ཤ་ཁྲག་རུས་གསུམ་བོད་ལ་སྐྱེ་ཉིན་ནས།།

ཤ་ཁྲག་རུས་གསུམ་བོད་ཀྱི་ཆེད་དུ་བཙག།

དམར་བོ་ཁྲག་གི་ཐིགས་པ་བོད་ནས་ཟེགས།།

སྙི་མོ་ཤ་ཡི་ན་ཟུག་བོད་ནས་གྲུབ།།

རུས་པའི་རང་ཚུགས་སྲ་མོ་བོད་དུ་བསྐྲུན།།

དམར་བོ་ཁྲག་གི་ཐིགས་པ་མ་ཆད་པར།།

སྙི་མོ་ཤ་ཡི་ན་ཟུག་མ་རྫོགས་བར།།

རུས་པའི་རང་ཚུགས་སྲ་མོ་མ་འཐོར་བར།།

ཤ་ཁྲག་རུས་གསུམ་བོད་ལ་གཏོགས་པ་འདི།།

བོད་མིའི་བདེན་དོན་ཆེད་དུ་བཙག་རྒྱུ་ཡིན།།

དམར་པོ་ཁྲག་གི་སྙན་ངག་ང་ཡིས་འབྲི།།

སྙི་མོ་ཤ་ཡི་ན་ཟུག་ང་ཡིས་གླེང་།།

རུས་པའི་རང་ཚུགས་སྲ་མོ་ང་ཡིས་འཛིན།།

ཤ་ཁྲག་རུས་གསུམ་བོད་ལ་བདག་པ་འདི།།

བོད་ཀྱི་རང་དབང་ཆེད་དུ་འབུལ་རྒྱུ་ཡིན།།

དམར་བོ་ཁྲག་གི་མཆོད་པ་མེ་ལ་དྲངས།།

སྙི་མོ་ཤ་ཡི་ན་ཟུག་མེ་ལ་བསྲེག།

རུས་པའི་རང་ཚུགས་སྲ་མོ་མེ་ལ་བཏབ།།

ཤ་ཁྲག་རུས་གསུམ་བོད་དོན་ཕུལ་བ་ཚོའི།།

ཁ་ཆེམས་སྙིང་ལ་བཅིངས་ཏེ་བོད་དུ་འགྲོ།