ཚོགས་པ་གསར་བའི་གཟེངས་རྟགས།

ཨ་རིའི་ཨེ་མོ་རེ་གཙུག་ལག་སློབ་གཉེར་ཁང་གི་རྒྱ་བོད་མཛའ་འབྲེལ་ཚོགས་པར་ ༢༠༡༤ ལོའི་སློབ་ཕྲུག་གི་ཚོགས་པ་གསར་པའི་གཟེངས་རྟགས་ཐོབ་ཡོད་འདུག

ཟླ་འདིའི་ཚེས་ ༡༦ ཉིན་ཨ་རིའི་ཨེ་མོ་རེ་གཙུག་ལག་སློབ་གཉེར་ཁང་གི་སློབ་མའི་དབུ་ཁྲིད་དང་ཞབས་ཞུའི་ཡིག་ཚང་གི་གོ་སྒྲིག་འོག དབུ་ཁྲིད་དང་ཞབས་ཞུ། སྣ་མང་རང་བཞིན་གྱི་ལོ་འཁོར་གཟེངས་རྟགས་ཞེས་པའི་མཛད་སྒོ་ཞིག་ཚོགས་པའི་ཐོག གཙུག་ལག་སློབ་གཉེར་ཁང་དེར་ཡོད་པའི་རྒྱ་བོད་མཛའ་འབྲེལ་ཚོགས་པ་ (China-Tibet Initiative) ཞེས་པར་ ༢༠༡༤ ལོའི་སློབ་ཕྲུག་གི་ཚོགས་པ་གསར་བའི་གཟེངས་རྟགས་དང་། རྒྱ་བོད་མཛའ་འབྲེལ་ཚོགས་པའི་སློབ་སྟོན་པ་དགེ་བཤེས་བློ་བཟང་བསྟན་འཛིན་ལགས་སུ་སློབ་སྟོན་པའི་གཟེངསརྟགས། རྒྱ་བོད་མཛའ་འབྲེལ་ཚོགས་པའི་ཚོགས་གཙོ་དང་ཚོགས་པ་གསར་འཛུགས་གནང་མཁན་རྒྱ་རིགས་སློབ་ཕྲུག་བྷ་ཊི་ལགས་སུ་མཐོ་སློབ་སློབ་ཕྲུག་ལྷན་ཚོགས་ཀྱི་གྲགས་ཅན་མི་སྣའི་གཟེངས་རྟགས་བཅས་ཕུལ་ཡོད་འདུག

ཨེ་མོ་རེ་གཙུག་ལག་སློབ་གཉེར་ཁང་དུ་ཡོད་པའི་རྒྱ་བོད་མཛའ་འབྲེལ་ཚོགས་པ་ནི། རྒྱ་ནག་ནས་ཕེབས་པའི་སློབ་ཕྲུག་བྷ་ཊི་དང་སེ་ར་དགོན་ནས་ཚན་རིག་སྦྱོང་བར་ཕེབས་མཁན་དགེ་འདུན་པ་ངག་དབང་ནོར་བུ་གཉིས་ཀྱིས། མཛའ་བརྩེ་དང་བསམ་ཤེས། ཞི་མོལ་བཅས་གཞི་ལ་བཞག་སྟེ་བཙུགས་པའི་ཚོགས་པ་ཞིག་ཡིན་འདུག་ལ། ༢༠༡༠ ལོར་རྒྱ་བོད་མཛའ་འབྲེལ་ཚོགས་པ་ཞེས་མིང་བཏགས་རྗེས། བདུན་ཕྲག་གཉིས་རེའི་མཚམས་སུ་རྒྱ་བོད་སློབ་ཕྲུག་རེ་རེས་རང་ཉིད་ཀྱི་མི་ཚེའི་ལོ་རྒྱུས་ངོ་སྤྲོད་སོགས་ལས་གཞི་སྣ་ཚོགས་སྤེལ་ཏེ། ལོ་གཉིས་ཙམ་གྱི་རིང་རྒྱ་བོད་སློབ་ཕྲུག་མི་ཉུང་བ་ཞིག་གི་སེམས་ཀྱི་དོགས་པ་དང་རྣམ་རྟོག་མང་པོ་སེལ་ཐུབ་པ་བྱུང་འདུག

༢༠༡༣ ལོའི་དཔྱིད་ཀར་གཙུག་ལག་སློབ་གཉེར་ཁང་གི་སློབ་ཕྲུག་ཚོགས་པའི་ནང་དེབ་སྐྱེལ་གྱིས་ཚོགས་པ་དངོས་སུ་བཙུགས་པ་མ་ཟད། འོས་བསྡུའི་ལམ་ནས་རྒྱུན་ལས་ཐེངས་དང་པོ་འདེམས་ཐོན་དང་། ༢༠༡༤ ལོའི་དཔྱིད་ཀར་འོས་བསྡུའི་ལམ་ནས་རྒྱུན་ལས་ཐེངས་གཉིས་པ་འདེམས་ཐོན་བྱུང་ཡོད་འདུག ད་ལྟའི་བར་སློབ་སྟོན་པ་དགེ་བཤེས་བློ་བཟང་བསྟན་འཛིན་ལགས་ཀྱི་ལམ་སྟོན་བཀའ་སློབ་འོག ༢༠༡༣ ཕྱི་ཟླ་ ༡༠ ཚེས་ ༩ ཉིན་༧གོང་ས་མཆོག་གིས་རྒྱ་བོད་མཛའ་འབྲེལ་ཚོགས་པའི་ཚོགས་མི་ ༥༠ ཙམ་ལ་མཇལ་ཁ་དང་ལམ་སྟོན་བཀའ་སློབ་བཅས་གནང་ཡོད་འདུག་ལ། བྱང་ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་མཆོག་གིས་ལས་འཁུར་སྐབས་ཚོགས་པའི་ལས་གཞི་ངོ་སྤྲོད་དང་རྒྱུན་ལས་སྔ་ཕྱི་གཉིས་ལ་མཇལ་འཕྲད་བཅས་གནང་ཡོད་འདུག

ད་ལྟའི་བར་ཚོགས་པ་འདིས་༧གོང་ས་མཆོག་གི་བཀའ་དགོངས་ལྟར་དུས་རབས་ཉེར་གཅིག་པ་འདི་ཞི་མོལ་གྱི་དུས་རབས་ཤིག་ལ་བསྒྱུར་རྒྱུར་འབད་བརྩོན་གནང་གི་ཡོད་པར་མ་ཟད། ཆུང་ས་ནས་མི་སྒེར་བར་གྱི་གནད་དོན་དང་ཆེ་ས་ནས་རྒྱ་བོད་གཉིས་ཀྱི་གནད་དོན་དེ་ཞི་མོལ་གྱི་ལམ་ནས་སེལ་ཐུབ་པར་རེ་བ་བྱེད་ཀྱི་ཡོད་འདུག འདས་པའི་ལོ་ཤས་རིང་ཆེས་ཐོག་མའི་ཚོགས་མི་ ༣ ནས་ཚོགས་མི་ ༨༠ ལ་འཕར་ཡོད་པ་དང་། ཚོགས་མིའི་བརྒྱ་ཆ་ ༧༠ ལྷག་རྒྱ་ནག་ནས་ཡོང་བའི་སློབ་ཕྲུག་ཆགས་ཡོད་འདུག

ཐེངས་འདིར་ཨེ་མོ་རེ་གཙུག་ལག་སློབ་གཉེར་ཁང་གིས་རྒྱ་བོད་མཛའ་འབྲེལ་ཚོགས་པ་དང་ཚོགས་པའི་ཚོགས་གཙོ། ཚོགས་པའི་སློབ་སྟོན་པ་བཅས་ལ་ཆེ་མཐོང་གཟེངས་རྟགས་གནང་བ་དེར་ཚོགས་མི་ཚོས། གཙུག་ལག་སློབ་ཁང་གིས་ཚོགས་པ་འདིས་བོད་རྒྱའི་བར་ཞི་མོལ་གྱི་ལམ་དུ་ཞུགས་པའི་བྱ་གཞག་ལ་ཆེ་མཐོང་གནང་བར་ངོས་འཛིན་བྱེད་བཞིན་ཡོད་འདུག་ལ། མ་འོངས་པར་བྱ་གཞག་འདི་ཡུན་གྱིས་རྒྱ་ཇེ་ཆེ་དང་ནུས་པ་ཇེ་ཆེར་འགྲོ་བའི་ཡིད་ཆེས་བྱེད་ཀྱི་ཡོད་འདུག

གནས་ཚུལ་མཁོ་གཏོང་བ། འབྲོང་བུ་ཟླ་བ་ཚེ་རིང་།