རྒྱ་ནག་ལ་མགོ་བཏགས་བྱས་པ་རེད་ཟེར།

དབྱིན་ཇིའི་སྲིད་བློན་ཁཱ་མེ་རོན་གྱིས་རྒྱལ་སྤྱིའི་ཚོགས་སྡེ་ཁག་གིས་སྐྱོན་བརྗོད་བྱེད་མིན་ལམ་མ་ལྟོས་པར། རྒྱ་ནག་ནང་ཉིན་གསུམ་རིང་གི་གཟིགས་སྐོར་བྱས་ཏེ་རྒྱ་ནག་གི་མགོ་ཁྲིད་ཚོ་དང་དབྱིན་སྒོར་ཐེར་འབུམ་ ༡།༨ ལྷག་གི་ཚོང་འབྲེལ་སྐོར་ལ་གྲོས་བསྡུར་བྱས་ཡོད་འདུག

ཟླ་འདིའི་ཚེས་ ༢ ཉིན་ནས་བཟུང་དབྱིན་ཇིའི་སྲིད་བློན་ཌ་ཝེ་ཌི་ཁ་མེ་རོན་ (David Cameron)མཆོག་རྒྱ་ནག་ནང་ཉིན་གསུམ་རིང་གི་གཟིགས་སྐོར་མགོ་འཛུགས་བྱས་ཡོད་ཅིང་། ཁོང་དང་ལྷན་དུ་དབྱིན་ཇིའི་ཚོང་ལས་སྡེ་ཚན་ཁག་གི་མི་སྣ་ ༡༢༠ ཙམ་མཉམ་སྐྱོད་བྱས་ཡོད་འདུག དབྱིན་ཇིའི་སྲིད་བློན་མཆོག་རྒྱ་ནག་གི་སྲིད་འཛིན་ཞི་ཆིན་ཕིན་དང་སྲིད་བློན་ལི་ཁཱེ་ཆང་། དེ་བཞིན་ཁེ་ལས་ཁག་གི་མགོ་ཁྲིད་དང་འཕྲུལ་རིག་དང་ལག་རྩལ་ཆེད་མཁས་པ་སོགས་ལ་ཐུག་འཕྲད་ཀྱིས་རྒྱལ་ཁབ་གཉིས་བར་ལོ་རེ་བཞིན་དབྱིན་སྒོར་ཐེར་འབུམ་ ༡།༨ ལྷག་གི་ཚོང་འབྲེལ་ལས་གཞིར་གྲོས་བསྡུར་བྱེད་འཆར་ཡོད་འདུག

ཚོང་འབྲེལ་ལས་གཞི་དེ་དག་ནི་དངུལ་རྩའི་ཁེ་ལས་དང་མགྱོགས་ཚད་ལྡན་པའི་མེ་འཁོར་བཟོ་སྐྲུན། བཟའ་ཆའི་ཁེ་ལས། དེ་བཞིན་རྡུལ་ཕྲན་གྱི་གློག་ཤུགས་མ་རྐང་ཉོ་ཚོང་སོགས་ཡིན་པ་དང་། དབྱིན་ཇིའི་སྲིད་བློན་མཆོག་གིས་དབྱིན་ཇི་དང་རྒྱ་ནག་གི་འབྲེལ་བ་དེ་ཕྱོགས་གཉིས་ཀྱི་དཔལ་འབྱོར་གོང་འཕེལ་ཡོང་ཐབས་ཐད་ཧ་ཅང་གལ་གནད་ཆེན་པོ་ཡིན་པ་དང་། རྒྱལ་ཁབ་ཁ་ཤས་ཀྱིས་རྒྱ་ནག་ནི་བཀག་རྒྱ་དང་དམ་དྲག་ཆེ་བ་ཞིག་ཏུ་ངོས་འཛིན་ཐོག་ཚོང་འབྲེལ་བྱེད་ཀྱི་མེད་པ་ནི་ནོར་འཁྲུལ་ཞིག་ཡིན་སྐོར། དེ་བཞིན་ཁོ་རང་གི་ངོས་ནས་རྒྱ་ནག་དང་ཡུ་རོབ་བར་གྱི་མ་དངུལ་ཁྲག་དཀྲིགས་ཆེན་མོ་གཅིག་ལྷག་གི་ཚོང་འབྲེལ་གྲོས་གཞི་དེར་མཐའ་གཅིག་ཏུ་རྒྱབ་སྐྱོར་བྱེད་རྒྱུ་ཡིན་ཅེས་སོགས་བརྗོད་འདུག

རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་སྡེ་ཁག་དང་རྒྱ་རིགས་དམངས་གཙོ་དོན་གཉེར་བ་མང་པོ་ཞིག་གིས་ཐེངས་འདིར་དབྱིན་ཇིའི་སྲིད་བློན་དང་རྒྱ་ནག་གི་མགོ་ཁྲིད་ཐུག་འཕྲད་བྱེད་ཕྱོགས་ཐོག་སྐྱོན་བརྗོད་ཤུགས་ཆེན་བྱེད་ཀྱིན་ཡོད་ཅིང་། དེར་དབྱིན་ཇིའི་ངལ་རྩོལ་ཚོགས་པའི་མགོ་ཁྲིད་ཨི་ཌི་(Ed Miliband) ལགས་ཀྱིས་དབྱིན་ཇིའི་གཞུང་གིས་ཅ་དངོས་དང་ལག་རྩལ་གྱི་སྤུས་ཚད་ཞན་པའི་རྒྱ་ནག་ལ་ཚོང་འབྲེལ་བྱེད་པ་ལས་རྒྱལ་ཁབ་ནང་ཁུལ་གྱི་བཟོ་ལས་སྲིད་བྱུས་དང་བཟོ་བའི་གླ་ཕོགས་སོགས་ཡར་རྒྱས་སུ་གཏོང་རྒྱུ་གལ་ཆེན་ཡིན་པ་དང་། རྒྱལ་ཁབ་ནང་ཁུལ་གྱི་གནས་ཚུལ་ལེགས་བཅོས་མ་བྱས་པར་འཛམ་གླིང་ཐོག་དཔལ་འབྱོར་ཨང་གཉིས་པ་ཡིན་པའི་རྒྱ་ནག་ལ་དཔུང་བ་མཉམ་གཤིབ་བྱས་ན་གྱོང་ལས་ཁེ་མེད་སྐོར་བརྗོད་འདུག དེ་བཞིན། རྒྱ་ནག་གི་བཙོན་འོག་ཏུ་ཡོད་པའི་ནོ་བྷེལ་ཞི་བདེ་གཟེངས་རྟགས་ཐོབ་མཁན་རྒྱ་རིགས་རྩོམ་པ་པོ་ལེའུ་ཞའོ་པོ་ ( Liu Xiabbo )ཡི་ཁྲིམས་རྩོད་པ་མའོ་ཞོ་ཕིན་( Mo Shaoping)ལགས་ཀྱིས་ “ ཐེངས་འདིར་དབྱིན་ཇིའི་སྲིད་བློན་མཆོག་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་གནད་དོན་ཐོག་ཁ་ཡ་མ་ཙམ་ཡང་མ་བྱས་པར་རྒྱལ་ཁབ་གཉིས་ཀྱི་ཚོང་འབྲེལ་གལ་ཆེན་དུ་བཟུང་པ་དེ་ནི་ཧ་ཅང་བློ་ཕམ་གྱི་གནས་ཚུལ་ཞིག་རེད’’ཅེས་བརྗོད་འདུག

ཨོ་སི་ཊོ་ལི་ཡའི་སི་ནི་གཙུག་ལག་སློབ་ཆེན་གྱི་རྒྱའི་རིག་གཞུང་ཚན་ཁག་གི་འགན་འཛིན་ཁེ་རི་(Kerry Brown )ལགས་ཀྱིས་དབྱིན་ཇིའི་སྲིད་བློན་རྒྱ་ནག་ནང་བསྐྱོད་པ་དེ་ནི། ལོ་སྔོན་མའི་ཟླ་ ༥ པའི་ནང་༧ གོང་ཏཱ་ལའི་བླ་མར་མཇལ་འཕྲད་གནང་བ་དེར་སྔར་བྱས་ལ་གྱོད་བཤག་དང་ཕྱིས་འབྱུང་སྤང་བླངས་ཀྱི་ཚུལ་དུ། མ་འོངས་པར་བོད་ཀྱི་གནད་དོན་གླེང་སློང་དང་༧ གོང་ས་མཆོག་ལ་ཐུག་འཕྲད་བྱེད་རྒྱུ་མིན་ཞེས་རྒྱ་ནག་ལ་མགོ་བཏགས་ཞུས་པ་རེད་ཅེས་སྐྱོན་བརྗོད་བྱས་ཡོད་འདུག

སྲིད་བློན་ཁཱ་མེ་རོན་གྱིས་ ༢༠༡༠ ཟླ་ ༥ པར་སྲིད་བློན་གྱི་འགན་འཁུར་རྗེས་ལོ་དེའི་ཕྱི་ཟླ་ ༡༡ པའི་ནང་རྒྱ་ནག་ལ་ཐེངས་དང་པོར་གཟིགས་སྐོར་གནང་ཡོད་ཅིང་། ༢༠༡༢ ཟླ་ ༥ པའི་ནང་༧གོང་ས་མཆོག་དབྱིན་ཡུལ་དུ་ཆིབས་བསྒྱུར་སྐབས་སྲིད་བློན་ཁོང་དང་མཇལ་འཕྲད་གནང་བ་དེར་རྒྱ་ནག་གཞུང་གིས་ངོ་རྒོལ་བྱས་ཏེ་དབྱིན་གཞུང་དང་ཚོང་འབྲེལ་ལས་གཞི་ཁག་ཅིག་ཕྱིར་འཐེན་བྱས་ཡོད་པ་རེད།