དེ་རིང་རྒྱ་གར་དུས་བབ་སྟེང་ཟླ་འདིའི་ཚེས་ ༡༦ ཉིན་གྱི་དགོང་དྲོར་མཚོ་སྣ་རིན་པོ་ཆེ་མཆོག་ལྡི་ལིར་རང་ཤི་བསྐྱོན་ཡོད་པའི་གནས་ཚུལ་འཁོད་འདུག
དེ་རིང་རྒྱ་གར་དུས་བབ་ (Times Of India) དྲ་རྒྱའི་སྟེང་གནས་ཚུལ་ཐོན་པ་ལྟར་ན། ཟླ་འདིའི་ཚེས་ ༡༦ ཉིན་གྱི་དགོང་དྲོར་མཚོ་སྣ་རིན་པོ་ཆེ་མཆོག་ལྡི་ལི་གསར་པའི་ལྷོ་ངོས་ཝ་སན་ཌི་ཁུན་ཇིའི་ (Vasant Kunj) གཟིམ་ཤག་ཏུ་རང་ཤི་བསྐྱོན་ཡོད་པའི་གནས་ཚུལ་བཀོད་འདུག ས་གནས་ཉེན་རྟོག་པས་སྐུ་ཕུང་ལ་བརྟག་ཞིབ་བྱས་པ་བརྒྱུད། ཁོང་གིས་རང་ཤི་བསྐྱོན་པ་ཡིན་ཚུལ་ཕྱིར་བསྒྲགས་བྱས་ཡོད་པ་དང་། རེས་གཟའ་སྤེན་པའི་ཉིན་ཁོང་གི་སྐུ་ཕུང་འབུམ་སྡེ་ལར་གདན་འདྲེན་ཞུས་ཡོད་འདུག
ཁོང་གི་སློབ་མ་ཞིག་གིས་རྒྱ་གར་དུས་བབ་གསར་ཁང་དུ་བརྗོད་པར། ཁོང་གི་སྤུན་མཆེད་ཞིག་ལ་རྒྱ་གར་རྒྱལ་ཡོངས་གྲོས་ཚོགས་འོག་མའི་འོས་བསྡུའི་ཁྲོད། མོན་རྟ་དབང་གི་གྲོས་ཚོགས་འཐུས་མའི་རྒྱལ་ཁ་ཐོབ་མེད་པ་དེར་ཐུགས་འཕམ་བྱུང་སྟེ་རང་ཤི་བསྐྱོན་པ་ཞིག་ཡིན་སྐོར་བརྗོད་འདུག སློབ་མ་གཞན་ཞིག་གིས། ཟླ་འདིའི་ཚེས་ ༢ ཉིན་རིན་པོ་ཆེ་མཆོག་འབུམ་སྡེ་ལ་ནས་ལྡི་ལིར་ཕྱིར་ལོག་གནང་རྗེས། དད་ལྡན་པ་ཚོར་བཀའ་མོལ་མ་གནང་བ་མ་ཟད། འགྱོད་བཤགས་ཀྱི་ཡི་གེ་ཞིག་བྲིས་ཏེ་ཞུགས་ཀྱི་འདུག་ཅེས་བརྗོད་འདུག
ད་ལྟ་ཉེན་རྟོག་པས་ཁོང་གྲོངས་རྐྱེན་གང་ཡིན་ལ་མུ་མཐུད་རྩད་ཞིབ་བྱེད་ཀྱིན་ཡོད་པ་དང་། ཁོང་གི་བཞུགས་ཤག་ནས་རྙེད་སོན་བྱུང་བའི་བོད་ཡིག་ཕྱག་བྲིས་ཤིག་ཡོད་པར་ཁྲིམས་དོན་སྨན་སྦྱོར་གྱི་རྟག་ཐབས་ (forensic examination ) སྤྱད་དེ་བརྟག་དཔྱད་བྱེད་བཞིན་ཡོད་འདུག
མཚོ་སྣ་རིན་པོ་མཆོག་ནི། ༡༩༦༩ ལོའི་ཟླ་ ༨ པའི་ཚེས་ ༡༩ ཉིན་མོན་རྟ་དབང་སྙེ་གསར་རྫོང་པ་མཚོ་གྲོང་ཚོར་སྐུ་འཁྲུངས་ཤིང་། ༧གོང་ས་མཆོག་གིས་མཚོ་སྣ་བ་རྗེ་བཙུན་ཤེས་རབ་བཟང་པོ་མཆོག་གི་སྐུ་ཕྲེང་ ༡༣ པར་ངོས་འཛིན་དང་། འབྲས་སྤུངས་བློ་གསལ་གླིང་ནས་གཞུང་ཆེན་བཀའ་པོད་ལྔར་བསླབ་པ་མཐར་སོན་གནང་སྟེ་དགེ་བཤེས་ལྷ་རམས་པའི་ཕྱག་འཁྱེར་བཞེས་ཡོད་འདུག ཁོང་དུས་རྒྱུན་བོད་དོན་ཐོག་རྒྱབ་སྐྱོར་གནང་མཁན་ཞིག་དང་༧གོང་ས་མཆོག་ལ་དད་གུས་ཆེན་པོ་ཡོད་མཁན་ཞིག་ཡིན་འདུག ༢༠༠༤ ལོར་ཨ་རུ་ན་ཅལ་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་དང་རྒྱ་གར་གྲོས་ཚོགས་འོག་མའི་འཐུས་མི་བཅས་གནང་ཡོད་འདུག
ཁོང་ད་ལྟ་ལྡི་ལིར་ཡོད་པའི་ཤེས་རབ་བཟང་པོ་སྤྱི་ཚོགས་ཞབས་ཞུ་ཁང་གི་འགན་འཛིན་གནང་མུས་ཡིན་པ་དང་། རྒྱ་གར་གྱི་ (Zee) བརྙན་འཕྲིན་ཁང་གི་ཆེད་སྒྲིག་གླེང་མོལ་ (Zee Jagran) བརྒྱུད་ནང་ཆོས་ངོ་སྤྲོད་ཀྱང་གནང་གི་ཡོད་འདུག
གསར་འགོད་པ། དོན་གྲུབ།
ད་ལྟའི་གནས་ཚུལ་འདི་། རང་ལྕེབས་སམ། རང་སྲོག་རང་གིས་བཅད་པ་ཡིན་ན། སེམས་ཤུགས་ཆེ་དྲགས་ནས་བྱུང་བ་ཡིན་ནམ། ཡང་ན། སེམས་པ་ཆུང་དྲགས་ནས་བྱུང་བ་རེད། ཡིད་ཆེས་དཀ་བའི་གནས་སུ་གྱར་མི་འདུག་གམ། ལགས།
མཐོ་དམན་སུ་ཡིན་ཡང་རྒྱ་གར་ནག་གི་བར་ནས་ལ་དྭགས་དང་མོན་རྟ་དབང་དགེ་བའི་ལམ་ལ་འཁྲིད་སྐབས་འགྲོ་ཤེས་འདུག་ཤེས་བྱེད་དགོས་ཀྱི་འདུག་དྲན་གྱིན་མི་འདུག་གམ།
མཚོ་སྣ་རིན་པོ་ཆེ་རང་ཤི་བརྒྱབ་ཚུལ་དང་དེའི་བདེན་དཔང་ལྟ་བུར་ཁོང་གི་སྐུ་འཁོར་དང་སློབ་མ་དྲུད་ཡོང་རྒྱུ་ཡོད་པ་འདི་ལ་བལྟས་ན་འདི་རྒྱ་གར་ནག་གང་གིས་བྱས་པ་ཚོད་དཔག་བྱེད་བདེ་བ་ཞིག་རེད། འོན་ཀྱང་ཉམས་ཆུང་རྟ་དབང་བས་ཅི་བྱེད་ཐུབ། རྒྱ་གར་བས་གནམ་ལ་འཕུར་བ་རེད་ཟེར་ན་ས་ལ་འཛུལ་བ་རེད་ཟེར་ན་རྒོལ་ལན་སློང་མཁན་ཞིག་ཡིད་ནི་མ་རེད། ཤུ་རེ་ཀོ བོད་རང་བཙན་ཞིག་ཡོད་ན་དོན་དག་འདི་གསལ་བོ་ཞིག་བཟོ་རྒྱུ་ཡོད་པ་རེད།
ད་ཡིན་ན་སྤྲུལ་སྐུས་ཀྱང་རང་ཤི་རྒྱག་པའི་དུས་ལ་སླེབས་འདུག
དོན་དངོས་ག་རེ་ཡིན་མིན་བཤད་དཀའ་གི་ཡ།
མཚོ་སྣ་རིན་པོ་ཆེ་ནི། ཧི་མ་ལ་ཡ་རི་བརྒྱུད་ཁུལ་དུ་སོ་སོ་མི་རིགས་ཀྱི་སྐད་ཡིག་རིག་གནས་སྲུང་སྐྱོབ་དང་བདག་དབང་ཐད་ཤུགས་རྒྱག་མཁན་གཙོ་བོའི་གྲས་ཤིག་རེད། ཁོང་གིས་སོ་སོའི་མི་རིགས་སྐད་ཡིག་(བོད་ཡིག)དེ་རྒྱ་གར་གཞུང་ཡིག་ཏུ་ངོས་ལེན་ཡོང་ཐབས་ཐད། གོང་རིམ་ལ་རེ་སྐུལ་དང་ཞུ་འབོད། ངོ་རྒོལ་བཅས་སྔ་ཕྱིར་གནང་མྱོང་ཡོད་པ་རེད།
ང་འཛམ་གླིང་གི་གནའ་བོའི་རིག་གནས་རྒྱལ་ཁབ་ཏུ་གྲགས་པ་འདི་དག་གི་ཆབ་སྲིད་ཀྱིས་ཧད་འཇུག་གི་འདུག མི་རིགས་རིག་གནས་དང་མི་རིགས་རང་སྐྱོང་ནི། དེང་གི་༼རྒྱལ་ཁབ་༽ཟེར་བའི་ཆབ་སྲིད་དབང་སྒྱུར་གྱི་སྒྲོམ་གཞི་འདིའི་གྲོད་པའི་ནང་གི་སྐྲན་དུ་ངོས་འཛིན་བྱེད་ཀྱིན་ཡོད་དམ། དོག་སློང་དང་བསམ་གཞིགས་མང་པོ་ཞིག་གིས་ང་ནི་མུན་པར་སྦང་བའི་བྱེའུ་ཆུང་ཞིག་དང་འདྲ་བར་འདར་སིག་རྒྱག་གིན་བཅུག་བྱུང་། རི་བོ་གངས་ཅན་གྱི་ཚུར་འདབས་ཕར་རྒྱབ་གཉིས་ཆ་ནས། མི་རིགས་དང་སྐད་ཡིག་རིག་གནས་ཆེད་འདུར་རྒྱུགས་བྱེད་མཁན་སྐྱེས་བུ་མང་པོ་ཞིག སྔ་ཕྱིར་མང་ཚོགས་ཀྱི་སེམས་ཁོང་ནས་ཚ་རེག་དང་བཅས་བལ་ཏེ། གློ་བུར་གློ་བུར་དུ། ཁ་ཁུ་སིམ་སིམ་གྱིས། གཏན་དུ་བཞུད་སོང་། ད་དུང་ག་ཚོད་ཅིག་བཞུད་དགོས་སམ།
དེ་རིང་ཡང་། ༼གསར་གཏོད་ཀྱི་སྙིང་སྟོབས་མེད་ན་དྲང་བདེན་ཟེར་བ་མེད་ལ། རྒྱུ་འབྲས་ཟེར་བའང་སྐྱག་རྫུན་རེད།༽ ཅེས་པའི་ཤ་དར་ཁྲག་དར་གྱི་སྐྱེས་བུ་ཞིག་གི་གཏམ་དྲན་དུ་བཅུགས་སོང་།
མཚོ་སྣ་རིན་པོ་ཆེ་གནས་ཚུལ་དེ་འདྲའི་འོག་སྐུ་འདས་ཟིན་པ་རེད། ནང་ཆོས་སྦྱངས་ཡོད་མེད་གང་ལྟར་ཀྱང་གནད་དོན་དེ་འདྲའི་ཐད་ལ་རང་ཤི་མི་བྱེད་པ་ཁོང་གིས་ད་བར་དུ་ཆོས་སྲིད་ཀྱི་ལས་ཀ་མང་པོ་བྱས་པ་དེས་ཤེས་ཐུབ་གི་སྙམ། ཆབ་སྲིད་པ་ཞིག་ཡིན་ནའང་གནད་དེ་འདྲའི་ཐད་པ་བྱ་སྤྱོད་འདི་འདྲ་སྤེལ་མི་སྲིད་ལ། གལ་སྲིད་ཡིན་ཀྱང་གནས་དུས་འདིའི་འདྲའི་དུས་སྐབས་སུ་རང་ཤི་མི་རྒྱག་པར་ཡིད་ཆེས་ཡོད།
ད་གང་ལྟར་ང་ཚོར་བསྒྲགས་པ་ནི་རང་ཤི་བརྒྱབས་པ་དང་། དེ་ཡང་གནད་དོན་དེ་འདྲ་བཤད་ན་རིན་ཐང་མེད་པ་ཞིག་གི་ཕྱིར་དུ་རིན་པོ་ཆེའི་འདས་རྐྱེན་ཕྱིར་བསྒྲགས་བྱས་པ་རེད།
ཨ་རུ་ན་ཅལ་མངའ་སྡེ་བྻོན་ཆེན་རིན་མཁའ་འགྲོ་ཡང་དེ་ལྟ་དེ་ལྟར་སྐུ་འདས་པ་དང་། དེ་ལྟ་དེ་ལྟར་ཁུ་སུམ་མེར་འཇམ་ཐང་ངེར་གྱུར་བ་རེད་ལ། མཚོ་སྣ་རིན་པོ་མཆོག་ཀྱང་དེ་ལྟ་དེ་ལྟར་སྐུ་གཤེགས་པ་དང་དེ་ལྟ་དེ་ལྟར་ཁུ་སུམ་མེར་འགྱུར་རྒྱུ་ཐབས་གཞན་ཅི་ཡོད།
དོན་ལ་རྒྱ་དཀར་གཉིས་ཀྱི་ཁ་རྩ་ན་གྲངས་ཉུང་མི་རིགས་ཀྱི་གནད་དོན་ནི་དེ་ལྟ་དེ་ལྟར་མ་རེད་དམ།
ཨ་རུ་ན་ཅལ་ཕྱོགས་ནས་བློན་ཆེན་འདས་པོ་རྡོ་རྗེ་མཁའ་འགྲོ་ལྟ་བུ་དང་མཚོ་སྣ་རིན་པོ་ལྟ་བུ་ཉིས་ལྡབ་སུམ་ལྡབ་ཀྱིས་འཐོན་ཡོང་བར་སྨོན། དེ་ཡང་ས་གནས་མི་དམངས་ཀྱི་དམངས་གཙོ་དང་འགྲོ་མིའི་ཐོབ་ཐང་རྩོད་ལེན་གྱི་ཕྱིར་དུ་འཐོན་ཡོང་བར་སྨོན།
བླ་མ་མཚོ་སྣ་རིན་པོ་ཆེ་སྐུ་གཤེགས་པར་མྱ་ངན་གུས་དུད་དང་། ཡང་སྲིད་མྱུར་དུ་བྱོན་ཏེ་མཛད་འཕྲིན་གྱི་འཕྲོ་མུ་ནས་མུར་བསྐྱང་རྒྱུ་སྐྱབས་འཇུག་སྙིང་ནས་ཞུ་ཞུ་ཞུ།
༡ རང་ཤི་བརྒྱབ་པ་ཡིན་ཚེ། ནང་ཆོས་སློབ་གཉེར་གནང་མཁན་ཚོའི་སེམས་ཁམས་ལ་ནང་ཆོས་ཀྱིས་ཕན་གྱི་ཡོད་མེད་དོགས་གནས་མ་རེད་དམ།
༢ ཨ་རུ་ན་ཆལ་ནས་ཡིན་མཁན་གྱི་སྲིད་དོན་པ་དག་ཅིའི་ཕྱིར་གཅིག་རྗེས་གཉིས་མཐུད་ཀྱིས་གྲོངས་བཞིན་ཡོད་དམ།
༣ རྒྱ་ནག་གཞུང་གིས་དོན་རྐྱེན་འདི་དག་ལ་ཁ་གཡར་ནས་རྒྱ་གར་ལ་དམག་རྒྱག་སྲིད་དམ།
ཨ་ཁ །སྤྲུལ་ཞིག་ཡིན་པ་དང་ནང་ཆོས་ལ་སློབ་སྦྱོང་དེ་འདྲ་བྱས་ནའང་ད་དུང་རང་ཤི་རྒྱབ་པ་ནི་ངོ་གནོངས་དགོས་པ་ཞིག་རེད་།མི་ཕལ་པ་ཞིག་གིས་ལས་རང་བྱས་འདུག།སྤྲུལ་མིང་པ་ཡོངས་ལ་སློབ་བྱ་ཞིག་རེད་མི་འདུག་གམ
་་་་་་་་ ས་གནས་ཉེན་རྟོག་པས་སྐུ་ཕུང་ལ་བརྟག་ཞིབ་བྱས་པ་བརྒྱུད། ཁོང་གིས་རང་ཤི་བསྐྱོན་པ་ཡིན་ཚུལ་ཕྱིར་བསྒྲགས་བྱས་ཡོད་པ་དང་། རེས་གཟའ་སྤེན་པའི་ཉིན་ཁོང་གི་སྐུ་ཕུང་འབུམ་སྡེ་ལར་གདན་འདྲེན་ཞུས་ཡོད་འདུག ་་་་་་་་་
ཨ་ཁ་དེ་འདྲ་རང་ཡིན་རྒྱུ་མ་རེད་གང་ལྟར་ཡིན་ཡང་ཁོང་དགོང་པ་རྫོགས་པ་འཕངས་པོ་རེད།