ཉི་ཧོང་གི་བོད་རིག་པ་ཞིབ་འཇུག་པ་ཞིག་གིས་ཉམས་མྱོང་གླེང་པ།

ཨ་རིའི་ཧར་ཝར་ཌི་(Harvard)གཙུག་ལག་སློབ་གྲྭར་བོད་རིག་པར་སློབ་སྦྱོང་དང་ཞིབ་འཇུག་གནང་བཞིན་པའི་ཉི་ཧོང་བ་མ་ཧོ་ཡའུ་ཅེ་ལགས་སུ། མོ་རང་གིས་བོད་རིག་པར་ཞིབ་འཇུག་གནང་བའི་བརྒྱུད་རིམ་དང་བོད་ཕྱི་ནང་གི་བོད་རིག་པའི་གནས་སྟངས་ཐོག་བཅར་འདྲི་ཞུས་པ།

 དྲི་བ། ཁྱེད་རང་ངོ་སྤྲོད་གནད་བསྡུས་ཤིག་གནང་རོགས་ཞུ།

ལན། ངའི་མིང་ལ་(Maho Iuchi)ཟེར། ང་ནི་ཉི་ཧོང་ཨོ་ས་ཀ་(Osaka)ནས་ཡིན། ཁྱའོ་ཐོ་(Kyoto)ལ་ཡོད་པའི་ཨོ་ཐ་ནི་(Otani)གཙུག་ལག་སློབ་གྲྭ་ཆེན་མོ་ནས་ ༢༠༠༨ ལོར་བོད་རིག་པའི་ཐོག་ལ་རིགས་གཅིག་རྐང་འཛིན་(Ph.D.)ཐོན་པ་ཡིན། ད་ལྟ་ཨ་མེ་རི་ཀའི་ཧར་ཝར་ཌི་གཙུག་ལག་སློབ་གྲྭ་ཆེན་མོར་(Post-doc)མིང་ཐོག་ནས་ཞིབ་འཇུག་བྱེད་བཞིན་ཡོད། ངའི་ཞིབ་འཇུག་བྱེད་ཡུལ་གཙོ་བོ་ནི་དུས་རབས་དགུ་པ་ནས་བཅུ་གསུམ་བར་གྱི་བོད་ཀྱི་ལོ་རྒྱུས་དང་། ལྷག་པར་དུ་བཀའ་གདམས་པའི་དགོན་སྡེའི་སྐོར་ཡིན།

དྲི་བ། ཁྱེད་རང་བོད་ཀྱི་སྐད་ཡིག་དང་རིག་གནས་ལ་འབྲེལ་བ་བྱུང་སྟངས་ཀྱི་བརྒྱུད་རིམ་ག་འདྲ་ཡིན།

ལན། ངས་དང་པོ་བོད་ཡིག་སྦྱོང་ས་ནི་ཉི་ཧོང་ཡིན། དངོས་གཞིའི་སློབ་མའི་སྐབས་སུ་ ༡༩༩༧ ལོར་འབྲུག་ཡུལ་ལ་ཕྱིན་པ་ཡིན། དེ་དུས་བོད་ཡིག་ལ་དོ་སྣང་བྱུང་སོང་། དེ་ནས་ ༡༩༩༨ ལོར་ལྷ་སར་ཕྱིན་ཏེ། བོད་ཡིག་སྦྱང་མགོ་བཙུགས་པ་ཡིན། སྐབས་དེར་ང་བུད་མེད་ཀྱི་སློབ་གྲྭ་ཆེན་མོ་ཞིག་ཏུ་རྒྱ་ནག་གི་ལོ་རྒྱུས་སློབ་སྦྱོང་བྱས་ཡིན། དེ་དུས་ཨོ་ཐ་ནི་གཙུག་ལག་སློབ་གྲྭ་ཆེན་མོར་བོད་ཡིག་དང་། བོད་ཀྱི་རིག་གནས། ནང་ཆོས་སོགས་ཀྱི་སློབ་ཚན་ཡོད་པ་མ་ཟད། བོད་ཀྱི་དགེ་རྒན་ཆེན་མོ་གཅིག་ཡོད་པ་ཐོས་ཏེ་ཞིབ་འཇུག་སློབ་མའི་མིང་ཐོག་ནས་ཨོ་ཐ་ནི་གཙུག་ལག་སློབ་གྲྭ་ཆེན་མོར་ཕྱིན་པ་ཡིན། ང་ཞིབ་འཇུག་སློབ་མ་ཡིན་པའི་སྐབས་སུ་ཨོ་ཐ་ནི་ལ་དགེ་རྒན་ཆེན་མོ་མཁས་དབང་ཁང་དཀར་ཚུལ་ཁྲིམས་སྐལ་བཟང་ལགས་ཡོད་པ་རེད། དེ་དུས་གཙོ་བོར་རྒན་ཁང་དཀར་ལགས་ཀྱི་མདུན་ནས་བོད་ཡིག་སུམ་རྟགས་དག་གསུམ་དང་། གཞན་ས་སྐྱ་ལེགས་བཤད། ལོ་ཆེན་རིན་ཆེན་བཟང་པོའི་རྣམ་ཐར་སོགས་བོད་ཀྱི་རིག་གནས་སྐོར་ལ་སློབ་སྦྱོང་ཅུང་ཟད་བྱས་པ་ཡིན། དེ་བས་ཀྱང་གོ་སྐབས་བཟང་པོ་ཞིག་ཐོབ་པ་ནི། ༢༠༠༣ ལོར་ལྷ་སར་ཡོད་པའི་བོད་ལྗོངས་སློབ་གྲྭ་ཆེན་མོར་བོད་ཀྱི་ཁ་སྐད་སྦྱོང་དུ་ཕྱིན་ཏེ། དེ་དུས་ཁ་སྐད་དང་མཉམ་དུ་བོད་ཡིག་གི་ཡིག་གཟུགས་ཀྱང་སྦྱངས་པ་ཡིན།

དྲི་བ། ཁྱེད་རང་གིས་བོད་ཀྱི་ལོ་རྒྱུས་སྤྱི་དང་བྱེ་བྲག་བཀའ་གདམས་པའི་ལོ་རྒྱུས་སྐོར་ལ་ཉམས་ཞིབ་བྱས་པའི་ལས་རིམ་དང་དམིགས་ཡུལ་སྐོར་རོབ་ཙམ་གསུངས་རོགས། 

ལན། ཕྱི་ལོ་ ༢༠༠༥ ནས་ ༢༠༠༧ ལོའི་བར་ལྷ་སར་བསྡད་དེ་ཞིབ་འཇུག་གི་གོ་སྐབས་བཟང་པོ་ཐོབ་སོང་། དེ་ང་རང་གི་གཅིག་རྐང་འཛིན་ (Ph.D.) གྱི་དཔྱད་རྩོམ་ཆེད་དུ་ཡིན་ལ། དཔྱད་རྩོམ་གྱི་བརྗོད་གཞི་བཀའ་གདམས་པའི་ལོ་རྒྱུས་དང་། ལྷག་པར་དུ་བཀའ་གདམས་པའི་དགོན་སྡེའི་སྐོར་ཡིན། དེའི་རྒྱུ་མཚན་ནི། མཁས་དབང་དགེ་འདུན་ཆོས་འཕེལ་(༡༩༠༣-༡༩༥༡)ལགས་ཀྱི་<<གཏམ་རྒྱུད་གསེར་གྱི་ཐང་མ་>>ལས། ”འདི་འདྲའི་གདན་ས་གྲགས་ཆེ་བ་རྣམས་རང་རེའི་ལོ་རྒྱུས་སོགས་ལ་ཞིབ་བལྟ་མ་བྱས་པ་རྣམས་ཀྱིས་དབུས་གཙང་ཕྱོགས་ན་ཡོད་བྱ་བ་ཙམ་ལས། གར་ཡོད་ཏན་ཏན་མི་ཤེས་པ་ལ་གློ་བུར་དུ་དེར་སླེབས་ཚེ། སེམས་ལ་དགའ་སྐྱོ་ཚད་ལས་འདས་པ་རེ་ཡོང་གི་འདུག བཀའ་གདམས་པའི་ལྷ་ཁང་དེ་ཀུན་བཀོད་པ་ཞན་ཅིང་། ཀ་བ་ཡང་ཤིང་འཁྱར་འཁྱོར་ལས་དྲང་པོ་ལེགས་པོ་ཞིག་ཀྱང་མེད་པ་ཕལ་ཆེར་དེ་འདྲར་འདུག་མོད། མཇལ་བ་ཙམ་གྱིས་ཆོས་དང་རྗེས་མཐུན་གྱི་དང་བ་འདྲེན་ཅིང་ཉམས་དགའ་ཡལ་ལེ་བ་བྱེ་པའི་བྱིན་ཆགས་པ་ཤ་སྟག་འདུག” ཅེས་སྐབས་དེ་དུས་ཀྱི་བཀའ་གདམས་པའི་དགོན་སྡེའི་གནས་ཚུལ་མི་ཉུང་བ་ཞིག་བྲིས་འདུག་པ་མཐོང་བས་རྐྱེན་བྱས་ཏེ། བཀའ་གདམས་པའི་དགོན་སྡེའི་སྐོར་ལ་ཞིབ་འཇུག་བྱེད་རྒྱུའི་འདུན་པ་སྐྱེས་སོང་།

དེར་བརྟེན་ལྷ་སར་སྡོད་རིང་འཕན་ཡུལ་དང་། སྟོད་ལུང་། མལ་འགྲོ་གུང་དཀར་སོགས་སུ་ཡོད་པའི་བཀའ་གདམས་པའི་དགོན་སྡེ་མང་པོ་ཞིག་ལ་དངོས་སུ་ཕྱིན་ཏེ་ལྟ་སྐོར་བྱས་པ་ཡིན། ཁོང་གིས་གསུངས་པ་ལྟར། བཀའ་གདམས་པའི་དགོན་པ་མང་ཆེ་བ་དུས་རབས་བཅུ་གཅིག་པ་ནས་བཅུ་གསུམ་པའིི་བར་ལ་བཞེངས་པའི་ལོ་རྒྱུས་ལྡན་པའི་དགོན་པ་ཤ་སྟག་རེད། ཡིན་ནའང་ད་ལྟ་གྲུབ་མཐའ་དགེ་ལུགས་དང་། ས་སྐྱ་སོགས་ལ་འགྱུར་ཚར་ཡོད་པ་རེད། འོན་ཀྱང་བཀའ་གདམས་པ་དར་བའི་དུས་ཚོད་ལྟར་རྒྱ་ཆེན་པོ་རང་མི་འདུག ད་ལྟ་ཡོད་པའི་དགོན་པ་མང་ཆེ་བའི་དཔལ་འབྱོར་གྱི་གནས་བབ་ཧ་ཅང་སྐྱོ་བོ་འདུག བཀའ་གདམས་པས་ཕྱིས་སུ་བྱུང་བའི་བོད་ཀྱི་གྲུབ་མཐའ་མང་ཆེ་བ་ལ་ཤུགས་རྐྱེན་ཆེན་པོ་ཐེབས་ཡོད་པ་མ་ཟད། གྲུབ་མཐའ་ཁག་གི་བླ་མ་དང་། དགེ་བཤེས་སོགས་ཀྱིས་སློབ་སྦྱོང་གནང་ས་མང་ཆེ་བ་བཀའ་གདམས་པ་དང་འབྲེལ་བ་ཡོད་པ་རེད། དེར་བརྟེན། བཀའ་གདམས་པའི་སྐོར་ལ་ཞིབ་འཇུག་བྱེད་རྒྱུ་དེ་དམིགས་བསལ་གལ་ཆེན་པོ་རེད། ངའི་ད་ལྟའི་བར་གྱི་ཞིབ་འཇུག་གི་གྲུབ་དོན་སྐོར་ཅུང་ཟད་ཞུས་ན། ཉི་ཧོང་སྐད་ཡིག་ཐོག་ཏུ་བསྒྱུར་བའི་ལོ་ཆེན་རིན་ཆེན་བཟང་པོའི་རྣམ་ཐར་དང་། ཐུའུ་བཀྭན་གྲུབ་མཐའི་བཀའ་གདམས་ཀྱི་ལེའུ་གཉིས་ཡོད། དེ་ནས་དབྱིན་ཡིག་དང་ཉི་ཧོང་ཡིག་ཐོག་ཏུ་བྲིས་པའི་དཔྱད་རྩོམ་ཁ་ཤས་ཀྱང་ཡོད། དེ་ཚོའི་བརྗོད་གཞི་ནི་དགེ་བཤེས་སྤྱན་སྔ་པས་(༡༠༣༨-༡༡༠༣) བཞེངས་པའི་ལོ་དགོན་པའི་ལོ་རྒྱུས་དང་། དུས་རབས་བཅུ་གཅིག་པར་བཀའ་གདམས་པའི་དགེ་བཤེས་མང་པོས་ཁམས་འདན་མར་སློབ་སྦྱོང་བྱས་ཚུལ། མི་ཉག་གི་བཙན་རྫོང་ནས་ཐོན་པའི་བཀའ་གདམས་པ་དང་འབྲེལ་བ་ཡོད་པའི་དཔེ་ཆ་བྲིས་མའི་སྐོར་སོགས་ཡིན།

དྲི་བ། རྒྱལ་སྤྱིའི་བོད་རིག་པའི་ཞིབ་འཇུག་ཚོགས་འདུ་དང་ཉི་ཧོང་བོད་རིག་པའི་ཚོགས་འདུ། སོག་པོ་བོད་རིག་པའི་ཚོགས་ཆུང་སོགས་ཀྱི་བོད་རིག་པའི་ཞིབ་འཇུག་ཐོག་དགོངས་ཚུལ་གང་འདྲ་ཡོད།

ལན། དེང་སྐབས་བོད་རིག་པ་དང་འབྲེལ་བ་ཡོད་པའི་ཚོགས་འདུ་ནི་བོད་དང་། རྒྱ་ནག རྒྱ་གར། ནུབ་ཕྱོགས་རྒྱལ་ཁབ་ཁག ཉི་ཧོང་སོགས་མང་པོ་ཞིག་ལ་འཚོགས་ཀྱིན་ཡོད་ལ། ད་ལོའི་རྒྱལ་སྤྱིའི་བོད་རིག་པའི་ཚོགས་འདུ་དེ་སོག་ཡུལ་ལ་ཚོགས་པ་རེད། གཞན་རྒྱལ་སྤྱིའི་ཚོགས་འདུ་མ་ཡིན་པ་ཡང་མང་པོ་ཡོད་པ་རེད། ཚང་མས་ཞིབ་འཇུག་བྱེད་ས་གཙོ་བོ་བོད་རིག་པ་ཡིན་ནའང་། མི་རིགས་སམ། ཡང་ན་རྒྱལ་ཁབ་རེ་རེའི་དམིགས་ཡུལ་མི་གཅིག་པ་མ་ཟད། ཞིབ་འཇུག་བྱེད་མཁན་གྱི་རྒྱབ་ལྗོངས་ཡང་མི་འདྲ་བ་ཡོད་པ་རེད། བོད་རིག་པ་ཞེས་པ་དེ་ནང་དོན་ཡང་རྒྱ་ཆེན་པོ་དང་། ཞིབ་འཇུག་བྱེད་ཐབས་ཀྱང་རྣམ་པ་སྣ་ཚོགས་ཡོད་པ་རེད། དེ་ཚོ་གཅིག་གྱུར་བྱེད་དགོས་པ་ཡོད་པ་མ་རེད་ལ། མི་རེ་རེར་བསམ་ཚུལ་ཡང་མི་འདྲ་བ་དང་། ཆབ་སྲིད་ཀྱི་གནས་སྟངས་ཀྱང་མི་འདྲ་བ་ཡོད་པའི་དབང་གིས་དམིགས་ཡུལ་གཅིག་བཞག་པ་དེ་ཧ་ཅང་དཀའ་ལས་ཁག་པོ་རེད། ལྷག་པར་དུ་དེང་སྐབས་བོད་ཀྱི་གནས་སྟངས་ལ་བསམ་བློ་བཏང་ན། བོད་ཀྱི་སྐད་ཡིག་དང་རིག་གནས། སྲོལ་རྒྱུན་གྱི་གོམས་གཤིས་སོགས་རྩ་བརླག་ཏུ་འགྲོ་བའི་ཉེན་ཁ་ཡོད་པ་རེད། དེར་བརྟེན། ང་ཚོ་བོད་རིག་པར་ཞིབ་འཇུག་བྱེད་མཁན་རྣམས་ཀྱིས། བརྗོད་གཞི་འདྲ་མིན་དང་། ཐབས་ཤེས་མི་འདྲ་བ་དུ་མའི་སྒོ་ནས་བོད་ཀྱི་སྐད་ཡིག་དང་། རིག་གནས་མི་ཉམ་སྲུང་སྐྱོབ་བྱེད་རྒྱུ་དེ་གལ་གནད་ཆེ་ཤོས་སུ་བརྩིས་ནས་ལས་ཀ་བྱེད་དགོས་པ་རེད་དྲན་གྱི་འདུག དེ་ནི་བོད་རིག་པར་ཞིབ་འཇུག་བྱེད་མཁན་དང་། བོད་རིག་པའི་ཐད་ལས་ཀ་མཁན་མང་ཆེ་བའི་བསམ་བློ་དང་རེ་བ་ཡིན་རྒྱུ་རེད་བསམ་གྱི་ཡོད།  

དྲི་བ། ཁྱེད་རང་གིས་བོད་གཞིས་བྱེས་གཉིས་ཀྱི་སྤྱི་ཚོགས་དངོས་སུ་མཐོང་ཡོད་དུས། སྤྱིའི་ཆ་ནས་མ་འདྲ་བའི་ཁྱད་པར་གང་དག་མཐོང་སོང་།

ལན། ང་རང་ལ་མཚོན་ལ། ད་ལྟའི་བར་དུ་བོད་ཀྱི་ས་ཆ་དངོས་དང་། བོད་དང་འབྲེལ་བ་ཡོད་ས་མང་པོ་ཞིག་ལ་ཕྱིན་པ་ཡིན། དཔེར་ན་དབུས་གཙང་དང་། ཁམས། ཨ་མདོ། དེ་བཞིན་བལ་ཡུལ་དང་། རྒྱ་གར་གྱི་ས་གནས་ཝ་ར་ན་སི། ངྷ་རམ་ས་ལ། ཨོ་རིས་ས། རྒྱ་གར་ལྷོ་ཕྱོགས་ཀྱི་སེ་འབྲས་དགའ་གསུམ་སོགས་དང་། གཞན། ནུབ་ཕྱོགས་རྒྱལ་ཁབ་ཁག་ནང་ཚོགས་འདུ་སོགས་ལ་འགྲོ་སྐབས་བོད་རིགས་འདུ་འཛོམས་བྱེད་ས་དང་། ཆོས་ཚོགས་སོགས་ལ་ཕྱིན་ཏེ་བོད་པའི་འཚོ་བ་སྐྱེལ་སྟངས་དང་། བསམ་བློ་གཏོང་སྟངས་སོགས་གང་འདྲ་ཡོད་མེད་ལ་ཞིབ་འཇུག་བྱས་པ་ཡིན། ད་ལྟ་ཨ་རིའི་བྷོ་སི་ཊོན་(Boston) ལ་སྡོད་སྐབས་ལོ་གཉིས་ནང་ནུབ་ཕྱོགས་རྒྱལ་ཁབ་ཏུ་ཡོད་པའི་བོད་པ་ཚོའི་ཉིན་རེའི་འཚོ་བ་སྐྱེལ་སྟངས་དང་། ཆེས་སྤྱིར་བཏང་གི་གནས་སྟངས་ཁག་ཀྱང་གང་འཚམ་ཤེས་ཐུབ་སོང་། སྤྱིར་བོད་ཕྱི་ནང་གཉིས་ལ་ཁྱད་པར་ཆེན་པོ་ཡོད་པ་རེད། ང་རང་ལས་ཀའི་ངོ་བོ་ཐད་ནས་བཤད་ན། བོད་ནང་ལ་མཚོན་ན་བོད་ཡིག་དང་། བོད་ཀྱི་རིག་གནས་ལ་སྦྱོང་མཁན་མང་བ་ཡོད་པའི་ཚོར་སྣང་འདུག དེའི་རྒྱུ་མཚན་ནི་བོད་རིགས་སློབ་གྲྭ་ཆེན་མོར་འགྲོ་མཁན་མང་ཆེ་བ་མི་རིགས་སློབ་གྲྭའི་བོད་ཡིག་ཚན་ཁག་ལ་འགྲོ་བཞིན་འདུག དེ་ནས་སློབ་གྲྭ་མཐར་ཕྱིན་ན་མི་རིགས་སློབ་གྲྭ་དང་། སྤྱི་ཚོགས་ཚན་རིག་ཁང་། དེ་བཞིན་མི་རིགས་པར་སྐྲུན་ཁང་། གཞན་གྲོང་གསེབ་ཁག་གི་སློབ་གྲྭའི་དགེ་རྒན་སོགས་བོད་ཡིག་དང་འབྲེལ་བ་ཡོད་པའི་ལས་ཀ་མང་པོ་ཡོད་པ་གོ་སོང་། ང་ལའང་བོད་ཡིག་ལས་ཀ་བྱེད་མཁན་ངོ་ཤེས་གྲོགས་པོ་མང་པོ་ཡོད། བཙན་བྱོལ་ནང་མི་རང་རང་གི་དགའ་ཕྱོགས་སམ། སློབ་སྦྱོང་བྱེད་ཡུལ་བརྗོད་གཞི་རྣམ་པ་སྣ་ཚོགས་ཡོད་པའི་བོད་རིག་པ་ཞིབ་འཇུག་བྱེད་མཁན་ཉུང་ཉུང་ཡིན་པར་མཐོང་སོང་། དཔེར་ན། རྒྱལ་སྤྱིའི་བོད་རིག་པའི་ཚོགས་འདུ་ཁག་ཏུ་བཙན་བྱོལ་ནས་ཕེབས་པའི་བོད་རིག་པའི་ཞིབ་འཇུག་པ་གཞོན་སྐྱེས་ཉུང་ཉུང་རེད།

དྲི་བ། མཐའ་མར་ཁྱེད་རང་ལ་དམིགས་བསལ་ཞུ་རྒྱུ་དེ་འདྲ་ཡོད་དམ།

ལན། ང་རང་ཉི་ཧོང་ནས་ཡིན་དུས་ཉི་ཧོང་གི་བོད་རིག་པ་དར་ཁྱབ་གཏོང་ཕྱོགས་སྐོར་ཞུ་འདོད་བྱུང་། ཉི་ཧོང་གི་བོད་རིག་པའི་ཞིབ་འཇུག་ཚོགས་པ་ (Japanese Association for Tibetan Studies) ནི། ༡༩༥༣ ལོར་ཚོགས་ཆེན་ཐེངས་དང་པོ་ཚོགས་པའི་བོད་རིག་པའི་ཚོགས་པ་རྙིང་ཤོས་གྲས་ཤིག་རེད། ད་ལྟའི་ཆར་ཚོགས་མི་སུམ་བརྒྱ་ལྷག་ཡོད་ཅིང་། ལོ་ལྟར་ཚོགས་འདུ་འཚོགས་བཞིན་ཡོད་པ་རེད། ད་ལོ་ཕྱི་ཟླ་ ༡༡ པར་ཐེངས་ ༦༡ པ་འཚོགས་འཆར་ཡོད་པ་རེད། ཐེངས་རེ་རེར་གཏམ་བཤད་གནང་མཁན་ལྔ་བརྒྱ་དྲུག་བརྒྱ་ཡོང་གི་ཡོད་པ་རེད། བརྗོད་གཞི་མཚན་ཉིད་དང་ལོ་རྒྱུས།  སྐད་ཡིག མི་རིགས་རིག་པ་སོགས་སྣ་ཚོགས་ཡོད་པ་རེད། ཚོགས་འདུ་རེ་རེའི་མཇུག་འབྲས་དུས་དེབ་(Report of the Japanese Association for Tibetan Studies) ཀྱང་ལོ་ལྟར་པར་བསྐྲུན་བྱེད་ཀྱི་ཡོད་པ་རེད།

རྒྱལ་ཁབ་གཞན་གྱི་ཞིབ་འཇུག་པའང་ཚོགས་ཁོངས་སུ་ཞུགས་ཆོག་གི་ཡོད་པ་རེད། དེར་བརྟེན། རྗེས་ཕྱོགས་བཙན་བྱོལ་ནང་གི་བོད་རིག་པ་ཞིབ་འཇུག་གནང་མཁན་དང་ཉི་ཧོང་གི་བོད་རིག་པར་དོ་སྣང་ཡོད་མཁན་ཚོས། ཚོགས་པ་དེའི་ནང་ཞུགས་པའམ་ཡང་ན་འབྲེལ་བ་གནང་ན་ཡག་པོ་འདུག ང་ཚོ་ཤར་ཨེ་ཤ་ཡ་གཅིག་པ་ཡིན་པ་མ་ཟད། ནང་པའི་རྒྱལ་ཁབ་ཡིན་པས་རྒྱབ་ལྗོངས་ཡོད་པ་རེད། ཞིབ་འཇུག་བྱེད་མཁན་ཞིག་ལ་མཚོན་ན། ཆ་རྐྱེན་གཙོ་བོ་སྨྲ་བརྗོད་རང་དབང་དང་འགྲོ་འདུག་རང་དབང་སོགས་རེད།  དེ་ནི་ཉི་ཧོང་ལ་ཡག་ཐག་ཆོད་ཡོད་པ་རེད། བཙན་བྱོལ་བོད་པའི་སྤྱི་ཚོགས་ནང་ཡོད་པའི་བོད་རིག་པ་ཞིབ་འཇུག་པ་དང་། ཉི་ཧོང་བོད་རིག་པ་ཞིབ་འཇུག་པའི་བར་ཕན་ཚུན་བསམ་བློ་བརྗེ་རེས་བྱེད་ཐུབ་ན་བོད་རིག་པ་ལ་ཕན་ཐོགས་ཆེན་པོ་ཡོང་གི་རེད་བསམ་གྱི་འདུག ཐུགས་རྗེ་ཆེ།

བཅར་འདྲི་བྱེད་མཁན། རྨེའུ་དཀོན་རྒྱམ།