བོད་ནས་གནས་ཚུལ་འབྱོར་གསལ་ལྟར་ན། ཕྱི་ཟླ་༨ ཚེས་ ༣ ཉིན་ཁམས་ནག་ཆུ་ཁུལ་ནས་དམག་མིའི་རླངས་འཁོར་ ༢༠ ཙམ་ཤག་རོང་པོ་དགོན་པར་བསྐྱོད་ཡོད་པའི་གནས་ཚུལ་འདུག
ངག་དབང་ཐར་པ་ལགས་ཀྱིས་གནས་ཚུལ་བཏང་འབྱོར་ལྟར་ན། དམག་མི་དེ་དག་ཕྱི་ཟླ་༨ ཚེས་ ༣ ཉིན་དམག་སྒར་ཤག་ཆུ་ཁ་ལ་གུར་ཕུབ་ནས་ཞགས་སྡོད་བྱས་ཡོད་པ་དང་། ཤག་རོང་པོ་དགོན་པ་དང་ཤག་ཆུ་གྲོང་རྡལ་གཉིས་བར་ཀི་ལོ་མི་ཊར་ ༡༥ ཙམ་ལས་མེད་ཅིང་། དེར་ཁྱོན་རྒྱ་དམག་ ༢༠༠ ཙམ་ཡོད་པ་དང་། དེའི་ནང་ལ་དམག་མི་དང་སྨན་པ་གཉིས་ཀ་ཡོད་པ་མ་ཟད། དེ་ནི་ཛ་དྲག་དམག་མིས་དགོན་པར་དྲག་གནོན་བྱེད་རྒྱུར་གྲ་སྒྲིག་ཡོད་པའི་ཚོད་དཔག་བྱེད་ཀྱིན་ཡོད་འདུག
དགོན་པ་སྒོ་མ་བརྒྱབ་སྔོན་ནག་ཆུའི་འཆར་ཅན་རྟ་རྒྱུག་ཅེས་སྲིད་གཞུང་གི་གོ་སྒྲིག་འོག དབྱར་སྐྱིད་གཏོང་ལ་ཉེ་བའི་སྐབས་སུ། སྲིད་གཞུང་གི་མགྲོན་བརྡ་གཏང་བའི་སྟར་ཆེན་ཞང་གི་གཞས་དང་ཞབས་བྲོ་རྒྱག་མཁན་མི་ ༥༠ ཙམ་ཡོད་ཀྱང་། ཁོང་ཚོས་ཕྱི་ཟླ་ ༧ ཚེས་ ༣༠ ཉིན་དགོན་པ་སྒོ་རྒྱབ་པ་དང་། བླ་མ་དང་གྲྭ་པར་སུན་བཙེར་བྱས་པ་ཐོས་འཕྲལ། ང་ཚོའི་བླ་མ་དགོན་པར་ཕེབས་མི་ཆོག་པ་དང་གྲྭ་པ་རྣམས་དགོན་པ་དང་ཁ་བྲལ་དགོས་བྱུང་འདུག ད་གང་གསོན་པོའི་སྐྱབས་འཇུག་ཞུ་ཡུལ་དང་། ཤི་བོའི་བསྔོ་རྟེན་ཕུལ་ས་མེད་པའི་གནས་སྐབས་སུ། ང་ཚོ་གཞས་དང་ཞབས་བྲོ་འཁྲབ་ཐབས་བྲལ་སོང་ཟེར་ནས། སྲིད་གཞུང་ལ་དགོངས་པ་ཞུས་ཀྱང་། སྲིད་གཞུང་གིས་བཤད་དོན། ཁྱེད་ཚོ་ངེས་པར་དུ་དབྱར་སྐྱིད་ལ་མཉམ་ཞུགས་དགོས་པ་མ་ཚད། གཞས་དང་ཞབས་བྲོ་གཏོང་དགོས་པ་དང་། བླ་མ་དང་དགོན་པའི་གནས་ཚུལ་དེ་ཚོ་ཉིན་ཤས་རྗེས་ནས་ཐག་ཆོད་འགྲོ་ཡི་རེད། དེ་ལྟར་མ་བྱས་པར་ཕྱིར་རང་ཡུལ་ལ་ལོག་ན། ཆབ་སྲིད་དང་འབྲེལ་བའི་ནག་ཉེས་ཆགས་རྒྱུ་ཡིན་སྐོར་བརྗོད་འདུག
ཁོང་ཚོ་འུ་ཐུག་ཐབས་ཟད་ཀྱིས་སྲིད་གཞུང་ལ་སྤྱིར་བཏང་གཞས་དང་ཞབས་བྲོ་དང་། རྟ་རྒྱུག་མདའ་འཕེན་སོགས་ནི། དགའ་དགའ་སྐྱིད་སྐྱིད་ཀྱི་རྣམ་འགྱུར་ཞིག་ཡིན་པ་ལས། ད་ཆ་འདི་ལྟ་བུའི་སྐབས་ལ་དེ་འདྲ་རྩ་བ་ནས་མི་ཡོང་ཞེས་བརྗོད་པ་དང་སྦྲགས། མཛུབ་ཐེལ་བརྒྱབ་ནས་ནག་ཆུ་ནས་ཕྱིར་རང་ཡུལ་ལ་ལོག་ཡོད་འདུག
དགོན་པ་ཁ་སྔོན་བཞིན་སྒོ་བརྒྱབ་ཡོད་པའི་ཐོག རྒྱ་གཞུང་གིས་ནག་ཆུའི་དབྱར་སྐྱིད་ནས་ཕྱིར་ལོག་མཁན་དེ་དག་ལ་སུན་བཙེར་དང་། སྡིག་ར་སྐུལ་བཞིན་འདུག་ལ་ས་གནས་མང་ཚོགས་རྣམས་འཇིགས་སྣང་དང་དངངས་སྐྲག་བཅས་ཀྱི་ འོག་གནས་མུས་ཡིན་འདུག
