དུས་དབང་བཀག་འགོག་བྱས་འདུག

རྒྱ་ནག་གཞུང་གིས་བྲག་དཀར་བློ་བཟང་ཆོས་ཀྱི་ཉི་མ་མཆོག་གི་དུས་འཁོར་དབང་ཆེན་གསུང་རྒྱུར་བཀག་འགོག་བྱས་ཡོད་པ་མ་ཟད། ཆོས་ཞུ་བ་རྣམས་ཕྱིར་ལོག་དགོས་པའི་བཙན་བཀའ་བཏང་འདུག

བསོད་ནམས་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཟླ་འདིའི་ཕྱི་ཚེས་ ༡༧ ཉིན་ནས་བཟུང་བོད་མདོ་སྨད་མཚོ་སྔོན་ཞིང་ཆེན་མཚོ་ལྷོ་ཁུལ་འབའ་རྫོང་དུ་ས་གནས་དད་ལྡན་པ་དང་ཤ་སྦྲང་ཚོ་དྲུག་གི་མི་མང་རྣམས་ཀྱིས་ཇི་ལྟར་གསོལ་འདེབས་ཞུས་དོན་ལྟར། ༸སྐྱབས་རྗེ་དུས་འཁོར་བ་བྲག་དཀར་རིན་པོ་ཆེ་བློ་བཟང་ཆོས་ཀྱི་ཉི་མ་མཆོག་གིས། དད་ལྡན་ཁྲི་ཕྲག་བརྒལ་བར་དུས་འཁོར་དབང་ཆེན་གསུང་ཆེད་དཀྱིལ་འཁོར་སོགས་བླུགས་ཏེ་གྲྭ་སྒྲིག་ཆ་ཚང་བྱས་རྗེས། ས་གནས་ཉེན་རྟོག་པ་དང་དམག་མི་ཡོང་སྟེ་དུས་འཁོར་དབང་ཆེན་གསུང་མི་ཆོག་པའི་བཀའ་རྒྱ་བཏང་ཡོད་པ་མ་ཟད། ཕྱོགས་མཐའ་ཁག་ནས་ཡོང་བའི་ཆོས་ཞུ་བ་ཚོར་ཕྱིར་རང་ཡུལ་དུ་ལོག་དགོས་པའི་བཙན་བཀའ་བཏང་སྟེ། དུས་དབང་གི་ཚབ་དུ་དཔལ་དུས་ཀྱི་འཁོར་ལོའི་སྦྱིའི་བཀའ་དབང་མདོར་བསྡུས་ཤིག་གསུངས་དགོས་བྱུང་འདུག

ཐེངས་འདིའི་ཉིན་གྲངས་གསུམ་རིང་གི་དུས་འཁོར་དབང་ཆེན་ཐད་ཤ་སྦྲང་ཚོ་དྲུག་གི་ཡ་གྱལ་ཕྱིས་རྒྱལ་ཚོ་སྟེང་བདུན་གྱིས་སྔར་ལོ་ནས་བླ་མར་སྐྱབས་འཇུག་ཞུས་པ་དང་། རྒྱ་སྒོར་ཁྲི་ ༣༠ ལྷག་འགྲོ་གྲོན་བཏང་སྟེ་གྲ་སྒྲིག་ཆ་ཚང་བྱས་གྲུབ་ཏེ་རྒྱ་ནག་གཞུང་ལ་ཆོག་མཆན་ཞུས་སྐབས་ངོས་ལེན་བྱས་མི་འདུག   ཉེ་ལམ་བྲག་དཀར་རིན་པོ་ཆེ་བློ་བཟང་ཆོས་ཀྱི་ཉི་མ་མཆོག་གིས་དད་མང་ཚོགས་ཀྱི་རེ་འདུན་ལྟར་སྟ་གོན་དང་བཅས་དཔལ་དུས་ཀྱི་འཁོར་ལོའི་སྤྱི་བཀའི་དབང་དང་ཚེ་དབང་ཚེ་སྒྲུབ་བཅས་གནང་རྗེས། ཕྱི་ཚེས་ ༢༠ ཉིན་བྲག་དཀར་སྤྲེལ་རྫོང་དགོན་དུ་ཕེབས་ཡོད་འདུག

 ༸སྐྱབས་རྗེ་དུས་འཁོར་བ་བྲག་དཀར་བློ་བཟང་ཆོས་ཀྱི་ཉི་མ་མཆོག་ད་ལྟ་དགུང་ལོ་ ༩༢ ཕེབས་ཡོད་པ་དང་། ཁོང་ནི་མཚོ་སྔོན་ཞིང་ཆེན་རྩི་གོར་ཐང་རྫོང་བྲག་དཀར་སྤྲེལ་རྫོང་དགོན་པའི་དགོན་བདག་བླ་མ་ཡིན་འདུག 

 གསར་འགོད་པ། དོན་གོ