རྒྱ་དམག་གིས་ལ་དྭགས་ནང་བཙན་འཛུལ་བྱེད་ཀྱི་འདུག་ཟེར།

རྒྱ་མིའི་མཐའ་སྲུང་དམག་མིས་བདུན་ཕྲག་གཉིས་རེའི་མཚམས་སུ་ལ་དྭགས་ས་ཁུལ་ཁག་གཅིག་ནང་བཙན་འཛུལ་བྱེད་ཀྱི་ཡོད་སྐོར་བསྒྲགས་འདུག 

དེ་རིང་རྒྱ་གར་རྒྱལ་སྲུང་བདེ་འཇགས་ལྷན་ཁང་གིས་བརྗོད་པ་ལྟར་ན། བོད་ཀྱི་མཐའ་མཚམས་ས་ཁུལ་ཁག་ནས་རྒྱ་ནག་གི་མཐའ་སྲུང་དམག་མིས་བདུན་ཕྲག་གཉིས་རེའི་ནང་རྒྱ་གར་བྱང་ཤར་ལ་དྭགས་ས་ཁུལ་ཆུ་དམར་ (Chumar)དང་། རྭ་ཁཱེ་ཎུ་ལཱ (RakhiNullah)། ཏཱག་གྲིབ་(Takdip )སོགས་སུ་བཙན་འཛུལ་བྱེད་ཀྱིན་ཡོད་སྐོར་བསྒྲགས་འདུག གནས་ཚུལ་དེའི་རྐྱེན་གཙོ་བོ་ནི་རྒྱ་གར་རྒྱལ་སྲུང་བདེ་འཇགས་དམག་མིས་ཉེ་ལམ་ནས་རྒྱ་དཀར་ནག་གི་རྩོད་གཞི་ཉོག་ཅན་གྱི་ས་མཚམས་ཐོག་དམག་སྒར་དང་འཛུགས་སྐྲུན་ལས་གཞི་མགོ་འཛུགས་བྱས་ཡོད་སྟབས། རྒྱ་ནག་གཞུང་གིས་དེ་ལ་འདོད་པ་མེད་པའི་རྣམ་འགྱུར་བསྟན་པ་ཞིག་ཡིན་སྐོར་དང་། སྔར་ལོའི་ཟླ་ ༤ དང་ ༥ ནས་ད་བར་རྒྱ་ནག་གི་དམག་མིས་རྒྱ་གར་ས་ཐོག་ཏུ་བཙན་འཛུལ་ཐེངས་ ༢༠ ཙམ་བྱས་ཡོད་འདུག

རྒྱ་གར་རྒྱལ་སྲུང་བདེ་འཇགས་ལྷན་ཁང་གིས། རྒྱ་ནག་མཐའ་མཚམས་དམག་མིས་རྒྱ་གར་བྱང་ཤར་ལ་དྭགས་ནང་བཙན་འཛུལ་ཡང་ཡང་བྱེད་ཀྱིན་ཡོད་ཀྱང་། ཁོ་ཚོ་ས་ཁུལ་དེ་དག་ནང་དུས་ཡུན་ཆུ་ཚོད་ ༡ ཙམ་ལས་སྡོད་ཀྱི་མེད་སྟབས། ད་སྔ་རྒྱལ་ཁབ་བདེ་འཇགས་ལ་གནོད་གཞིའི་གནས་ཚུལ་དེ་དག་སྐོར་རྒྱ་ནག་ལ་ཉེན་བརྡ་གང་ཡང་བཏང་མེད་སྐོར་དང་། རྒྱ་དམག་གིས་ལ་དྭགས་བྱང་ཤར་ཁུལ་དུ་དམག་མིའི་རླངས་འཁོར་ཡང་ཡང་གཏོང་གི་ཡོད་པ་དེ་ནི། བོད་ནུབ་ངོས་ཀྱི་མཐའ་མཚམས་ཁུལ་དུ་རྒྱ་ནག་གིས་གཞུང་ལམ་འཛུགས་སྐྲུན་རྒྱ་ཆེན་པོ་བྱས་ཡོད་པས་ཡིན་སྟབས། འབྱུང་འགྱུར་ཡང་གནས་ཚུལ་དེ་རིགས་འཐོན་སྲིད་སྐོར་བསྒྲགས་འདུག

སྔར་ལོའི་ཕྱི་ཟླ་ ༡༢ ཚེས་ ༡༩ དང་ཚེས་ ༢༠ ཉིན་རྒྱ་ནག་མཐའ་སྲུང་དམག་མི་ལ་དྭགས་ལྡེབ་བཟང་ ( Depsang)ཞེས་པའི་ས་ཁུལ་དང་། ཚེས་ ༡༣ ཉིན་ཏཱག་གྲིབ་ཞེས་པར་འཛུལ་ཡོད་པ་དང་། ཟླ་འདིའི་ཚེས་ཤར་ལ་སླར་ཡང་ལ་དྭགས་ཆུ་དམར་དང་ཏཱག་གྲིབ་སོགས་སུ་འཛུལ་ཏེ་དུས་ཡུན་ཆུ་ཚོད་ ༡ ཙམ་བསྡད་རྗེས་ཕྱིར་ལོག་ཡོད་འདུག  

འདས་ལོའི་ཟླ་ ༡༠ པའི་ནང་རྒྱ་གར་སྲིད་བློན་མན་མ་ཧཱན་སིང་དང་རྒྱ་ནག་གི་སྲིད་བློན་ལི་ཁཱེ་ཆིང་གཉིས་ཀྱིས་མཐའ་མཚམས་སྲུང་སྐྱོབ་སྐོར་གྱི་ཡིག་ཆར་མིང་རྟགས་བཀོད་དེ། ས་མཚམས་ཁུལ་དུ་ཞི་བདེ་བརྟན་བརླིང་དང་དམག་འཐབ་མི་འབྱུང་བ། མཉམ་ལས་དམག་སྦྱོང་བྱ་རྒྱུ་སོགས་ལ་གྲོས་ཆོད་བཞག་ཡོད་ཀྱང་། རྒྱ་དཀར་ནག་གི་ས་མཚམས་རྩོད་རྙོག་དེ་ལོ་རེ་བཞིན་ཇེ་སྡུག་ཏུ་འགྲོ་བཞིན་ཡོད་པ་དང་། ཐེངས་འདིར་ཡང་རྒྱ་ནག་གི་དམག་མི་རྒྱ་གར་ས་མཚམས་ནང་འཛུལ་ཏེ་རྒྱ་གར་གཞུང་དམངས་ལ་ཁོང་ཁྲོ་ཆེན་པོ་བསླངས་ཡོད།