དབུ་མའི་ལམ། ～ རྒྱ་ནག་གི་གོ་སྐབས་ཤིག

ལོ་རྒྱུས་ཐོག་བོད་ནི་རང་བཙན་གཙང་མའི་རྒྱལ་ཁབ་ཅིག་ཡིན་པ་ལས་ “རྒྱ་ནག་གི་ཆ་ཤས” ཤིག་གཏན་ནས་མིན། བདེན་དོན་འདི་ལ་ཅི་ལྟར་འཁྱོགས་བཤད་བྱས་ཀྱང་སྐྱག་རྫུན་ལ་འགྱུར་མི་སྲིད་པས། དེའི་སྐོར་ལ་འདི་ཡན་གྱི་རྩོད་གླེང་བྱེད་པའི་དགོས་པ་མི་འདུག དེ་ལས་ཀྱང་ཤེས་དགོས་བ་ཞིག་ནི། ད་ལྟ་བོད་མི་མང་ཆེ་བའི་རེ་བ་ནི་༧གོང་ས་སྐྱབས་མགོན་རྒྱལ་བ་བསྟན་འཛིན་རྒྱ་མཚོ་མཆོག་དང་ཡང་ན་བཙན་བྱོལ་བོད་གཞུང་གིས་བཏོན་པའི་དབུ་མའི་ལམ་ཡིན་པས། བོད་ཀྱི་འདས་ཟིན་པའི་ཆབ་སྲིད་གནས་བབས་ལ་རྩོད་གླེང་བྱེད་རྒྱུར་དགེ་མཚན་ཆེན་པོ་ཞིག་མཐོང་གི་མི་འདུག

དབུ་མའི་ལམ་ཞེས་པ་ནི། དུས་རབས་ ༢༠ བའི་ལོ་རབས་ ༧༠ སྟོད་ལ་༧གོང་ས་མཆོག་གིས་སྒེར་གྱི་བསམ་ཚུལ་ཡིན་པར་བྱས་ཏེ་བཏོན་པའི་བོད་དོན་བདེན་མཐའ་སེལ་ཐབས་ཤིག་ཡིན་པ་དང་། ༡༩༧༩ ལོར་རྒྱ་ནག་གི་ཕྱོགས་ནས་ཀྱང་ “ བོད་རང་བཙན་རྩོད་གླེང་མ་བྱས་ན། དེ་མིན་གྱི་གནད་དོན་ཁག་གྲོས་མོལ་བརྒྱུད་དེ་ཐག་གཅོད་བྱས་ཆོག(ཏིང་ཞའོ་ཕིན)” ཅེས་བཟང་ཕྱོགས་ཀྱི་རྣམ་འགྱུར་བསྟན་ཡོད་སྟབས། བཙན་བྱོལ་སྤྱི་ཚོགས་ཀྱི་བོད་གཞུང་དམངས་གཉིས་ཀྱིས་དམངས་གཙོའི་ལམ་ནས་དེ་ལ་བགྲོ་གླེང་བྱས་ཤིང་། ༡༩༨༨ ལོར་ “བོད་རྒྱ་གཉིས་ལ་ཕན་ཁེ་ཡོད་པའི་སྲིད་ཇུས” ཤིག་ཡིན་པར་གཏན་ལ་ཕབ་པ་ཞིག་རེད།

དེའི་བརྗོད་སྙིང་ནི། “བོད་མི་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་དབང་བསྒྱུར་བྱེད་བཞིན་པའི་་བོད་ཀྱི་ད་ལྟའི་གནས་བབས་ཁས་མི་ལེན་པ་དང་། བོད་ཀྱི་ལོ་རྒྱུས་དངོས་དོན་རང་བཙན་ཡིན་པ་དེ་ཡང་རྩོད་གླེང་མི་བྱེད་པར་དེ་གཉིས་ཀྱི་དབུས་ཏེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྒྲོམ་གཞིའི་ནང་ཆོལ་གསུམ་བོད་རིགས་ཡོངས་རྫོགས་ལ་མིང་དོན་མཚུངས་པའི་རང་སྲིད་རང་སྐྱོང་ཐོབ་ཐབས་བྱ་རྒྱུའི་སྲིད་ཇུས་དང་ཐབས་ལམ། ” ཞེས་པ་དེ་ཡིན། དེ་ལ་ཐོག་མར་བོད་མི་མང་པོ་ཞིག་གིས་ “ང་ཚོའི་འདེམས་བསྐོའི་ཐོབ་ཐང་ལ་རྩིས་མེད་བཏང་སོང” ཞེས་བློ་ཕམ་གྱི་རྣམ་འགྱུར་བསྟན་དེ་བོད་ཀྱི་རང་དབང་སླར་གསོའི་ཆེད་དུ་རྒྱ་ནག་ལ་ཛ་དྲག་གི་ངོ་རྒོལ་ལས་འགུལ་ཡང་སྤེལ་ཡོད།

འོན་ཀྱང་། ལོ་ཁ་ཤས་ཡར་སྔོན་ནས་བཟུང་༧གོང་ས་མཆོག་དང་བཙན་བྱོལ་བོད་གཞུང་གིས་དབུ་མའི་ལམ་་གྱི་བྱེ་བྲག་གི་ནང་དོན་ལ་འགྲེལ་བཤད་རབ་དང་རིམ་པ་བྱས་པར་བརྟེན། ད་ལྟ་བོད་མི་མང་ཆེ་བས་ “དེ་ནི་དངོས་ཡོད་གནས་ཚུལ་དང་མཐུན་པ་ཞིག་རེད” ཅེས་དབུ་མའི་ལམ་ལ་མོས་མཐུན་དང་རྒྱབ་སྐྱོར་བྱེད་བཞིན་ཡོད། དེ་བས། བོད་བློས་གཏོང་འདོད་མེད་པའི་རྒྱ་ནག་ལ་མཚོན་ན་དབུ་མའི་ལམ་ནི་གོ་སྐབས་བཟང་པོ་ཞིག་ཡིན་ཞེས་བཤད་ཆོག རྒྱུ་མཚན་ནི། བོད་མི་ཚོས་རྒྱ་ནག་གཞུང་ལ་བཟུང་ཡོད་པའི་ “རེ་བ” དང་ “བཟོད་བསྲན” ལའང་ཚད་ཡོད་པའི་རྐྱེན་གྱིས་ཡིན་ལ། དེ་ནི་གཡས་ཕྱོགས་ཀྱི་རི་མོ་ལས་གསལ་བོར་བསྟན་ཡོད་པ་ལྟར། ད་ལྟའི་བོད་རྒྱའི་བར་གྱི་རྟེན་འབྱུང་གི་འབྲེལ་བ་ལས་ཀྱང་ཚོད་དཔག་བྱེད་ཐུབ།

རི་མོ་འདི་གཞིར་བཟུང་ན་དེ་རིང་གི་བོད་རྒྱའི་བར་གྱི་འབྲེལ་བ་ནི། རྒྱ་ནག་ནི་ཐག་གཅོད་བྱེད་མཁན་གྱི་ནུས་བ་བཟུང་ཡོད་པའི་གྲུབ་ཆ་གཙོ་བོ་དང་བོད་ནི་དེ་ལས་ལྡོག་སྟེ་ཐག་གཅོད་བྱ་ཡུལ་གྱི་ནུས་བ་མ་གཏོགས་བཟུང་མེད་པའི་གྲུབ་ཆ་ཕལ་བའི་འབྲེལ་བས་གྲུབ་ཡོད། དེ་འདྲའི་ཆགས་སྟངས་ཀྱི་འབྲེལ་བའི་ཁྲོད། ད་ལྟ་རྒྱ་ནག་གིས་བོད་ཐོག་ལག་བསྟར་བྱེད་བཞིན་པའི་དྲག་གནོན་སྲིད་ཇུས་ཀྱི་ཚད་རིམ་དེ་རིམ་བཞིན་ཡར་འཕེལ་ཏེ་ཚད་རིམ་མཐོ་ཤོས་སུ་བསླེབས་ཡོད་པ་དང་། བོད་ཀྱི་རང་དབང་གི་ཚད་རིམ་དེ་རིམ་བཞིན་མར་འགྲིབ་ནས་ཚད་རིམ་དམའ་ཤོས་སུ་ལྷུང་ཡོད། འདི་ནི་ད་ལྟའི་བོད་ཀྱི་གནས་བབས་ཡིན།

འོན་ཀྱང་། འབྲེལ་བ་དེའི་ནང་དུ་གནད་དོན་གཞན་ཞིག་ཀྱང་བསྟན་ཡོད་དེ། རྒྱ་ནག་གིས་བོད་ཐོག་ལག་བསྟར་བྱེད་བཞིན་ཡོད་པའི་དྲག་གནོན་སྲིད་ཇུས་ནི་ཚད་རིམ་མཐོ་ཤོས་སུ་བསླེབས་ཡོད་པ་དེས་དོན་གྱིས་རྒྱ་ནག་གི་མི་རིགས་སྲིད་ཇུས་ཀྱི་ཕམ་ཁའི་ཚབས་ཆེན་རང་བཞིན་དེ་ཚད་ཐིག་ལ་ཐག་ཉེ་བར་གྱུར་ཡོད་པ་དང་། དེ་དང་མཉམ་དུ་བོད་ཀྱི་རང་དབང་ནི་ཚད་རིམ་དམའ་ཤོས་སུ་ཆགས་ཡོད་པ་དེས་དོན་གྱིས་བོད་མི་ཚོའི་བཟོད་བསྲན་དེ་ཚད་ཐིག་ལ་ཐག་ཉེ་བར་གྱུར་ཡོད་པ་བསྟན་ཡོད། དེ་བས། གལ་སྲིད་དེ་ཚད་ཐིག་དེ་ལ་བརྒལ་ན། དབུ་མའི་ལམ་ནུས་མེད་དུ་གྱུར་ཏེ་བོད་མི་ཚོས་ཡང་བསྐྱར་རང་བཙན་གཙང་མའི་ལམ་ཁ་འདེམས་བསྐོ་བྱེད་སྲིད་ལ། སྐབས་དེར་ད་ལྟའི་རྒྱ་ནག་ལ་ཁ་ཕྱོགས་རང་བཞིན་གྱི་འགྱུར་ལྡོག་ཅིག་འབྱུང་སྲིད།

དེར་བརྟེན། རྒྱ་ནག་གཞུང་གིས་ “ཆུ་མ་ཡོང་གོང་གི་རག” ཅེས་བའི་དཔེ་ལྟར། གང་མགྱོགས་དབུ་མའི་ལམ་ལ་མོས་མཐུན་བྱས་ཏེ་བོད་རྒྱ་སོགས་མི་རིགས་ཚང་མ་འདྲ་མཉམ་དང་ཞི་བདེའི་ངང་འཚོ་གནས་བྱེད་ཐུབ་པའི་རྒྱལ་ཁབ་ཀྱི་སྒྲོམ་གཞི་གསར་བ་ཞིག་འཚོལ་བསྙེག་བྱེད་རྒྱུ་ནི་གལ་ཆེན་པོར་མཐོང་ཡོད།།