དེ་རིང་ཉིན་རྒྱབ་༧གོང་ས་མཆོག་གི་རྒྱ་གར་གྱི་མངའ་སྡེ་ཁག་བཞི་ཙམ་གྱི་ནང་གི་མཛད་འཕྲིན་རྣམས་ལེགས་པར་གྲུབ་སྟེ་བཞུགས་སྒར་དུ་ཞབས་སོར་བདེ་བར་བཀོད་སོང་།
༧གོང་ས་མཆོག་གི་ཉིན་གྲངས་ ༡༠ ཙམ་གྱི་རྒྱ་གར་གྱི་མངའ་སྡེ་མཧཱ་ར་ཤེ་ཌ་དང་ཏ་མིལ་ན་ཌོའུ། མ་དྱ་པཱ་ཌེ་ཤི། ཆ་ཏི་སི་གྷར་བཅས་ཀྱི་མཛད་འཕྲིན་རྣམས་ལེགས་པར་གྲུབ་སྟེ། དེ་རིང་ཉིན་རྒྱབ་ཆུ་ཚོད་ ༢།༣༠ ཐོག་བཙན་བྱོལ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གི་དབུས་ཆོས་རིག་བཀའ་བློན་པདྨ་ཆོས་འབྱོར་མཆོག་དང་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་ལགས། དེ་བཞིན། གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་དང་དྷ་ས་ཁུལ་གྱི་སེར་སྐྱ་མི་མང་བཅས་ཀྱི་ཕེབས་བསུའི་ཁྲོད་བཞུགས་སྒར་དུ་ཞབས་སོར་བདེ་བར་བཀོད་སོང་།
ཕྱི་ཟླ་ ༢ ཚེས་ ༡ ནས་ ༢ བར་རྒྱ་གར་ཨ་སམ་མངའ་སྡེའི་གྲོང་ཁྱེར་ཆེ་ཤོས་གོ་ཧ་ཊིར་ (Guwahati) རྟེན་གཞི་བྱས་པའི་ཀ་ལ་ཆེ་ཏྲ་ (Kalakshetra )ཞེས་པའི་སྒྱུ་རྩལ་བསྟི་གནས་ཁང་དུ་བོད་ཀྱི་སྒྱུ་རྩལ་དང་རིག་གཞུང་དུས་སྟོན་ཐེངས་དང་པོ་དབུ་འབྱེད་སོགས་ཀྱི་མཛད་འཕྲིན་བསྐྱང་རྒྱུ་དང་། ཕྱི་ཚེས་ ༣ ནས་ ༥ བར་རྒྱ་གར་མེ་གྷ་ལཱ་ཡཱའི་མངའ་སྡེའི་ནང་དད་ལྡན་ནང་པ་ཚོར་གསུང་ཆོས་དང་བཀའ་སློབ་ལམ་སྟོན་གནང་གཏན་འཁེལ་ཡོད་འདུག
གསར་འགོད་པ། པདྨ་མཚོ།
