དམིཊ་བསལ་ཐོངས་མཆན་སྤྲད་པ་དེ་བརྩི་བཀུར་བྱས་པ་ཡིན་ཟེར།

ཁ་སང་རྒྱ་ནག་གི་ཕྱི་སྲིད་བློན་ཆེན་གྱིས་རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་མཆོག་ལ་མཇལ་འཕྲད་བྱས་ཏེ་རྒྱ་དཀར་ནག་གཉིས་ཀྱི་དཀའ་རྙོག་དང་ཚོང་དོན་སྐོར་ལ་གྲོས་མོལ་བྱས་ཡོད་འདུག

རྒྱ་ནག་གི་ཕྱི་སྲིད་བློན་ཆེན་ཝང་ཡིས་ཟླ་འདིའི་ཚེས་ ༨ དང་ ༩ ཉིན་གཉིས་རིང་རྒྱ་གར་ནང་གཟིགས་སྐོར་བྱས་ཡོད་པ་ལྟར། ཁ་སང་རྒྱ་གར་སྲིད་བློན་ནཱ་རེན་ཌ་མུ་དྷེ་མཆོག་དང་དུས་ཡུན་སྐར་མ་ ༤༥ རིང་མཇལ་འཕྲད་བྱས་ཏེ་ཚོང་དོན་གཙོས་རྒྱ་དཀར་ནག་གི་ས་མཚམས་དཀའ་རྙོག་དང་། ཨ་རུ་ན་ཅལ་དང་ཇམ་མུ་ཀ་ཤི་མེར་ཀྱི་མི་རིགས་ཚོར་དམིགས་བསལ་མཐོང་ཆེན་སྤྲོད་ཕྱོགས། རིག་གཞུང་བརྗེ་ལེན། ཡུལ་སྐོར་སྤྲོ་འཆམ་སོགས་ཀྱི་སྐོར་ལ་གྲོས་བསྡུར་བྱས་ཡོད་འདུག

ནཱ་རེན་ཌ་མུ་དྷེ་མཆོག་གིས། “ ཕྲན་ནི་རྒྱ་ནག་གྲོགས་པོར་ངོས་འཛིན་བྱེད་མཁན་ཞིག་ཡིན་པ་མ་ཟད། རྒྱ་ནག་གི་དཔལ་འབྱོར་འཕེལ་རྒྱས་འགྲོ་བཞིན་ཡོད་པར་དགའ་གུས་ཡི་རངས་བྱེད་མཁན་ཞིག་ཀྱང་ཡིན་སྟབས། ངས་རྒྱ་ནག་དང་ཡིད་ཆེས་འཕེར་ངེས་ཀྱི་མཉམ་ལས་བྱས་ཏེ་རྒྱལ་སྤྱིའི་སྤྱི་ཚོགས་ཀྱིས་ཡིད་ཆེས་དང་གདེང་འཇོག་འཐོབ་པ་བྱ་རྒྱུ་ཡིན།”ཞེས་དང་། ད་དུང་ཁོང་གིས་རྒྱལ་ཁབ་གཉིས་པོས་ས་མཚམས་ཀྱི་བརྟན་བརླིང་སྲུང་སྐྱོབ་བྱས་ཏེ། ཡུན་རིང་བདེ་འཁོད་ཀྱི་གཉིས་ཕན་མཉམ་རྒྱལ་གྱི་འབྲེལ་ལམ་ཞིག་གསར་འཛུགས་ཐུབ་པ་བྱ་རྒྱུ་ཡིན་སྐོར་སོགས་བརྗོད་འདུག

རྒྱ་ནག་ཕྱི་སྲིད་བློན་ཆེན་ཝང་ཡིས། “ རྒྱ་ནག་གཞུང་གིས་རྒྱ་གར་དང་ས་མཚམས་རྩོད་རྙོག་འགྲིག་འཇགས་དང་འབྲེལ། རྒྱལ་ཁབ་གཉིས་ཀྱི་འབྲེལ་ལམ་གོང་མཐོར་གཏོང་ཐུབ་པ་བྱས་ཏེ། དཔལ་འབྱོར་འཕེལ་རྒྱས་དང་རྒྱལ་ཁབ་འཛུགས་སྐྲུན་བྱ་རྒྱུ་ཡིན།” ཞེས་དང་། རྒྱ་ནག་གཞུང་གིས་ཨ་རུ་ན་ཅལ་དང་། ཇམ་མུ་ཀ་ཤི་མེར་ཀྱི་མི་རིགས་ཚོར་དམིགས་བསལ་མཐོང་ཆེན་ལག་འཁྱེར་སྤྲོད་དོན་ནི། ཁོ་ཚོར་གུས་བཀུར་དང་བརྩི་མཐོང་ཞུ་ཆེད་སྤྲད་པ་ཞིག་ཡིན་པ་ལས་རྒྱ་གར་གྱི་བདག་དབང་གནད་དོན་ལ་ཐེ་ཇུས་བྱས་པ་ཞིག་མིན་སྐོར་བརྗོད་འདུག

ནཱ་རེན་ཌ་མུ་དྷེ་མཆོག་གིས་ ༢༠༠༡ ལོའི་ཟླ་ ༡༠ པའི་ཚེས་ ༧ ནས་ ༢༠༡༤ ལོའི་ཟླ་ ༥ པའི་ཚེས་ ༢༡ ཉིན་བར། རྒྱ་གར་གྷོ་ཆུ་ར་ཌེ་མངའ་སྡེའི་བློན་ཆེན་གནང་སྐབས། རྒྱ་ནག་ནང་སྐོར་སྐྱོད་ཐེངས་བཞི་ཙམ་བྱས་ཡོད་པ་དང་། རྒྱ་ནག་གི་ཁེ་ལས་ ༤༥ ལྷག་མངའ་སྡེའི་ནང་གསར་འཛུགས་དང་། རྒྱ་གར་གྱི་ཐོན་ཁུངས་རྒྱ་ནག་ནང་ཕྱིར་ཚོང་སོགས་བྱས་ཏེ་མངའ་སྡེའི་གཞུང་དང་རྒྱ་ནག་གི་ཁེ་ལས་བར་ལོ་རེར་ཨ་སྒོར་ཐེར་འབུམ་ ༡༤།༧༨ ལྷག་གིས་ཚོང་འབྲེལ་བྱེད་བཞིན་ཡོད་ལ། གྷུ་ཆུ་ར་ཌེ་ནི་རྒྱ་ནག་གིས་མ་འཇོག་ཤུགས་ཆེ་ཤོས་བྱེད་ཡུལ་གྱི་མངའ་སྡེ་ཞིག་ཀྱང་ཆགས་ཡོད་འདུག

ཟླ་འདིའི་ཟླ་མཇུག་ཏུ་རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་མཆོག་འབྲུག་ཡུལ་དང་། དེའི་རྗེས་ཉི་ཧོང་ནང་གཟིགས་སྐོར་གནང་འཆར་ཡོད་པ་དང་། ཟླ་རྗེས་མར་བྷར་ཛིལ་ནང་ཚོགས་གཏན་འཁེལ་བའི་ཡར་རྒྱས་འགྲོ་བཞིན་པའི་རྒྱལ་ཁབ་བྷིར་ཛལ་དང་ཨུ་རུ་སུ། རྒྱ་གར། རྒྱ་ནག ལྷོ་ཨ་ཧྥི་རི་ཀ་ (BRICS ) བཅས་ཀྱི་མཉམ་འབྲེལ་ཚོགས་འདུར་བསྐྱོད་དེ། རྒྱ་ནག་གི་སྲིད་འཛིན་ཞི་ཅིན་ཕིན་དང་ཐུག་འཕྲད་ཀྱིས་རྒྱལ་ཁབ་གཉིས་ཀྱི་འབྲེལ་ལམ་གོང་མཐོར་གཏོང་ཐབས་སྐོར་ལ་གོ་བསྡུར་གནང་རྒྱུ་ཡིན་འདུག

ཟླ་འདིའི་ཚེས་ ༢༨ ཉིན་རྒྱ་གར་གྱི་སྲིད་འཛིན་པཱར་ནཱབ་མུ་ཁཱ་ཇཱི་ (Pranab Mukherjee) མཆོག་ ༡༩༥༤ ལོར་རྒྱ་གར་གྱི་སྲིད་བློན་ནེ་རུ་དང་། རྒྱ་ནག་གི་སྲིད་བློན་ཀྲའུ་ཨིན་ལེ་གཉིས་བར་གྲོས་མཐུན་དོན་ཚན་ལྔ་བཞག་སྟེ་ལོ་ངོ་ ༦༠ འཁོར་བའི་དུས་དྲན་མཛད་སྒོར་རྒྱ་ནག་པེ་ཅིན་དུ་ཕེབས་རྒྱུ་ཡིན་པ་དང་། ཟླ་ ༩ པའི་ནང་རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་གར་ལ་གཟིགས་སྐོར་གནང་འཆར་ཡོད་འདུག

གསར་འགོད་པ། དོན་གྲུབ།