རེས་གཟའ་ལྷག་པའི་ཉིན་རྔ་བ་རྫོང་ཨ་འདུས་ཡུལ་ཚོའི་ནང་གངས་ལྗོངས་སྒྲོན་མེའི་ཚོགས་པས་ཕ་སྐད་རྒྱུགས་སྤྲོད་ཆེན་མོ་སྐོང་ཚོགས་གནང་ཡོད་འདུག
ཟླ་འདིའི་ཕྱི་ཚེས་ ༢༦ ཉིན་རྔ་བ་རྫོང་ཨ་འདུས་ཡུལ་ཚོ་རུ་གངས་ལྗོངས་སྒྲོན་མེའི་ཚོགས་པའི་གོ་སྒྲིག་འོག ཕ་སྐད་རྒྱུགས་སྤྲོད་ཆེན་མོ་སྐོང་ཚོགས་གནང་ཡོད་པ་དང་། ཐེངས་འདིའི་རྒྱུགས་སྤྲོད་ཐོག་ཀིརྟི་དགོན་གྱི་དགེ་བཤེས་མཛོད་ཚང་བློ་བཟང་བརྩོན་འགྲུས་ལགས་དང། དྷི་ཕུ་དཔལ་ལྡན་རྒྱ་མཚོ་ལགས། ཁཱ་ཤེས་རབ་རྒྱ་མཚོ་ལགས། ནག་སྤྲུལ་བསྟན་པའི་ཉི་མ་ལགས་སོགས་ཤེས་ཡོན་པ་ཁག་ཅིག་ཆེད་དུ་གདན་འདྲེན་གྱིས། བོད་རིགས་གཞོན་སྐྱེས་ཚོར་བསམ་བློའི་སློབ་གསོ་དང་སྐད་ཡིག དེང་རབས་དྲ་རྒྱའི་རིག་གནས་སོགས་ཀྱི་ཐོག་གསུང་བཤད་གནང་ཡོད་པ་དང་། ཕ་སྐད་རྒྱུགས་སྤྲོད་ནང་ཞུགས་པའི་རྩེད་ཕུད་ཀྱི་གཞོན་སྐྱེས་ཕོ་མོ་ ༡༠༠ ཡས་མས་ལ་གཟེངས་རྟགས་སྤྲད་ཡོད་འདུག
གངས་ལྗོངས་སྒྲོན་མེའི་ཚོགས་པ་ནི་ཕྱི་ལོ་ ༢༠༠༧ ལོར་ཕ་སྐད་གཙང་མ་སྲུང་སྐྱོབ་ཀྱི་ཆེད་དུ་གསར་འཛུགས་གནང་ཞིང་། རྔ་བ་རྫོང་ཨ་འདུས་དཔོན་ཁག་བརྒྱད་ཀྱི་ནང་ཚན་མཐའ་བ་སྡེ་བའི་སྐྱེས་མ་ལོ་ཆུང་ཁག་གིས་གཙོ་སྒྲུབ་གནང་བཞིན་ཡོད་པ་དང་། ཁོ་མོ་ཚོས་ང་ཚོ་ལ་ནུས་པ་ཆེན་པོ་མེད་ཀྱང་ཡོད་ཚོད་ཀྱིས་པཎ་ཆེན་རིན་པོ་ཆེའི་ཞལ་གདམས་བཞིན། རང་སྐད་བཤད་རྒྱུ་དང་རང་རིག་སློབ་རྒྱུ་ནི་ང་ཚོའི་འདས་མ་ད་གསུམ་གྱི་ཕུགས་བསམ་ངོ་མ་དེ་ཡིན་ཞེས་བརྗོད་འདུག
གསར་འགོད་པ། པདྨ་མཚོ།
རྒྱལ་གྱུར་ཅིག