བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༢༥ སྟེང་གི་རྩོམ་སྒྲིག་པའི་གཏམ།
ད་ལོར་རྡ་རམ་ས་ལའི་བོད་མིའི་སྒྲིག་འཛུགས་ཀྱིས་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མའི་འཁྲུངས་སྐར་གཞུང་འབྲེལ་ཐོག་སྲུང་གཙི་གནང་སོང་། བཀའ་ཤག་དང་སྤྱི་འཐུས་ལྷན་ཁང་། བྱེས་ཀྱི་བཀྲ་ཤིས་ལྷུན་པོ་སོགས་ཀྱིས་གསར་འགོད་བསྒྲགས་གཏམ་སྤེལ་ཏེ། རྒྱལ་བ་པཎ་ཆེན་གྱི་ཡང་སྲིད་འཚོལ་བའི་ལམ་སྲོལ་འདི་ཆབ་སྲིད་དང་འབྲེལ་བ་རྩ་ནས་མེད་ཀྱང་རྒྱ་གཞུང་གིས་ཆབ་སྲིད་ལག་ཆར་སྤྱད་དེ། ཆུང་སྲིད་ཕ་མ་གཉེན་འབྲེལ་དང་བྱ་བྲལ་རིན་པོ་ཆེ་སོགས་བཙོན་མུན་དུ་བཅུག་ནས་ད་བར་སུས་ཀྱང་མཐོང་ཚོར་མེད་པ་ཆགས་ཡོད་ཟེར།
རྒྱ་ནག་གཞུང་གིས་བོད་མིའི་ཆོས་ཀྱི་བྱེད་སྒོ་དང་སྤྲུལ་སྐུའི་ལམ་སྲོལ་སོགས་ཆབ་སྲིད་ལག་ཆར་སྤྱད་པའི་ལོ་རྒྱུས་དུས་ཡུན་ཐུང་ཐུང་མིན། བོད་བཙན་པོའི་སྐབས་ནས་ས་ཕག་རིན་གཙང་དང་། རྒྱལ་བ་པཎ་ཆེན་ནས་དེང་གི་ལྷ་རམ་དགེ་བཤེས་བར་གཏིང་ཟབ་ས་དང་ཕུགས་རིང་ས་ནས་ཆབ་སྲིད་ལག་ཆར་སྤྱད་དང་སྤྱོད་བཞིན་ཡོད། པཎ་ཆེན་རིན་པོ་ཆེ་ཁོ་ནའི་སྟེང་ནས་གླེང་ནའང་པཎ་ཆེན་ནང་མ་སྒང་དང་བོད་གཞུང་བར་དཀྲུག་ཤིང་བརྒྱབ། གསང་ཡུམ་བཞེས་པའི་མགོ་རྔར་ཐེ་གཏོགས་དང་པཎ་སྲས་མོ་རིག་འཛིན་དབང་མོའི་སློབ་སྦྱོང་ལའང་ལག་བསྲིངས་ནས་ཇུས་འཐེན་ཡོད།
འདི་དང་འབྲེལ་ནས་ཉེ་ཆར་གྱི་གནས་ཚུལ་ཞིག་ལ་དོགས་སློང་བྱེད་དགོས་བྱུང་། བདུན་ཕྲག་གཅིག་གཉིས་གོང་སྤྱི་ཚོགས་བརྒྱུད་ལམ་ཁག་ཏུ་པཎ་ཆེན་སྐུ་གོང་མའི་སྲས་མོ་རིག་འཛིན་དབང་མོའི་གཉེན་སྒྲིག་གི་ཆོ་ག་རེད་ཟེར་ནས་བོད་རྒྱ་གཉིས་ཀའི་ཁྱད་ཆོས་ལྡན་པའི་བག་ལྭ་དཀར་གཙང་གྱོན་པའི་ན་གཞོན་ཕོ་མོ་གཉིས་ཀྱི་དཔར་ཞིག་ཁྱབ་བཞིན་འདུག པར་ངོས་ཀྱི་བུ་མོ་དེ་པཎ་རིག་འཛིན་དབང་མོ་ཡིན་ཞིང་། གམ་གྱི་སྐྱེས་པ་དེ་མོ་ལས་ཅུང་ལོ་ཆེ་བ་མིན་འགྲོ་བསམ་པ་ཞིག་དང་ཁོ་རྒྱ་རིགས་ཡིན་པའི་འགྲེལ་བཤད་ཀྱང་བསྐྱོན་འདུག
གོང་གི་གནས་ཚུལ་དེ་བརྒྱུད་ནས་གནས་ཚུལ་གཞན་ཞིག་ཀྱང་གློ་བུར་དུ་དྲན་པ་བསླངས། ལོ་ངོ་བཅུ་དགུའི་སྔོན་ནས་བོར་བརླག་ཏུ་ཕྱིན་ཞིང་། ད་ལྟ་ལོ་ན་ཉེར་ལྔར་སོན་པའི་བོད་པའི་ཕོ་གསར་ཤ་དར་ཁྲག་དར་དེ་ད་ལྟ་འཚོ་བཞུགས་ཡོད་མེད་བཤད་དཀའ་ལ། གལ་སྲིད་ཡོད་པའི་དབང་དུ་བྱས་ཀྱང་མི་རིགས་མཐུན་སྒྲིལ་གྱི་སློབ་གསོའི་འོག་ན་བོད་སྐད་བོད་ཆས་གྱོན་ཤེས་པ་ཕར་ཞོག རང་གི་རིགས་དང་རུས་རྒྱུད་ངོ་མི་ཤེས་མཁན་ཞིག་དང་། རྒྱ་ནག་གི་རིག་གཞུང་འཆལ་སྤྱོད་དང་ཆང་དང་ཐ་མག་ནང་ན་བག་མེད་གཉིད་དུ་ཡུར་མཁན་རྒྱ་མིན་བོད་མིན་ཞིག་བཟོས་ཡོད་ཀྱང་སྲིད། རྒྱ་ནག་དམར་ཤོག་གིས་བོད་གཙོས་པའི་གྲངས་ཉུང་མི་རིགས་ཁག་བཙན་བཟུང་བྱས་ཤིང་། གུང་ཁྲན་ཏང་གཞུང་གསར་འཛུགས་བྱས་རྗེས་མཐུན་སྒྲིལ་ཟེར་བའི་བརྡ་ཆད་ཅིག་བཙན་གྱིས་བསྒྲིགས་ནས་ཤུགས་ཀྱིས་བསྒྲགས་ཡོད། མིང་ཚིག་འདིའི་གདགས་གཞིར་བོད་པའི་བླ་སྤྲུལ་དགེ་བཤེས་དང་། དམའ་རིམ་སྤྱི་ཚོགས་ལ་དངུལ་དངོས་ཀྱི་བསླུ་བྲིད་བཏང་སྟེ་བྱེད་སྒོ་སྣ་ཚོགས་སྤེལ་ཡོད་ལ། ཐ་ན་སྲིད་གཞུང་གི་རྒྱབ་རོགས་འོག་ནས་རྒྱ་བོད་གཉེན་སྒྲིག་བྱེད་དུ་བཅུག་ནས་མི་རིགས་མཐུན་སྒྲིལ་གྱི་རྣམ་པ་སྟོན་ཐབས་ཀྱང་བྱས་ཡོད།
ཀུན་གཟིགས་པཎ་ཆེན་སྐུ་ཕྲེང་བཅུ་བ་མཆོག་དང་ཁོང་གི་གསང་ཡུམ་རྒྱ་རིགས་ལཱི་ཅེ་གཉིས་ཀྱི་གཉེན་སྒྲིག་དེའང་མི་རིགས་མཐུན་སྒྲིལ་གྱི་ལག་ཆར་སྤྱད་པ་ཉུང་ཉུང་མིན་ལ། སྐབས་དེའི་བོད་རྒྱ་གཉེན་སྒྲིག་གི་ཕྲུ་གུ་དག་ལའང་མཐུན་སྒྲིལ་བྱིས་པ་ཞེས་བཏགས་ཡོད། གྱ་གསུམ་ལོར་པཎ་རིག་འཛིན་དབང་མོ་བཙས་སྐབས། དེ་སྔའི་སྲིད་བློན་ཀྲུག་གི་སྐུ་ཟླ་ཏུན་དབྱིན་ཁྲའོ་དང་། ད་ལྟའི་སྲིད་འཛིན་ཞི་ཡི་ཕ་ཞི་ཀྲུང་ཞོན་གཉིས་ཕེབས་ཏེ། སྲས་མོའི་མིང་ལ་ ‘ཐོན་ཐོན་团团’ ཞེས་བཏགས་ན་བཟང་ཚུལ་བཤད་ཡོད། 5 རིག་གསར་རྗེས་ལ་བཟོ་ཞིང་མཐུན་སྒྲིལ་དང་། “དམག་དམངས་མཐུན་སྒྲིལ།” “མི་རིགས་མཐུན་སྒྲིལ་སོགས་མཐུན་སྒྲིལ་རིག་པ་སྤྱི་ཚོགས་ཧྲིལ་པོར་བརྡོལ། ད་ལྟ་ད་དུང་མིང་ཚིག་འདི་དར་སྤེལ་བཏང་སྟེ་ཆབ་སྲིད་ལག་ཆར་སྤྱོད་ཀྱིན་ཡོད་སྟབས། པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་པཎ་རིག་འཛིན་དབང་མོ་རྣམ་གཉིས་ཀྱང་རྒྱ་གཞུང་གིས་མཐུན་སྒྲིལ་ཞེས་པའི་མིང་ཚིག་འདིའི་གདགས་གཞིར་བཟོ་སྐྲུན་བྱེད་ཀྱི་མེད་དམ།
