ཁ་སང་ཨེ་ཤ་ཡའི་ཚོགས་ཆེན་ཞིག་གི་ཐོག་རྒྱ་ནག་ཨུ་རུ་སུའི་སྲིད་འཛིན་རྣམ་གཉིས་ཐུག་འཕྲད་བྱས་ཏེ་ཚོང་འབྲེལ་དང་དམག་དོན་སྐོར་གྱི་གྲོས་མཐུན་མང་པོ་ཞིག་ལ་མིང་རྟགས་བཀོད་པའི་ཐད་རྒྱལ་སྤྱིའི་ཐོག་དོ་སྣང་ཆེན་པོ་བྱས་ཡོད།
ཁ་སང་དེ་རིང་ཉིན་གཉིས་རིང་རྒྱ་ནག་གི་གྲོང་ཁྱེར་ཧྲེང་ཧེ་རུ་ཨེ་ཤ་ཡའི་འབྲེལ་ལམ་དང་བརྟན་བརླིང་གི་ཚོགས་ཆེན་ཐེངས་བཞི་པ་ཞེས་པ་ཞིག་ཚོགས་ཡོད་ཅིང་། སྐབས་དེར་ཨུ་རུ་སུའི་སྲིད་འཛིན་པུ་ཊིན་དང་རྒྱ་ནག་གི་སྲིད་འཛིན་ཞི་ཅིན་ཕིན་གཉིས་ཐུག་འཕྲད་བྱས་ཏེ། རྒྱལ་ཁབ་གཉིས་ཀྱི་ཕྱི་འབྲེལ་དང་དམག་དོན། བར་སྣང་འཚོལ་ཞིབ། བརྡ་འཕྲིན། མཚོན་ཆ། འཛུགས་སྐྲུན་སོགས་ཚོང་དོན་གྲོས་མཐུན་དོན་ཚན་ ༤༩ ཙམ་ལ་མིང་རྟགས་བཀོད་ཡོད་འདུག འོན་ཀྱང་། ཨུ་རུ་སུ་ནས་རྒྱ་ནག་ལ་སོལ་རླངས་ནང་འདྲེན་བྱེད་རྒྱུའི་ཚོང་དོན་ཨ་སྒོར་ཐེར་འབུམ་ ༤༠༠ ཙམ་གྱི་ཚོང་དོན་ལ་མིང་རྟགས་བཀོད་ཐུབ་མི་འདུག
སྲིད་འཛིན་གཉིས་ཐུན་མོང་ཐོག་གསལ་བསྒྲགས་ཤིག་སྤེལ་བའི་ནང་། དེང་སྐབས་རྒྱལ་ཁབ་ཁག་གི་དྲ་ཚིགས་བདེ་འཇགས་ལ་ཁྲིམས་འགལ་ཐོག་འཇབ་རྒོལ་དང་ལྐོག་འཛུལ་སོགས་ཀྱི་གནས་ཚུལ་འབྱུང་བཞིན་ཡོད་སྟབས། རྒྱལ་ཁབ་ཀྱི་བདག་དབང་དང་མི་སྒེར་གྱི་ཁེ་དབང་ལ་དོ་ཕོག་འགྲོ་རྒྱུའི་སེམས་འཚབ་ཡོད་སྐོར་དང་། རྒྱལ་ཁབ་གཞན་གྱི་སྲིད་གཞུང་ལ་འགྱུར་བ་གཏོང་བའི་དམིགས་འབེན་འོག་ཕྱོགས་གཅིག་ཁོ་ནས་དཔལ་འབྱོར་ཉེས་ཆེད་གཏོང་བའི་བྱེད་སྟངས་འདོར་དགོས་ཚུལ། ཡུའུ་ཁུ་རེན་གྱི་ཛ་དྲག་དཀའ་རྙོག་དེ་ནང་ཁུལ་གྱི་དཀའ་རྙོག་ཅིག་ཡིན་སྟབས་ཕྱོགས་ཚང་མས་ཞི་འཇགས་དང་གྲོས་མོལ་བརྒྱུད་སེལ་ཐབས་བྱ་དགོས་སྐོར་སོགས་བརྗོད་འདུག
གསར་འགོད་གསལ་བསྒྲགས་སྟེང་སྲིད་འཛིན་ཞི་ཅིན་ཕིན་གྱིས་རྒྱ་ནག་དང་ཨུ་རུ་སུའི་བར་མཐུན་ཕྱོགས་ཀྱི་ཆ་རྐྱེན་གང་མང་ཡོད་སྟབས། ང་ཚོས་དམག་དོན་ཐབས་ཇུས་དང་དཔལ་འབྱོར་ཚོང་ལས་ཀྱི་ཐོག་ནས་མཉམ་འབྲེལ་བྱས་ཏེ་རྒྱལ་ཁབ་གཉིས་ཀྱི་སྟོབས་ཤུགས་ཡར་རྒྱས་དང་རྒྱལ་སྤྱིའི་ནང་འགྲན་བསྡུར་བྱ་རྒྱུ་ཡིན་ཞེས་བརྗོད་པ་དང་། དེ་བཞིན་སྲིད་འཛིན་པུ་ཊིན་གྱིས་ཀྱང་རྒྱ་ནག་ནི་ཡིད་ཆེས་བློས་འགེལ་ཆོག་པའི་ཨུ་རུ་སུའི་གྲོགས་པོ་ཞིག་ཡིན་པ་དང་། རྒྱལ་ཁབ་གཉིས་བར་དམག་དོན་གཙོས་བདེ་སྲུང་ཐད་མཉམ་འབྲེལ་བྱས་ན་འཛམ་གླིང་དང་ས་ཁུལ་རིམ་པའི་ཞི་བདེ་དང་བརྟན་བརླིང་ལ་སྲུང་སྐྱོབ་ཐུབ་ཀྱི་ཡོད་སྐོར་བརྗོད་འདུག
ཐེངས་འདིར་ཨུ་རུ་སུ་དང་རྒྱ་ནག་གི་དམག་དོན་གྲོས་ཆོད་ནང་། འབྱུང་འགྱུར་ཤར་རྒྱ་ནག་རྒྱ་མཚོའི་ནང་ཉི་ཧོང་གི་བདག་དབང་འོག་ཡོད་པའི་རྩོད་གཞི་ཅན་གྱི་གླིང་ཕྲན་སན་ཁད་ཁེ་ (Senkake) ཡི་ཉེ་འཁོར་དུ་རྒྱལ་ཁབ་གཉིས་ཀྱི་མཚོ་དམག་གིས་དམག་གྲུ་ ༡༤ དང་མཚོ་འོག་གྲུ་གཟིངས་ ༢ ། འཐབ་འཁྲུག་གནམ་གྲུ་ ༡༥ ཙམ་བེད་སྤྱོད་བཏང་སྟེ་དམག་སྦྱོང་བྱ་རྒྱུ་ཡིན་པ་འཁོད་ཡོད་འདུག འདིའི་ཐད་དམག་ཇུས་དབྱེ་ཞིབ་པ་རོབ་སི་ལན་ (Suslan Pukhov) ལགས་ཀྱིས་གསར་འགོད་པར། དམག་འཁྲུག་ལྟ་བུའི་རྩེད་མོ་འདིའི་ནང་རྒྱ་ནག་ལ་ཁེ་ཕན་ཆེ་བ་ཡོད་ཀྱང་། ནུབ་ཕྱོགས་རྒྱལ་ཁབ་ཚོས་ཡུའུ་ཁུ་རེན་གྱི་གནད་དོན་ཐོག་ནས་ཨུ་རུ་སུ་འཛམ་གླིང་ཐོག་ཁེར་རྐྱང་བཟོས་ཡོད་སྟབས་ཨུ་རུ་སུས་ཁས་ལེན་བྱེད་དགོས་ཆགས་ཡོད་ཅེས་བརྗོད་འདུག
རྒྱལ་སྤྱིའི་གསར་ལམ་ཁག་ཏུ། ཨུ་རུ་སུ་དང་རྒྱ་ནག་བར་སོལ་རླངས་ཚོང་འབྲེལ་སྐོར་ལ། ཨ་རི་གཙོས་ཡུ་རོབ་རྒྱལ་ཁབ་ཚོས་ཡུའུ་ཁུ་རེན་གྱི་གནད་དོན་དང་འབྲེལ་ཏེ་ཨུ་རུ་སུར་དཔལ་འབྱོར་ཉེས་ཆད་ཆེན་པོ་བཏང་ཡོད་པ་དང་། རྒྱལ་སྤྱིའི་དངུལ་ཁང་གིས་ཚོད་དཔག་བྱས་པ་ལྟར་ན་ ༢༠༡༤ ལོར་ཨུ་རུ་སུའི་དཔལ་འབྱོར་ཡར་རྒྱས་བརྒྱ་ཆའི་ ༠.༢ ཡིན་སྟབས་ཨུ་རུ་སུའི་དཔལ་འབྱོར་ཉམས་རྒུད་དུ་འགྲོ་བཞིན་པའི་སྐབས་འདིར། སྐུ་ཞབས་པུ་ཊིན་གྱིས་རྒྱ་ནག་གི་སོལ་རླངས་གོང་ཚད་ལྟར་སོལ་རླངས་ཚོང་ལས་གྲོས་གཞིར་མིང་རྟགས་འགོད་སྲིད་སྐོར་དང་། ཡང་ཁག་ཅིག་གིས་རྒྱ་ནག་ལ་དཀྱིལ་ཤར་ཨེ་ཤ་ཡའི་རྒྱལ་ཁབ་ཁག་ནས་དབོར་འདྲེན་བྱས་པའི་སོལ་རླངས་ཀྱིས་ ༢༠༢༠ ལོའི་བར་འདང་གི་ཡོད་སྟབས། ཨུ་རུ་སུས་བསམ་ཤེས་མ་བྱས་ཚེ་རྒྱ་ནག་གིས་ཨུ་རུ་སུ་མཉམ་དུ་སོལ་རླངས་ཚོང་ལས་གྲོས་ཆོད་ལ་མིང་རྟགས་འགོད་རྒྱུར་འདོད་པ་མེད་སྐོར་བརྗོད་འདུག
ཉེ་ལམ་རྒྱ་ནག་གིས་ཝེ་ཋི་ནམ་དང་ཧྥི་ལི་ཕིན་གཉིས་མཉམ་དུ་རྩོད་རྙོག་ཡོད་པའི་ལྷོ་རྒྱ་ནག་རྒྱ་མཚོའི་ནང་རྡོ་སྣུམ་སྔོག་འདོན་དང་མཚོ་ངོས་རྒྱ་སྐྱེད་བྱས་པར་ཨ་རི་གཙོས་ནུབ་ཕྱོགས་རྒྱལ་ཁབ་ཁག་གིས་སྐྱོན་བརྗོད་ཤུགས་ཆེན་བྱས་སྐབས། སྲིད་འཛིན་པུ་ཊིན་གྱིས་གོ་སྐབས་བཟུང་སྟེ་རྒྱ་ནག་དང་མཉམ་དུ་ཕྱི་སྲིད་དང་དམག་དོན། ཚོང་ལས་ཀྱི་འབྲེལ་ལམ་བཙུགས་པ་དང་། ཡུའུ་ཁུ་རེན་གྱི་གནད་དོན་ལ་རྒྱ་ནག་གིས་རྒྱབ་རོགས་འཚོལ་ཐབས་དང་། ལྷག་པར་དུ་ཨེ་ཤ་ཡའི་ནང་སོལ་རླངས་གི་ཁྲོམ་རྭ་རྒྱ་སྐྱེད་གཏོང་ཐབས་བྱེད་ཀྱི་ཡོད་འདུག
ཟླ་འདིའི་ཚེས་ ༡༩ ཉིན་སྲིད་འཛིན་པུ་ཊིན་གྱིས་ཡུའུ་ཁུ་རེན་ཤར་ཕྱོགས་ས་མཚམས་སུ་ཡོད་པའི་ཨུ་རུ་སུའི་དམག་དཔུང་གིས་དཔྱིད་དུས་དམག་སྦྱོང་བྱེད་པའི་དུས་ཡུན་རྫོགས་ཟིན་སྟབས། དམག་དཔུང་ཕྱིར་ལོག་དགོས་པའི་གསལ་བསྒྲགས་སྤེལ་ཡང་ནུབ་ཕྱོགས་རྒྱལ་ཁབ་ཚོས་རྣམ་འགྱུར་གང་ཡང་མ་བསྟན་པ་མ་ཟད། གྱེན་ལོག་པ་ཚོས་བཙན་བཟུང་བྱས་པའི་གྲོང་ཁྱེར་ཁག་སྲིད་གཞུང་ལ་རྩིས་སྤྲོད་དགོས་པའི་འབོད་སྐུལ་བྱས་དང་བྱེད་བཞིན་ཡོད་འདུག
ཉིན་འགའི་སྔོན་གྱེན་ལོག་པ་ཚོས་ཤར་ཕྱོགས་གྲོང་ཁྱེར་ཊོབ་ནེ་ཌི་སི་ཁུ་ (Donetsk) དང་ལོ་ཧན་སི་ཁུ་ (Lugansk)བཅས་ཀྱི་མང་ཚོགས་ཀྱིས་མང་མོས་འོས་བསྡུ་བརྒྱུད་རང་སྐྱོང་མངའ་ཁུལ་ཡིན་པར་བསྒྲགས་ཡོད་ཅིང་། ནུབ་ཕྱོགས་རྒྱལ་ཁབ་ཁག་གིས་གནད་དོན་དེའི་རྒྱབ་ཏུ་ཨུ་རུ་སུ་ཡོད་པའི་སྐྱོན་འཛུགས་བྱེད་བཞིན་ཡོད།
གསར་འགོད་པ། ལྷ་སྐྱབས་རྒྱལ།
