ཁ་སང་མེ་ཤལ་ཨོ་བྷ་མ་མཆོག་བོད་པའི་ཟ་ཁང་ཞིག་ཏུ་ཕེབས་ནས་བོད་ཟས་མཆོད་པ་ནི་གྲངས་ཉུང་མི་རིཊ་ལ་བརྩི་བཀུར་བྱས་པ་ཞིག་ཡིན་སྐོར་བསྒྲཊ་འདུག
ཁ་སང་ཨ་རིའི་སྲིད་འཛིན་གྱི་བཟའ་ཟླ་མེ་ཤལ་ཨོ་བྷ་མ་གཙོས་ནང་མི་སྐུ་འཁོར་ལྷན་རྒྱས་བདུན་ཕྲག་གཅིག་རིང་གི་རྒྱ་ནག་གི་འཚམས་གཟིགས་མཇུག་སྒྲིལ་ལ་ཉེ་སྐབས། རྒྱ་ནག་ཟི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་གྱི་བོད་ཟས་ཟ་ཁང་ (Zangxiang Teahouse) ཞེས་པར་ཕེབས་ཏེ་ཉིན་གུང་གི་ཞལ་ལག་མཆོད་ཡོད་སྟབས། དྲ་ལམ་དུ་རྩོམ་ཡིག་སྤེལ་མཁན་རྒྱ་རིགས་རྩོམ་པ་པོ་ཚོས་སྐྱོན་བརྗོད་ཤུགས་ཆེར་བྱས་ཡོད་འདུག
དེའི་ཐད་རྒྱ་རིགས་རྩོམ་པ་པོ་ཞིག་གིས། མེ་ཤལ་ཨོ་བྷ་མས་བོད་ཟས་ཟ་ཁང་ཞིག་ཏུ་ཞལ་ལག་མཆོད་པ་དེ་ནི། ཨ་རིས་བོད་དོན་གནས་སྟངས་ལ་དམིགས་བསལ་དོ་སྣང་བྱེད་བཞིན་ཡོད་པ་གསལ་སྟོན་བྱས་པ་ཞིག་ཡིན་སྟབས། ཁོ་མོའི་རྒྱ་ནག་གི་འཚམས་གཟིགས་དེར་ཆབ་སྲིད་ཀྱི་ལྐོག་ཇུས་ཡོད་སྐོར་བརྗོད་འདུག
དེ་བཞིན་རྩོམ་པ་པོ་གཞན་ཞིག་གིས། “ མེ་ཤལ་ཨོ་བྷ་མའི་འཚམས་གཟིགས་ནང་ཤེས་ཡོན་སློབ་གསོ་ཙམ་མིན་པར། ཆབ་སྲིད་ཀྱི་རྙོག་དྲ་ཡང་ཚུད་ཡོད་སྟབས། རྒྱ་རིགས་ཀྱི་མི་སེར་དང་ཨ་རིའི་གྲོས་ཚོགས་འཐུས་མི་ཚོས་ཞིབ་འཇུག་མཐིལ་ཕྱིན་གནང་དགོས་ཀྱི་འདུག ” ཅེས་བརྗོད་འདུག
ཨ་རིའི་ཕོ་བྲང་དཀར་པོའི་ལས་བྱེད་ཅིག་གིས། ལྕམ་སྐུ་མཆོག་གི་བོད་པའི་ཟ་ཁང་ནང་ཞལ་ལག་མཆོད་དོན་རྒྱ་ནག་ནང་ཡོད་པའི་གྲངས་ཉུང་མི་རིགས་ཀྱི་ཐོབ་ཐང་ལ་བརྩི་བཀུར་བྱས་པ་ཡིན་སྐོར་བརྗོད་འདུག
གནད་དོན་དབྱེ་ཞིབ་པ་ཚོས། མེ་ཤལ་ཨོ་བྷ་མས་བོད་ཟས་ཟ་ཁང་དུ་ཞལ་ལག་མཆོད་དོན། ཁོ་མོས་ནམ་རྒྱུན་གྲངས་ཉུང་མི་རིགས་ཀྱི་ཐོབ་ཐང་ལ་བརྩི་བཀུར་ཞུ་བཞིན་པ་དང་ཡོངས་སུ་མཐུན་པ་ཞིག་ཡིན་སྐོར་བརྗོད་འདུག
མེ་ཤལ་ཨོ་བྷ་མ་མཆོག་གིས་གུང་ཟས་མཆོད་རྗེས། ཁྲིན་ཏུའུ་གྲོང་ཁྱེར་གྱི་མཐོ་འབྲིང་ཨང་བདུན་པར་ཕེབས་ཏེ་ཨ་རིའི་འགྲོ་བ་མིའི་ཐོབ་ཐང་གི་འཐབ་རྩོད་ལས་འགུལ་ ( Civil Right Movement ) དང་འབྲེལ་སློབ་མ་ཚོར། ཨ་རིས་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་། ཆོས་དད་རང་དབང་། གཞི་རྩའི་འགྲོ་བ་མིའི་ཐོབ་ཐང་བཅས་ལ་རྩ་འཛིན་ཞུ་བཞིན་ཡོད་ཀྱང་། ད་དུང་མི་རིགས་དབྱེ་འབྱེད་ཀྱི་ཤུགས་རྐྱེན་ངན་པ་དེ་ལས་ཐར་ཐུབ་མེད་སྐོར་དང་། འདས་པའི་བདུན་ཕྲག་གཅིག་རིང་ལྕགས་རི་རིང་བོ་གཙོས་གནའ་ཤུལ་དང་དེང་རབས་ཚན་རྩལ་གྱི་གྲུབ་འབྲས་དག་ལ་མཇལ་རྒྱུ་བྱུང་བ་མ་ཟད། ཤེས་འཇོན་གྱིས་ཕྱུག་པའི་གཞོན་སྐྱེས་ཁྱེད་ཚོར་མཇལ་རྒྱུ་བྱུང་བ་དེ་གཟི་བརྗིད་ཅིག་ཡིན་སྐོར་བརྗོད་ཡོད་འདུག
མེ་ཤལ་ཨོ་བྷ་མ་སྐུ་འཁོར་ལྷན་རྒྱས་ཟླ་འདིའི་ཚེས་ ༢༥ ནས་ ༢༦ ཉིན་གཉིས་རིང་ཟི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་དུ་ཡོད་པའི་བོད་པའི་ཟ་ཁང་ཞིག་ཏུ་བསྐྱོད་ཡོད་པ་དང་། ཟ་ཁང་མདུན་དུ་ཡོད་པའི་མ་ཎི་འཁོར་ལོ་བསྐོར་ཏེ་བོད་པའི་ཆོས་དང་རིག་གཞུང་ལ་བརྩི་བཀུར་ཞུས་ཡོད་འདུག
གསར་འགོད་པ། དོན་གྲུབ།
བོད་ལ་རྒྱབ་སྒྱོར་ཡོད་པའི་བརྟན་པ་ཐུགས་རྗེ་ཆེ་ལྩམ་མེ་ཤལ་ཨོ་བྷ་མ་།