ཉེ་ཆར་ཚེས་ ༢༠ ཉིན་རྔ་པ་མཛོད་དགེ་རྫོང་ཐང་སྐོར་སོག་ཚང་དགོན་པའི་རྒྱལ་གཅེས་དཔའ་བོ་གྲྭ་དཀོན་མཆོག་བསོད་ནམས་ལགས་ཀྱིས་རང་ལུས་མེར་བསྲེགས་ཀྱིས་རྒྱ་གཞུང་གི་སྲིད་ཇུས་ལ་ངོ་རྒོལ་གནང་སྟེ་འདས་གྲོངས་སུ་གྱུར་རྗེས། རྒྱ་གཞུང་གིས་མཛོད་དགེ་ཐང་སྐོར་སོག་ཚང་དགོན་པའི་དགེ་འདུན་པ་དང་སོག་ཚང་ཡུལ་ཚོའི་ཡུལ་མི་མང་པོ་གང་བྱུང་འཛིན་བཟུང་བཙན་ཁྲིད་བྱེད་ཀྱིན་ཡོད་འདུག
ཕྱི་ཚེས་ ༢༠ ཉིན་གྱི་མཚན་མོར། རྒྱ་གཞུང་གི་ཉེན་རྟོག་པས་སོག་ཚང་དགོན་པའི་གྲྭ་བསྟན་འཛིན་རྒྱ་མཚོ་ལགས་འཛིན་བཟུང་བཙན་འཁྲིད་བྱས་ཡོད་པ་དང་། ཕྱི་ཚེས་ཚེས་ ༢༡ གི་དགོང་མོའི་ཆུ་ཚོད་ ༡༠ པ་ཙམ་ལ་སོག་ཚང་དགོན་པའི་རང་ལོ་ ༢༠ ཡིན་པའི་གྲྭ་དཔལ་ལྡན་རྒྱ་མཚོ་ལགས་འཛིན་བཟུང་བཙན་ཁྲིད། ཚེས་ ༢༣ ཉིན་གྱི་ཞོགས་པ་སྔ་བོ་ཆུ་ཚོད་ ༥ པ་ཙམ་ལ་རང་ལོ་ ༢༥ ཡིན་པའི་སངས་རྒྱས་དཔལ་ལྡན་རང་ཁྱིམ་ནས་བཙན་ཁྲིད། ཁ་སང་ཚེས་ ༢༤ ཉིན་གྱི་ཉིན་རྒྱབ་ཆུ་ཚོད་ ༢ པ་ཙམ་ལ་གྲྭ་དཔལ་ལྡན་དབྱིག་གཉེན་བཙན་ཁྲིད་བྱས་ཡོད་འདུག ཁོང་ཅག་འཛིན་བཟུང་བྱས་ཏེ་ད་ལྟའི་བར་ནང་མི་ཚོས་གར་ཡོད་ཅི་ཆགས་ཀྱི་གནས་ཚུལ་གཅིག་ཀྱང་ཤེས་རྟོགས་མ་ཐུབ་པར་སེམས་ཁྲལ་བྱེད་བཞིན་ཡོད་འདུག དེ་རིང་སྔ་དྲོར་སླར་ཡང་སོག་ཚང་དགོན་པའི་གྲྭ་རབ་གསལ་ལགས་ཀླུ་སྒྲུབ་བཟོད་པ་གཉིས་འཛིན་བཟུང་བཙན་ཁྲིད་བྱས་ཡོད་འདུག
གཞན། དེ་སྔ་གནས་ཚུལ་སྤེལ་ཟིན་པ་ལྟར། དཀོན་མཆོག་བསོད་ནམས་ལགས་ཀྱིས་རང་ལུས་མེར་བསྲེགས་མ་གནང་གོང་སྟེ། ཟླ་འདིའི་ཚེས་ ༧ ཉིན་ཐང་སྐོར་སོག་ཚང་དགོན་པའི་གྲྭ་བ་དགེ་ལེགས་ཆོས་འཕེལ་དང་། བློ་བཟང་ཆོས་འབྱོར། དེ་བཞིན། ཐང་སྐོར་རུ་ཁག་གཉིས་པའི་མི་སྐྱ་སྐལ་བཟང་དབྱིག་གཉེན་བཅས་རྒྱ་གཞུང་གིས་འཛིན་བཟུང་བཙན་ཁྲིད་བྱས་རྗེས། ནང་མི་ཚོས་ད་ལྟའི་བར་གར་ཡོད་ཅི་ཆགས་ཀྱི་གནས་ཚུལ་ཤེས་རྟོགས་མ་ཐུབ་པར་སེམས་ཁྲལ་ཆེན་པོ་བྱེད་ཀྱིན་ཡོད་འདུག
གྲྭ་དཀོན་མཆོག་བསོད་ནམས་ལགས་ཀྱིས་རང་ལུས་མེར་བསྲེཊ་གནང་རྗེས། རྒྱ་གཞུང་གིས་ས་གནས་དེ་ཁུལ་གྱི་བརྡ་འཕྲིན་བཀག་ཡོད་པ་དང་། མཛོད་དགེ་ཐང་སྐོར་ཞང་དུ་དམག་མི་དང་ཉེན་རྟོག་པ་འགྲེམས་འཇོག་བྱས་ཏེ་དགོན་གྲོང་གཉིས་ལ་དམ་དྲག་ཆེན་པོ་བྱེད་བཞིན་ཡོད་འདུག
གྲྭ་དཀོན་མཆོག་བསོད་ནམས་ལགས་ཀྱི་དགེ་རྒན་དང་ཨ་མ། སྤུན་མཆེད་སོགས་ཕྱི་ཚེས་ ༢༡ ཉིན་གྱི་ཕྱི་དྲོར་འཛིན་བཟུང་བྱས་ཏེ་འདྲི་རྩད་བྱས་རྗེས་ཚེས་ ༢༢ ཉིན་གྱི་ཞོགས་པར་ཕྱིར་གློད་གྲོལ་བཏང་ཡོད་འདུག སྔ་ཕྱིར་ཐང་སྐོར་དགོན་གྲོང་གཉིས་ཀྱི་སྐྱ་སེར་ ༡༤ ཙམ་རྒྱ་གཞུང་གིས་འཛིན་བཟུང་བྱས་ཏེ་གར་ཡོད་ཅི་ཆགས་ཀྱི་གནས་སྟངས་ཤེས་རྟོགས་མེད་པ་ཆགས་ཡོད་པ་རེད།
