ཚོགས་ཆེན་ཇི་ལྟར་མཇུག་བསྡུ་ངེས་ཡིན།

ཛ་དྲག་ཟེར་ན་རེད། གནད་འགག་གི་དུས་ཤིགས་ཟེར་ན་ཆོག གང་ལྟར། མི་ཞིག་གིས་ལོ་ངོ་བཅུ་དྲུག་ནི་ནས་བཟུང་དེ། མི་ལོ་བདུན་བཅུ་དོ་བདུན་ལ་སླེབས་རེག་བར་དུ་བོད་མི་རིགས་ཀྱི་འཆི་གསོན་གྱི་འགན་བཞེས་དེ་བཞུགས་པ་ཡིན་ལ། ད་དུང་། དེ་དག་གིས་དེ་ལ་བསམ་ཤེས་གནང་དེ་ཁྱེད་ཀྱི་སྐུ་ཚེགས་ལ་དངོས་ནས་མཐའ་མེད་པ་དང་། ད་ནི་དངོས་ནས་སྐུ་ཉིད་ཀྱིས་ངལ་ཞིག་གསོས་ན་རེད། ང་ཚོས་དངོས་ནས་གང་འཇོན་ཅི་འཇོན་གྱིས་བོད་ཀྱི་བདེན་མཐའ་གསལ་བའི་ཆེད་དུ་ཉིད་ཀྱིས་བཀའ་གསུང་དང་དུ་བླངས་དེ་འབད་པར་བྱེད། ཉིད་ཀྱིས་ངེད་ཅག་ལ་མ་སྟོན་པའི་ལམ་ནི་མེད་ལ། ངེད་ཅག་ལ་མ་གསུང་པའི་བཀའ་སློབ་གང་ཡང་ལུས་མེད། ད་ནི་ང་ཚོའི་ལག་ལེན་དུ་སྤྱར་ཐུབ་མིན་དེ་གཅིག་བུ་ལས་ལུས་མེད། སྐུ་ཉིད་ཀྱིས་དཀའ་ལས་ཁག་སོང་། ངལ་ཞིག་གསོ་རོགས་ཞུ་ཟེར་རྒྱུའི་ཚབ་དུ། ཁྱེད་ནི་རྒས་མེད་འཆི་མེད་ཡིན་ཟེར་བ་དང་འདྲ་བར། གསོལ་བ་ཨུ་ཚུགས་ཀྱིས་འདེབས་པ་དང་། སྙན་ཞུ་མཁྲེགས་བཟུང་གིས་འབུལ་བཞིན་ཡོད་ལ། ཚོགས་ཆེན་དེ་ཡང་བཅོས་མའི་ཟོལ་གྱིས་བསྡུས་ཡོད།

འདི་ལྟར་བྱུང་བས་སྟབས་ཀྱི་བོད་ལ་རང་གི་འགོ་ཁྲིད་བྱེད་ཐུབ་མཁན་གྱི་མི་སྣ་ཞིག་བྱུང་བར་གོ་སྐབས་ཤིག་རེག་གི་མེད་ལ། རེག་པའི་ལམ་ཁ་བསྟན་ཡང་། ཕྱིར་ཁོང་གི་བཀའ་གསུང་བརྩི་བ་ལས་ལྡོག་ནས་ཁྱེད་ནི་ག་དུས་ཡིན་ཡང་བོད་མི་རིགས་ཀྱི་སྙིང་ཡིན། སྲོག་ཡིན། བདེ་སྡུག་ཞུ་ཡུལ་ཡིན། འདི་ཕྱིའི་མགོན་སྐྱབས་ཡིན། ཆོས་སྲིད་གཉིས་ཀྱི་དབུ་ཁྲིད། བོད་མི་རིགས་ཀྱི་སྟོན་པ་ཡིན་ཟེར་ནས་སྒྲོག་བཞིན་ཡོད། སྒྲོག་མཁན་དག་གིས་ཁོང་གི་བཀའ་གསུང་དུས་ལྟར་ཉན་ཡོད་སྲིད་ཀྱང་། ཉན་སྟངས་ཀྱང་མི་ཤེས། སྙིང་དོན་ཡང་མི་ཤེས་པར། གནད་འགག་ལ་ཡང་མི་འཇུ་བར། ཁོང་མེད་དུས་བོད་མི་རིགས་ནི་ཚར་བར་གླེང་རྒྱུའི་སྐད་ཆ་ནི་མང་དུ་འགྲོ་བ་དེ་ནི་ཁོང་ཉིད་ཀྱིས་སྤྱི་ཚོགས་ཀྱི་ཟ་ཟུར་ནས་ཁོང་གི་རྣ་བར་གསན་ནས་འོང་དུས། ཁོང་གི་སེམས་ནང་དུ་དངོས་ནས་ང་རང་ནམ་ཞིག་མེད་དུས་སུ། ངའི་མི་རིགས་འདི་དག་གིས་ག་རེ་བྱེད་སྲིད་དམ་སྙམ་ན། ཁོང་ཉིད་ཀྱིས་རང་ཉིད་སྐུ་འཚོ་གཞུགས་ཀྱི་རིང་འདི་ལ། བོད་མི་རིགས་ཀྱི་གང་ཞིག་བྱེད་ཐུབ་མིན་དེ་ལ་ཡང་དངོས་སུ་གཟིགས་འདོད་ཅིག་ལོས་ཡོད།

བསམ་པ་དེ་ཙམ་ཡང་རྟོགས་མི་ཐུབ་པ་དང་། དེ་ཙམ་ལ་ཡང་འགན་མི་འཁུར་བའི་སྒྱིད་ལུག་གི་ངང་ཚུལ་ཁྲོད་དུ་གཞན་བསྟེན་གྱི་སྟེགས་བུ་སྲུང་མཁན་གྱི་མི་ཆེས་མང་བོ་ཞིག་གིས། ཡོད་ཚད་ཁོང་གི་ཕྲག་པར་སླར་ཡང་གཏོད་འདོད་ཀྱི་སྐད་ཤུགས་འདི་ནི་འཛམ་གླིང་གི་ཕར་ཕྱོགས་ཚུར་ཕྱོགས་གང་སར་བསྒྲགས་དུས། རྒྱ་ནག་པོའི་སྲིད་གཞུང་གི་དཔོན་ངན་དེ་དག་གིས་འདོད་ཐོག་དུ་རྟ་རྒྱུགས་པ་དང་བསམ་ཐོག་དུ་ཆར་འབབ་ཀྱི་ཡོད་པ་དེ་ཡང་ང་ཚོས་མ་ཤེས་པ་ཡིན་རྒྱུ་མ་རེད། སྐད་ཆ་བཤད་ནས་མཚམས་འདི་ལ་སླེབས་དུས་སུ། ང་རང་དངོས་ནས་མིག་ཆུ་ཤོར་གྲབས་བྱེད་ཞོར་དུ། སླར་ཡང་ཚོགས་ཆེན་འདི་ཡང་གཟི་བརྗིད་ལྡན་པའི་ངང་གྲོལ་སོང་ཟེར་ནས། གཅིག་གིས་གཅིག་ལ་འཁེན་ནས་ང་ཚོས་ཁོང་ལ་གསོལ་བ་འདེབས་དགོས་ཞེས་ཨུ་ཚུགས་ཀྱི་ངང་། གཞུང་ཞབས་རེ་ཟུང་གི་ལག་པར་ཁ་བཏགས་ཤིག་བཟུང་དེ། ༧རྒྱལ་བ་རིན་པོ་ཆེ་ཚང་གི་ཕོ་བྲང་གི་མཐའ་སྐོར་དུ་འཛོམ་མི་ཡོང་ངམ་བསམ་ན། དངོས་ནས་བཀའ་བརྩི་སྲུང་ཐུབ་མཁན་གྱི་མི་རིགས་དེ་ཉིད་རྫོགས་པར་གྱུར་བར་རྟགས་དངོས་སུ་བསྟན་པ་རེད་ལ། བོད་ཟེར་བ་འདི་༧རྒྱལ་བ་རིན་པོ་ཆེ་ཡི་མིང་དང་ལྷན་དུ་རྫོགས་ཀྱི་ཡོད་པས་གསལ་བསྒྲགས་ཐུང་ཐུང་ཞིག་ཀྱང་འཛམ་གླིང་དང་རྒྱ་ནག་སྲིད་གཞུང་ལ་བྱས་པ་ཡིན།