བོད་དོན་རྐང་འཁོར་སྐོར་སྐྱོད་པ་རིན་པོ་ལགས་དྷ་སར་འབྱོར་ཏེ་བཞུཊ་སྒར་ཉེ་ཁུལ་གྱི་སློབ་གྲྭ་ཁག་ཏུ་ལས་འགུལ་ངོ་སྤྲོད་དུ་ཕེབས་པ་དང་བསྟུན་ཏེ་གསར་འགོད་པས་ཁོང་ལ་བཅར་འདྲི་ཞུས་ཡོད།
དྲི་བ། ཉེ་སྔོན་སློབ་གྲྭ་ཁག་གི་ནང་སྐོར་སྐྱོད་བྱས་པའི་མྱོང་ཚོར་སོགས་ངོ་སྤྲོད་ཅིག་གནང་རོགས།
ལན། དྷ་ས་ས་གནས་བདེ་དོན་མཆོག་གིས་ཉེ་འཁོར་སློབ་གྲྭ་ཁག་ཏུ་ཕྱིན་ཏེ་སྐད་ཆ་བཤད་ཐུབ་ན་ཡག་པོ་ཡོང་ས་རེད་ཅེས་གོ་སྒྲིག་གནང་བ་ལྟར། དྷ་སའི་ཉེ་འཁོར་གྱི་ཤེས་རབ་དགའ་ཚལ་སློབ་གླིང་དང་སཱ་ར་མཐོ་སློབ། སུ་ཇཱ། གྷོལ་པ་པུལ། ས་གནས་གཞོན་ནུའི་གོ་སྒྲིག་འོག ཅན་ཌི་གྷལ་གྱི་མཐོ་རིམ་སློབ་ཕྲུག་བཅས་ལ་སྐད་ཆ་བཤད་དུ་ཕྱིན་པ་ཡིན། སློབ་མ་ཚོས་ལག་ཏུ་བོད་དར་དང་ཁ་བཏགས། མེ་ཏོག་སོཊ་བཟུང་ནས་ང་ལ་བསུ་བ་བྱས་སོང་། སྤྱིར་བཏང་ང་ལ་བསུ་བ་བྱེད་རྒྱུ་དེ་གལ་ཆེན་མིན་ཡང་ཁོ་ཚོས་ནམ་རྒྱུན་བོད་རང་གི་བསྟན་པ་ཆབ་སྲིད་ལ་དོ་ཁུར་དང་དགོས་པ་རྒྱུ་མཚན་ཤེས་པའི་ཐོག་ནས་ང་དང་ང་འདྲ་བའི་ལས་འགུལ་ཆུང་ཙག་རིགས་སྤེལ་མཁན་ཚོར་རྒྱབ་སྐྱོར་དང་། བོད་དོན་ལས་འགུལ་འདི་ཅི་ཙམ་གྱིས་གལ་ཆེན་དུ་བརྩི་ཡི་ཡོད་པ་མཚོན་ཡོད་ལ། ཁོ་ཚོས་འཚང་ཁ་ཤིག་ཤིག་གིས་དྲི་བ་དྲིས་བ་དང་བསུ་བ་བྱེད་སྟངས་དེས་བོད་དོན་ཐད་ཚོར་ཤུགས་ཆེན་པོ་ཡོད་པའི་ཚོར་སྣང་སྤྲད་སོང་།
དྲི་བ། ཕྱི་རྒྱལ་ཁག་ཏུ་རྐང་འཁོར་སྐོར་སྐྱོད་སྐབས་ས་གནས་མི་མང་དང་གནད་ཡོད་མི་སྣ་ཚོས་བོད་དོན་ཐོག་དོ་སྣང་དང་རྒྱབ་སྐྱོར་གནང་སྟངས་གང་འདྲ་འདུག
ལན། བོད་དོན་ལ་རྒྱབ་སྐྱོར་ཡོད་མེད་ཅི་རིགས་རེད། ཁག་ཅིག་གིས་ལྐོག་ནས་རྒྱབ་སྐྱོར་བྱེད་ཀྱི་ཡོད་ཀྱང་མངོན་གསལ་དོད་པོ་མི་བྱེད་མཁན་དེ་འདྲ་མང་པོ་འདུག གསར་འགོད་པ་ལོ་ཆུང་ཁ་ཤས་ཀྱིས་མ་འོངས་པར་ཁོ་ཚོ་རྒྱ་ནག་ནང་འགྲོ་འཆར་ཡོད་སྟབས། རྒྱ་གཞུང་གིས་ཐོངས་མཆན་སྤྲོད་རྒྱུར་འགོག་རྐྱེན་བཟོ་ཡི་འདུག་ལབ་སོང་། གནད་ཡོད་མི་སྣ་དཔེར་ན་མངའ་སྡེའི་བློན་ཆེན་དང་། ལྷག་པར་དུ་གྲོང་ཁྱེར་སྤྱི་ཁྱབ་མང་པོས་འཛེམ་ཟོན་བྱེད་ཀྱི་འདུག གང་ཡིན་ཟེར་ན། གྲོང་ཁྱེར་དེ་དང་རྒྱ་ནག་གི་གྲོང་ཁྱེར་ཆེ་ཁག་བར་མཛའ་འབྲེལ་གྲོང་ཁྱེར་ཞེས་ཚོང་འབྲེལ་བཟུང་སྟེ། གཞུང་ལམ་གྱི་ཟུར་དུ་མཛའ་འབྲེལ་གྲོང་ཁྱེར་གྱི་རྒྱལ་ཁབ་ཁག་གི་རྒྱལ་དར་སྒྲེང་འདུག ཧྥ་རན་སི་དང་སྦེལ་ཇམ། ཨི་ཊ་ལི། སུད་སི་སོགས་ཀྱི་གྲོང་ཁྱེར་མང་པོའི་ནང་མཛའ་འབྲེལ་གྲོང་ཁྱེར་གྱི་རྒྱལ་དར་སྒྲེང་འཛུགས་བྱས་པའི་མེ་ཏོག་ལྡུམ་རའི་དཀྱིལ་དུ་བོད་ཀྱི་རྒྱལ་དར་སྒྲེང་འདུག འབྲེལ་ཡོད་ནས་རྒྱལ་དར་གཞན་པ་དེ་ཚོ་ཚོང་ལས་ཀྱི་འབྲེལ་བ་ཡག་པོ་ཡོད་པའི་མཚོན་བྱེད་ཡིན་པ་དང་། བོད་ཀྱི་རྒྱལ་དར་དེ་དམིགས་བསལ་གྱི་རྒྱབ་སྐྱོར་མཚོན་བྱེད་ཡིན་ལ། སྒྲེང་འཛུགས་ཀྱི་ས་ཆའང་དམིགས་བསལ་ཡིན་སྐོར་བརྗོད་སོང་། སུད་སིའི་ནང་ནས་བོད་དར་སྒྲེང་བའི་གྲོང་ཁྱེར་ཁག་ ༦ ཙམ་ལ་ཐུག་སོང་ཡང་། ས་གནས་བོད་རིགས་ཚོས་བཤད་ན་གྲོང་ཁྱེར་མང་པོའི་ནང་བོད་དར་སྒྲེང་ཡོད་པ་རེད་ཟེར།དེ་བཞིན་ཧྥ་རན་སིའི་གྲོང་ཁྱེར་ ༦༠ ལྷག་གི་ནང་དུ་བོད་དར་སྒྲེང་ཡོད་པ་རེད་ཟེར་བ་ཞིག་གོ་སོང་།ཅེག་སྤྱི་མཐུན་རྒྱལ་ཁབ་ཀྱི་གྲོང་ཁྱེར་སྤྱི་ཁྱབ་ཅིག་གིས། ཅེག་རྒྱལ་ཁབ་ནང་བོད་ཀྱི་ཉིན་མོ་ཞེས་ཉིན་གཅིག་ལ་གྲོང་ཁྱེར་ཁག་ ༥༠༠ ལྷག་གི་ནང་བོད་ཀྱི་རྒྱལ་དར་སྒྲེང་འཛུགས་ཀྱིས་རྒྱབ་སྐྱོར་གྱི་རྣམ་པ་སྟོན་གྱི་ཡོད་པ་དང་། མ་འོངས་པར་གྲོང་ཁྱེར་ཁག་སྤྱི་ཡོངས་ནས་བོད་ཀྱི་ཉིན་མོ་སྲུང་གཙི་བྱེད་ཐུབ་པའི་རེ་བ་ཡོད་སྐོར་ལབ་སོང་། ནམ་རྒྱུན་མི་མང་པོ་ཞིག་གིས་བོད་དར་སྒྲེང་བའི་གྲོང་ཁྱེར་ཁག་གི་སྤྱི་ཁྱབ་ཀྱིས་བོད་ལ་རྒྱབ་སྐྱོར་བྱེད་ཀྱི་ཡོད་པ་རེད་བསམ་གྱི་ཡོད་ཀྱང་། སྤྱིར་བཏང་བོད་དར་སྒྲེང་འཛུགས་བྱེད་པ་དེ་མང་ཚོགས་ཀྱི་ནང་ནས་རྒྱབ་སྐྱོར་གྱི་མཚན་རྟགས་བསྡུ་རུབ་སོགས་བྱས་ཏེ་གཏན་འབེབས་བྱུང་བ་ཞིག་ཡིན་པ་དང་། ཡང་གྲོང་ཁྱེར་ཁ་ཤས་ནང་སྤྱི་ཁྱབ་ཅིག་གིས་རྒྱབ་སྐྱོར་གྱི་རྣམ་པ་མཚོན་བྱེད་དུ་བོད་དར་སྒྲེང་འཛུགས་བྱས་པ་དང་། ཕྱིས་སུ་སྤྱི་ཁྱབ་གཞན་ཞིག་བསླེབས་སྐབས་འགྱུར་བ་ཕྱིན་པ་དེ་འདྲའང་འདུག
དྲི་བ། རྐང་འཁོར་སྐོར་སྐྱོད་སྐབས་གསར་འགྱུར་བརྒྱུད་ལམ་ཁག་གིས་དོ་སྣང་གང་འདྲ་བྱེད་ཀྱི་འདུག
ལན། གསར་འགོད་པ་མང་པོ་ཞིག་གིས་ཐོག་མ་ང་རང་མི་སྒེར་གྱི་ལོ་རྒྱུས་དང་། ངའི་ལངས་ཕྱོགས་རང་བཙན་དང་དབུ་མ་གཉིས་ལས་གང་ཡིན། ལས་འགུལ་འདིར་སྤྱི་ཚོགས་ཀྱི་རྒྱབ་སྐྱོར་ཐོབ་རེ་ཅི་ཙམ་ཡོད་མེད་། དེ་བཞིན་ལས་འགུལ་འདིའི་དགོས་དམིགས་སོགས་དྲིས་ཡོང་གི་འདུག་སྟབས། བོད་དོན་ཆེད་ལུས་སྲོག་བློས་བཏང་བའི་རྒྱལ་གཅེས་དཔའ་བོ་དཔའ་མོ་ཚོའི་མངོན་འདོད་དང་ཞལ་ཆེམས་གང་ཡིན་པ་དང་། གནད་དོན་དེའི་རྒྱུ་རྐྱེན་གང་ལ་ཐུག་ཡོད་པ་སོགས་དབྱིན་ཡིག་ཏུ་བསྒྱུར་ནས་རང་གི་ལྕོགས་ཚོད་ཀྱིས་འགྲེལ་བཤད་བརྒྱབ་པ་ཡིན། བརྒྱུད་ལམ་ཁག་ནས་ཀྱང་དོ་སྣང་ཆེན་པོས་ཁྱབ་སྤེལ་བྱས་སོང་བསམ་ཡོད།
དྲི་བ། རྒྱལ་ཁབ་ཁག་ནང་སྐོར་སྐྱོད་སྐབས་རྒྱ་རིགས་ཚོའི་རྣམ་འགྱུར་དང་སྐད་ཆ་བཤད་སྟངས་གང་འདྲ་འདུག
ལན། རྒྱ་མི་མང་པོ་ཞིག་ལ་ཐུག་སོང་། ཁོ་ཚོ་རྒྱ་ནག་པེ་ཅིན་དང་ཧྲང་ཧེ་སོགས་ནས་ཕྱི་རྒྱལ་དུ་ཡོང་བའི་ཡུལ་སྐོར་སྤྲོ་འཆམ་པ་དང་།གསར་འགོད་འབྲེལ་མཐུད་པ། ཡུལ་སྐོར་སྣེ་ཤན་པ་དེ་འདྲ་རེད། ང་ཐུག་པའི་རྒྱ་རིགས་མང་ཆེ་བས་དབུ་མའི་ལམ་ལ་དགའ་མོས་དང་རྒྱབ་སྐྱོར་བྱེད་ཀྱི་འདུག ཁོ་ཚོས་ང་ཚོས་ཀྱང་རྒྱ་ནག་དམངས་གཙོ་དང་རང་དབང་གི་རྒྱལ་ཁབ་<ཅིག་ལ་འགྱུར་བར་རེ་བ་ཆེན་པོ་བྱེད་ཀྱི་ཡོད། ཡིན་ནའང་། རྒྱ་ནག་སྤྱི་ཡོངས་ལ་འགྱུར་ལྡོག་ཅིག་མ་བྱུང་ཚེ། བོད་ཀྱི་གནད་དོན་སེལ་རྒྱུ་ཁག་པོ་རེད། ནམ་ཞིག་འགྱུར་བ་བྱུང་བའི་དབང་དུ་བཏང་ཡང་བོད་ལ་རང་སྲིད་རང་སྐྱོད་སྤྲོད་དང་མི་སྤྲོད་མི་མང་གི་ལག་ཏུ་ཡོད་དུས་དེ་ཡང་དཀའ་ངལ་ཞིག་རེད། ཡིན་ནའང་། ཁྱེད་ཚོར་རྒྱུ་མཚན་དང་བདེན་པ་ཡོད་པ་ང་ཚོས་ཤེས་ཀྱི་ཡོད་ཟེར་གྱི་འདུག
དྲི་བ། ཁྱེད་ཀྱིས་རྒྱལ་ཁབ་མང་པོའི་ནང་སྐོར་སྐྱོད་ཀྱིས་བོད་དོན་ལས་འགུལ་སྤེལ་བར་རྐྱེན་བྱས་ཏེ། རྒྱ་གཞུང་གིས་ཁྱེད་ཀྱི་ཁྱིམ་མི་གཉེན་འབྲེལ་ཚོར་ཆབ་སྲིད་ཀྱི་གནོན་ཤུགས་སྤྲོད་ཀྱི་འདུག་གམ།
ལན། ད་ལྟའི་བར་ཁོ་ཚོར་གནོན་ཤུགས་སྤྲད་པ་དེ་འདྲ་བྱུང་མ་སོང་། ངས་ཁོ་ཚོར་འབྲེལ་བ་བྱེད་སྐབས། ཁྱེད་རང་ཚོས་རང་གི་སྐད་ཡིག་དང་རིག་གཞུང་། ཕ་ས་ཕ་ཡུལ་བདག་སྲུང་བྱས་ཏེ་རྒྱལ་ཁབ་ཀྱི་ཁྲིམས་དང་མ་འགལ་བ་བྱོས། ང་ཚོ་ཕྱི་ལོགས་ན་ཡོད་མཁན་ཚོས་གནས་ཡུལ་རྒྱལ་ཁབ་ཀྱི་ཁྲིམས་དང་མཐུན་པའི་ཐོག་ནས་ལས་འགུལ་ག་རེ་སྤེལ་བ་ཡིན་ནའང་དེ་ཁྱེད་ཚོ་དང་འབྲེལ་བ་ཡོད་པ་མ་རེད་ཟེར་གྱི་ཡོད་ལ། ཁྱིམ་མི་ཚོའི་ངོས་ནས་ཀྱང་རྒྱ་གཞུང་ལ་ངོ་རྒོལ་སོགས་ཆབ་སྲིད་དང་འབྲེལ་བའི་ལས་ཀ་གང་ཡང་བྱས་མེད་སྟབས། ད་ལྟའི་བར་ཆབ་སྲིད་ཀྱི་དཀའ་ངལ་དམིགས་བསལ་འཕྲད་ཡོད་པ་མ་རེད།
དྲི་བ། སྔོན་ཆད་ཁྱེད་རང་བོད་ནང་སྡོད་སྐབས་བོད་དོན་དང་འབྲེལ་བའི་ལས་ཀ་དེ་འདྲ་བྱས་མྱོང་ཡོད་དམ།
ལན། ང་བོད་དུ་ཡོད་སྐབས་འགྲམ་ནས་ཚོང་བརྒྱབ་སྟེ་བསྡད་པ་རེད། བལ་ཡུལ་དང་རྒྱ་ནག་གི་ས་མཚམས་དམག་མི་ཚོ་ངོ་ཤེས་ཡིན་སྟབས་བོད་མི་རྒྱ་གར་ལ་འགྲོ་མཁན་མང་པོ་བསྐྱལ་མྱོང་ཡོད། དེ་བཞིན། ཡིད་བཞིན་ནོར་བུའི་བཀའ་སློབ་ཀྱི་དེབ་མང་པོ་ལྷ་སར་ཡོད་པའི་གྲོགས་པོ་ཚོར་བསྐུར་ཏེ། ཁོ་ཚོས་དཔར་གློག་མང་པོ་བརྒྱབ་ནས་བཀྲམས་པ་རེད། ཕྱིས་སུ་དེབ་རེ་ཟུང་རྒྱ་གཞུང་གི་ལག་ཏུ་ཚུད་དེ་དེབ་ཀྱི་ཡོང་ཁུངས་རྩད་གཅོད་བྱས་ཏེ་ང་རང་ཡིན་པ་ཧ་གོ་ཡོད་ས་རེད། ང་རང་འཛིན་བཟུང་བྱེད་པར་རྩད་གཅོད་གཏོང་གི་ཡོད་པ་ཐོས་ཏེ་བཙན་བྱོལ་ཡོང་བ་ཡིན།
ང་འགྲམ་དུ་ཡོད་སྐབས་བལ་ཡུལ་ནང་བོད་མིའི་དྭང་བླང་དཔྱ་ཁྲལ་ལག་དེབ་བཟོ་ཡི་ཡོད་པ་དང། དེའི་དགོས་པ་རྒྱུ་མཚན་ཡང་གང་ལ་གང་འཚམ་ཧ་གོ་སོང་། སྐབས་དེར་ང་ཚོ་ཚོང་པ་ཆེན་པོ་མིན་ཡང་དཔྱ་ཁྲལ་དངུལ་ཙམ་སྤྲོད་པར་དཀའ་ངལ་མེད་སྟབས། བལ་ཡུལ་དུ་ཡོད་པའི་གྲོགས་པོ་ཞིག་གི་ལག་ཏུ་ང་རང་གི་པར་བཞག་ནས་བཟོ་རུ་བཅུག་པ་ཡིན། འདིར་ཟུར་འཕྲོས་ཙམ་ཞུས་ན། ད་རེབ་ཡུ་རོབ་ནང་སྐོར་སྐྱོད་བྱེད་སྐབས་དཔྱ་ཁྲལ་ལག་དེབ་ཀྱིས་ཕན་མང་པོ་ཐོགས་སོང་། ཁ་པར་གྱི་བྱང་བུ་ཉོ་བ་དང་སྤྱི་གླིང་སོགས་ཀྱི་འཛིན་བྱང་ཉོ་བ།དེ་བཞིན་མགྲོན་ཁང་གླ་བ་སོགས་བེད་སྤྱོད་མང་པོ་བཏང་བ་ཡིན། དེང་སང་ཡུ་རོབ་སོགས་སུ་བོད་མི་མང་པོས་ང་ཚོར་སྐྱབས་བཅོལ་བའི་ཡིག་ཆ་གང་ཡང་མེད་ཟེར་མཁན་མང་པོ་འདུག ངས་ཁོ་ཚོར་རྩེད་མོ་རྩེས་ནས་བོད་མིའི་དཔྱ་ཁྲལ་ལག་དེབ་བཟོས་ནས་བེད་སྤྱོད་བཏང་བ་ཡིན་ན་བཀོལ་སྤྱོད་ཡོད་པ་རེད་ལབ་ཀྱི་ཡོད།
དྲི་བ། བྱ་བ་ཆེ་ཆུང་གང་ཡིན་རུང་ཁྱིམ་མི་དང་འབྲེལ་ཡོད་ནས་རྒྱབ་སྐྱོར་ཐོབ་རྒྱུ་ཧ་ཅང་གལ་ཆེན་པོ་ཡིན་སྟབས། ཁྱེད་ཀྱི་ལས་འགུལ་ཐད་ཁྱིམ་མི་སོགས་ཀྱིས་རྒྱབ་སྐྱོར་གནང་གི་འདུག་གམ།
ལན། ང་རང་ ༡༩༩༨ ལོར་ཨ་རིར་ཕྱིན་པ་ཡིན། སྐབས་དེར་བལ་ཡུལ་ནས་ཕྱིན་པ་ཡིན། རྒྱ་གར་ནང་སྔོན་མ་དམིགས་བསལ་ཚོགས་ཆེན་སྐབས་ཐེངས་གཅིག་ཡོང་མྱོང་ཡོད། ད་རེབ་ཐེངས་གཉིས་པ་དེ་རེད། ཕྱི་ལོ་ ༢༠༠༠ ལོར་ངའི་ཆུང་མ་དང་བུ་དང་བུ་མོ་བཅས་ཨ་རིར་བསླེབས་པ་རེད། ལོ་དེར་ངས་ལས་ཀ་གཡུགས་ནས་ཨ་རིའི་མངའ་སྡེ་ ༤༥ ནང་བོད་དོན་རྐང་འཁོར་སྐོར་སྐྱོད་དང་རྐྱང་ཕྱག་ལས་འགུལ་སྤེལ་བ་ཡིན། སྐབས་དེར་ངའི་ཆུང་མ་ལའང་ལས་ཀ་ཡོད་པ་མ་རེད། ཡིན་ནའང་། ཁྱིམ་མིའི་ངོས་ནས་ང་ལ་ལས་འགུལ་སྤེལ་ན་འགྲིག་གི་མི་འདུག་ཐེངས་གཅིག་ཀྱང་ལབ་མྱོང་མེད། ངའི་ཆུང་མས་བུ་ཕྲུག་གཉིས་ལ་བདག་སྐྱོང་གང་ལེགས་གནང་བའི་བཀའ་དྲིན་གྱིས། ༢༠༠༠ ལོ་ཙམ་ནས་བཟུང་ངས་བོད་དོན་སྐོར་ལ་ལས་འགུལ་གང་ལ་གང་འཚམ་ཞིག་སྤེལ་ཐུབ་སོང་། ཡིན་ནའང་། ངེད་གཉིས་མཉམ་དུ་མ་བསྡད་ནས་ཕལ་ཆེར་ལོ་ ༣ ཙམ་འགྲོ་བཞིན་ཡོད། དེ་ཕལ་ཆེར་ངའི་ལས་འགུལ་དང་འབྲེལ་བ་ཡོད་རྒྱུ་རེད་བསམ་གྱི་འདུག ཡིན་ནའང་བུ་ཕྲུག་གཉིས་ཀྱི་ངོས་ནས་ངེད་གཉིས་མཉམ་དུ་ཡོད་མེད་ལ་མ་ལྟོས་པར་ཕ་མ་གཉིས་ལ་བསམ་ཤེས་དང་བརྩེ་འདང་ཆེན་པོ་ཡོད།
དྲི་བ། ད་རེབ་སྐོར་སྐྱོད་སྐབས་ལམ་བར་ནས་ན་ཚ་དང་ཉེན་ཁ་དེ་འདྲར་འཕྲད་ཡོད་དམ།
ལན། འཇར་མན་ནང་ནས་ཐེངས་ཤིག་རྐང་པའི་ཉྭ་གདོང་སྐྲངས་ནས་སྨན་པར་སྟོན་དགོས་བྱུང་སོང་། ཁོ་ཚོས་རྐང་པས་ཤུགས་བཀོལ་རྒྱུ་མང་དྲགས་པའི་རྐྱེན་གྱིས་རེད།རིམ་གྱིས་དྲག་སྐྱེད་མ་བྱུང་ན་གཤག་བཅོས་བྱེད་དགོས་སྐོར་བརྗོད་སོང་བས་ཅུང་ཙམ་སྐྲག་བྱུང་། ཡིན་ནའང་རིམ་གྱིས་དྲག་སྐྱེད་ཕྱིན་སོང་། དེ་ནས་གློ་རྒྱག་པ་དང་ཆམ་པ་ཕོག་པ་སོགས་ན་ཚ་ཞིག་ལ་བརྩི་ཡི་མེད། སྐོར་སྐྱོད་སྐབས་བོད་དོན་ཐོག་སྲོག་བློས་བཏང་བའི་རྒྱལ་གཅེས་དཔའ་བོ་བརྒྱ་དང་ཉི་ཤུ་རྩ་གྲངས་ཤིག་གི་མཚན་གཞུང་དེར་གཏན་ནས་ཁ་མ་བྲལ་བར་རྒྱབ་ལ་འཁུར་ནས་བསྡད་པ་ཡིན། ལམ་བར་གྱི་ཆར་བ་དང་ལྷགས་རླུང་སོགས་ཀྱི་དཀའ་ངལ་ཅི་ཞིག་འཕྲད་ཀྱང་ཁོང་ཚོའི་བློས་གཏོང་དང་ཆོད་སེམས་དེས་ང་ལ་བློ་སྤོབས་དང་སེམས་ཤུགས་སྤྲད་ཡོང་གི་འདུག ངའི་ལས་འགུལ་འདི་མཇུག་སྐྱོང་ཐུབ་པ་ཁོང་ཚོའི་བཀའ་དྲིན་ཡིན།
དྲི་བ། ཁྱེད་ལ་མ་འོངས་པར་འཆར་གཞི་གང་འདྲ་ཡོད། བོད་དོན་ལས་འགུལ་དེ་འདྲ་སྤེལ་འཆར་ཡོད་དམ།
ལན། ཟླ་འདིའི་ཕྱི་ཚེས་ ༢༢ ཡས་མས་ཤིག་ལ་ལྡི་ལི་ནས་ཡིད་བཞིན་ནོར་བུའི་མཇལ་ཁ་རག་གི་ཡོད་རེད། དེ་དུས་ད་ལྟ་བར་དུ་བོད་ཕྱི་ནང་གཉིས་ནས་རང་ལུས་མེར་བསྲེགས་བཏང་བའི་རྒྱལ་གཅེས་དཔའ་བོ་དཔའ་མོ་ཚོའི་མཚན་གཞུང་རྣམས་འབུལ་རྒྱུ་ཡིན། དེ་ནས་ཡུ་རོབ་ནང་ཕྱིར་ལོག་སྟེ། ད་རེབ་སྐོར་སྐྱོད་སྐབས་ཡུ་རོབ་རྒྱལ་ཁབ་ ༡༣ དང་། ཨེ་ཤ་ཡའི་ཉི་ཧོང་དང་ཐའེ་ཝན། ཧོང་ཀོང་། བལ་ཡུལ་དང་རྒྱ་གར་བཅས་ཁྱོན་རྒྱལ་ཁབ་ ༡༨ ཙམ་གྱི་མངའ་སྡེའི་སྤྱི་ཁྱབ་དང་གྲོས་ཚོགས་འཐུས་མི་སོགས་གནད་ཡོད་མི་སྣ་ ༡༤༠ ཙམ་གྱི་མཚན་རྟགས་བསྡུ་རུབ་བྱས་ཡོད་པ་དེ་དག་ཡུ་རོབ་མཉམ་འབྲེལ་དང་། ཇི་ནེ་ཝ་རུ་ཡོད་པའི་མཉམ་འབྲེལ་རྒྱལ་ཚོགས་གཉིས་ལ་སྤྲོད་རྒྱུ་ཡིན། དེའི་རྗེས་ཕྱིར་ཨ་རིར་མ་ལོག་ན་ང་རང་གི་རྐང་འཁོར་སྐོར་སྐྱོད་ཀྱི་ཐོངས་མཆན་དུས་ཡུན་རྫོགས་བཞིན་འདུག དེ་ནས་ཨོ་སི་ཊོ་རི་ཡ་དང་ནིའུ་ཛི་ལན་ཌི། སོག་ཡུལ་བཅས་སུ་སྐོར་སྐྱོད་བྱེད་པའི་འཆར་གཞི་ཞིག་ཡོད།
གསར་འགོད་པ། པདྨ་མཚོ།
གསར་འགོད་པ་དང་ལས་འགུལ་བ་གཉིས་ཀས་འབྲོག་སྐད་རྗེན་རྗེན་དུ་རྒྱག་གི་འདུག
ཀུ་རེ་རྩེད་མོ་ཡིན། ལས་འགུལ་བ་རིན་པོ་ལགས་སུ་རྗེས་སུ་ཡི་རངས་ཡོད་ཡོད་པ་རེད། དེ་ནས་གསར་འགོད་པ་པདྨ་མཚོ་ལགས་ཀྱིས་ཀྱང་དྲི་བ་ཡག་པོ་གནང་འདུག མ་འོངས་པར་ཡང་དྲི་བ་དྲིས་ལན་གྱི་སྐབས་སུ་གནད་དོན་ཧ་ཅང་གསལ་བོའི་ཐོག་ནས་འགོད་རྒྱུ་གལ་ཆེན་པོ་འདུག
སྙིང་གི་ནང་ན་རུས་པ་ཅན་རིན་པོ་ལགས་སུ་བསྔགས་བརྗོད་དང་རྗེས་སུ་ཡི་རངས་ཡོད། སྐུ་ཉིད་ཀྱིས་ལས་འགུལ་རླབས་ཆེན་འདི་ལྟ་བུ་ཞིག་སྤེལ་བ་དེས་བོད་ཕྱི་ནང་གཉིས་ལ་སེམས་ཤུགས་ཆེན་པོ་སྤར་སོང་། དཀའ་ངལ་དང་འགྲོ་སོང་མེད་པར་མི་བརྒྱ་གཉིས་བརྒྱ་མཉམ་དུ་འཛོམས་ཏེ་མར་མེ་ཁྲོམ་སྐོར་དང་ངོ་རྒོལ་སྐད་འབོད་སོགས་བྱས་ཀྱང་ས་གནས་གང་དེའི་ཡུལ་མི་ཚོར་སུན་པོ་བཟོས་པ་ལས་བོད་དོན་ལ་ཏུལ་འབྲུ་ཙམ་ཕན་ཐོགས་ཡོང་གི་མེད་ལ། རྒྱལ་སྤྱིའི་ཐོག་ལ་ཁྱབ་བསྒྲགས་ཀྱང་འགྲོ་ཐུབ་ཀྱི་མེད། དེ་བས་སྐུ་ཉིད་ཀྱིས་དཀའ་ལས་སོ་སོའི་གཟུགས་པོས་བརྒྱབ་འགྲོ་སོང་སོ་སོའི་པ་ཁུག་ནང་ནས་བཏང་སྟེ་འདི་ལྟ་བུའི་ལས་འགུལ་ཞིག་སྤེལ་བ་དེ་རྒྱལ་སྤྱིའི་ཐོག་ཁྱབ་བསྒྲགས་ཤུགས་ཆེན་པོ་འགྲོ་སོང་ལ། བོད་ཕྱི་ནང་གཉིས་ཀྱི་མི་མང་ཚོའི་སེམས་ནང་དྲི་བ་ཞིག་དང་དོགས་པ་ཞིག་བསླེབས་བཅུག་ཡོད།
སྐུ་ཉིད་ཀྱིས་བསྐྱར་དུ་ཨོ་སི་ཊོ་རི་ཡ་དང་ནེའུ་རྫི་ལནན་ཌི་སོགས་སུ་བོད་དོན་ཞུ་གཏུག་ལས་འགུལ་སྤེལ་རྒྱུའི་འཆར་གཞི་ཡོད་པར་ཡི་རངས་བསྔགས་བརྗོད་ཡོད། མུ་མཐུད་ཤུགས་བསྐྱོན་གནང་རོགས། ཐེངས་འདིའི་ཁྱོད་རང་གི་རླབས་ཆེའི་ལས་འགུལ་དེ་རྡ་རམ་ས་ལ་ཁུལ་གྱི་ལས་འགུལ་ཐབ་ཐེབ་ལ་སྙིང་བོ་མེད་པ་དང་ལྷག་པར་དུ་མི་སྒེར་ཁག་ཅིག་གིས་ལས་འགུལ་གྱི་ནང་དོན་ལས་སོ་སོ་ཁྱབ་བསྒྲགས་ཆེ་བ་བྱེད་མཁན་ཚོ་ངོ་གནོངས་དགོས་པ་ཞིག་བཟོས་གནང་སོང་ཐུགས་རྗེ་ཆེ།