ཟམ་གདོང་རིན་པོ་ཆེ་མཆོག་སི་པན་དུ་ཕེབས།

བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་ཕྱི་ཚེས་ ༡༧ ཉིན་ནས་སི་པན་བྷར་སི་ལོ་ནར་རྟེན་གཞི་བྱས་པའི་ས་སྐྱ་བཀྲ་ཤིས་གླིང་དུ་ཐེབས་མཛད་འཕྲིན་བསྐྱངས་ཡོད་འདུག

རྒྱ་མཚོ་ལགས་ཀྱིས་འདི་གར་གནས་ཚུལ་བཏང་འབྱོར་བྱུང་བ་ལྟར་ན། སི་པན་ས་སྐྱ་བཀྲ་ཤིས་གླིང་གིས་གདན་ཞུ་གནང་བ་ལྟར་བཀའ་བློ་ཁྲི་ཟུར་ཟམ་གདོང་རིན་པོ་ཆེ་མཆོག་ཟླ་འདིའི་ཚེས་ ༡༧ ཐོག སི་པན་གྱི་རང་སྐྱོང་མངའ་ཁུལ་གྲོང་ཁྱེར་བྷར་སི་ལོ་ན་(Barcelona)ཞབས་སོར་བཀོད་ཡོད་ཅིང་། དེར་ས་སྐྱ་བཀྲ་ཤིས་གླིང་གི་བླ་མ་འཇམ་དབྱངས་བཀྲ་ཤིས་རྡོ་རྗེས་གཙོས་པའི་ལས་བྱེད་རྣམ་པ་དང་། བྷར་སི་ལོ་ན་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་རིག་གཞུང་འགན་འཛིན། དྲུང་ཆེ་སོགས་ཕེབས་བསུར་བཅར་ཡོད།

ས་སྐྱ་བཀྲ་ཤིས་གི་དྲུང་ལགས་ཀྱིས་ངོ་སྤྲོད་གནང་བ་ལྟར་ན། རིན་པོ་ཆེ་མཆོག་འདི་གར་ཉིན་གསུམ་རིང་གི་མཛད་འཆར་ཡོད་ཅིང་། ཉིན་དང་པོའི་དགོང་དྲོར་ས་སྐྱ་བཀྲ་ཤིས་གླིང་དུ་ཞི་གནས་དང་འབྲེལ་བའི་གསུང་ཆོས་བཀའ་སློབ་བསྩལ་བ་དང་། ཉིན་གཉིས་པར་ས་སྐྱ་བཀྲ་ཤིས་གླིང་གིས་གོ་སྒྲིག་འོག བྷར་སི་ལོ་ན་གཙུག་ལག་སློབ་ཆེན་ཚོགས་ཁང་དུ་ ༼མཐོ་རིམ་སློབ་མའི་ཤེས་ཡོན་གྱི་རིན་ཐང་༽ཞེས་པའི་བརྗོད་གཞིའི་ཐོག་བཀའ་སློབ་དང་དྲི་བ་དྲིས་ལེན་གནང་པ། ཉིན་གསུམ་པར་ས་སྐྱ་བཀྲ་ཤིས་གླིང་གི་མ་འོངས་པའི་གལ་ཆེའི་ལས་འཆར་ཁག་གཅིག་གི་ཐོག གནད་ཡོད་མི་སྣ་ཁག་ཅིག་དང་ཚོགས་འདུ་ཚོགས་ཡོད་འདུག

དེ་རྗེས་ས་གནས་བོད་རིགས་སྤྱི་མཐུན་ཚོགས་པས་གསོལ་འདེབས་ཞུས་པ་ལྟར་བྷར་སི་ལོ་ནའི་བོད་ཁང་དུ། བོད་རིགས་ན་གཞོན་ཚོར་བོད་རིགས་གཙང་མ་ཞིག་ཡོང་ཐབས་སུ་ཕ་མས་ཁྱིམ་དུ་རང་སྐད་གཙང་མ་སྤྱོད་དགོས་པ་སོགས་སྐད་ཡིག་གི་གལ་ཆེའི་རང་བཞིན་སྐོར་ལ་བཀའ་སློབ་ལམ་སྟོན་གནང་ཡོད་ཅིང་། ཕྱི་ཚེས་  ༢༠། ཉིན་ཨོ་སི་ཁྲི་རི་ཡར་ཆིབས་བསྒྱུར་བསྐྱངས་ཡོད་འདུག