དེང་སང་མི་མང་བོ་ཞིག་གིས་ང་རང་བལ་ཡུལ་བཀག་བསྐྱེལ་ཁང་ནས་མི་རིང་བར་ཐག་གཅོད་མ་བྱས་པར་རྒྱུན་རིང་བོ་བཞག་པ་ཡིན་ན། གཅིག་བྱས་ན་རྒྱ་ནག་ལ་རྩིས་སྤྲོད་བྱེད་མི་སྲིད་པ་མིན་ལ། དེ་ལྟར་བྱས་པ་ཡིན་ན་ནི་ང་རང་གི་ཚེ་སྲོག་ལ་གནོད་སྐྱོན་ཏན་ཏན་ཡོང་གི་རེད་ཅེས་སེམས་ཁྲལ་གནང་གི་ཡོད་པ་རེད།
ངས་དེ་ཡི་ཐད་དུ་སྐད་ཆ་འདི་ལྟར་ཞུ་ན་འདོད་བྱུང་། ང་རང་མི་གཅིག་གི་ཚེ་སྲོག་ལ་གནོད་སྐྱོན་ཐེབས་མིན་དེ་ཙམ་ནི་ང་རང་གི་ཞི་བའི་འཐབ་རྩོད་འདིའི་ནུས་ཤུགས་ལ་གཏོར་སྐྱོན་ཐེབས་པ་གང་ཡང་མེད་ཅེས་ཞུ་རྒྱུ་ཡིན། ང་རང་བལ་ཡུལ་ནས་ཁྲིམས་ལ་བཅུགས་དེ་ཁྲིམས་ཁང་དུ་ནད་མནར་སོགས་ཀྱིས་རྐྱེན་པས་གྲོངས་ན་རེད། རྒྱ་ལག་དུ་བཞག་ནས་མནར་གཅོད་དང་བརྡུང་འདེག་གིས་ཁྲོད་ནས་གསད་ན་རེད། མི་ལོ་མང་བོ་བཙོན་ཁང་འགྲིམ་ནས་ཤི་མིན་གསོན་མིན་ཞིག་ལ་བཏང་ན་རེད། དེ་དག་གིས་བོད་མི་རིགས་ཀྱི་འཐབ་རྩོད་མཚམས་འཇོག་པར་ནུས་པ་གང་ཡང་མི་སླེབས་པར་བོད་མི་རིགས་ཀྱི་འཐབ་རྩོད་ཀྱི་ནུས་ཤུགས་ཆེ་རུ་འགྲོ་རྒྱུར་ཡིན་པར་བདག་གིས་ཡིད་ཆེས་བྱེད་རྒྱུ་ཡིན།
སྔོན་ཆད་ནས་ངས་ཐེངས་མང་བོ་ཞིག་ལ་བརྙན་འཕྲིན་གྱི་ལམ་དང་ཡི་གེ་ལམ་ནས་སྤུན་ཟླ་ཆེས་མང་བོ་ཞིག་ལ་ང་རང་གི་ཞི་བའི་གོམ་བགྲོད་འདི་ནི་ཞི་བའི་འཐབ་རྩོད་ནང་ལོག་གི་སྡེ་ཚན་ཞིག་ཡིན་པ་དང་ཞི་བའི་གོམ་བགྲོད་ལ་བར་ཆད་བྱུང་ཡོད་ཀྱང་། ངའི་ཞི་བའི་འཐབ་རྩོད། བོད་མི་རིགས་ཀྱི་རང་དབང་དང་ཞི་བདེ། ༧གོང་ས་མཆོག་བོད་དུ་གདན་འདྲེན་བྱེད་པའི་ཞི་བའི་སྐད་འབོད་འདི་ལ་གང་ཡང་འགྱུར་བ་འགྲོ་མི་སྲིད་ལ། ང་རང་མ་ཤི་བར་དུ་ས་གང་དུ་བསྡད་ཀྱང་བསྟུད་མར་ཞི་བའི་འཐབ་རྩོད་ངས་རང་ཉིད་ཀྱི་ལུས་ངག་ཡིད་གསུམ་བོད་མི་རིགས་ལ་འབུལ་ཡོད་པ་འདིས་སྟེང་ནས་འབད་བརྩོན་བྱེད་ཀྱི་ཡིན་ཞེས་ཡང་དང་བསྐྱར་དུ་ཞུས་ཀྱང་། ད་དུང་ཡང་། བོད་རིགས་སྤུན་ཟླ་ཁ་ཤས་ཤིག་གིས་དེ་ལྟར་མ་གོ་བར་ཞི་བའི་གོམ་བགྲོད་ལས་གཞན་ཞིག་ང་དང་འབྲེལ་མེད་ ལྟ་བུ་མཐོང་མཁན་ནི་རེ་ཟུང་ཞིག་སྤྱི་ཚོགས་ཀྱི་ཟ་ཟུར་ནས་ཡོང་གི་ཡོད་ཚོད་དུ་སྣང་། སྤུན་ཟླ་དེ་དག་ལ་ཆེད་དུ་ཞུ་སྙིང་སྤྲོ་བ་ཞིག་ནི། ང་རང་གླིང་ཚ་ཚེ་བརྟན་རྡོ་རྗེ་ནི། སུམ་དུས་ལྔ་གསུམ་གྱི་ཉིན་མོ་དེ་ནས་ཁྱིམ་ཚང་གཅིག་གི་མི་མིན་ལ། ཆོལ་ཁ་གཅིག་གི་མི་ཡང་མིན། ཚོགས་སྤྱི་གང་རུང་ཞིག་ལ་གཏོགས་པ་དེ་བས་ཀྱང་མིན། ང་རང་གིས་གང་བྱེད་བཞིན་པ་འདི་ནི་བོད་མི་ས་ཡ་དྲུག་གི་འབྲལ་བའི་མིག་དང་ཁོག་པོའི་སྙིང་། ༧སྤྱི་ནོར་༧གོང་ས་མཆོག་གངས་ཅན་བོད་ལ་གདན་འདྲེན་བྱེད་ཆེད་དང་། བོད་མི་རིགས་ཀྱི་རང་དབང་དང་ཞི་བདེ་ཡི་ཆེད། ལྷག་དོན་དུ་བོད་མི་རིགས་ཀྱི་ཆེད་དུ་རང་ལུས་གཞན་ཕན་གྱི་མེ་ལྕེ་རུ་སྒྲོན་བཞིན་པ་དེ་དག་གིས་མེ་ལྕེ་མཆེད་མཚམས་བཞག་ནས་བོད་ཡུལ་ཁ་བ་ཅན་ལ་བདེ་སྐྱིད་ཀྱི་ཉི་མ་ཞིག་ཤར་བའི་ཆེད་ཁོ་ནར་བརྩོན་པ་བསྟེན་བཞིན་ཡོད་པ་དང་། འགྲོ་བ་མིའི་འདྲ་མཉམ་གྱི་ཁེ་དབང་ཞིག་རྩོད་པར་དམ་བཅས་པ་ཡིན་པ་ཐུགས་ལ་ངེས་པ་གཏན་པོར་བཅིངས་རོགས་ཞུ།
འདི་ན་ང་རང་ལ་སྒེར་སེམས་ཟེར་བ་ཞིག་གཏན་བྲལ་ཡིན་ལ། ཁྱིམ་དང་ཆུང་མ་ཟེར་བའི་ཆེད་དུ་འབད་འབུངས་བྱེད་པའི་བསམ་བློ་ཡང་རྩ་ནས་སྤངས་ཡོད་པ་མ་ཟད། ཚེ་ཐོག་འདིར་འཆི་བ་འགོ་ལ་མ་སླེབས་པར་དང་བོད་མི་རིགས་ལ་བདེ་སྐྱིད་མ་ཐོབ་པར་དུ་ང་རང་ནི་བོད་མི་རིགས་ཀྱི་བདེ་སྡུག་གི་སྐད་འཁྱེར་བ་བོད་མི་དཀྱུས་མ་ཞིག་གིས་རང་གི་མི་རིགས་ཀྱི་རང་དབང་དང་ཞི་བདེའི་ཆེད་དུ་མ་སྐུལ་དྭང་བླང་གིས་རང་མི་རིགས་ཀྱི་མགྲིན་ཚབ་པ་ཆུང་ཆུང་ཞིག་བྱེད་ཀྱི་ཡོད་པ་དེ་ཡིན། འདིའི་ཆེད་དུ་ང་རང་སུས་གསད་ཀྱང་རུང་ལ། སུས་གཏུབ་ཀྱང་ཆོག ང་རང་གི་འཆི་ཁའི་དབུགས་ཐ་མ་དེ་ལེན་རེག་བར་དུ་ངས་འདི་ལྟར་ཞི་བའི་འཐབ་རྩོད་བྱེད་ཀྱི་ཡིན་ལ། བྱེད་སྟངས་དེ་ཡང་འགྲོ་བ་འདྲ་མཉམ་དང་འགྲོ་བ་མིའི་ཀུན་སྤྱོད་ལ་བརྩི་བཀུར་ཡོད་པ། མི་རིགས་གཞན་དག་ལ་སྡང་སེམས་མེད་པར་རང་མི་རིགས་ཀྱང་མི་རིགས་གཞན་དག་བཞིན་གནམ་འོག་འདིར་རང་ཉིད་ཀྱི་རིག་གཞུང་གོམ་གཤིས་ཆ་ཚང་བདག་པོ་རྒྱགས་ཐུབ་མཁན་ཞིག་དུ་ཆགས་ཐུབ་པར་ངས་རང་ཉིད་ཀྱི་ཚེ་སྲོག་གཅིག་པོ་འདི་གཞན་ལག་གང་ཞིག་ནས་མེད་པར་སོང་བ་དེར་གཏན་ནས་འགྱོད་མི་སྲིད་ལ། དེ་ལྟར་སོང་བ་དེས་བོད་མི་རིགས་ཀྱི་འཐབ་རྩོད་ཀྱི་རང་བཞིན་ཤི་སོང་བ་ཡང་གཏན་ནས་མིན་པ་རིགས་ཀྱི་སྤུན་ཟླ་གང་ན་སུ་བཞུགས་པ་དང་། ངས་ཡི་གེ་འདི་ཀློག་མཁན་གྱི་སྐྱེ་བོ་སུས་ཀྱང་མཁྱེན་ངེས་ཡིན་ལ། འཛམ་གླིང་འདིར་གནས་པའི་སྐྱེ་བོ་རང་དབང་དང་ཞི་བདེ་ལ་དགའ་བ་རྣམས་ཀྱིས་ངའི་ཞི་བའི་འཐབ་རྩོད་ཀྱི་འབོད་སྒྲ་འདི་ལ་རྒྱབ་རོགས་བྱེད་པར་ཡིད་ཆེས་དང་བཅས་བལ་ཡལ་བཀག་བསྐྱེལ་ཁང་དུ། གླིང་ཚ་ཚེ་བརྟན་རྡོ་རྗེ་ནས། ༡།༦།༡༢
ཅི་ཞིག་བཤད་དགོས་ཡང་ཤེས་ཀྱིན་མི་འདུག གང་ལྟར་རིག་པ་སྒྲིམ་རོགས་ཞུ་རྒྱུ་ཡིན། རོགས་རམ་རེ་དགོས་ཚེ་ཟིན་བྲིས་སུ་སྤེལ་རོགས ཉིན་ལྟར་ཁྱེད་རིང་གི་ཟིན་བྲིས་ལ་ལྟ་གི་ཡོད ། རྡ་རམ་ས་ལར་ཁྱིམ་ཚེ་བྱས་ནས་བསྡད་མྱོང་ཡོད་པའི་གྲོགས་པོ་ཤིག་གིས།། ཨོ་སུ་ཏྲི་ལེ་ཡ་ནས།་
དྲ་གྲོགས་ལགས། ཁྱེད་ཀྱི་ཆོད་སེམས་དང་ལས་འགུལ་འདི་ནི་རླབས་ཆེན་གྱི་བྱ་བཞག་ཅིག་ཡིན་པ་ངས་འདི་ནས་བཤད་ཅི་དགོས། དེས་ན་ངས་ཁྱེད་ཀྱི་གནས་ཚུལ་བཀླག་རྒྱུ་དྲ་ལམ་ནས་འཆོར་གྱིན་འཇུག་གི་མེད། ཁྱེད་རང་རྒྱལ་བའི་སྨོན་མདུན་ཞུ།