ང་ཚོ་ལོ་གསར་མེད།

ང་ཚོ་བོད་པ་ཚང་ལ་ད་ལོ་ལོ་གསར་མེད། གང་བྱས་ནས་ཟེར་ན། ཁྱིམ་ཚང་ཞིག་ལ་ཆགས་བཞག་པ་ཡིན་ན་རང་གི་ཕ་མ་དང་ཉེ་དུ་གང་རུང་ཞིག་གྲོངས་ན། ངེད་ཅག་གི་དེ་ལ་མྱ་ངན་བྱས་དེ་ལོ་གསར་བྱེད་ཀྱི་མེད་པ་ནི་བོད་པ་ཚང་གི་གཞིས་བྱེས་གཉིས་ཀྱི་ལུགས་སྲོལ་ཞིག་རེད། དེས་ན་ངེད་ཅག་བོད་པ་ཚང་གི་མ་འོངས་བདེ་སྐྱིད་ཀྱི་ཆེད་དུ་རང་སྲོག་བློས་གཏོང་ཚར་བས་དབའ་བོ་དབའ་མོ་དེ་དག་ནི་ངེད་ཅག་གི་ཕ་མ་ཉེ་དུ་ཚོ་གྲོངས་སྟངས་ལས་ཀྱང་གཟི་བརྗིད་ཆེ་བ་ཞིག་ཡིན་ན། ངེད་ཅག་གི་དེ་ལ་མྱ་ངན་མི་བྱེད་ཟེར་ན། བོད་པའི་མི་རིགས་ནི་ཁྲེལ་གཞུང་ཕྱི་ཐག་ཅན་གྱི་མི་རིགས་ཤིག་དང་ལས་རྒྱུ་འབྲས་བརྩི་མཁན་གྱི་མི་རིགས་ཤིག་ཟེར་ནས་དུས་རྒྱུན་དུ་གླེང་བཞིན་པ་དེ་ཡང་སྐྱག་རྫུན་དུ་གྱུར་བ་ལས། དོན་དག་གང་ཡང་མེད་པར་གྱུར་བ་རེད། དེས་ན་ངེད་ཅག་བོད་ཕྱི་ནང་གཉིས་ཀྱི་བོད་པ་ཡིན་ནོ་ཅོག་གིས་ད་ལོ་ལོ་གསར་མི་བྱེད་པར། སྤུན་ཟླ་དེ་དག་གི་རྣམ་ཤེས་བདེ་བར་གཟིམ་ཆེད་དུ་མྱ་ངན་བྱེད་དགོས་ལ། བོད་ཟེར་བ་འདི་ནི་ཁྲེལ་གཞུང་དང་ཕྱི་ཐག་ཡོད་པ། ལས་རྒྱུ་འབྲས་བརྩི་མཁན། སྐྱིད་སྡུག་མཉམ་མྱོང་བྱེད་མཁན་གྱི་མི་རིགས་ཤིག་ཡིན་པ་འཛམ་གླིང་མི་དམངས་ལ་ཤེས་སུ་འཇུག་དགོས་སོ།