ཆོལ་ཁ་གསུམ་གྱི་བསམ་ཚུལ་སྤུངས་ཐུབ་ས་ཞིག་ཡིན་དགོས།

དེ་རིང་ཆོལ་གསུམ་ཆིག་སྒྲིལ་ཚོགས་པ་མི་ལོ་ ༥༠ འཁོར་བའི་དུས་དྲན་མཛད་སྒོ་ཐོག སྤྱི་འཐུས་ཚོགས་གཙོ་མཆོག་གིས་བཙན་བྱོལ་སྤྱི་ཚོགས་ནང་ཕན་ཐོགས་མེད་པའི་སྒྲིག་ཚོགས་མང་པོ་ཡོད་པ་ལས་སྒྲིག་འཛུགས་སྲ་ཐག་གཅོད་གཅིག་གཉིས་ཡོད་ན་ལེགས་སྐོར་གསུངས་སོང་།

དེ་རིང་སྔ་དྲོའི་ཆུ་ཚོད་ ༡༠།༣༠ ཐོག ངྷ་ས་མེག་གྷན་བྷག་སོའུ་ཚོགས་ཁང་ (Club House ) དུ། གངས་ཅན་ཆོལ་གསུམ་ཆིག་སྒྲིལ་ཚོགས་པ་དབུ་བརྙེས་ནས་ལོ་ ༥༠ འཁོར་བའི་དུས་དྲན་མཛད་སྒོ་ཚོགས་ཡོད་ཅིང་། དེར་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གཙོས་ཧིན་བོད་མཛའ་འབྲེལ་ཚོགས་པའི་ཚོགས་གཙོ་དང་རྒྱུན་ལས་རྣམ་པ། ངྷ་སའི་གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ་དང་སྐུ་ཚབ་དང་། དེ་བཞིན་ཚོགས་པ་དེའི་རྒྱུན་ལས་ཟུར་བ་དང་ཚོགས་མི་བཅས་མི་ ༧༠ ལྷག་འཛོམས་སོང་།

མཛད་སྒོའི་ཐོག་མར་སྐུ་མགྲོན་གཙོ་བོ་མཆོག་གིས་༧གོང་ས་མཆོག་གི་སྐུ་པར་ལ་མཇལ་དར་ཕུལ་བ་དང་སྣང་སེལ་སྒྲོན་མེ་ཞལ་འབྱེད། ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་བ་དང་། བོད་བསྟན་སྲིད་ཆེད་རང་སྲོག་བཏང་བའི་རྒྱལ་གཅེས་བ་དག་ལ་མྱ་ངན་གུས་འདུད་བཅས་དབུ་འཛུགས་ལས་རིམ་ཁག་གྲུབ་རྗེས། ཆོལ་གསུམ་ཆིག་སྒྲིལ་ཚོགས་པའི་ཚོགས་གཙོ་བསྟན་འཛིན་གྲགས་པ་ལགས་ཀྱིས་ཚོགས་པ་ངོ་སྤྲོད་དང་འབྲེལ་བརྗོད་དོན། རྒྱ་མིས་བོད་ལ་བཙན་བཟུང་བྱས་རྗེས་བོད་བསྟན་སྲིད་མི་རིགས་རང་དབང་སླར་གསོ་ཡོང་སླད། ༡༩༥༩ ལོའི་གོང་དུ་ཀ་སྦུག་ཏུ་བདེ་དོན་ཚོགས་པ་ཞེས་པའི་བོད་ཆོལ་གསུམ་གྱི་གནད་ཡོད་སེར་སྐྱ་མི་སྣ་འདུས་པའི་ཚོགས་པ་ཞིག་གསར་འཛུགས་གནང་ཡོད་ཅིང་། ༡༩༥༩ ལོར་༧གོང་ས་མཆོག་དང་བཀའ་ཤག་རྒྱ་གར་ནང་ཕེབས་ཏེ་འགན་གཙོ་གནང་བཞིན་ཡོད་པར་བརྟེན། བདེ་དོན་ཚོགས་པའི་ལས་འགན་ཇི་ཡོད་བཀའ་ཤག་ལ་རྩིས་འབུལ་བྱས་པར་ཞལ་བཞེས་ཐོབ་ཏེ་ཚོགས་པ་ཕྱིར་བསྡུ་བྱས་ཡོད་ཀྱང་། ༡༩༦༤ ལོའི་ཟླ་ ༤་ཚེས་ ༢༤ ཉིན་རྡོ་རྗེ་གླིང་དུ་ཆོལ་གསུམ་ཆིག་སྒྲིལ་ཚོགས་པའི་ལས་འགུལ་ཐོག་མར་དབུ་འཛུགས་ཞུས་ཡོད། དེ་ནས་དམིགས་ཡུལ་དོན་ཚན་ལྔ་ཅན་གྱི་ཟིན་བྲིས་བརྒྱབ་པ་དང་རྒྱུན་ལས་རྣམས་ཀ་རྡོར་སྒང་གསུམ་གཙོས་བོད་མི་འདུས་སྡོད་ཁག་ལ་སྐོར་སྐྱོད་ཕེབས་ཏེ། ཆོལ་ཁ་ཆོས་ལུགས་ཀྱི་མི་སྣ་ཆེ་ཁག་ལ་དམིགས་ཡུལ་སྐོར་ཞུས་པར་རྒྱབ་སྐྱོར་ཐོབ་ནས་ཚོགས་པའི་སྒྲིག་གཞི་ཕྱོགས་སྒྲིག་ཞུས་ཡོད་པ་དང་། དེའི་རྗེས་ཆོས་ལུགས་ཆོལ་གསུམ་གྱི་ཚོགས་མི་བརྒྱད་ལས་གྲུབ་པའི་ཚོགས་ཆུང་ཟུར་འཛུགས་ཀྱིས་དམིགས་ཡུལ་དོན་ཚན་ལྔ་རྩ་འཛིན་འོག་སྒྲིག་གཞི་དོན་ཚན་ ༡༧ འཁོད་པ་བོད་མི་མང་སྤྱི་འཐུས་ལྷན་ཚོགས་དང་བཀའ་ཤག་ལྷན་རྒྱས་བརྒྱུད་༧གོང་ས་མཆོག་ལ་བརྟན་བཞུགས་བསྟར་འབུལ་དང་བསྟུན་སྙན་འབུལ་ཞུས་ཏེ། ༧གོང་ས་མཆོག་གི་ཞལ་ནས་ཆོལ་གསུམ་ཆིག་སྒྲིལ་ཚོགས་པའི་དམིགས་ཡུལ་དང་སྒྲིག་གཞི་གང་ལེགས་བྱུང་ལུགས་གསུངས་སྟབས། ཚོགས་པ་འདི་གཞུང་ནས་ངོས་བཞེས་གཙང་མ་གནང་རྒྱུའི་བཀའ་འཁྲོལ་གནང་ཡོད། ཅེས་སོགས་བརྗོད་སོང་།

དེའི་རྗེས་ཚོགས་པའི་དྲུང་ཆེ་སྨན་པ་བསོད་ནམས་ཕུན་ཚོགས་ལགས་ཀྱིས་ལས་བསྡོམས་སྙན་སེང་ཞུས་དོན་ལྟར་ན། ད་ལྟ་ཚོགས་པར་བདག་པའི་ཁང་མིག་ ༡༥ ཡོད་པའི་ཁོངས་ནས་ ༡༠ ཁྲིམས་མཐུན་ཐོག་གསར་རྒྱག་ཟིན་པ་དང་། གཞན་ ༥ གཏན་འཇགས་བཟོ་སྐྲུན་བྱེད་པར་འབད་བརྩོན་གནང་མུས། ༢༠༡༡ ལོ་ནས་བཟུང་ཚོགས་པའི་རྩིས་ཁྲ་ལ་རྒྱ་གར་གྱི་ཁྲིམས་ལུགས་དང་མཐུན་པར་རྩིས་བཤེར་འགྲོ་ཐུབ་ཡོད་པ་དང་། ཚོགས་པའི་ངོས་ནས་བོད་བསྟན་སྲིད་ཆེད་རང་ལུས་མེར་བསྲེགས་གནང་མཁན་ཚོའི་ཆེད་མཆོད་འབུལ་དང་། ཉམས་ཐག་སློབ་མ་དང་ནད་པར་རོགས་སྐྱོར་སོགས་བྱས་ཡོད་སྐོར་བརྗོད་སོང་།

དེའི་རྗེས་སྐུ་མགྲོན་གཙོ་བོ་སྤྱི་འཐུས་ཚོགས་གཙོ་མཆོག་གིས་གཏམ་བཤད་གནང་དོན། སྔོན་མ་ཆོས་རྒྱལ་ཚོའི་སྐབས་ནས་བཟུང་བོད་ཆོལ་ཁ་གསུམ་གཅིག་ཏུ་བསྡུས་དང་མ་བསྡུས་པའི་གནས་སྟངས་མང་པོ་བྱུང་ཡོད་པ་རེད། ལྷག་པར་དུ་བོད་ས་མ་ཤོར་བའི་གོང་བོད་ཆོལ་ཁ་གསུམ་གཅིག་སྒྲིལ་ཡོང་བ་ཕར་ཞོག ཆོལ་ཁ་སོ་སོའི་ནང་ས་ཁུལ་དང་ལུང་ཚན་བར་མ་མཐུན་པའི་གནས་སྟངས་མང་པོ་ཞིག་ཆབ་སྲིད་ཀྱི་ཐོག་ནས་བྱུང་ཡོད། འོན་ཀྱང་། ཆོས་ཕྱོགས་ཀྱི་ཐོག་ནས་བོད་མི་ཚོ་རྡོག་རྩ་ཆིག་བསྒྲིལ་བྱུང་ཡོད། ལྷག་པར་དུ་བཙན་བྱོལ་ལ་གྱར་རྗེས། ང་ཚོས་རྒྱ་གར་སྐད་དང་འགྲོ་ལུགས་འགྲོ་སྟངས་མ་ཤེས་བ་དང་ལྟ་རྒྱ་མཐོང་རྒྱ་མེད་པའི་དཀའ་ངལ་འོག ཆིག་སྒྲིལ་ཚོགས་པ་བཙུགས་ཏེ་ཆོལ་ཁ་ཙམ་མ་ཡིན་པའི་ཆོས་རྒྱུད་ཁག་གི་སྐུ་ཚབ་ཡོད་པའི་ཚོགས་པ་ཞིག་ཆགས་ཡོད། ཚོགས་པ་དེ་བརྒྱུད་ནས་ཆོལ་ཁ་གསུམ་གྱི་གནད་ཡོད་མི་སྣ་ཚོ་ཕན་ཚུན་ཐུག་འཕྲད་དང་བསམ་བློ་བརྗེ་རེས་བྱས་པའི་སྡིངས་ཆ་བསྐྲུན་ཡོད་པར་ངོས་འཛིན་ཞུ་བཞིན་ཡོད།

འོན་ཀྱང་བར་ལམ་ཞིག་ནས་ཆིག་སྒྲིལ་ཚོགས་པའི་ལས་དོན་བྱེད་ཕྱོགས་ལ་ཉམས་ཆགས་ཕྱིན་པ་རེད། དེང་སང་ང་ཚོའི་སྤྱི་ཚོགས་ནང་སྤྱི་པའི་སྒྲིག་འཛུགས་ལ་ཤུགས་རྒྱག་རྒྱུ་ཉུང་དུ་སོང་སྟེ། ཡན་ལག་བྱེ་བྲག་པ་ཚོ་ཤུགས་ཆེན་པོ་ཆགས་པའི་གནས་སྟངས་ཤིག་ལོ་རྒྱུས་ཐོག་བྱུང་བསྡད་པ་རེད། ཁྲི་ཟུར་ཟམ་གདོང་རིན་པོ་ཆེ་མཆོག་གིས་ལྷོ་ཕྱོགས་སུ་བཀའ་སློབ་གནང་བའི་ནང་། དཔེར་ན། དགོན་སྡེ་ཁག་ནང་བླ་སྤྱི་ཤུགས་ཆུང་རུ་ཕྱིན་པ་དང་གྲྭ་ཚང་ཚོ་ཤུགས་ཆེ་རུ་ཕྱིན་ཡོད་། དེ་བཞིན་ང་ཚོ་ཆོལ་གསུམ་ཆིག་སྒྲིལ་ཚོགས་པ་ཡིན་ན་མར་ཉམས་པ་དང་ཆོལ་ཁ་སོ་སོའི་ཚོགས་པ་ཤུགས་ཆེར་ཕྱིན་པ་ཡོང་བསྡད་ཡོད། ཅེས་གསུངས་སོང་།

ཁོང་གིས་མུ་མཐུད་དུ། གངས་ཅན་ཆོལ་གསུམ་ཆིག་སྒྲིལ་ཚོགས་པ་བཙུགས་ནས་མི་ལོ་ ༥༠ འཁོར་བའི་དུས་དྲན་སྲུང་གཙི་བྱེད་བཞིན་ཡོད་སྟབས། ང་ཚོས་བསམ་བློ་གཟབ་གཟབ་གཏོང་དགོས་གལ་ཆེན་པོ་རེད། སྒྲིག་འཛུགས་མང་པོ་ཞིག་ཡོད་ན་ཕན་ཐོགས་གང་ཡང་མི་འདུག སྒྲིག་འཛུགས་ཡོད་པ་སྲ་ཐག་ཐག་གིས་སྤྱི་ཚོགས་ལ་ཕན་ཐོགས་པའི་ལས་ཀ་བྱེད་ཐུབ་པ་ཞིག་གལ་ཆེན་པོ་རེད། ད་ལྟའི་ཆོལ་གསུམ་ཆིག་སྒྲིལ་ཚོགས་པའི་རྒྱུན་ལས་རྣམ་པ་ཡིན་ན་རེད། ཆོལ་གསུམ་ཆིག་སྒྲིལ་ཚོགས་པ་ཟེར་དུས་ཆོལ་ཁ་གསུམ་གྱི་འཐུས་མི་ཆ་ཚང་ཡོད་པའི་ཐོག་ནས་ཆོལ་ཁ་གསུམ་གྱི་བསམ་ཚུལ་ཚང་མ་སྤུངས་ཐུབ་ས་དང་ཆོལ་ཁ་གསུམ་གྱི་ནུས་པ་འདོན་ཐུབ་ས་ཞིག་ཡིན་དགོས། མ་འོངས་བར་ཚོགས་པའི་སྒྲིག་གཞི་དང་ལས་གཞི་ག་འདྲ་ཞིག་བཟོ་དགོས་མིན་ཆབ་སྲིད་ཐོག་ལ་རྣམ་འགྱུར་ག་འདྲ་ཞིག་སྟོན་དགོས་མིན་ལའང་ལ་བསམ་བློ་གཏོང་དགོས་བ་གལ་ཆེན་རེད། གཞན། ངྷ་རམ་ས་ལར་ཆོལ་གསུམ་ཆིག་སྒྲིལ་ཚོགས་པ་རྒྱུ་ཆེ་ཤོས་ཡིན་པའི་བཤད་སྲོལ་ཞིག་ཡོད། ངས་རྒྱུ་ཆེ་ཤོས་ཡིན་མིན་མི་ཤེས་ཀྱང་། མེག་གྷན་གྱི་ས་ཆ་ཁག་ཅིག་ཆིག་སྒྲིལ་ཚོགས་པའི་མིང་ཐོག་ཡོད་པ་བདག་གཅེས་ཡག་པོ་བྱ་དགོས་རེད། ཆིག་སྒྲིལ་ཚོགས་པའི་ས་ཆ་རེད་ཟེར་བའི་ཟ་ཁང་དང་ཚོང་ཁང་། ཚོགས་ཁང་སོགས་འཛུགས་སྐྲུན་བྱས་པར་མེད་པར་རྙིང་པ་རང་འཇགས་བཞག་ཡོད་སྟབས། འཛུགས་སྐྲུན་སྐོར་ལ་བསམ་བློ་བཏང་སྟེ་ཚད་ལྡན་ཞིག་བཟོ་རྒྱུ་གལ་ཆེན་རེད། ཅེས་སོགས་གསུངས་སོང་།

དེ་རྗེས་སྐུ་མགྲོན་གཙོ་བོ་མཆོག་ནས་རྒྱུན་ལས་ཟུར་པ་ཁག་ཅིག་ལ་ཐུགས་རྗེ་ལེགས་གསོལ་གྱི་ཐང་ཀ་རེ་དང་མཇལ་དར་རེ་ཕུལ་རྗེས་དུས་དྲན་མཛད་སྒོ་མཇུག་སྒྲིལ་སོང་།

གསར་འགོད་པ། ལྷ་སྐྱབས་རྒྱལ།