བོད་སྐྱོབ་ཚོཊ་པའི་མཛད་སྒོ།

གཟའ་སྤེན་པའི་ཉིན་ཨོ་སི་ཊི་རེ་ཡར་བོད་སྐྱོབ་ཚོགས་པའི་ལོ་ཉི་ཤུའི་མཛད་སྒོ་ཚོགས་ཏེ། བོད་དོན་གཏམ་བཤད་དང་བོད་ཀྱི་རིག་གཞུང་སྐོར་འགྲེམས་སྟོན་བཅས་གནང་འདུག

དབུས་ཕྲུག་ཚེ་རིང་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཟླ་འདིའི་ཚེས་ ༡༧ ཉིན་ཨོ་སི་ཊི་རེ་ཡའི་རྒྱལ་ས་ཝིན་དུ་བོད་སྐྱོབ་ཚོགས་པ་གསར་འཛུགས་གནང་ནས་ལོ་ ༢༠ འཁོར་བའི་དུས་སྟོན་མཛད་སྒོ་ཚོགས་ཡོད་འདུག་ལ། མཛད་སྒོའི་ཐོག་སྐུའི་གཅུང་མོ་བཀའ་ཟུར་རྗེ་བཙུན་པདྨ་མ་མཆོག་དང་། བོད་སྐྱོབ་ཚོགས་པའི་ཚོགས་མི་ ༧༠ ཙམ། དེ་བཞིན་བོད་པ་དང་བོད་དོན་རྒྱབ་སྐྱོར་བཅས་འཛོམས་ཏེ། སྐུའི་གཅུང་མོ་བཀའ་ཟུར་རྗེ་བཙུན་པདྨ་མཆོག་གིས་བོད་ཀྱི་ད་ལྟའི་གནས་སྟངས་དང་བཙན་བྱོལ་བོད་མིའི་སློབ་གྲྭའི་གནས་སྟངས། ད་ལྟ་དང་འབྱུང་འགྱུར་གྱི་ལས་འཆར་སོགས་ཀྱི་སྐོར་ནས་གཏམ་བཤད་དང་། རི་འཛེགས་པ་དང་བོད་ཀྱི་གྲོགས་པོ། བོད་ནང་ལོ་བདུན་ཞེས་པའི་དཔེ་དེབ་ཀྱི་རྩོམ་པ་པོ་ཧན་རིག་ཧན་རར་གྱི་རོགས་པ་པི་ཊར་ཨོ་པོ་ཤེ་ནེ་ཏར་དང་། ༡༩༣༦ ལོར་བོད་ནང་རི་འཛེགས་གནང་མཁན་དང་། ས་ཁམས་རིག་པ་བ་ཧར་བེར་ཏེ་ཏི་ཁེ། དུས་རབས་བཅུ་བདུན་ནང་ལྷ་སར་སླེབས་པའི་ཡོ་རོབ་ཀྱི་མི་སྣ་ཐོག་མ་པ་ཏེར་ཇོན་གུ་རུ་བེར་ཏེ་བཅས་ཀྱིས་གཏམ་བཤད་གནང་ཡོད་འདུག

ཉིན་གཅིག་རིང་གི་མཛད་སྒོ་དེར་བོད་ཀྱི་གསོ་རིག་པའི་སྐོར་དང་ཐང་ག འབྲོག་པའི་སྐོར། བཙན་བྱོལ་སྤྱི་ཚོགས་ཀྱི་གནས་སྟངས། བོད་དང་ཨོ་སི་ཊི་རེ་ཡའི་རི་རྒྱུད་ཀྱི་པར་རིས། བོད་ཆོལ་ཁ་གསུམ་གྱི་གྱོན་ཆས་རིགས་སོགས་འགྲེམས་སྟོན་གནང་ཡོད་པར་མ་ཟད། ཧོ་ལན་ཌི་ནས་ཆེད་དུ་ཕེབས་པའི་གཞས་མ་རྣམ་རྒྱལ་ལྷ་མོ་དང་ཟློས་གར་གྱི་གཞས་པ་གཞས་མ། ས་གནས་བོད་རིགས་བཅས་ཀྱིས་རྐང་བྲོ་གླུ་གཞས་གཟིགས་འབུལ་བཅས་གནང་ཡོད་འདུག

ཨོ་སི་ཊི་རེ་ཡའི་བོད་སྐྱོབ་ཚོགས་པ་ནི་ ༡༩༩༤ ལོར་གསར་འཛུགས་གནང་བ་དང་། ཚོགས་པའི་ཚོགས་གཙོ་ཨི་ལེ་ས་བི་ཏ་ཛིམ་མར་མན་ (Elisabeth Zimmermann) ལགས་ཡིན་འདུག ད་ཆར་ཚོགས་པར་ཚོགས་མི་ ༧༠༠ དང་རྒྱབ་སྐྱོར་གནང་མཁན་མི་ ༤༠༠༠ ཙམ་ཡོད་འདུག་ལ། བཙན་བྱོལ་ནང་གི་སློབ་ཕྲུག་༩༠༠ གཙོས་པའི་རྒན་གཞོན་བར་གསུམ་ཁྱོན་མི་ ༡༦༠༠ ལ་རོགས་སྐྱོར་སྦྱིན་བདག་གནང་བཞིན་ཡོད་པར་མ་ཟད། དུས་ནས་དུས་སུ་བོད་ཀྱི་ཆོས་དང་རིག་གཞུང་། ཆབ་སྲིད། ཁོར་ཡུག་སྲུང་སྐྱོབ་བཅས་ཀྱི་སླད་ལས་འགུལ་སྤེལ་གྱི་ཡོད་འདུག

གསར་འགོད་པ། དོན་གོ