ཕོ་བྲང་དཀར་པོའི་སྲིད་བྱུས་ནག་པོ།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༡༩ སྟེང་གི་རྩོམ་སྒྲིག་པའི་གཏམ།

     ཉེ་ལམ་༧གོང་ས་མཆོག་དང་ཨ་རིའི་སྲིད་འཛིན་ཨོ་བྷ་མ་རྣམ་གཉིས་ཕོ་བྲང་དཀར་པོ་རུ་མཇལ་འཕྲད་གནང་སོང་། ཨོ་བྷ་མས། བོད་རང་བཙན་ལ་རྒྱབ་སྐྱོར་མེད་པ་དང་། དབུ་མའི་ལམ་ལ་རྒྱབ་སྐྱོར་ཡོད་པ། རྒྱ་ནག་གིས་བོད་པའི་ཆོས་དང་རིག་གཞུང་ལ་བདག་སྐྱོང་དང་བོད་མིའི་འགྲོ་བ་མིའི་ཐོབ་ཐང་ལ་སྲུང་སྐྱོབ་བྱེད་དགོས་ཟེར། ད་དུང་༧གོང་ས་མཆོག་གི་འཚེ་མེད་ཞི་བདེའི་ཕྱག་ལས་ལ་བསྟོད་བསྔགས་དང་། རྒྱ་ནག་གཞུང་གིས་༧གོང་ས་མཆོག་གི་སྐུ་ཚབ་དང་ལྷན་དུ་གྲོས་མོལ་བརྒྱུད་བོད་དོན་སེལ་ཐབས་བྱ་དགོས་པ། བོད་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ཆ་ཤས་རེད་ཅེས་བསྐྱར་བརྗོད་བྱས་འདུག 

     ཨ་རིའི་སྲིད་འཛིན་རིམ་བྱུང་གིས་༧གོང་ས་མཆོག་དང་མཇལ་འཕྲད་གནང་རྒྱུ་དེ་ཨ་རིའི་གཞུང་གི་སྲིད་བྱུས་ཤིག་ཆགས་ཡོད། ཐེངས་འདིའི་མཇལ་འཕྲད་དེ་ཧ་ཅང་གློ་བུར་བ་ཞིག་རེད། ཨ་རི་དང་ཉི་ཧོང་རྒྱ་གར་གསུམ་གྱིས་རྒྱ་ནག་ལ་ཁ་གཏད་གཅོག་བཞིན་པའི་སྐབས་དང་། རྒྱ་ནག་གིས་བོད་དང་ཡུ་གུར་ལྷོ་སོག་གསུམ་གྱི་སྲིད་བྱུས་གཏན་འབེབས་བྱེད་བཞིན་པའི་སྐབས་ཡིན། ཕྱོགས་གཞན་ཞིག་ནས་བོད་དོན་རྒྱལ་སྤྱིའི་ཐོག་ནས་མར་འགྲིབ་བཞིན་པའི་སྐབས་དང་། ཨོ་བྷ་མ་སྐབས་གཉིས་པའི་སྲིད་འཛིན་དུ་བསྡད་དེ་ལས་དོན་མང་པོ་ཞིག་མཇུག་སྐྱོང་བྱེད་བཞིན་པའི་སྐབས་དང་ཁེལ་ཡོད།

     ཨོ་བྷ་མས་༧གོང་ས་མཆོག་ཐེངས་གསུམ་ལ་ཕོ་བྲང་དཀར་པོར་གདན་འདྲེན་ཞུས། གཞུང་འབྲེལ་གསལ་བསྒྲགས་ལྟར་ན། མཇལ་འཕྲད་རེ་རེའི་གསུང་མོལ་ནང་དོན་ཧ་ལམ་གཅིག་མཚུངས་རེད། ༧གོང་ས་མཆོག་གིས་དུས་རྒྱུན་འགྲོ་བ་མིའི་རིན་ཐང་གོང་མཐོར་གཏོང་རྒྱུ་དང་ཆོས་ལུགས་མཐུན་སྒྲིལ། བོད་ཀྱི་གནད་དོན་ཐོག་ཐུགས་འཚབ་ཡོད་པ་སོགས་དང་། ཨོ་བྷ་མའི་ཕྱོགས་ནས་ཀྱང་བོད་པའི་ཆོས་དང་རིག་གཞུང་སྲུང་སྐྱོབ་དང་བོད་མིའི་འགྲོ་བ་མིའི་ཐོབ་ཐང་བརྩི་སྲུང་། དབུ་མའི་ལམ་ལ་རྒྱབ་སྐྱོར། གྲོས་མོལ་གྱི་ལམ་ནས་བོད་དོན་སེལ་དགོས་པ་སོགས་རེད།

     མཇལ་འཕྲད་དང་པོ་དང་གཉིས་པར་གནད་དོན་མང་པོ་ཞིག་གི་ཐོག་ཨོ་བྷ་མས་ཁ་ཕྱི་ལ་འཁོར་ནས་བཤད་དགོས་པ་མང་པོ་ནང་ལ་འཁོར་ནས་བཤད་ཡོད། དཔེར་ན། ༧གོང་ས་མཆོག་གིས་བོད་པའི་ཆོས་དང་རིག་གཞུང་ལ་སྲུང་སྐྱོབ་བྱེད་པར་རྒྱབ་སྐྱོར་ཡོད་ཅེས་འགན་༧གོང་ས་མཆོག་ལ་བཀལ་ཡོད། བོད་རྒྱའི་བར་གྱི་མི་མཐུན་པ་དེ་དག་གྲོས་མོལ་བརྒྱུད་ནས་སེལ་རྒྱུར་ཕྱོགས་གཉིས་ཀར་རྒྱབ་སྐྱོར་ཡོད་ཅེས་ཚིག་གཉོམ་ཆུང་ཞིག་གིས་མཇུག་བསྡུས།། མཇལ་འཕྲད་སྔ་མ་ལས་ཕྱི་མ་ནང་དོན་ཁ་གསལ་བོ་དང་དོན་དག་ཐག་ཉེ་བོ་ཆགས་ཡོད། བརྗོད་བྱ་གཅིག་པ་ཡིན་ཡང་བརྗོད་སྟངས་ལ་ཁྱད་པར་ཆེན་པོ་ཕྱིན་འདུག ཐེངས་འདིའི་མཇལ་འཕྲད་རྗེས་ཕོ་བྲང་དཀར་པོའི་གསལ་བསྒྲགས་ནང་། རྒྱ་ནག་གིས་བོད་པའི་ཆོས་དང་རིག་གཞུང་སྲུང་སྐྱོབ་དང་། བོད་མིའི་འགྲོ་བ་མིའི་ཐོབ་ཐང་ལ་འགན་སྲུང་བྱེད་དགོས། རྒྱ་ནག་གིས་ཏཱ་ལའི་བླ་མའི་སྐུ་ཚབ་དང་ལྷན་དུ་གྲོས་མོལ་བརྒྱུད་བོད་དོན་སེལ་ཐབས་བྱེད་དགོས། ཞེས་ཁ་ཕར་འཁོར་ཏེ་འགན་ཡོངས་རྫོགས་རྒྱ་ནག་ལ་བཀལ་ཡོད།

      དམངས་གཙོ་དང་རང་དབང་། འགྲོ་བ་མིའི་ཐོབ་ཐང་དང་འདྲ་མཉམ་སོགས་འཛམ་གླིང་ཀུན་ཁྱབ་ཀྱི་གནད་དོན་ཞིག་ཡིན། བོད་དོན་ལ་འབྲེལ་བ་ཡོད་ཀྱང་བོད་དོན་དངོས་དེ་མ་རེད། གནད་དོན་འདི་དག་ཨ་རིའི་གཞུང་གིས་སྲོག་སྙིང་དང་རིན་ཐང་དུ་འཛིན་གྱི་ཡོད། བོད་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ཆ་ཤས་རེད་ཟེར་བ་དེ་ཨོ་བྷ་མས་སྔོན་ཆད་ཀྱང་བརྗོད་མྱོང་ཡོད་མོད། བོད་རང་བཙན་ལ་རྒྱབ་སྐྱོར་མེད་ཟེར་བ་འདི་དང་པོ་རེད། འདི་ཕོ་བྲང་དཀར་པོའི་སྲིད་བྱུས་ནག་པོ་དེ་རེད་ལ། ཨོ་བྷ་མའི་ལངས་ཕྱོགས་ཇེ་གསལ་དུ་སོང་བའི་ཆ་ཡང་རེད།