༧གོང་ས་མཆོག་གིས་ལ་ཏི་ཝི་ཡའི་མི་མང་དང་ཨུ་རུ་སུའི་དད་ལྡན་པ་རྣམས་ལ་ཆོས་འབྲེལ་དབུ་འཛུཊ་གནང་སྟེ། ཁོང་རྒྱལ་ཁབ་དེའི་ནང་ཕེབས་དོན་མི་དམངས་དཀྱུས་མ་ཚོར་ཆོས་འབྲེལ་བྱེད་ཆེད་ཡིན་སྐོར་གསུངས་འདུག
ཟླ་འདིའི་ཚེས་ ༣ ཉིན་༸གོང་ས་མཆོག་བཞུགས་སྒར་ནས་ཆིབས་བསྒྱུར་གནང་ཡོད་པ་དང་། ཚེས་ ༤ ཉིན་ཏེ་ལོ་རིན་པོ་ཆེ་མཆོག་དང་། ཡུ་རོབ་རྒྱལ་ཁབ་ལ་ཏི་ཝི་ཡ་ (Latvia) བོད་དོན་རྒྱབ་སྐྱོར་ཚོགས་པའི་སྐུ་ཚབ། ཨུ་རུ་སུ་བོད་དོན་རྒྱབ་སྐྱོར་ཚོགས་པའི་སྐུ་ཚབ་བཅས་ཀྱིས་ཕེབས་བསུའི་ཁྲོད་ལ་ཏི་ཝི་ཡའི་རྒྱལ་ས་རེ་གྷར་ (Riga) རུ་ཞབས་སོར་བདེ་བར་འཁོད་ཡོད་འདུག སྐབས་དེར་གསར་འགོད་པས་ལ་ཏི་ཝི་ཡའི་རང་བཙན་ཉིན་མོའི་སྐོར་ལ་བཅར་འདྲི་ཞུས་པའི་ལན་དུ་༧གོང་ས་མཆོག་གིས། དུས་རབས་ ༢༠ པའི་མགོ་སྟོད་དང་མཇུག་བཅས་སུ་འཛམ་གླིང་ནང་བཟང་ཕྱོཊ་ཀྱི་འགྱུར་བ་ཕྱིན་པར་བལྟ་སྐབས་སེམས་ནང་དགའ་སྤོབས་སྐྱེ་བཞིན་ཡོད་པ་དང་། ཁོང་ ༡༩༩༦ ལོར་དབྱིན་ཇིའི་རྒྱལ་མོའི་ཨ་མ་དང་མཇལ་ཏེ། ད་ལྟའི་འཛམ་གླིང་གི་གནས་སྟངས་དེ་སྔ་དང་གཅིག་མཚུངས་ཡིན་མིན་དྲིས་སྐབས། ཁོ་མོས་ཐེ་ཚོམ་མེད་པར་འཛམ་གླིང་གི་གནས་སྟངས་དེ་སྔ་དང་བསྡུར་ན་བཟང་དུ་ཕྱིན་ཡོད་པ་དང་། ཁོ་མོ་ཆུང་དུས་འགྲོ་བ་མིའི་ཐོབ་ཐང་དང་རང་ཐག་རང་གཅོད་ཀྱི་ཐོབ་ཐང་སོགས་མེད་ཀྱང་། དེང་སྐབས་དེའི་སྐོར་འཛམ་གླིང་ཡོངས་གྲགས་ཆགས་ཡོད་སྐོར་གསུངས་ཡོད་ཚུལ་སོགས་དང་འབྲེལ། ད་ལྟའི་ཆར་འཛམ་གླིང་གང་སར་རང་དབང་ཆེ་རུ་ཕྱིན་ཡོད་ཀྱང་། མི་འབོར་ཐེར་འབུམ་བདུན་ཡོད་པ་རྣམས་གཞི་རྩའི་ཆ་ནས་འགྲོ་བ་མིའི་རིགས་གཅིག་ཡིན་སྟབས། འགྲོ་བ་མིའི་ཐོབ་ཐང་ཡར་རྒྱས་གཏོང་ཐབས་སུ་འབད་བརྩོན་བྱེད་དགོས་པ་དང་། དེ་ལྟའི་ལས་འགུལ་ཐད་བྷེལ་ཊེ་ཀི་ཡུལ་གྲུ་ (Baltic States) ལྟ་བུའི་རྒྱལ་ཁབ་ཆུང་བ་ཚོས་སྐབས་རེ་སྣེ་འཁྲིད་དེ་ཞབས་འདེགས་ཡག་པ་ཞུ་ཐུབ་པར་ངོས་འཛིན་བྱེད་བཞིན་ཡོད་སྐོར་སོགས་གསུངས་འདུག
ཁ་སང་ཚེས་ ༥ ཉིན་༧གོང་ས་མཆོག་གིས་ལ་ཏི་ཝི་ཡའི་བོད་དོན་རྒྱབ་སྐྱོར་ཚོགས་པ་དང་ཨུ་རུ་སུ་བོད་དོན་རྒྱབ་སྐྱོར་ཚོགས་པ། ཨུ་རུ་སུའི་སྐུ་ཚབ་དོན་གཅོད་ལས་ཁང་བཅས་ཀྱི་གོ་སྒྲིག་གནང་བ་ལྟར། ལ་ཏི་ཝི་ཡའི་ཀེ་ཕི་ས་ལྰ་ (Kipsala) ཚོགས་ཁང་ནང་དད་ལྡན་པ་ ༣༥༠༠ བརྒལ་བ་ཤེས་རབ་སྙིང་པོ་དང་ལག་ལེན་སོ་བདུན་མའི་ཆོས་འབྲེལ་དབུ་འཛུཊ་གནང་ཡོད་འདུག ཆོས་འབྲེལ་དབུ་འཛུཊ་མ་གནང་གོང་༧གོང་ས་མཆོག་གིས་དེར་ཡོད་མི་མང་ལ་བཀའ་སློབ་གནང་དོན། དེ་རིང་ངོས་རང་འདི་གར་ཡོང་སྟེ་ཁྱེད་རང་ཚོར་ཐུག་རྒྱུ་བྱུང་བར་ཧ་ཅང་དགའ་པོ་བྱུང། སྤྱིར་བཏང་ངོས་རང་དེ་སྔ་ཁུལ་འདིར་ཡོང་སྐབས་ཨུ་རུ་སུའི་མི་ཞིག་གིས་རྒྱལ་ཁབ་འདིའི་ནང་མི་དམངས་དཀྱུས་མ་མང་ཆེ་བ་ཞིག་དཔལ་འབྱོར་གྱི་དཀའ་ངལ་གྱི་རྐྱེན་པས་རྒྱ་གར་དུ་ངོས་ཀྱིས་ཆོས་འབྲེལ་བྱེད་སྐབས་ཡོང་ཐུབ་ཀྱི་མེད་སྐོར་བརྗོད་བྱུང་སྟབས། དེ་རིང་ངོས་རང་འདིར་ཡོང་དོན་མི་དམངས་དཀྱུས་མ་ཚོར་ཆོས་འབྲེལ་བྱེད་ཆེད་ཡིན། དཔལ་འབྱོར་གྱི་དཀའ་ངལ་ཡོད་མེད་ལ་མ་ལྟོས་པར་ད་རེས་འདིར་ཨུ་རུ་སུ་གཙོ་བོར་གྱུར་བའི་མི་དམངས་མང་དག་ཅིག་བསླེབས་འདུག ཧ་ཅང་དགའ་བོ་བྱུང། ཚང་མར་འཚམས་འདྲི་དང་འབྲེལ་ཐུགས་རྗེ་ཆེ་ཞུ་རྒྱུ་ཡིན། ཉིན་གྲངས་གཉིས་རིང་ངོས་ཀྱིས་འདི་གར་གཙོ་བོ་ཤེས་རབ་སྙིང་པོ་དང་རྒྱལ་སྲས་ལག་ལེན་སོ་བདུན་མའི་ཆོས་འབྲེལ་བྱ་རྒྱུ་ཡིན་ཞེས་གསུངས་འདུག
ཡང་༧གོང་ས་མཆོག་གིས་དེང་གི་དུས་འདིར་ཕྱི་དངོས་པོས་ནང་སེམས་ཀྱི་དཀའ་ངལ་སེལ་ཐུབ་ཀྱི་མེད་པ་ཧ་ཅང་གསལ་པོ་ཆགས་ཡོད་པ་དང་། འཛམ་གླིང་འདིའི་ནང་རྒྱུ་དཔལ་འབྱོར་ཧ་ཅང་ཕྱུག་པོ་ཡོད་པའི་འབྱོར་ལྡན་པ་ཚོ་སེམས་མ་སྐྱིད་པ་བྱེད་མཁན་མང་པོ་ཡོང་གི་ཡོད་པ་ང་ཚོའི་མཐོང་ཆོས་སུ་འདུག་སྟབས། དུས་རབས་ཉེར་གཅིག་པའི་ནང་ཆོས་ལུགས་མང་ཆེ་བ་མི་ལ་དཀའ་ངལ་འཕྲད་སྐབས་སེམས་ལ་བདེ་སྐྱིད་ཀྱི་ཚོར་བ་སྦྱིན་མཁན་ཞིག་ཆགས་ཡོད་སྐོར་སོགས་གསུངས་འདུག
ཐེངས་འདིའི་ཉིན་གཉིས་རིང་གི་གསུང་ཆོས་ཨི་སི་ཊོ་ནི་ཡ་དང་ལ་ཏི་ཝི་ཡ། ཨུ་རུ་སུ། དབྱིན་སྐད་སོགས་ཀྱི་ནང་གསུང་བསྒྱུར་ཞུ་བཞིན་ཡོད་འདུག་ལ། ལ་ཏི་ཝི་ཡའི་མཛད་འཕྲིན་གྲུབ་རྗེས་༧གོང་ས་མཆོག་གིས་མུ་མཐུད་ནོར་ཝེ་དང་ཧོ་ལན་ཌི། འཇར་མན་བཅས་རྒྱལ་ཁབ་ཁག་ནང་ཆོས་ཕྱོཊ་ཀྱི་མཛད་འཕྲིན་བསྐྱང་རྒྱུ་ཡིན་འདུག
གསར་འགོད་པ། དོན་གོ
