སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} ཉེར་དགུ

ནོར་བུ་བཟང་མོ་ངུ་བཞིན་ངུ་བཞིན་སྒོ་ཕྱི་རུ་བུད། བློ་བཟང་གིས་ཁོ་མོས་རྗེས་སུ་བལྟས་དེ་བསྡད། བར་སྐབས་ཤིག་ལ། ཁོ་མོ་ནགས་གསེང་དེ་ནས་ས་རུ་བསྡད་ཡོད་པ་མཐོང་ནས། བློ་བཟང་ཁོ་རང་ཡང་རྗེས་སུ་སོང་ནས་ཁ་བརྡ་དང་སེམས་གསོ་བྱས་སྟབས། ཁོ་མོ་ཡང་འདོད་ལ་མི་འདོད་ཀྱི་རྣམ་འགྱུར་ཞིག་དང་བཅས་ནང་དུ་ལོག་པ་རེད།

བློ་བཟང་ཕྱིར་ནང་དུ་འབྱོར་དུས། བདེ་གྲོལ་ད་དུང་ནང་དུ་ཁོ་རང་ལ་སྒུག་ནས་བསྡད་ཡོད་པ་དང་། བདེ་གྲོལ་གྱིས་བློ་བཟང་ལ། ད་དངོས་ནས་ཁྱེད་རང་གིས་བསམ་བློ་གཏོང་རན་རེད། མོ་ནི་གཉེན་སྒྲིག་བྱས་ཚར་མ་ཐག་རེད། དངོས་ནས་དེ་འདྲའི་ཕན་ཚུན་ལ་དགའ་ནས་བློས་མི་གཏོང་བ་འདྲ་ཡོད་ན། ཁྱེད་རང་གིས་ཁོ་མོ་ཁྲིད་དེ་ས་གཞན་ལ་སོང་ན་འགྲིག་གི་རེད། དེ་མིན་ངོ་ཚ་རྒྱུ་མེད་པའི་མོ་རང་ལ་ཁ་བརྡ་བྱས་དེ་རྗེས་ཕྱོགས་ཁྱེད་རང་གི་ནང་དུ་གོམ་བཀང་སྤོ་རུ་མ་བཅུགས་ན་ཡག་གི་རེད།

བློ་བཟང་གིས། ངས་ཁོ་མོར་རང་གི་ནང་དུ་མ་ཡོང་ཟེར་ནས་བཤད་ཐུབ་ཀྱི་མེད། ངེད་གཉིས་ཁྱེད་རང་བཟའ་མི་གཉིས་བརྒྱུད་དེ་ངོ་ཤེས་པ་རེད་ལ། ཕན་ཚུན་ལ་སེམས་གཏིང་གི་གྲོགས་པོ་ཞིག་གི་འདུ་ཤེས་ལས་གཞན་མེད། རེད་དེ། ང་རང་གི་ཐད་ནས་འདང་རྒྱག་ངེས་ཡིན། དེའི་ཕྱོགས་སུ་ཁྱེད་རང་གི་སེམས་འཁྲལ་མ་བྱེད།

བདེ་གྲོལ་གྱིས་རང་གི་གྲོགས་པོ་བློ་བཟང་ལ་དེ་ལས་ལྷག་པའི་ཚིག་ལྕི་མོ་དེ་འདྲ་གང་ཡང་བཤད་མ་ཐུབ་པར་དེ་ཙམ་གྱིས་འགྲིག་ནི་འཐུས་ནི་བྱོས་དེ་བློ་བཟང་གི་ནང་དང་ཁ་ཁར།

བློ་བཟང་རྡ་སར་འབྱོར་ནས་ཟླ་ངོ་གཉིས་ཙམ་ཞིག་འགྲོ་བཞིན་ཡོད་ལ། དེའི་རིང་དུ་དུས་ཚོད་མང་ཤོས་ཤིག་ནོར་བུ་བཟང་མོ་དང་ལྷན་དུ་བསྐྱལ་ཡོད་ཀྱང་། ཁོ་གཉིས་ལ་དམིགས་བསལ་གྱིས་ཕོ་མོའི་བར་གྱི་ལུས་འབྲེལ་ཕྱོགས་སུ་སྐད་ཆ་གང་ཡང་མ་བྱུང་མོད། རེད་དེ་བཀག་ན་མི་ཐུབ་པའི་ནོར་བུ་བཟང་མོའི་སེམས་ཁོང་གི་ན་ཟུག་མི་ཉུང་བ་ཞིག་བློ་བཟང་ལ་བཤད་ཡོད་ལ། སེམས་པ་སྙི་བའི་བློ་བཟང་གི་སེམས་པའི་ཟབ་སར་ཡང་སྐད་ཆ་དེ་དག་གི་ཤན་ཤུགས་མི་ཉུང་བ་ཞིག་ཐེབས་ཡོད་པ་དེ་ནི་དངོས་ཡོད་ཆགས་ཡོད་པ་རེད་ལ། ཕན་ཚུན་ལ་བཤད་འདོད་པའི་སྐད་ཆ་དག་ནི་རི་དྭགས་རྙི་ལས་ཤོར་བ་ལྟར་བཤད་རེས་དང་ཉན་རེ་བྱས་པ་དེ་ནི། མྱི་ཁ་དང་འཕྱ་དམོད་སྣ་ཚོགས་ཀྱི་བར་གསེང་གི་ཁོ་གཉིས་ཀྱི་ཚོད་དཔག་དཀའ་བའི་སེམས་ཀྱི་མྱོང་བྱང་ཟབ་མོ་ཞིག་དུ་གྱུར་ཡོད་པ་རེད།

བློ་བཟང་གི་གྲོགས་པོས་ཁོ་རང་ལ་རྒན་རྒོན་གཉིས་ཀྱིས་ཁ་པར་ཞིག་གང་མགྱོགས་གཏོང་རོགས་ཟེར་གྱི་འདུག་ཟེར་ནས་ལས་ཀ་གྲོལ་ནས་ནང་དུ་སླེབས་མ་ཐག་བཤད།

ངས་རོགས་པས་ང་ལ་དེ་རིང་ཕྱི་དྲོ་ཁྱེད་གཉིས་ཀྱིས་ཁ་པར་ཞིག་གཏོང་རོགས་ཟེར་གྱི་འདུག་པ་ལྟར། ང་རང་ཁ་པར་གཏོང་དུ་ཡོང་བ་ཡིན། ཁྱེད་གཉིས་བདེ་ཐང་ཡིན་ནམ་ཞེས་བློ་བཟང་གིས་ཁ་པར་ཁྲོད་ནས་ཨ་ཅག་ཚེ་འཛོམ་ལ་དེ་ལྟར་བཤད།

ཨ་ཅག་ཚེ་འཛོམ་གྱིས། ངེད་གཉིས་བདེ་ཐང་ཡིན། ད་ནི་ངེད་གཉིས་ཀྱིས་ཁྱེད་རང་གི་བཤད་པ་ལྟར། ད་ལོ་རྡོ་རྗེ་གདན་དུ་གནས་བསྐོར་ལ་འགྲོ་ཐུབ་ན་བསམ་གྱི་ཡོད། གལ་སྲིད། ངེད་གཉིས་གནས་བསྐོར་ལ་བུད་སོང་བ་ཡིན་ན། ཁྱེད་རང་འདིར་ཡོང་ནས་ཟ་ཁང་གཅིག་ལ་བདག་སྐྱོང་བྱེད་དགོས་ཀྱི་འདུག ཁྱེད་ཀྱིས་དེ་ལྟར་ངེད་གཉིས་ལ་རོགས་རམ་བྱེད་ཐུབ་ས་ཨེ་རེད།

ལོས་ཐུབ། ངས་སྔོན་ཆད་རང་གི་ཁས་ལེན་བྱེད་མྱོང་བ་ལྟར། ཁྱེད་རང་གཉིས་ལ་ཕན་ཞིག་ཐོག་ན་རོགས་པ་བྱེད་དུ་ཡོང་དང་ཡོང་།
དེས་ན་ཉིན་མ་ལྔའི་རྗེས་སུ་ཡང་བསྐྱར་ཁ་པར་ཞིག་གཏོང་རོགས་གནོང་།

ཉིན་ལྔའི་རྗེས་ཏག་ཏག་ལ་བློ་བཟང་གིས་ཁ་པར་བརྒྱབ་དུས། ཨ་ཅག་ཚེ་འཛོམ་གྱིས། བུ། ངེད་གཉིས་གནས་བསྐོར་ལ་འགྲོ་རྒྱུ་གཏན་འཁེལ་སོང་། ཁྱེད་ཀྱིས་རང་གི་གློག་ཀླད་དང་ཅ་དངོས་དག་བཙོང་ནས་འདིར་ཡོང་རོགས། གློག་ཀླད་དང་ཅ་དངོས་དག་རྗེས་ཕྱོགས་གསར་དུ་ཉོས་ཀྱང་འགྲིག་གི་རེད། ད་རེབས་ཁྱེད་རང་འདིར་སླེབས་ན་ཅུང་ཙམ་འགོར་རྒྱུ་རེད།

ཡ་ཡ་་་ དེས་ནས་ང་རང་གང་མགྱོགས་མགྱོགས་ཤིག་ལམ་དུ་ཆས་ངེས་ཡིན། མེ་འཁོར་འཛིན་བྱང་ག་རེ་བྱེད་དགོས་སམ།

མེ་འཁོར་འཛིན་བྱང་འདི་ནས་བསྔགས་ཆོག གཅིག་བྱས་ནས་ལྡི་ལུ་ནས་ཉིན་རེ་གཉིས་ཤིག་ལ་སྒུག་དགོས་སྲིད། ཡིན་ཡང་། མགྲོན་ཁང་ཞིག་དུ་བསྡད་ན་འགྲིག་གི་རེད། ལྡི་ལུར་འབྱོར་ནས་ཁ་པར་གཏོང་།

བློ་བཟང་གིས་དེ་ལྟར་ཁས་ལེན་བྱས་པ་ལྟར། མི་འགྱངས་པར་ལམ་ལ་ཆས་རྒྱུའི་བསྐོར་གྲོགས་པོ་དེར་བཤད་དུས། གྲོགས་པོས། ངས་བལྟས་ན་འདི་རུ་བསྡད་དེ་མུ་མཐུད་དུ་སློབ་སྤྱོང་ཞིག་བྱས་པ་ཡིན་ན་ཡག་པོ་འདུག ས་ཆ་དེ་ནི་མི་གཤིས་རྩུབ་ས་དང་བདེ་འཇག་མེད་ས་ཞིག་རེད། སྒོར་མོ་རེ་གསོག་ཐུབ་ཀྱང་། དེའི་མི་ཚེ་བཟོ་ཐུབ་ནི་མ་རེད།

བློ་བཟང་གིས། ཁྱེད་རང་གིས་བཤད་པ་བདེན་པ་རེད། འོན་ཀྱང་། ཁོང་རྒན་རྒོན་གཉིས་ང་རང་ལ་བཀའ་དྲིན་ཆེན་པོ་ཡིན་ལ། ངས་ཁོང་གཉིས་ལ་དགོས་འཁོ་བྱུང་ན་རོགས་བྱེད་རྒྱུའི་ཁས་ལེན་ཡང་བྱས་ཡོད་ལ། དེ་ལྟར་བྱེད་པ་དེ་ནི་འོས་པ་ཞིག་ཀྱང་ཡིན། རྗེས་ཕྱོགས་རང་ཉིད་དཀའ་ངལ་འདྲ་ཐུག་དུས་ཕ་མ་སྤུན་མཆེད་སོགས་གང་ཡང་མེད་པའི་ས་མཐའ་འདི་ནས་ཁོང་གཉིས་ཀྱི་ང་རང་ལ་རོགས་རམ་ཐུབ་ངེས་ཡིན།

བློ་བཟང་ནི་བློ་བཟང་དེ། སུས་ཀྱང་འགྱུར་བ་གཏོང་མི་ཐུབ་པའི་རང་ཚུགས་ཅན་ཞིག་ཡིན། ཁོ་རང་གི་གང་ཐག་བཅད་པ་དེ་ལྟར་དུ་ཡིན་པ་གྲོགས་པོས་ཀྱང་། གཞི་ནས་ངོས་ཟིན་ཐོབ་ནས་མཐར་བློ་བཟང་གི་ཅ་དངོས་དག་ག་རེ་བྱེད་མིན་བསྐོར་ལ། བློ་བཟང་གིས་ཅ་དངོས་གང་ཡང་བཙོང་དགོས་དོན་མེད། ཁྱེད་ཀྱི་གཉར་ན་འགྲིག ནམ་ཞིག་ང་རང་ཕྱིར་སླེབས་ན་དེ་དུས་འུ་གཉིས་ཀྱིས་བེད་སྤྱོད་གཏོང་། གལ་སྲིད། ང་རང་ཕྱིར་མ་སླེབས་པ་ཡིན་ན་ཡོད་ཚད་ཁྱེད་ལ་བདག་པ་ཡིན།

ཉིན་དེ་ནི་སྤྱི་ལོ་ཉིས་སྟོང་གཉིས། སྤྱི་ཟླ་བཅུ་གཅིག་གི་ཚེས་ཉི་ཤུའི་ཉིན་ཡིན་ལ་བློ་བཟང་ཕྱི་དྲོ་དེར་སླར་ཡང་དུས་ཚོད་དྲུག་དང་ཕྱེད་ཀའི་སྟེང་དུ་རྡ་ས་མེག་ལོར་དང་ཁ་གྱེས་བཞིན་ཡོད་པ་རེད། འོན་ཀྱང་། ཉིན་དེའི་ཞོགས་པ་སྔ་བོ་ནས་ནོར་བུ་བཟང་མོ་ཁོ་རང་གི་ནང་དུ་སླེབས་ནས་ཁོ་གཉིས་སྲང་དུ་སོང་དེ་དྲན་རྟེན་གྱི་འདྲ་དཔར་ཞིག་ལྷན་དུ་བརྒྱབ་དེ་ཕྱིར་བློ་བཟང་གི་ནང་དུ་ཡོང་ནས་ཉིན་གུང་ཁ་ལག་བཟོ་རྩིས་བྱས། ནོར་བུ་བཟང་མོས། དེ་རིང་ངས་ཁྱེད་རང་ལ་ཁ་ལག་བཟོ་ཆོག་ཟེར་ནས་ཞོག་ཁོག་ཁ་ཤས་ཤིག་གཏུབ་ནས་ཉིན་གོང་གི་ཁ་ལག་བཟོས།

བློ་བཟང་གིས་དེ་རིང་གང་ཡིན་ནམ། ཞོགས་པ་ནས་བཟུང་དེ་ང་རང་གི་སྙིང་ཆུང་ལྡིང་ནས་མཚམས་ཤིག་འཇོག་གི་མི་འདུག་ཟེར་ནས་ནོར་བུ་བཟང་མོ་ལ་ཡང་ཡང་བཤད། ནོར་བུ་བཟང་མོས་ཀྱང་། དེ་རིང་ཁྱེད་རང་འདི་ནས་གྱེས་དེ་འགྲོ་དགོས་པའི་ཡིན་རྒྱུ་རེད་ལ། འུ་གཉིས་ཐུག་འཕྲད་བྱེད་པའི་ཉིན་མ་མཐའ་མ་དེ་ཆགས་སྲིད་པའི་ཡིན་རྒྱུ་རེད་ཅེས་བཤད།