ལས་ཁུངས་ཁག་གིས་ཀྱང་རང་ཁ་རང་གསོ་ཡོང་ཐབས་ལ་འབད་དགོས།

དེ་རིང་སྔ་དྲོར་གངས་སྐྱིད་དུ་ས་གནས་མགོ་འཛིན་གྱི་འཛིན་སྐྱོང་ཚོགས་འདུ་ཐེངས་དགུ་བ་དེ་དབུ་འཛུགས་གནང་བའི་ཐོག་ནང་སྲིད་བཀའ་བློན་མཆོག་གིས་ས་གནས་ཁག་གི་རྩིས་ཞིབ་སྙན་ཐོ་དང་ལས་དོན་ཅི་བྱས་གསལ་བོ་བཟོ་དགོས་པའི་ལམ་སྟོན་གནང་སོང་།

དེ་རིང་སྔ་དྲོའི་ཆུ་ཚོད་༩།༠༠ སྟེང་། བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གོ་སྒྲིག་འོག གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ། ནང་སྲིད་ཁྱབ་ཁོངས་འོག་གི་རྒྱ་བལ་འབྲུག་གསུམ་བོད་མིའི་གཞིས་ཆགས་དང་། ཁ་འཐོར་ས་གནས་ཁག་གི་ས་གནས་མགོ་འཛིན་རྣམ་པའི་འཛིན་སྐྱོང་ལས་དོན་དང་འབྲེལ་བའི་ཚོགས་ཆེན་ཐེངས་ ༩ པ་དེ་དབུ་འཛུགས་གནང་ཡོད་པ་དང་། ཐེངས་འདིའི་ཚོགས་ཆེན་ཐོག་ས་གནས་ཁག་ ༤༢ ནས་ཕེབས་ཡོད་ཅིང་། ཚོགས་འདུ་དབུ་འབྱེད་ཐོག་སྲིད་སྐྱོང་བློ་བཟང་སེང་གེ་མཆོག་གིས་དབུས་བཀའ་བློན་རྣམ་པ་དང་། ལྷན་ཁང་ཁག་གི་དྲུང་ཆེ་དང་སྡེ་ཚན་འགན་འཛིན་རྣམ་པ་བཅས་ཕེབས་འདུག

སྐབས་དེར་ནང་སྲིད་བཀའ་བློན་རྒྱ་རི་སྒྲོལ་མ་མཆོིག་གིས་གསུང་བཤད་གནང་དོན། “ འཛིན་སྐྱོང་ནང་གཅིག་ནས་ལས་དོན་ཚེགས་ཚུད་ཡོང་དགོས་པ་དང་། གཉིས་ནས་རྩིས་ཀྱི་ཐོག་ནས་གཙང་མ་ཞིག་མ་བྱུང་བ་ཡིན་ན། ལས་ཀ་ཡག་པོ་ཅི་ཙམ་བྱས་ཀྱང་ལས་འགན་འགྲུབ་ཐུབ་ཡོད་པ་མ་རེད། དེའི་ཕྱིར་ད་ལྟ་ནས་ཚགས་ཚུད་དང་ཕྱི་གསལ་ནང་གསལ་དགོས་པ་དང་། ལྷག་པར་དུ་༸གོང་ས་མཆོག་གིས་དུས་ནས་དུས་སུ་བཀའ་གནང་བ་དེ་ཚོ་སྙིང་ལ་བཅངས་ཏེ། དྲང་བདེན་དང་ཕྱི་གསལ་ནང་གསལ། དམངས་གཙོའི་འགྲོ་ལུགས་དང་མཐུན་པའི་ཐོག་ནས་ཆིག་སྒྲིལ་གྱི་ནུས་པ་འདོན་པ། གསར་གཏོད་ག་རེ་བྱེད་རྒྱུ་འདུག སྲིད་སྐྱོང་མཆོག་གིས་དབུ་ཁྲིད་པའི་འཛིན་སྐྱོང་བཀའ་ཤག་གི་ལྟ་གྲུབ་རང་ཁ་རང་ གསོའི་ཐད། མི་མང་ལ་མར་རང་ཁ་རང་གསོ་དགོས་པ་རེད་ཅེས་ལབ་པ་ལས། ང་ཚོ་འགན་འཁུར་མཁན་ཚོའི་ངོས་ནས་སྒྲིག་འཛུགས་རང་ཁ་རང་གསོ་ཡོང་ཐབས་དང་། ས་གནས་མགོ་འཛིན་ལས་ཁུངས་སོ་སོ་རང་ཁ་རང་གསོ་ཡོང་ཐབས་ལ་ག་རེ་བྱེད་དགོས་ཀྱི་འདུག ད་ལྟ་བལྟས་པ་ཡིན་ན། ས་གནས་མགོ་འཛིན་སུམ་ཅུ་སོ་གྲངས་ཤིག་གི་དངུལ་རྩིས་དེ་དབུས་ལ་ཞུ་དགོས་པ་ཆགས་ཡོད་པ་དང་། དབུས་ནང་སྲིད་ལས་ཁུངས་ཀྱང་རང་ཁ་རང་གསོའི་གནས་སྟངས་ཡག་པོ་ཞིག་བྱུང་ཡོད་པ་མ་རེད།  ཡིན་ནའང་། བོད་མིའི་སྒྲིག་འཛུགས་སྤྱི་ཡོངས་ཀྱི་དཔལ་འབྱོར་གནས་སྟངས་སྐྱོ་བོ་རེད་ ཅེས་ཞུ་ཡི་མེད། ད་ལན་གྱི་འཛིན་སྐྱོང་ཚོགས་འདུ་འདི་གལ་ཆེན་དུ་རྩི་བཞིན་ཡོད་པ་ལྟར་ཚོགས་ཐོག་ཏུ་ང་ཚོ་ཚང་མས་འགན་འཁུར་ཏེ་གསལ་བོ་ཡག་པོ་ཞིག་ཡོང་ཐུབ་པའི་རེ་བ་ཡོད། ”ཅེས་གསུངས་པ་དང་འབྲེལ། ས་གནས་ཁག་ནས་རྩིས་ཞིབ་སྙན་ཐོ་རྣམས་དུས་ཐོག་ཏུ་ཁ་གསལ་བཟོ་དགོས་པ་དང་། རྩིས་ལེན་རྩིས་འབུལ་སྐབས་ཡིག་ཆ་རྩིས་སྤྲོད་ཙམ་མ་ཡིན་པར་ལས་དོན་རྩིས་སྤྲོད་ཐུབ་པ་དགོས་རྒྱུ་གལ་ཆེན་ཡིན་སྐོར་སོགས་གསུངས་སོང་།

དེ་རྗེས་སྲིད་སྐྱོང་བློ་བཟང་སེང་གེ་མཆོག་གིས་སྤྱིར་བཏང་བཀའ་ཤག་གིས་གཟིགས་སྐྱོང་གནང་གི་ཡོད་ཀྱང་། ཉིན་རེ་བཞིན་ས་གནས་ཁག་གི་གནས་ཚུལ་རྣམས་གདོང་ལེན་གནང་མཁན་དེ་ས་གནས་མགོ་འཛིན་རྣམས་ཆགས་ཡོད་སྟབས། བཀའ་ཤག་གི་ངོས་ནས་རྒྱུན་དུ་རྒྱབ་སྐྱོར་དང་ཡིད་ཆེས་གཙང་མ་ཡོད་པ་ལྟར། ས་གནས་མགོ་འཛིན་རྣམས་པའི་ཉམས་མྱོང་གཞིར་བཟུང་མ་འོངས་ཕྱག་ལས་གནང་སྟངས་ཐོག་སྙིགས་དོར་བཅུད་ལེན་གྱིས་ཕན་ཚུན་བཀའ་སྡུར་ཡོང་ཆེད་ད་ལན་གྱི་ཚོགས་འདུ་དེ་གོ་སྒྲིག་བྱས་ཚུལ་དང་།  དེ་བཞིན། འདས་པའི་ལོ་གཉིས་རིང་ཚང་མའི་འབད་བརྩོན་ལ་ བརྟེན་ནས་སྔར་ལྟར་ཕྱག་ལས་ཚགས་ཚུད་དང་སྤྱི་ཚོགས་ལྷིང་འཇགས་ཡོང་ཡོད་པ་རྒྱུན་འཁྱོངས་དགོས་པ། ས་གནས་མགོ་འཛིན་རྣམས་པས་དབུ་ཁྲིད་དེ་མི་མང་ནང་དབུ་མའི་ལམ་གྱི་གོ་རྟོགས་སྤེལ་རྒྱུ་གལ་ཆེན་ཡིན་སྐོར་སོགས་གསུངས་སོང་།

ཐེངས་འདིའི་ཚོགས་ཐོག་ཏུ་ས་གནས་མགོ་འཛིན་རྣམས་པས་ཚོགས་ཆེན་ཐེངས་ ༨ པའི་གྲོས་ཆོད་ཁག་ལག་བསྟར་ཇི་བྱུང་སྐོར་སྙན་གསེང་ཞུ་རྒྱུ་དང་། ཉམ་ཐག་ལ་ལྟ་སྐྱོང་བྱེད་ཕྱོགས་ཀྱི་སྲིད་བྱུས་ལ་བསྐྱར་ཞིབ། གཞིས་ས་བདག་འཛིན་དང་རང་ཁ་རང་གསོ། དེ་བཞིན། ལས་བསྡོམས་ཞིབ་ཚགས་སླད་མགོ་འཛིན་རྣམས་པས་ཉིན་དེབ་འབྲི་ཉར་གནང་ཕྱོགས། སྔོན་རྩིས་སྟངས་འཛིན་དང་རྩིས་ཞིབ་སྙན་ཐོར་ཐུགས་ཞིབ། མང་ཚོགས་རྩིས་ཁྲ་ཚོགས་ཆུང་སྐབས་ལྔ་པའི་སྙན་ཐོ་ཁག་ལ་ལན་འདེབས་གསལ་བཤད་ཞུ་ཕྱོགས་སོགས་ཀྱི་ཐོག་བཀའ་བསྡུར་གནང་རྒྱུ་ཡིན་པ་དང་། ཉིན་མཐའ་མར་བོད་མིའི་སྒྲིག་འཛུགས་ཀྱི་བློན་ཆེན་ལས་ཁུངས་བདུན་གྱི་ལས་དོན་དང་འབྲེལ་བའི་ལམ་སྟོན་གནང་རྒྱུ།

དེ་བཞིན། འཆར་ཟླ་ཚེས་ ༢ དང་ ༣ ལ་ཁན་ཡཱ་རཱ་ལམ་གྱི་ཀཱར་ནའི་ཀཱ་རི་སོར་ཊི་(Hotel Karnika Resort)གསོལ་མགྲོན་ཁང་དུ། ནང་སྲིད་ལས་ཁུངས་ཀྱི་གོ་སྒྲིག་འོག་དཔལ་འབྱོར་བཀའ་བློན་དང་བདེ་སྲུང་བཀའ་བློན། བཀའ་ཟུར་བསྟན་པ་ཚེ་རིང་བཅས་གདན་འདྲེན་གྱིས་བོད་མིའི་གཞིས་ཆགས་སྲ་བརྟན་དང་བདེ་འཇགས། དེ་བཞིན་བོད་དོན་འཐབ་རྩོད་གནང་ཕྱོགས། བོད་ནང་གི་འགྲོ་བ་མིའི་ཐོབ་ཐང་གི་གནས་བབ་སོགས་ཀྱི་ཐོག་ཟབ་སྦྱོང་ཞིག་ཀྱང་གོ་སྒྲིག་ཞུ་རྒྱུ་ཡིན་འདུག

གསར་འགོད་པ། པདྨ་མཚོ།