རྒྱ་ནག་གཞུང་གིས་ཁས་ལད་ཅེས་པའི་ནད་ཡམས་ཞིག་ལ་ཁ་གཡར་ཏེ། གཞིས་ཀ་རྩེའི་མངའ་ཁོངས་ལྷ་རྩེ་དང་ངམ་རིང་བཅས་ཀྱི་མི་མང་གི་སྒོ་ཕྱུཊ་རྣམས་བཙན་དབང་གིས་གསོན་སྦས་བྱེད་ཀྱི་ཡོད་འདུག
རྒྱ་གར་ལྷོ་ཕྱོགས་སེར་བྱེས་གྲྭ་ཚང་གི་གྲྭ་བསྟན་འཛིན་ཆོས་འབྱོར་ལཊ་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཉེ་ལམ་རྒྱ་ནག་གཞུང་གིས་བོད་རང་སྐྱོངས་ལྗོངས་གཞིས་ཀ་རྩེའི་མངའ་ཁོངས་ལྷ་རྩེ་རྫོང་དང་ངམ་རིང་རྫོང་གི་སྒོ་ཕྱུཊ་སེམས་ཅན་ཉུང་ཤས་ཤིག་ལ་ “ ཁས་ལད ” ཅེས་པའི་ནད་ཡམས་ཤིག་འགོས་ཡོད་ཚུལ་བསྒྲགས་འདུག རྗེས་སུ་ ས་གནས་གྲོང་ཚོ་ཁག་གི་སྤྱི་མི་དང་བརྒྱ་དཔོན་ཚོས་ས་གནས་སྲིད་གཞུང་ལ་ནད་ཡམས་འགོག་ཐབས་སུ་སྨན་བཅོས་རོགས་སྐྱོེར་བྱེད་དགོས་པའི་རེ་སྐུལ་ཞུས་ཡོད་ཀྱང་། ས་གནས་ལས་བྱེད་ཚོས་མི་མང་གི་བསམ་ཚུལ་ལ་ཡ་ལན་བྱས་མེད་པ་མ་ཟད། ཟླ་འདིའི་ཚེས་ ༢ ཉིན་ས་གནས་ལས་བྱེད་ཚོས་ལྷ་རྩེ་རྫོང་ཆོས་མ་ཤང་དང་རྒྱན་མདའ། ཐང་ཀ་གྲོང་སྡེ་བཅས་སུ་ཡོང་སྟེ་མཛོ་ ༡༤ དང་། གཡག་ ༢ བཅས་ལ་ཕྱི་ཚུལ་ནས་མེ་མདའ་བརྒྱབ་ཙམ་བྱས་རྗེས་བཙན་གྱིས་གསོན་སྦས་བྱས་ཡོད་འདུག
ཕྱི་ཚེས་ ༧ ཉིན་གྱི་མཚན་མོར་རྒྱ་གཞུང་གི་ལས་བྱེད་དང་དམག་མིའི་རླངས་འཁོར་ཆུང་བ་ ༤ དང་ས་སྔོག་བྱེད་ཀྱི་འཕྲུལ་ཆས་ (JCB) བཞི་བཅས་ངམ་རིང་རྫོང་ཁོངས་སུ་ཡོང་སྟེ། ནད་ཡམས་ཡོད་མེད་ཀྱི་བརྟག་དཔྱད་ཅི་ཡང་མི་བྱེད་པར་མི་མང་གི་སྒོ་ཕྱུཊ་ ༦༨ གསོན་སྦས་དང་། ཚེས་ ༨ ཉིན་མདོག་ལྷོ་གྲོང་མཚོའི་ཕྱུཊ་རྫིའི་ལག་ནས་མཛོ་མོ་དང་བ་ཕྱུགས་གྲངས་ ༢༡ བཙན་འཕྲོག་གིས་གསོན་སྦས་བྱས་ཡོད་འདུག ཕྱི་ཚེས་ ༩ ཉིན་སྤེལ་མར་གྲོང་ཚོའི་སྒོ་ཟོག་ ༥༨ གསོན་སྦས་བྱས་པ་དང་གྲོང་ཚོ་གཞན་གྱི་ཕྱུགས་ཟོག་གསོད་དུ་འགྲོ་སྐབས། ཡུལ་མི་ཚོས་རླངས་འཁོར་གྱི་འགྲོ་ལམ་བཀག་ཏེ་ངོ་རྒོལ་བྱས་ཡོད་འདུག་མོད། སྐབས་དེར་ས་གནས་ཀྱི་ལས་བྱེད་དང་རྒྱ་དཔོན་ཚོས་སྒོ་ཟོག་གསོད་རྒྱུར་བཀག་འགོག་བྱེད་མཁན་སུ་ཡིན་ཡང་ཚེ་བཙོན་གྱི་ཁྲིམས་ཐག་གཅོད་རྒྱུའི་ཁྱབ་བསྒྲགས་བྱས་ཡོད་པ་མ་ཟད། ཕྱི་ཚེས་ ༡༠ ཉིན་གྱི་མཚན་ཆུ་ཚོད་ ༤།༠༠ ཡས་མས་སུ་སྤྱི་བདེ་ཉེན་རྟོག་པས་གཞུང་གི་བཀའ་དང་ལེན་མ་བྱས་པའི་ཉེས་མིང་འོག རྒྱན་མདའ་གྲོང་པའི་སྐལ་བཟང་ཞུ་བ་འཛིན་བཟུང་བྱས་ཏེ། ད་ཆར་གར་ཡོད་མ་ཤེས་པར་ལྷག་འདུག
ཁ་སང་ཕྱི་ཚེས་ ༡༢ ཉིན་རྒྱ་ནག་གཞུང་གིས་ཐང་ཀ་གྲོང་སྡེའི་མཛོ་དང་གཡག་ ༥༢ གསོན་སྦས་བྱ་རྒྱུ་དང་། ད་དུང་ས་གནས་ཀྱི་ཕྱུགས་ཟོག་ལྷག་མ་རྣམས་གསོད་རྒྱུའི་གསལ་བསྒྲགས་གནང་སྟབས། ས་གནས་ཡུལ་མི་རྣམས་མཉམ་དུ་འཛོམས་ཏེ་ཞུ་བ་བྱས་ཡོད་འདུག་ལ། སྐབས་དེར་ས་གནས་ལས་བྱེད་ཚོས་གནས་སྐབས་རིང་མི་མང་ལ་འགན་ལེན་མཚན་རྟགས་དང་མཛུབ་ཐེལ་རྒྱག་བཅུག་རྗེས་ཕྱུགས་ཟོག་གསོད་རྒྱུ་མཚམས་འཇོག་བྱས་ཡོད་ཀྱང་། ད་ལྟའི་ཆར་ས་གནས་ཀྱི་ལས་བྱེད་དང་དམག་མིས་མི་མང་གི་འགྲོ་འོང་ལ་བཀག་སྡོམ་དང་ལྟ་རྟོག་བྱེད་ཀྱིན་པར་མ་ཟད། ཉེ་འཁོར་ས་གནས་གཞན་ཁག་གི་མི་མང་དངངས་སྐྲག་ཁྲོད་ལྷག་ཡོད་འདུག
