ཁ་སང་གཟའ་ཕུར་བུའི་ཉིན་༧གོང་ས་མཆོག་གིས་ཝ་ཤིན་ཌོན་དུ་གནས་སྡོད་བོད་མི་རྣམས་ལ་བཀའ་སློབ་བསྩལ་ཏེ། ཕྱི་རྒྱལ་དུ་ཡོད་པའི་གཞོན་སྐྱེས་ཚོས་བོད་ཡིག་དང་བོད་སྐད་མ་བརྗེད་པ་བྱེད་རྒྱུ་གལ་ཆེན་ཡིན་སྐོར་གསུངས་འདུག
ཉིན་འདི་གར་༧གོང་ས་མཆོག་གིས་ཨ་རིའི་རྒྱལ་ས་ཝ་ཤིན་ཌོན་དུ་མཛད་འཕྲིན་སྐྱོང་བཞིན་པ་ལྟར། ཁ་སང་ཚེས་ ༢༠ ཉིན་གྱི་ཕྱི་དྲོ་ཕ་ཁི་ཧྰ་ཡ་ཊི་ (Park hyatt) ཞེས་པའི་བཞུགས་གནས་མགྲོན་ཁང་གི་ཚོགས་ཁང་དུ་བོད་མི་ ༤༠༠ བརྒལ་བར་བཀའ་སློབ་གནང་སྟེ། ང་ཚོ་བཙན་བྱོལ་བ་ཆཊ་ནས་མི་ལོ་ལྔ་བཅུ་ང་ལྔ་ཙམ་ཆས་ཏེ་མི་རབས་བརྗེ་འགྲོ་གི་ཡོད་པ་ལྟར། བོད་ནང་དུའང་མི་རབས་བརྗེ་འགྲོ་གི་ཡོད་པ་དང་། འདས་པའི་ལོ་དེ་དག་རིང་བོད་ནང་གི་བོད་མི་ཚོས་དཀའ་སྡུག་སྣ་ཚོཊ་ཤིག་མྱངས་དང་མྱོང་མུས་སུ་ཡོད་ཀྱང་། བོད་མི་རིཊ་ཀྱི་ལར་ཞེན་དང་སྐད་ཡིག སོ་སོའི་རིག་གཞུང་ལ་གཅེས་འཛིན་བྱེད་རྒྱུར་འགྱུར་བ་མེད་པར་གནས་ཡོད་པ་མ་ཟད། བདེན་དོན་འཐབ་རྩོད་ཐད་ལའང་ལྷག་བསམ་གཡོ་མེད་ཐོག་བསྡད་དེ། བཙན་བྱོལ་དུ་ཡོད་པའི་བོད་མི་ཚོས་ཀྱང་བོད་མི་རིཊ་ཀྱི་ལོ་རྒྱུས་གཙོས་པའི་ཆོས་དང་རིག་གཞུང་གཏིང་ཟབ་ཡོད་ཅེས་ཁ་བཀྱགས་བཀྱགས་བྱས་ཏེ་ཤོད་རྒྱུ་ཞིག་ཡོང་གི་ཡོད་ཚུལ་གསུངས་འདུག
དེ་བཞིན། ༧གོང་ས་མཆོག་གིས་འདས་པའི་ལོ་དེ་དག་ནང་དེ་སྔ་བོད་མཐོང་ཐོས་མེད་མཁན་དང་བོད་ཀྱི་སངས་རྒྱས་པའི་ཆོས་ཞེས་བརྗོད་སྐབས། ལུང་པ་ཁུག་ཀྱོག་ཅིག་ཏུ་ལྷ་གསོལ་ཀླུ་གསོལ་བྱེད་བཞིན་ཡོད་པར་ངོས་འཛིན་བྱེད་བཞིན་པ་དེར་འགྱུར་བ་ཕྱིན་ཏེ། དེང་སྐབས་འཛམ་གླིང་འདིའི་ནང་བོད་ཀྱི་སངས་རྒྱས་པའི་ཆོས་དང་འབྲེལ་བའི་ཚན་རིག་དང་ལྟ་གྲུབ་ཅེས་བརྗོད་སྐབས་དོ་སྣང་གསར་པ་ཞིག་བྱེད་ཀྱི་ཡོད་པ་དང་། དེ་ཡང་ཡ་མཚན་གྱི་ཐོག་ནས་བྱས་པ་ཞིག་མིན་པར་དངོས་ཡོད་གནས་ཚུལ་ཐོག་མིའི་བསམ་བློ་གཏོང་རྒྱུར་ཕན་ཐོགས་ཡོད་པར་ངོས་འཛིན་གྱིས་དོ་སྣང་བྱེད་ཡུལ་དུ་གྱུར་ཡོད་པ་དང་། དེང་སྐབས་འཛམ་གླིང་འདིའི་ཐོག་དངོས་སུ་ཕན་ཐོགས་ཡོད་པ་ཞིག་ཏུ་མཐོང་གི་ཡོད་པ་དེ་བཙན་བྱོལ་དུ་གནས་པ་ཚོའི་བྱས་རྗེས་ལྟ་བུ་ཡིན་སྐོར་གསུངས་ཡོད་འདུག
ཕྱི་རྒྱལ་དུ་ཡོད་པའི་བོད་མི་ཚོས་བོད་ཀྱི་ཆོས་དང་རིག་གཞུང་སྲུང་སྐྱོབ་བྱ་ཕྱོགས་ཐད་༧གོང་ས་མཆོག་གིས། “ ང་ཚོས་ཆོས་དང་རིག་གཞུང་ཉམས་པ་སླར་གསོ་དང་མི་ཉམས་གོང་སྦེལ་བྱེད་པར་སློབ་སྦྱོང་བྱེད་རྒྱུ་ཧ་ཅང་གལ་ཆེན་ཆགས་ཡོད། ལྷག་པར་དུ་ཁྱེད་རང་ཚོ་ཕྱི་རྒྱལ་ལུང་པར་བསྡད་ཡོད་སྟབས། གཞོན་སྐྱེས་ཚོས་བོད་ཡིག་དང་བོད་སྐད་མ་བརྗེད་པ་བྱེད་དགོས། ལོ་གཉིས་གོང་ངོས་རང་ཀྰ་ཤི་མིར་ལ་ཐེངས་ཤིག་ཕེབས་པ་རེད། དེ་གར་བོད་པའི་སྐད་ཡིག་སློབ་སའི་དམིགས་བསལ་སློབ་གྲྭ་མི་འདུག་ཀྱང་། ལྷ་ས་ཁ་ཆེའི་བུ་ཕྲུག་གིས་ངོས་རང་ཐུག་སྐབས་ལྷ་སའི་སྐད་ཡག་པོ་རྒྱག་གི་འདུག ཕལ་ཆེར་ཨ་རིར་ཡོད་པའི་བོད་ཕྲུག་ཚོ་ལས་ཁ་ཆེའི་བོད་ཕྲུག་ཚོ་བོད་སྐད་བདེ་བ་ལྟ་བུ་འདུག ཁོང་ཚོས་རང་ཉིད་ཀྱི་ཁྱིམ་ཚང་ནང་ཞར་དང་ཞོར་ལ་བོད་སྐད་རྒྱག་གི་ཡོད་པ་རེད། གང་ལྟར་བོད་ཕྲུག་ཅིག་ཡིན་ཕྱིན་བོད་པའི་སྐད་ཡིག་མ་བརྗེད་པ་བྱ་རྒྱུ་ཧ་ཅང་གལ་ཆེན་ཡིན་པ་སེམས་ལ་འཇོག་དགོས། སྤྱིར་བཏང་མི་རིཊ་གང་ཡིན་རུང་ངས་ཐུབ་དང་ནུས་ཞེས་པའི་སྤོབས་པ་དགོས། ང་ཚོ་བོད་མི་རིགས་ནི་རིག་གཞུང་ཕྱུག་པོ་ཡོད་མཁན་ཞིག་ཡིན་ལ། སྤྱི་ཡོངས་ནས་བོད་པར་ཡ་རབས་དང་དྲང་པོ་འདུག་ཅེས་བརྗོད་ཀྱི་འདུག འོན་ཀྱང་། བར་སྐབས་དངུལ་ལ་འདོད་རྔམ་ཆེ་དྲགས་པའི་དབང་གིས་ཡ་རབས་སྤྱོད་བཟང་ཕྲན་བུ་ཉམས་རྒུད་འགྲོ་གི་ཡོད་པ་ལྟ་བུ་འདུག ཡ་རབས་དང་དྲང་པོ། སྙིང་རྗེ་བྱེད་རྒྱུ་ནི་ང་ཚོའི་ཕ་མེས་ནས་ང་ཚོར་འཇགས་པའི་གཅེས་ནོར་ཡིན་སྟབས། དེ་དག་མི་རབས་གཞོན་པའི་རྒྱུད་ལ་འཇགས་ཐབས་བྱ་རྒྱུ་ཧ་ཅང་གལ་ཆེན་པོ་རེད། ” ཅེས་བཀའ་སློབ་གནང་ཡོད་འདུག
གསར་འགོད་པ། དོན་གོ
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཁྱེད་ཀྱིས་བོད་སྐད་ཡིག་ལ་བདག་གཅེས་དགོས་པའི་ལམ་སྟོན་དང་། ཉེན་ཁ་སྔོན་འགོག་གི་བཀའ་སློབ་ཇི་ཙམ་གནང་ཡང་། གོང་གི་བླ་དཔོན་དང་འོག་གི་མི་མང་ཚོ་ནི་ཤེས་བཞིན་དུ་ལམ་ལོག་ལ་འཚང་བས། བཙན་བྱོལ་བོད་མིའི་བོད་སྐད་ཡིག་འཆི་ལམ་དུ་བརྫངས་ཟིན།
༼༧རྒྱལ་བ་རིན་པོ་ཆེས་1963ལོར་བོད་སྐད་ཡིག་སྐོར་ལ་གནང་བའི་གསུང་བཤད།༽
དེང་དུས་ཧིན་དི་དང་དབྱིན་ཇི་ཕྲན་བུ་ཤེས་པའི་གཞོན་ནུ་ཚོས། མི་ཞིག་འཕྲད་མ་ཐག་ཧ་ལོ་ཟེར་བ་དང་། ཡུ་ནོའོ་ཟེར་བ་སོགས་བོད་སྐད་ནང་དུ་དབྱིན་ཇིའི་མིང་ཚིག་མང་པོ་བསྲེས་ནས་བརྗོད་པ་འདི་དག་ལ་སེམས་ལྷད་ཀྱི་དྲི་མ་མེད་ཀྱང་། དོན་སྙིང་རུལ་འགྲོ་གི་ཡོད་པ་རེད། ད་ལྟ་ནས་དེ་ལྟར་བརྗོད་ན། ཚིག་ལྷད་དེ་དག་རིམ་བཞིན་དར་འཕེལ་ཕྱིན་ན་གང་འདྲ་ཞིག་ཡོང་གི་ཡོད་དམ།
བོད་དུ་རྒྱ་མིས་ཤན་དང་ཆུས་ཟེར་བ་སོགས་བོད་ཀྱི་མིང་ཚིག་མང་པོ་རྒྱ་སྐད་དུ་བསྒྱུར་ཟིན་ཅིང་། དེ་དག་རྒྱ་ཆེར་བཏང་དུས་ཉེན་ཁ་ཆེན་པོར་སླེབས། བོད་ལ་རྒྱ་མིས་མགོ་བརྡུངས། གཉའ་མནན། ཐ་ན་དངུལ་རྩིས་ཚུལ་ཆད་རྒྱ་སྐད་སྤྱོད་དུ་བཅུག་ནས་བོད་སྐད་བོད་ཡིག་ཉམས་རྒུད་ཅི་ཆེར་གཏོང་བའི་དུས་སྐབས་སུ། འདི་ཕྱོགས་རང་གི་སྐད་ཡིག་ལ་བདག་གཅེས་བྱ་རྒྱུའི་འོས་བབ་ཡོད་པ་ཚོས་དབྱིན་ཧིན་སྐད་ཡིག་ཕྲན་བུ་ཤེས་པ་རྒྱུ་མཚན་དུ་བྱས་ཏེ། བོད་སྐད་བོད་ཡིག་ལ་མཐོང་ཆུང་བྱས་ན་གང་འདྲ་ཞིག་ཡོང་བ་འདུག
ཡ་རབས་བཟང་པོའི་གོམས་གཤིས་ཅན་གྱི་བོད་མི་རྣམས་རྒས། གཞོན་ནུ་ཚོས་བོད་སྐད་ནང་ཚིག་ལྷད་གང་འཚམས་བཅུག བུ་ཕྲུག་ཆུང་ངུ་ཚོས་མ་ཤེས་པར་དེ་བས་མང་ཙམ་བཅུག གང་འཚམས་ནས་བོད་སྐད་གཙང་མ་དེ་གོ་བརྡ་མ་འཕྲོད་པའི་དུས་ཤིག་བྱུང་ན་ཇི་འདྲ་བྱེད་ཀྱི་ཡིན་ནམ།
སྔར་མོན་གྱི་ས་གནས་ཤིག་ལ་རྡོ་རྗེ་གཅོད་པའི་དཔེ་ཆ་མང་ཆེ་བ་མ་དག་པ་དང་། དག་པ་གཅིག་རང་ཡོད་ཞིག་གི་སྐབས། མི་ཚོས་ཞུ་དག་བྱས་པས། མ་དག་པ་མང་བ་དེ་དང་སྒོ་བསྟུན་ནས། དག་པ་གཅིག་རང་ཡོད་པ་དེ་མ་དག་པར་བཟོ་བཅོས་བྱས་པའི་ལོ་རྒྱུས་ལྟ་བུ་བྱུང་ན་ཇི་ལྟར་བྱེད། རྒྱུ་མཚན་དེ་འདྲའི་ཆེད་དུ་ང་ཚོས་བོད་སྐད་དང་། བོད་ཡིག་ལ་བདག་གཅེས་མ་བྱས་ན་ཉེན་ཁ་ཤིན་ཏུ་ཆེན་པོ་ཡོད།
ཕྱི་རྒྱལ་སྐད་ཡིག་ཤེས་དགོས། ང་ཚོས་མ་ཤེས་ཐབས་མེད་ཡིན། འོན་ཀྱང་རང་གི་སྐད་ཡིག་ལ་དོ་སྣང་མ་བྱས་ན། ནམ་ཞིག་དཔེ་ཆ་རྣམས་ཀྱང་དོན་མི་གོ་བའི་དུས་ཤིག་བྱུང་དུས། ལེ་ལན་རང་ལ་ཡོད་པ་ལྟར་ལེ་ལན་རང་གིས་འཁུར་ཤེས་པའི་དམན་ས་བཟུང་ན་ལྟ་ལེགས་ཏེ། དེ་ལྟར་མིན་པར། དཔེ་ཆས་མ་འགྲིག་པར་བསྙད་ནས་དཔེ་ཆ་རྣམས་ཕར་བཞག་སྟེ། དཔེ་ཤོག་འདི་ཚོར་གོ་རྒྱུ་མི་འདུག་ཟེར་བ་ཞིག་ཡོང་ཉེན་ཡོད། ཁོང་ཚོས་དཔེ་ཆ་དགྲ་རུ་འཛིན་པ་མིན་ཡང་། རང་བཞིན་གྱིས་སྤྱི་ཚོགས་ཀྱི་གནས་ཚུལ་འགྱུར་ནས་དེ་ལྟ་བུ་འབྱུང་ཉེན་ཡོད།
༼༡༩༦༣ལོའི་ཕྱི་ཟླ༧ཚེས༩ཉིན་༧རྒྱལ་བ་རིན་པོ་ ཆེས་བཞུགས་སྒར་ཕོ་བྲང་དུ་རིས་མེད་ཆོས་ཚོགས་སར་བསྩལ་བའི་བཀའ་སློབ་འདི་ནི། བོད་གཞུང་ཤེས་རིག་དཔར་ཁང་གིས་དཔར་སྐྲུན་བྱས་པའི་བཀའ་སློབ་ཕྱོགས་བསྡུས་ལས་བདམས་བཀོད་ཞུས་པ་ཡིན།༽
ཐུགས་རྗེ་གཟིགས།