བོད་པའི་གནས་བབ་ཀྱི་དཔང་པོ།

རྨེའུ་དཀོན་རྒྱམ།

དུས་རབས་ཉི་ཤུ་བའི་ནང་འཛམ་གླིང་དམག་འཁྲུག་ཆེན་པོ་གཉིས་བསྟུར་མར་བྱུང་བའི་ཤུགས་རྐྱེན་གྱིས། སྤྱིར་ཨེ་ཤ་ཡ་དང་སྒོས་སུ་བོད་ཀྱི་མངའ་ཁོངས་སུའང་དེ་བཞིན་དམར་ཕྱོགས་བཙན་འཛུལ་བས་དྲག་རྒོལ་རིམ་པར་བྱུང་བས། བོད་མི་ཁྲི་བརྒྱ་དང་ཉི་ཤུ་བརྒལ་བ་དམར་གསོད་བཏང་ཞིང་། ལོ་ངོ་སྟོང་ཕྲག་མང་པོའི་ལོ་རྒྱུས་ཀྱི་རིན་ཐང་ལྡན་པའི་བོད་ཀྱི་རིག་གཞུང་དང་ཁོར་ཡུག མདོར་ན་སྣོད་བཅུད་ཡོངས་ལ་གཏོར་བཅོམ་ཚབས་ཆེན་ཐེབས་པ་མ་ཟད། བོད་རིག་པའི་ལྟེ་གནས་དགོན་སྡེ་དྲུག་སྟོང་ལྷག་ཀྱང་རྩ་གཏོར་བཏང་སྟེ། དཔལ་ཡོན་ཕུན་སུམ་ཚོགས་པའི་བོད་དང་བོད་ཀྱི་ཁྱད་ནོར་རྣམས་རྩ་མེད་དུ་གཏོང་རྒྱུའི་སྲིད་བྱུས་གདུག་རྩུབ་ཅན་རྒྱུན་ཆད་མེད་པར་སྤེལ་བར་བརྟེན།

གཞི་རྩའི་བོད་ཀྱི་རང་དབང་དང་ཞི་བདེ། ཐོབ་ཐང་བཅས་ཀྱི་རིན་ཐང་ལ་མཁྱེན་རྟོགས་དང་ལག་ལེན་ཟབ་པའི་རིགས་མཐུན་སྤུན་ཟླ་ཆེས་མང་པོ་ཞིག་གིས་རིགས་ཞེན་གཙང་མ་ཞིག་དང་ཆོད་སེམས་བརྟན་པོ་ཞིག་གིས་འཐབ་རྩོད་གནང་བའི་ཁྲོད་ནས་བློས་གཏོང་དང་དཔའ་ངར་ཆེན་པོས་བཙན་པོའི་ལོ་རྒྱུས་ཀྱི་ བདག་དབང་མཇུག་སྐྱོང་ཞུས་པའི་བརྒྱུད་རིམ་ནང་རླབས་ཆེན་གྱི་སྐྱེ་བུ་མང་པོས་ཚེ་སྲོག་གཏའ་མར་འཇོག་གནང་མཛད་པའི་ལོ་རྒྱུས་ཀྱི་བདེན་དོན་བརྩད་པ་ནི།  རང་རིགས་རང་སྲུང་གི་འགན་འཁྲི་དང་། མི་རབས་གསར་བ། མ་འོངས་པའི་བོད་བཅས་ཀྱི་འཐབ་རྩོད་ཀྱི་རྨང་གཞི་གལ་ཆེན་ཞིག་ཆགས་ཡོད།

དཔེར་ན། ཕྱི་ལོ་ ༡༩༦༥ ཟླ་ ༨ ཚེས་ ༡༥ ཉིན་རྒྱ་ནག་དམར་གཞུང་གིས་ཁྲི་མུན་བཙོན་དུ་བཅུགས་ཤིང་བོད་ཀྱི་ལོ་རྒྱུས་ནང་གི་ཆབ་སྲིད་བཙོན་པའི་ལོ་ཡུན་རིང་ཤོས་ཡིན་པ་མ་ཟད། ལྷོ་ཤར་ཨེ་ཤ་ཡའི་ལོ་རྒྱུས་ནང་གིའང་ཟིན་ཐོ་ཨང་དང་པོ། ལྷག་པར་འཛམ་གླིང་གི་ཆབ་སྲིད་བཙོན་པའི་ལོ་རྒྱུས་ཟིན་ཐོ་ཨང་གསུམ་པ་ཡིན་པའི་བོད་དང་བོད་མིའི་ཆེད་དུ་རྒྱ་གཞུང་དང་དེའི་སྲིད་བྱུས་ལ་ཞུམ་པ་མེད་པའི་སྙིང་སྟོབས་ཀྱིས་ཞི་རྒོལ་རབ་དང་རིམ་པ་གནང་མྱོང་བའི་རླབས་ཆེན་གྱི་སྐྱེ་བུ་དམ་པ་སྟག་སྣ་འཇིགས་མེད་བཟང་པོ་མཆོག་རྒྱ་གཞུང་གི་བཙོན་ནང་དུ་མི་ལོ་ཧྲིལ་བོ་སོ་གཉིས་རིང་དཀའ་སྡུག་ཚད་མེད་མྱངས་ཤིང་། ལོ་ངོ་ལྔ་ལ་ལས་མི་རུ་ཁག་ཟེར་བའི་འགྲོ་འདུག་གི་རང་དབང་སྤུ་རྩེ་ཙམ་ཡང་མེད་པའི་ངལ་རྩོལ་བསྒྱུར་བཀོད་ཀྱི་ཁོར་ཡུག་ནང་བཞུགས་དགོས་བྱུང་འདུག་ལ། ལར་ནས་ཀྱང་རྒྱ་གཞུང་གིས་ཁྲིམས་མེད་ལུགས་མེད་ཀྱིས་དམ་པ་ཁོང་ལ་ལོ་ངོ་ཧྲིལ་བོ་བཞི་བཅུ་ཞེ་གཅིག་གི་ཁྲིམས་ཐག་བཅད་འདུག་མོད། རྒྱལ་སྤྱི་དང་འགྲོ་བ་མིའི་ཐོབ་ཐང་ལྷན་ཚོགས་ཁག་ནས་གནོད་ཤུགས་དང་རྒྱ་གཞུང་གིས་རང་སྲུང་དཀར་འདོན་གྱི་ཆེད་སོགས་རྒྱུ་མཚན་སྣ་ཚོགས་ལ་བརྟེན་ཕྱི་ལོ་ ༢༠༠༢ ཟླ་ ༣ ནང་ཨ་རིར་སྨན་བཅོས་ལ་ཁ་གཡར་ནས་ཕྱིར་ཕུད་བཏང་།

རྒྱུ་མཚན་ནི། གལ་སྲིད་རྒྱ་གཞུང་གིས་མུ་མཐུད་ནས་རྒྱལ་གཅེས་དཔའ་བོ་ཁོང་ལོ་ཤས་རིང་བཙོན་འཇུག་བྱས་ན། འཛམ་གླིང་ཆབ་སྲིད་བཙོན་པའི་ལོ་རྒྱུས་ཀྱི་ཟིན་ཐོ་ཡོངས་སུ་གཏོར་བར་ཞེད་དེ་ཁོང་འགྲོ་འདུན་མེད་བཞིན་དུ་བཙན་ཤུགས་ཀྱིས་ཨ་རིར་ཕྱིར་ཕུད་གཏོང་སྟངས་སྐོར་ལ། རིན་ཐང་ལྡན་པའི་ཁོང་གི་ལོ་རྒྱུས་《མི་ཚེའི་མྱོང་ཚོར་》གྱི་ནང་དུ། “ང་ཨ་རིར་གཏོང་གི་ཡིན་ཟེར་བ་དང་། ཕྱིར་ལོག་མི་ཆོག་པའི་མིང་རྟགས་འགོད་དགོས་ཟེར་དུས། ང་ནི་བོད་རང་དབང་རང་བཙན་ཡིན་ཞེས་བརྗོད་ནས་བཙོན་དུ་ཚུད་པ་ཞིག་ཡིན་པ་ལས། ཁྲིམས་འགལ་གྱི་ཉེས་དོན་ཉེས་བསགས་ཀྱིས་བཙོན་དུ་ཚུད་པ་ཞིག་མིན་པས། ངས་ཕྱིར་ལོག་མི་བྱེད་པའི་མིང་རྟགས་འགོད་ཐུབ་ཀྱི་མི་འདུག”ཅེས་པ་འདིས། བོད་མི་རིགས་ཀྱི་ཆེད་དུ་བློས་གཏོང་ཅི་ཙམ་བྱས་ཡོད་མེད་དང་། ལྷག་པར་རྒྱ་གཞུང་གིས་ཁོང་ཕྱིར་ཕུད་གཏོང་དགོས་པའི་རྒྱབ་ལྗོངས་གསལ་བོ་ཤེས་རྟོགས་ཐུབ་ཀྱི་འདུག

དེས་ན། བོད་མི་སྒེར་བའི་ལོ་རྒྱུས་ཀྱིས་བོད་ཀྱི་གནས་བབ་སྤྱི་ཡོངས་རྒྱལ་སྤྱིའི་སྡིངས་ཆའི་ཐོག་དངོས་ཡོད་ལོ་རྒྱུས་ཀྱི་ལམ་ནས་གསལ་སྟོན། དེ་ལས་ཀྱང་རྒྱ་གཞུང་གི་ཁྲིམས་ལུགས་དང་ལག་ལེན་གཉིས་ལ་འགལ་ཟླ་ཡོད་པ་བདེན་དཔང་གིས་གསལ་བཤད། སྐྱབས་བཅོལ་ནང་གི་གཞོན་སྐྱེས་ཚོར་འཐབ་རྩོད་བྱེད་ཕྱོགས་ལ་མིག་དཔེ་འཇོག་བཞག་པ་མ་ཟད། ད་ལྟ་དང་མ་འོངས་པའི་བོད་ཀྱི་རྗེས་རབས་པ་རྣམས་ལའང་འཐབ་རྩོད་ཀྱི་གདེང་སྤོབས་ཆེན་པོ་བསྐྲུན་ཐུབ་པའི་ཡིད་ཆེས་དང་། བོད་ཀྱི་གནས་བབ་ངོ་མའི་བདེན་དཔང་བཅས་ཡིན་པའི་རྒྱལ་གཅེས་དམ་པ་ཁོང་གི་མི་ཚེའི་ལོ་རྒྱུས་དེ་མ་བཀླགས་ཐབས་མེད་ཀྱི་དེབ་ཐེར་ཞིག་ཏུ་ཁུམས་སོ།།