རྒྱ་ནག་གི་མགོ་ཁྲིད་ཟུར་བ་ལྔ་འཛིན་རོགས།

ཁ་སང་ཕྱི་དྲོར་སི་པན་རྒྱལ་སར་སི་པན་རྒྱལ་ཡོངས་ཁྲིམས་ཁང་གི་ཁྲིམས་རྩོད་པ་མོ་རེ་ནོ་ (Ismael Moreno )ལགས་ཀྱིས།རྒྱ་ནག་གི་སྲིད་འཛིན་ཟུར་པ་ཅང་ཙེ་མིན་དང་སྲིད་བློན་ཟུར་བ་ལི་ཕིན་ (li peng)།ཆོད་ཧྲི་ (Qiao shi)།ཁྲིན་ཁོས་ཡོན་ (chen kuiyuan) ཕིན་པེ་ཡུན་ (Peng peiyun)སོགས་ཀྱིས་བོད་ནང་གི་བོད་མི་དམར་གསོད་དང་གཅར་རྡུང་སོགས་བྱས་ཏེ་མི་རིགས་རྩ་མེད་གཏོང་བའི་སྲིད་བྱུས་ལག་བསྟར་བྱས་པའི་ནག་ཉེས་ཆེན་པོ་བཟོས་ཡོད་སྟབས། རྒྱལ་སྤྱིའི་ཉེན་རྟོག་ལྷན་ཚོགས་ཀྱིས་ཁོང་ཚོ་འཛིན་བཟུང་བྱེད་དགོས་པའི་བཀའ་ཁྱབ་བཏང་ཡོད་འདུག

དེ་རིང་རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་དཔའ་ཆོན་ཡུན་གྱིས་སི་པན་རྒྱལ་ཡོངས་ཁྲིམས་ཁང་གི་ཐག་གཅོད་ལ་སྐྱོན་བརྗོད་བྱས་པ་མ་ཟད།རྒྱལ་ཁབ་གཉིས་ཀྱི་ཕྱི་སྲིད་དང་ཚོང་ལས་འབྲེལ་ལམ་ཇེ་སྡུག་ཏུ་འགྲོ་སྲིད་པའི་ཉེན་བརྡ་བཏང་བ་དང་སི་པན་གཞུང་གིས་དྲང་བདེན་གྱི་ཐག་གཅོད་ཡག་པོ་གནང་དགོས་སྐོར་བརྗོད་ཡོད་འདུག གོང་གི་གནས་ཚུལ་དེར་རྒྱུ་བྱས་ཏེ། དེ་རིང་སི་པན་གྲོས་ཚོགས་ནང་གཞུང་འཛིན་མི་མང་ཚོགས་པས་སི་པན་རྩ་ཁྲིམས་ནང་གི་རྒྱལ་སྤྱིའི་ཡོངས་ཁྱབ་རྩ་ཁྲིམས་ལ་བསྐྱར་བཅོས་བྱས་ཏེ། ཁྲིམས་ཁང་དང་ཁྲིམས་རྩོད་པའི་དབང་ཚད་དང་ཁྱབ་ཚད་ལ་ཚོད་འཛིན་ཇི་ལྟར་བྱེད་དགོས་མིན་ཐོག་བགྲོ་གླེང་བྱེད་བཞིན་ཡོད་འདུག

རྒྱལ་སྤྱིའི་ཉེས་ཡང་ཚོགས་པ་དང་འགྲོ་བ་མིའི་ཐོབ་ཐང་ཚོགས་པ་གཉིས་ཀྱིས་ཟུང་འབྲེལ་གྱིས།སི་པན་གཞུང་གིས་རྩ་ཁྲིམས་དེར་འགྱུར་བ་མི་གཏོང་རྒྱུར་འབོད་སྐུལ་ཞུ་བཞིན་ཡོད་པ་མ་ཟད། གལ་སྲིད་འགྱུར་བ་ཕྱིན་པ་ཡིན་ན། འབྱུང་འགྱུར་སི་པན་རྒྱལ་ཡོངས་ཁྲིམས་ཁང་གིས་རྒྱལ་སྤྱིའི་ནང་འགྲོ་བ་མིའི་རིགས་ལ་ནག་ཉེས་བཟོ་མཁན་ཚོ་ཁྲིམས་བཤེར་བྱེད་པའི་དབང་ཚད་ཆུང་དུ་འགྲོ་རྒྱུ་ཡིན་པའི་ཚོད་དཔག་བྱེད་བཞིན་ཡོད་འདུག

རྒྱལ་སྤྱིའི་ཉེན་རྟོག་ལྷན་ཚོགས་ནང་འཐུས་མིའི་རྒྱལ་ཁབ་༡༩༠ཙམ་ཡོད་ཅིང་།འཐུས་མིའི་རྒྱལ་ཁབ་ཀྱི་ཉེན་རྟོག་པས་ཉེས་ཅན་སོ་སོའི་རྒྱལ་ཁབ་ཀྱི་མངའ་ཁོངས་སུ་སླེབ་ཚེ་འཛིན་བཟུང་བཀག་ཉར་བྱེད་ཆོག་པ་དང་།ཉེས་ཅན་གྱི་འཛིན་བཟུང་བྱེད་པའི་ཉེན་བརྡའི་མཚོན་མདོག་དམར་པོ་དང་ལྗང་ཁུ།ནག་པོ།སེར་པོ།སྔོན་པོ།དམར་སྨུགལི་ཁྲི་བཅས་ཡོད།དེའི་ནང་རྒྱ་ནག་གི་མགོ་ཁྲིད་ཟུར་བ་ཚོ་དམར་པོའི་ཉེན་བརྡའི་ཁོངས་སུ་ཚུད་ཡོད་སྟབས།དེས་ཉེས་ཅན་གྱི་སྡོད་གནས་འཚོལ་ཞིབ་བྱས་ཏེ་འཛིན་བཟུང་གིས་བཅད་ཁྲ་གཏོང་མཁན་ཁྲིམས་ཁང་ལ་རྩིས་སྤྲོད་བྱེད་ཀྱི་ཡོད་འདུག