོག་ལོ་ ༡༠ ཡི་བཙོན་འཇུག་ཁྲིམས་ཐག་བཅད་འདུག
ཝ་ཤུལ་རྡོར་ཕྲུག་ལགས་རང་ལོ ༥༧ ཡིན་ཞིང་། ཁོང་གི་བཟའ་ཟླའི་མིང་ལ་སྐར་མ་སྐྱིད་ཟེར་བ་དང་། ཁོང་གཉིས་ལ་བུ་བུ་མོ་གཉིས་ཡོད་པ་ལས། བུ་མོ་སྐལ་བཟང་སྒྲོལ་མ་ལོ་ ༡༩ དང་བུ་དཀོན་མཆོག་རྡོ་རྗེ་ལོ་ ༡༣ ཡིན་འདུག རྡོར་ཕྲུག་ལགས་ཀྱི་ཕ་མ་གཉིས་རང་ལོ་ ༧༠ ལྷག་ཡིན་པ་དང་། ཁོང་ཁྱིམ་མི་ཚང་མ་མགོ་ལོག་པད་མ་རྫོང་དུ་གནས་སྡོད་ཀྱིས་ཞིང་ལས་གཉེར་ཏེ་འཚོ་བ་སྐྱེལ་བཞིན་ཡོད་འདུག་ལ། རྒྱུན་དུ་སྡེ་བའི་ནང་རྩོད་རྙོག་རིགས་བྱུང་སྐབས་རྡོར་ཕྲུག་ལགས་ཀྱིས་གཟུ་པ་བྱེད་པ་སོགས་སྤྱི་ཚོགས་ཀྱིས་བརྩི་མཐོང་འཇོག་ས་ཞིག་ཡིན་འདུག
