ནང་གི་ཨ་མ་ལོ་ན་དྲུག་བཅུ་མ་ཟིན་པ་དེའི་ཐབ་ཚང་དུ་བྱ་ཤ་ཞིག་བཀྲུ་བཞིན་འདུག་ལ། དེ་ནི་དོ་ནུབ་ཀྱི་དགོང་ཟས་བཟོ་བྱེད་རེད་འདུག་ལ། སྐུ་མགྲོན་མ་བུད་མེད་རྒྱགས་པ་དེའི་ཐབ་ཚང་ནང་དུ་གྲང་ཚལ་ཞིག་བཟོ་བཞིན་ཞོར་དུ། ཀ་ར་དང་ཚ་སྣོད་གསར་བ་ཞིག་བརྗེ་བོ་བརྒྱབ་ནས། ཕར་ཕྱོགས་ཀྱི་རྐུབ་སྟེགས་རིང་བོ་དེའི་ཟུར་དུ་བསྡོད་པའི་ཕོ་གསར་དེ་ལ་འདི་ཚ་ཡིན། འདི་ཀ་ར་ཡིན་བཤད་དུས། ཕོ་གསར་དེའི་ངས་མ་ཤེས་ན་བྲོ་བ་བལྟས་ཆོག ཟེར་ནས་དགོད་ཤོར་དུ་ལན་བཏབ། ད་ནི་ཐབ་ཚང་ནང་དུ་གངས་འཚོའི་གྲོགས་མོ་གཟུགས་རིང་མ་ཡང་ཐབ་ཚང་ནང་གི་ལས་རོགས་སུ་ཞུགས་འདུག ལོ་ན་དྲུག་བཅུ་ལས་བརྒལ་བའི་ཨ་མ་དེའི་ཅོག་རྩེ་སྟེང་ཤེལ་ཕོར་དང་དཀར་སྡེར་སོགས་འཇོག་བཞིན་འདུག
སྐུ་མགྲོན་བུད་མེད་རྒྱགས་པའི་བུ་མོ་ཆེ་བས་ཐང་ཚང་ནང་དུ་ཨ་མ་ལ་རོགས་བྱས་དེ་སྔོ་ཚལ་གཏུབ་བཞིན་འདུག བུ་མོ་ཆུང་བ་དེས་ནང་གི་ཕོ་གསར་དེའི་ལག་ཁྱེར་གློག་ཀླད་ནང་རྩེད་མོ་རྩེ་བཞིན་རྣ་མཆོག་ནང་དུ་སྒྲ་འཛིན་སྐུད་པ་ཞིག་བཅུགས་དེ་འཇིག་རྟེན་གཞན་ཞིག་དུ་འཚོ་བ་ལྟར་ཁུ་སིམ་མེར་འདུག
ཕོ་གསར་དེའི་ནང་གི་སྐུ་མགྲོན་བུད་མེད་རྒྱགས་པ་དེ་དང་བུ་མོ་ཆེ་ཆུང་གཉིས། སྐུ་མགྲོན་བུ་མོ་གཟུགས་རིང་མ་བཅས་ཀྱི་ག་རེ་བྱེད་བཞིན་པར་བལྟས་དེ་རྐུབ་སྟེགས་རིང་བོ་དེའི་ཟུར་ན་ཁ་རོག་གེར་བསྡད་འདུག་ལ། ནང་འདིར་ཁོ་རང་མ་གཏོགས་བུ་ཞིག་མེད་པ་དང་བུད་མེད་ཆེ་ཆུང་སྡོམ་ན་དྲུག་འདུག སྐབས་དེར་ཕོ་གསར་དེའི་བསམ་པར་འཛམ་གླིང་འདིར་བུ་ལས་བུད་མེད་མང་བ་ཡིན་ནམ། ང་རང་བསྡོད་སའི་ཁང་བ་འདིར་བུད་མེད་མང་ཡིན་ནམ་སྙམ་ཞོར་དུ་བུད་མེད་དེ་དག་གི་ག་རེ་བྱེད་བཞིན་པའི་ཚུགས་ཀ་བལྟས་དེ་ཁུ་སིམ་མེར་འདུག ད་ནི་ག་ལེར་ནང་འདིའི་མི་ཚང་མ་ལྷོད་དུ་འབབ་བཞིན་དགོང་ཟས་ལ་རོལ་བར་སྒུག
ཨ་མ་རྒན་མོ་དེ་ཕོ་གསར་དེའི་འཁྲིས་སུ་ཡོང་ནས་རྐུབ་སྟེགས་སྟེང་བཙོག་ནས་ཉིན་རེའ་ཚགས་པར་ཀློག ཐབ་ཚང་ནང་དུ་གངས་འཚོ་དང་གངས་འཚོའི་གྲོགས་མོ་གསུམ་ནས་ཁ་ལག་བཟོ་ཞོར་དུ་གཏམ་གླེང་འདྲ་མིན་བྱེད་བཞིན་ཞོར་དུ་ཐབ་ཚང་ནང་གི་ཅ་ལག་ཁ་ཤས་ཤིག་གཙང་བ་བཟོ་བཞིན་འདུག
བུ་མོ་ཆུང་བ་གཙང་སྤྱོད་དུ་སོང་ཤུལ་ནས་བུ་མོ་ཆེ་བ་ལག་ཁྱེར་གློག་ཀླད་དུ་རྩེད་མོ་རྩེ་བར་མགོ་བཙུགས་སོང་། ཨ་མ་དེའི་ཉིན་རེའི་ཚགས་པར་ཀློག་མཚམས་བཞག་ནས་ཐབ་ཚང་དུ་སོང་ནས་བྱ་ཤ་ཚོས་ཡོད་མེད་ལ་བལྟ་ཞོར་དུ་ཐབ་ཚང་ནང་གི་རང་གི་བུ་མོ་དང་བཅས་ཡོད་པའི་གྲོགས་མོ་གསུམ་གྱི་ཁ་བརྡའི་ནང་དུ་ཞུགས། ཅུང་མ་འགོར་བར་ཨ་མ་དེའི་ཕོ་གསར་དེའི་ལག་ཟས་འབྲས་དང་ཚལ་བརྔོས་མ། ཐུག་པ་དང་ཚལ་བརྔོས་མ་ཞིག དཀར་ཡོལ་ནང་དུ་བླུགས་དེ་ཚུར་འཁུར་ཡོང་ནས་ཟ་ཞོར་དུ་ཕོ་གསར་དེ་ལ་ཁྱེད་རང་གི་ལག་ཟས་དངོས་ནས་ཞིམ་པོ་འདུག་ཞེས་བཤད་དུས། ཕོ་གསར་དེའི་འཛུམ་ཞིག་སྟོན་ཞོར་དུ་ཐུགས་རྗེ་ཆེ་ཞེས་ལན་བཏབ་སོང་།
བུད་མེད་གཟུགས་རིང་མས་ཇ་ཤེལ་ཕོར་བཀང་ལག་དུ་བཟུང་དེ་ཕོ་གསར་དེ་དང་ཨ་མ་རྒན་མོ་དེའི་འགྲམ་དུ་ཡོང་ནས། རྒྱུན་ལྡན་གྱི་སྐད་ཆ་ཁ་ཤས་ཤིག་བཤད་མགོ་བཙུགས་སོང་། ཕོ་གསར་དེའི་བུད་མེད་གཟུགས་རིང་དེའི་ཇ་ཕོར་ལག་དུ་བཟུང་དེ་ཁ་བརྡའི་ཁྲོད་ཀྱི་མོ་རང་གི་གདོང་གི་ཉམས་འགྱུར་ལ་ཞིབ་དུ་བལྟ་ཞོར་བུད་མེད་འདི་མཛེས་མ་ཞིག་རེད་འདུག་བསམ་ཞོར་བར་གསེང་ཅི་རེག་ལ་ཡང་ཡང་བུད་མེད་གཟུགས་རིང་མའི་སྒེག་ཉམས་ཀྱི་ཁ་བརྡ་བྱེད་སྟངས་ལ་གཅེར་ནས་བལྟས།
བུ་མོ་ཆེ་བ་དེའི་མགོ་ཅོག་རྩེ་སྒང་དུ་བཞག་ནས་ཞོར་དུ་གློག་ཀླད་རྩེ་བཞིན་འདུག་པ་དེ་ལ་བལྟས་ན་ད་ནི་མོ་རང་ཐང་ཆད་ཡོད་པ་ཤེས་ཐུབ་ཀྱི་འདུག བུད་མེད་རྒྱགས་པ་དེ་རྒྱགས་པ་དེ་གཙང་སྤྱོད་ནང་དུ་བུ་མོ་ཆུང་བ་དེར་བལྟ་རུ་འགྲོ་སོང་། ཐབ་ཚང་ནང་དུ་མི་གཅིག་ཀྱང་མི་འདུག་ལ། ཁ་ལག་གི་བྲོ་བ་ནི་ཚུར་སྣ་ལམ་དུ་འཐིལ་ནས་འོང་། སྐབས་དེ་འདྲ་ཞིག་ལ་ཕོ་གསར་དེ་ཡར་བླངས་དེ་ཐབ་ཚང་དུ་སོང་ནས་ཁོ་རང་ལ་ཇ་ཞིག་བཟོས་སོང་། བུད་མེད་རྒྱགས་པ་དེ་ཐབ་ཚང་དུ་ཡོང་ནས་ཕོ་གསར་དེ་ལ་ཇ་འདི་ག་རེ་རེད་ ཅེས་དྲིས་སོང་། ཤིང་ཏོག་གི་ཇ་ཟེར་ནས་ལན་བཏབ་དེ་ཇ་འཁུར་ནས་ཕྱིར་རྐུབ་སྟེགས་རིང་བོ་དེའི་སྒང་དུ་བསྡད་སོང་།
བྲེལ་བྲེལ་ཟིང་ཟིང་མང་བོ་ཞིག་བྱས་ནས་ཆུ་ཚོད་གཉིས་ལྷག་གཉིས་ཙམ་བྱིན་སོང་། ཅོག་རྩེ་སྟེང་དུ་སྡེར་མ་དང་སྔོ་ཚལ་སོགས་གྲ་སྒྲིག་གང་ཙམ་ཞིག་བཟོས་འདུག་ཀྱང་། ད་དུང་། དགོང་ཟས་ལ་འཛོམ་མི་འདུག
གངས་འཚོས་ཀྱང་ཐབ་ཚང་ནས་ཇ་ཞིག་འཁུར་ནས་མོ་རང་གི་ཨ་མའི་འཁྲིས་སུ་བཙོག བུད་མེད་རྒྱགས་པ་དེའི་ལག་དུ་ཚུག་ཇ་ཞིག་བཟུང་དེ་བུད་མེད་གཟུགས་རིང་མའི་འཁྲིས་སུ་བསྡད་སོང་། ཨ་མ་དེས་ངས་བྱ་ཤ་བཟོས་དེ་ཆུ་ཚོད་གཅིག་ལྷག་སོང་ཡོད་ངེས་ཟེར་ནས་བཤད་དུས། བུད་མེད་རྒྱགས་པ་དེས་སོང་མེད་ངེས་རེད། ངེད་ཅག་ཡོང་ནས་ཆུ་ཚོད་གཅིག་ལྷག་སོང་མེད་ངེས་ཡིན་ཟེར་ཞོར་དུ་རང་གི་ལག་མགོའི་ཆུ་ཚོད་ལ་བལྟས། ཨོ་རེད་འདུག ངེད་ཅག་སླེབས་ནས་ཆུ་ཚོད་གཉིས་ཙམ་སོང་འདུག་རང་གི་བཤད་ནོར་བྱས་པ་དེ་ངོས་ལེན་བྱས་སོང་།
ད་ནི་ཅོག་རྩེ་སྒང་ན་བྲང་ཚལ་གྱི་མི་ཚད་པར། བྱ་ཤ་བསྲེག་མ། བྱ་ཤའི་ཁུ་བ། སྔོ་ཚལ་གྱི་ཁུ་བ། སྔོ་ཚལ་དང་འབྲས་བརྔོས་མ། ཐུག་པ་དང་ཚལ་བརྔོས་མ། ཞོག་ཤོག་བསྲེག་མ། ད་དུང་ཤིང་ཏོག་གི་ཁུ་བའི་རིགས་མང་བོ་ཞིག་ཀྱང་གཤམ་འདུག་ལ། བུད་མེད་གཟུགས་རིང་མས་གསར་དུ་ཉོས་དེ་འོང་བའི་མེ་ཏོག་སྙིང་རྗེ་བོ་དེ་ཡང་ཅོག་རྩེའི་དཀྱིལ་དུ་བཞག་འདུག
རྩོམ་སྒྲིག་པ་མི་ནག་ཚང་ལུང་རིགས་རྒྱལ་ལགས་སུ་ཐུགས་ཆེ་རྗེ་ཞུ། བརྡ་ལན་སྤྲད་པ་དེར། ཡིན་ཡང་། ང་རང་གིས་སྨྱུག་མིང་སྤྱོད་པ་ལས་དངོས་མིང་མ་སྤྱད་པའི་རྒྱུ་མཚན་གྱིས་རྩོམ་ཡིག་དག་བསམ་ཚུལ་རྩོམ་ཡིག་གི་མཚོན་པའི་ཚགས་པར་སོགས་ཀྱི་སྟེང་དུ་འགོད་ཐུབ་ཀྱི་མི་འདུག་གསུང་བ་དེར། བདག་གི་དུས་རྟག་དུ་དངོས་མིང་དང་སྨྱུག་མིང་གང་ཞིག་སྤྱད་མིན་དེ་ནི་གཙོ་བོ་འཛིན་གྱི་མེད། དེའི་རྒྱུ་མཚན་ནི་ཀློག་པ་པོ་དེ་དག་གིས་རྩོམ་ཡིག་གི་ནང་དོན་ཡོད་མེད་དེ་ཤེས་དགོས་པ་ལས། མིང་དང་དཔར་སོགས་ནི་ཁོང་ཚོ་ལ་མཚོན་ན་ཡང་གལ་ཆེན་དུ་ཆགས་མེད་པར་འདོད། དེའི་རྒྱུ་མཚན་ཟེར་ན་འདྲ། ང་རང་མིང་ལ་མི་དགའ་ཟེར་ན་འདྲ། གཞན་གྱིས་རང་ལ་བཏགས་པའི་མིང་དང་རང་གི་རང་ལ་བཏགས་པའི་མིང་འདི་གཉིས་ལ་ཁྱད་པར་ཆེན་མོ་ཞིག་ཡོད་པ་ཡིན་ན། དེ་ནི་དངོས་ཡོད་ཡིན་མིན་ཡང་གསལ་བོ་ཞིག་བཤད་ཁག་པོ་རེད་མོད། ཡིན་ཡང་། ཚགས་ཤོག་གཞན་ཁ་ཤས་སམ་སྨྱུག་མིང་ལས་དངོས་མིང་མི་སྤྱོད་མཁན་ཡོད་པ་རེད། དེ་དག་ལ་ཡང་ཁོང་ཚོས་དགོས་དབང་དང་དམིགས་ཡུལ་ཞིག་ཡོད་ཆོག་པ་རེད། གང་ལྟར། ཁྱེད་ཀྱིས་བདག་ལ་གསལ་བཤད་གནང་བ་དེར་སྙིང་ཐག་པ་ནས་ཐུགས་རྗེ་ཆེ་ཞུ། སྨྱུག་མིང་ལ་བརྟེན་ནས་རྩོམ་ཡིག་སྤེལ་ཆོག་གི་མེད་ན་ནི། མ་སྤེལ་ན་ང་རང་ལ་བསམ་འཆར་གང་ཡང་མེད། ཐུགས་རྗེ་ཆེ།
གུས་པར་འོས་པའི་ཟིན་བྲིས་པ། བོད། ཤ་ཁྲག་རུས་གསུམ་ལགས། སྐུ་ཉིད་བོད་ཀྱི་དུས་བབ་ཟིན་བྲིས་སུ་ཕེབས་པ་ནས་ད་བར་བསམ་ཚུལ་འདྲ་མིན་སྤེལ་བ་དང་། དྲ་ཐོག་གི་གནས་ཚུལ་དང་བསམ་ཚུལ་གཞན་པའི་རིགས་ལ་དུས་ཐོག་བགྲོ་གླེང་དང་གནས་ཚུལ་སྤེལ་རེས་བྱེད་ཀྱིན་པའི་ཐད་འདི་ནས་དགའ་བསུ་དང་། རྗེས་སུ་ཡི་རངས་ཡོད། ཡིན་ཡང་། དཀའ་ངལ་གཅིག་ནི། ཁྱེད་ཀྱིས་སྨྱུག་མིང་བེད་སྤྱོད་བྱས་ཡོད་སྟབས། སྐབས་རེར་ཉིད་ཀྱི་རྩོམ་ཡིག་རེ་གསར་ཤོག་སྟེང་འགོད་དགོས་བསམ་ནའང་རྩོམ་པ་པོ་གསལ་བོ་མེད་སྟབས་འགོད་མ་ཐུབ་པའི་གནས་སྟངས་ཆགས་ཡོང་གི་འདུག དེ་བས་ང་ཚོའི་རེ་བར་ཟིན་བྲིས་པ་དག་གིས་དོན་དངོས་དག་བརྩད་ནས་གླེང་ཞིང་། དོ་བདག་རང་རང་ཡང་སྤྱི་ཚོགས་ཀྱི་གདོང་ལ་འབུད་ཐུབ་པའི་རེ་བ་ཞུ་གི་ཡོད། དེ་ལ་དཔག་པའི་སྒོ་ནས་ང་ཚོས་ཀྱང་རྩོམ་ཡིག་དང་བསམ་ཚུལ་གང་ཡིན་ལ་རིན་ཐང་ཞིག་འཇོག་ཐུབ་པར་འདོད།
མཆན་འདི་ནི་ཉིད་ཀྱིས་ངའི་ཟིན་བྲིས་ནང་རྩོམ་ཡིག་ཅིག་དང་བསམ་ཚུལ་ཞིག་སྤེལ་འདུག་པ་དེའི་ལན་ལྟ་བུར་བཀོད་ཀྱང་། ཉིད་ནས་གཟིགས་ཡོད་མེད་ཆ་མ་འཚལ་བར་འདིར་བཀོད་པ་ཡིན།