བོད་མི་ ༣ ལ་ཁྲིམས་ཆད།

རྒྱ་ནག་གཞུང་གིས་ནག་ཆུའི་འབྲི་རུའི་ཁོར་ཡུག་སྲུང་སྐྱོབ་ཆེད་ཞི་རྒོལ་གནང་མཁན་གྱི་བོད་མི་གསུམ་ལ་ལོ་ ༡༣ ནས་ ༣ བར་གྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག

ཟླ་འདིའི་ཚེས་ ༡༩ ཉིན་ནག་ཆུའི་འབྲི་རུ་རྫོང་མི་དམངས་ཁྲིམས་ཁང་གིས་ཁོར་ཡུག་སྲུང་སྐྱོབ་ཀྱི་ལས་འགུལ་ཁྲོད་མཉམ་ཞུགས་དང་། རྒྱལ་ཁབ་ཁ་བྲལ་གྱི་ཉེས་མིང་འོག འབྲི་རུ་གསེར་ཁང་གྲོང་ནས་ཡིན་པས་གླུ་བ་འཕྲིན་ལས་ཚེ་དཀར་ལ་ལོ་ ༩ དུས་བཀག་བཙོན་འཇུག་དང་། གསེར་ཁང་གྲོང་ནས་ཡིན་པའི་ཆོས་ཁྱབ་ལ་ལོ་ ༡༣ དུས་བཀག་བཙོན་འཇུག གྲོང་ཚོ་ལྔ་པ་ནས་ཡིན་ཞིང་། དེ་སྔོན་ཉེན་རྟོག་པའི་ལས་ཀ་བྱེད་མྱོང་བའི་ཚེ་ལྷར་ལོ་ ༣ བཅས་ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག

གནས་ཚུལ་མཁོ་སྤྲོད་པས་བརྗོད་པ་ལྟར་ན། གླུ་བ་ཚེ་དཀར་ལགས་ད་ལྟ་རང་ལོ་ ༢༢ ཡིན་པ་དང་། ཁོང་གི་ཕ་དེ་སྔོན་ནས་འདས་གྲོངས་ཕྱིན་ཡོད་འདུག ད་ལྟ་ཁོང་གི་ཁྱིམ་དུ་བཟའ་ཟླ་དང་ཕྲུ་གུ་གཅིག ཨ་མ་བཅས་ཡོད་འདུག་ལ།  ཁོང་ནི་ནམ་རྒྱུན་མི་རིགས་ཀྱི་བདེ་སྡུག་དབྱངས་སུ་གྱེར་མཁན་ཞིག་ཡིན་པ་མ་ཟད། ཁོང་གིས་༼མཐུན་སྒྲིལ་གྱི་ཨ་ལོང་༽ཞེས་པའི་འོད་སྡེར་གཙོས་པའི་མི་རིགས་རིག་གཞུང་གཅེས་འཛིན་སྐོར་བརྗོད་དོན་ཡིན་པའི་ཆེད་སྒྲིག་འོད་སྡེར་འགའ་ཤས་སྤྱི་ཚོགས་ཁྲོད་འགྲེམས་སྤེལ་བྱས་ཏེ། སྤྱི་ཚོགས་ཁྲོད་དགའ་མོས་བྱེད་མཁན་གྱི་གླུ་བ་ཞིག་ཡིན་འདུག

བོད་མི་ཁོང་གསུམ་འདི་ལོའི་ཕྱི་ཟླ་ ༡༡ པའི་ཟླ་མཇུག་ཙམ་ལ་རྒྱ་གཞུང་གིས་ནག་ཆུ་གྲོང་ཁྱེར་དུ་འཛིན་བཟུང་བྱས་བྱས་ཡོད་པ་དང་། ཉེ་ལམ་ཁོང་གསུམ་ལ་དེ་སྔོན་འབྲི་རུའི་ཡུལ་མི་རྣམས་ཀྱི་གནས་རི་ནགས་ལྷའི་ཁོར་ཡུག་སྲུང་སྐྱོང་ཆེད་རྒྱ་གཞུང་ལ་ངོ་རྒོལ་བྱུང་སྐབས་རྙོག་གྲ་སློང་མཁན་དང་། ཕྱི་ཕྱོགས་ལ་འབྲེལ་བ་ཡོད་ཚུལ། རྒྱལ་ཁབ་ཁ་བྲལ་གྱི་ཉེས་འཛུགས་བཅས་བྱས་ཡོད་འདུག

ད་ལོའི་དབྱར་རྩྭ་དགུན་འབུ་བརྐོ་བའི་དུས་སྐབས་སུ། ཤོད་འབྲི་རུའི་གནས་རི་ནགས་ལྷ་ཛམ་བྷར། རྒྱ་གཞུང་གིས་གཞུང་ལམ་དང་ཆུ་གློག་འཛུགས་བསྐྲུན་ལ་ཁ་གཡར་ཏེ། གཏེར་ཁ་སྔོག་འདོན་གྱི་ལས་འཆར་སྤེལ་ཡོད་པ་དང་། སྐབས་དེར་འབྲི་རུ་སྟོད་སྨད་བར་གསུམ་གྱི་ཡུལ་མི་ཚོས་ངོ་རྒོལ་ཤུགས་ཆེན་བྱས་སྟབས། རྒྱ་གཞུང་གིས་གཏེར་ཁ་སྔོག་འདོན་གྱི་ལས་འཆར་དེ་བཀག་འགོག་བྱེད་ཐུབ་ཡོད་པ་མ་ཟད། རྗེས་སུ་ས་གནས་སྲིད་གཞུང་རིམ་པར་མང་ཚོགས་ཀྱིས་ཞུ་གཏུག་བརྒྱབ་པ་ལ་བརྟེན་ནས། གནས་རི་དེ་ལྗོངས་རིག་དངོས་སྲུང་སྐྱོབ་ཀྱི་གྲལ་དུ་ཚུད་ཡོད་པ་དང་། གནས་རི་སྲུང་སྐྱོབ་ཀྱིས་གཏེར་ཁ་སྔོག་འདོན་ལ་ངོ་རྒོལ་བྱེད་མཁན་རྣམས་ཀྱང་། ཁོར་ཡུག་སྲུང་སྐྱོབ་ཀྱི་ཆེད་དུ་ཡིན་པར་ངོས་འཛིན་གྱིས་ཉེས་ཆད་མི་གཅོད་པར་རང་དགར་འཇོག་རྒྱུ་ཡིན་སྐོར་བརྗོད་ཡོད་ཅིང་། རྗེས་སུ་ནགས་ལྷ་གནས་རི་སྲུང་སྐྱོབ་ཞི་རྒོལ་ཁྲོད་ཞུགས་མཁན་བོད་མི་ཁོང་གསུམ་འཛིན་བཟུང་གིས་ཁྲིམས་ཐག་བཅད་ཡོད་པ་དང་། སྐབས་དེའི་ཞི་རྒོལ་ཁྲོད་ཞུགས་མཁན་མི་ཚང་མ་འཛིན་བཟུང་བྱ་རྒྱུ་ཡིན་པའི་གནས་ཚུལ་ཐོན་ཡོད་པ་སོགས་ཀྱིས། ད་ཆར་ས་གནས་ཡུལ་མི་ཚོ་དངངས་སྐྲག་དང་འཇིགས་སྣང་འོག་གནས་ཡོད་འདུག