དྲ་གྲོགས་ཚོ་བོད་ཀྱི་དུས་བབ་ཚང་གི་དྲ་ཚིགས་འདི་ནི་བོད་མི་ཚང་གི་སྐྱིད་སྡུག་བཤད་ས་དང་བོད་མི་ཚང་གི་བདེ་སྡུག་གླེང་སའི་སྟེགས་པུ་ཞིག་ལས་ཁྱོད་ཤི་ང་གསོན་བྱེད་སའི་འཐབ་ར་ཞིག་དེ་བས་ཀྱང་གཏན་ནས་མིན། ལྷག་པར་དུ་དྲ་གྲོགས་དུག་གི་མིང་ཅན་ལགས། ཁྱེད་རང་གིས་ཟིན་བྲིས་འདིའི་ནང་ནས་སྨྱུག་མིང་སྤྱད་དེ་རྩོམ་པ་པོ་ལྷ་ཆབ་མཆོག་ལ་འཇིགས་སྐུལ་བྱེད་པ་ནི་དངོས་ནས་མཐོང་བ་ཙམ་གྱིས་སྐྱུག་བྲོ་བ་དང་འདང་རྒྱག་བཞིན་རྒྱག་བཞིན་སྨྱུ་གུ་འཛིན་མཁན་གྱི་བོད་མི་ཞིག་གིས་རང་གི་ནང་ལ་དོན་མེད་དུ་སྡུག་ར་འདི་འདྲ་བྱེད་པ་མཐོང་དུས་རྒྱ་དམར་སྲིད་གཞུང་གིས་ངེད་ཚང་གི་བོད་མི་ཉེས་མེད་ཚོ་ལ་གསོད་འཕྲོག་གནར་གཅོད་བྱེད་པ་དེ་ཡང་བཟོད་བསྲན་བྱས་ཆོག་པ་ཞིག་དུ་མཐོང་སོང་། ཁྱེད་ཀྱིས་དངོས་ནས་བསམ་བློ་ཞིབ་དུ་བཏང་ནས་སྐད་ཆ་རེ་ཤོད་དང་བོད་མིས་ནང་ཁུལ་དུ་སྐད་ཆ་འདི་འདྲ་བརྫིག་བརྫིག་བཤད་དོན་གང་ཡིན་དེར་ཁྱེད་རང་ཉིད་ཀྱིས་ཐུགས་བསམ་ནན་པོ་ཞིག་བཞེས་རོགས་གནོང་། དེ་མིན་ལྟས་ངན་ཟེར་བ་སོགས་དོན་མེད་དགོས་མེད་དུ་བོད་ཕྱི་ནང་གཉིས་ལ་མཚན་མཐོང་མི་དམན་པ་ཞིག་ཡོད་པའི་རྩོམ་པ་པོ་ཁོང་ལྟ་བུ་ལ་བརྩི་བཀུར་དང་ཡི་རུང་བྱེད་མ་ཐུབ་ཀྱང་རང་གི་ས་ནས་དྲང་ཚུགས་བཟུང་དེ་བཞུགས་ཐུབ་ན་དངོས་ནས་ཡག་པོ་རེད། འདི་ནི་ང་རང་གི་བསམ་ཚུལ་ཡིན་པ་ལས་ང་རང་དྲ་གྲོགས་ལྷ་ཆབ་ལགས་ཀྱིས་ངོ་ཤེས་རྙིང་བ་ཞིག་ཡིན་སྟབས་གཏན་ནས་མིན། གལ་སྲིད་ཁྱེད་རང་གིས་དྲ་གྲོགས་བོན་རྒྱ་ལྟ་བུ་ལ་དེ་འདྲ་ཞིག་བཤད་ཀྱང་ང་རང་གི་སྐད་ཆ་འདི་ལས་གཞན་ཞུ་རྒྱུ་མེད། ཨ་མའི་བུ། སྐད་ཆ་དངོས་ནས་གནས་ལུགས་ཡོད་པ་རེ་དང་བོད་ཕྱི་ནང་གི་སུ་ཞིག་གིས་དྲ་ཚིགས་འདི་ཀློག་པ་ཡིན་ན་ཡང་བསམ་བློ་གཏོང་རྒྱུ་ཡོད་པ་དང་མཐུན་སྒྲིལ་དང་ཕྱོགས་ཞེན་མེད་པའི་སྐད་ཆ་རེ་གསུང་རོགས་གནོང་ཅེས་བོད། ཤ་ཁྲག་རུས་གསུམ་དུ་འབོད་པས་དུག་གི་མིང་འཛིན་པ་དྲ་གྲོགས་དེར་ཕུལ།
གཤམ་ནས་དྲ་གྲོགས་ཚོ་ལ་ཞུ་རྒྱུ་ཞིག་ལ།
མི་ཡིས་འདོད་པ་བཤད་ན་རྫོགས་མེད་ཀྱང་།།
འདོད་པ་ཚད་ཅིག་འཛིན་རྒྱུ་ཡོད་ངེས་དུས།།
རང་རང་སེམས་ཀྱི་འདོད་པའི་རྟ་རྒོད་དེ།།
ཚད་ཅིག་ཟིན་ན་ད་གཟོད་ཀུན་ལ་བདེ།།
དེ་བཞིན་དྲ་ཐོག་འདི་ཡིས་ཁ་རྒྱག་ཚོ།།
གཞན་གྱིས་སྐྱོན་ལ་འཛུབ་མོ་འཛུགས་པ་ལས།།
རང་གི་སྐྱོན་ལ་ཉིན་རེ་བརྟག་དཔྱད་བྱོས།།
ཕྱིས་སུ་འདི་རུ་ཡོང་ནས་ཉམ་མྱོང་ཤོད།།
དེ་ནས་ང་ཚོས་དེ་ལ་བགྲོ་གླེང་བྱེད།།
དེ་མིན་ཁ་ནས་ཅི་ཐོན་ལག་ནས་བྲིས།།
བོད་པའི་བོད་སེམས་འཁྲུགས་ནས་མཐུན་སྒྲིལ་གཏོར།།
དེ་འདྲ་རྒྱ་ནག་སྲིད་ཀྱིས་མི་འཇོན་པ།།
ང་ཚོས་རང་གི་སྐེ་ལ་གྲི་བཞག་ནས།།
རང་སྲོག་གཅོད་དང་མཚུངས་པའི་ཉོག་གཏམ་རིགས།།
ད་ནས་སྤང་བྱར་འཛེམས་རོགས་བོད་རིགས་ཚོ།།
ང་ཡི་སྙིང་གི་གཏམ་འདི་བྲིས་པ་ལ།།
དྲ་གྲོགས་རེ་ཟུང་ཁོང་དགོད་ཤོར་ཡང་སྲིད།།
དྲ་གྲོགས་རེ་གཉིས་སེམས་ངལ་སངས་ཡང་སྲིད།།
གང་ལྟར་མཐའ་མའི་ཐག་གཅོད་རང་སེམས་ལ།།
བརྟག་ནས་ལུང་དོར་བྱེད་རོགས་སྤུན་ཟླ་ཚོ།།
