བོད་ཀྱི་
ཉིན་འདི་གར་རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་པར། དེང་སྐབས་ཆ་རྐྱེན་མང་པོ་འཛོམ་པའི་ལག་འཁྱེར་ཁ་པར་ཨན་ཌོར་ཌི་དར་ཁྱབ་ཆེན་པོ་ཕྱིན་པ་དང་བསྟུན་ཏེ། རྒྱལ་སྤྱིའི་ཐོག་སྐད་གྲགས་ཆོད་པའི་ཨ་རིའི་ཨེན་ཊེལ་གློད་ཀླད་བཟོ་གྲྭར་གྱོང་ཕོག་ཡོད་པ་དང་། གྷོ་གྷིལ་རིག་མཛོད་ཐོན་རྗེས་འཛམ་གླིང་མི་མང་གིས་དེ་སྔ་དགའ་བསུ་ཆེན་པོ་ཞུ་ཡུལ་ཝེ་ཀི་ཤེས་བྱ་ཀུན་ཁྱབ་ཀྱང་ཕམ་ཉེས་ཕྱིན་ཡོད་འདུག ལྷག་པར་དུ་གློག་ཀླད་ཀྱི་གོ་གནས་ཁ་པར་གྱིས་འཕྲོག་པ་དང་བསྟུན་ཏེ། རིག་མཛོད་དྲ་བ་དེ་དག་ཐོག་བརྗོད་བྱ་སྤེལ་མཁན་ཡང་ལྡབ་འགྱུར་གྱིས་ཇེ་ཉུང་དུ་ཕྱིན་ཡོད་འདུག
ཉ་ཆེ་བས་ཆུང་བ་ཟོས། ཆུང་བས་འབུ་རིགས་ཟོས། ཞེས་པའི་དཔེ་ལྟར། བརྡ་འཕྲིན་ལག་རྩལ་འཕེལ་རྒྱས་ཕྱིན་ཏེ་དཔེ་དེབ་ཀྱི་ཁྲོམ་རྭ་གློག་ཀླད་ཀྱིས་འཕྲོག རླུང་འཕྲིན་གྱི་བདུད་བྱ་བརྙན་འཕྲིན་གྱིས་བཀུག དར་འཕྲིན་གྱི་མཚན་སྙན་སྐད་འཕྲིན་གྱིས་བཅོམ་སྟེ། ངོ་དེབ་དང་འཕྲུལ་དྲ། སྐད་འཕྲིན་སོགས་སྤྱི་ཚོགས་དྲ་འབྲེལ་མང་པོ་ཀློང་བརྡོལ་རྗེས། བྷེ་བྷེ་སི་དང་སི་ཨན་ཨན། ནེའུ་ཡོག་དུས་བབ་དྲ་བ་སོགས་ཀྱི་ཀློག་གྲངས་མར་ཆགས་ཤིང་། དེ་འབྲེལ་གྱི་རླུང་འཕྲིན་དང་བརྙན་འཕྲིན། ཚགས་པར་སོགས་ཀྱང་ལྟ་ཀློག་བྱེད་མཁན་ཉིན་རེ་བཞིན་ཇེ་ཉུང་དུ་འགྲོ་བཞིན་ཡོད་འདུག
དེང་སྐབས་མི་ཚང་མ་གསར་འགོད་པ་ཡིན་ལ་རྩོམ་སྒྲིག་པ་ཡང་ཡིན། གཞུང་གི་ལས་བྱེད་དང་བཟོ་གྲྭའི་བཟོ་བ། སློབ་གྲྭའི་སློབ་ཕྲུག་དང་དགོན་པའི་གྲྭ་བ། ཐ་ན་མིག་ལོང་པ་དང་རྣ་འོན་པ། ངག་ལྐུག་པ་ཚོས་ཀྱང་ཚ་ཚ་འུར་འུར་གྱིས་གསར་འགོད་དང་རྩོམ་སྒྲིག འབྲེལ་མཐུད་སོགས་བྱས་ཏེ་གནས་ཚུལ་ཁྱབ་སྤེལ་གཏོང་གི་ཡོད། བརྡ་འཕྲིན་གསར་བརྗེའི་དུས་རིམ་འདིར་ཡིག་འབྲུ་ན་གཅིག་མི་ཤེས་པའི་ཕྱུགས་རྫི་དང་ཞིང་བ། ཚོང་ཁང་གི་གཡོག་པོ་དང་ཟ་ཁང་གི་མ་བྱིན་ཚུན་གྱིས་འཛམ་གླིང་ཟླུམ་པོ་འདི་ཕྱིར་སློག་ནང་སློག་བྱས་ཏེ་གསར་འགྱུར་གསར་པ་དང་གསང་བ་ཟབ་མོ་དག་ལ་ལྟ་ཉན་བྱེད་བཞིན་ཡོད།
ལོ་རབས་བརྒྱད་ཅུ་དགུ་བཅུའི་ནང་། བརྡ་འཕྲིན་གྱིས་རང་བྱུང་ཁམས་ལ་གསར་བརྗེ་བྱས་ཏེ་གནམ་གཤིས་འགྱུར་ལྡོག་དང་ས་གཡོམ་མཚོ་འཁྱོམ་སོགས་ཀྱི་གསང་བ་བཏོད། སྟོང་ལོ་གསར་པ་དབུ་ཚུགས་པ་དང་བསྟུན་ཏེ་བརྡ་འཕྲིན་ནུས་པའི་ཁྱབ་ཁོངས་རྒྱ་བསྐྱེད་དེ་འཛམ་གླིང་ཤར་ནུབ་ཇེ་ཉེ་དང་ས་སྒང་རིལ་མོ་ཇེ་ཆུང་དུ་གྱུར་ཅིང་། རྒྱ་མཚོའི་གཏིང་དང་གནམ་མཁའི་དབྱིངས། སའི་གོ་ལའི་བྱང་སྣེ་ནས་ལྷོ་སྣེ་སོཊ་ལ་གཏམ་གླེང་སྐྱེལ་བ་དང་། གཟའ་སྐར་གཞན་དང་ས་སྒང་བར་བརྙན་རིས་ཐད་གཏོང་གི་ལས་རིམ་རྒྱུན་འཇགས་སུ་སོང་།
ན་ནིང་ད་ལོར་བརྡ་འཕྲིན་གྱིས་འགྲོ་བ་མིའི་རིགས་ལ་འགྲན་བསླངས་ཏེ་མི་དང་མིའི་འབྲེལ་ལམ་དང་། ཀུན་སྤྱོད་བརྩེ་དུང་སོགས་ཀྱི་རིན་ཐང་ཇེ་དམའ་ནས་ཇེ་ཆུང་དུ་འགྱུར་མགོ་མགོ་ཚུགས་སོང་། བརྡ་འཕྲིན་གྱི་ཐོད་རྒལ་ཆེན་མོ་འདིས་མི་ཚོར་རང་ཁྱིམ་གྱི་ཕ་མ་སྤུན་ཉེ་དང་བཟའ་ཟླ་བུ་ཕྲུག་སོགས་ལ་ཁ་བརྡ་དང་འབྲེལ་འདྲིས་ཇེ་ཉུང་དུ་བཏང་སྟེ། རྒྱལ་ཁབ་གཞན་དང་སྤྱི་ཚོགས་གཞན་གྱི་མི་དང་འགྲོ་འོང་འབྲེལ་འདྲིས་ཇེ་མང་དུ་བཏང་།
བརྡ་འཕྲིན་གྱིས་མིའི་གསང་བ་ཐམས་ཅད་ཕྱིར་བསྔོགས་ཏེ་ཟོག་རྫུ་ཡོད་ཚད་མཐིལ་གཏོད། འཛམ་གླིང་གི་གནས་ཚུལ་དང་གསང་བ་ཐ་དག་གི་ཁ་ལུད་ནས་ཞབས་རྡོལ་བཞིན་པའི་སྐབས་འདིར། བོད་པ་ཚོར་གདོད་ནས་གོམས་པའི་ཟོལ་སྦྱོར་ཚུལ་ཆོས་ཀྱི་རང་གཤིས་དག་ཀྱང་རྨང་ནས་ཞིག་ཅིང་སྙིལ་མགོ་བརྩམས་སོང་ལ། ལྷ་ཆོས་དགེ་བ་བཅུ་དང་མི་ཆོས་གཙང་མ་བཅུ་དྲུག་གི་ཁྲིམས་ལས་བརྒལ་བའི་གྲུབ་རྟགས་ཆེན་པོ་དག་དེང་གི་བརྡ་འཕྲིན་ཁྲོམ་རྭའི་ནང་གི་ཚོང་རྫས་བྲིན་ཤོས་དེ་ཆགས་འདུག
