ཧི་མ་ལ་ཡའི་རི་རྒྱུད་སྤྱི་དང་ལ་དྭགས་པ་ཚོ་བཀའ་དྲིན་ཆེན་པོ་ཡིན།

ཁ་སང་༧གོང་ས་མཆོག་གིས་ལ་དྭགས་ཞི་བའི་ཚལ་ཕོ་བྲང་དུ་བཀའ་སློབ་གནང་སྟེ། བོད་མི་ཚོ་བཙན་བྱོལ་དུ་འབྱོར་ནས་དུས་ཚོད་ཁག་པོ་ཡོད་སྐབས་བོད་ནས་གྲྭ་རྒྱུན་ཡོང་རྒྱུ་མེད་པ་དང་། བྷག་སར་ཡོད་པའི་དགེ་འདུན་པ་བགྲེས་པ་རྣམས་རིམ་པས་རྫོགས་འགྲོ་སྐབས། སློབ་གཉེར་གྱི་རྐང་འཛིན་མཁན་དེ་ཧི་མ་ལ་ཡའི་རི་རྒྱུད་སྤྱི་དང་ལྷག་པར་ཁྱེད་རང་ཚོ་ལ་དྭགས་པ་རྣམས་ཧ་ཅང་དྲིན་ཆེན་པོ་ཡིན་ཞེས་གསུངས།

ཁ་སང་ཕྱི་ཚེས་ ༡༧ ཉིན་གྱི་སྔ་དྲོར་༸གོང་ས་མཆོག་གིས་བདུན་ཕྲག་གཅིག་ཙམ་གྱི་རིང་གི་ཨི་ཊ་ལིའི་མཛད་འཕྲིན་ཁག་ལེག་པར་གྲུབ་ཏེ། ལ་དྭགས་ཀྱི་རྒྱལ་ས་སླེ་རུ་ཡོད་པའི་བ་ཀུ་ལ་ (Kushok Bakula Rinpoche Terminal ) གནམ་ཐང་དུ་ཞབས་སོར་འཁོད་ཡོད་པ་དང་། གནམ་ཐང་དུ་དགའ་ལྡན་ཁྲི་པ་རི་རྫོང་རིན་པོ་ཆེ་མཆོག་དང་། ལ་དྭགས་ས་གནས་གྲོས་ཚོགས་འཐུས་མི་སྐུ་ཞབས་ཐུབ་བསྟན་ཚེ་དབང་ལགས། བརྩེ་སྤྲུལ་རིན་པོ་ཆེ་མཆོག མངའ་སྡེའི་བློན་ཆེན་རིག་འཛིན་མཛོ་རྭ་ལགས། ས་གནས་ཀྱི་གནད་ཡོད་མི་སྣ། དེ་བཞིན་ལ་དྭགས་ནང་པའི་ཆོས་ཚོགས་དང་། ལ་དྭགས་རིག་གཞུང་ཡར་རྒྱས་ཚོགས་པའི་ཚོགས་གཙོ། ལ་སྤྱི། དུས་འཁོར་དབང་ཆེན་གོ་སྒྲིག་ཚོགས་ཆུང་གི་ཚོགས་གཙོ་དང་ཚོགས་མི། ས་གནས་ཀྱི་མཁན་པོ་བླ་སྤྲུལ་བཅས་ཀྱིས་ཕེབས་བསུའི་ཁྲོད་ཞི་བའི་ཚལ་གྱི་ཕོ་བྲང་དུ་ཆིབས་བསྒྱུར་བསྐྱངས་ཡོད་འདུག

ཞི་བའི་ཚལ་ཕོ་བྲང་དུ་དགའ་ལྡན་ཁྲི་རིན་པོ་ཆེ་མཆོག་གིས་མནྜལ་རྟེན་གསུམ་འདེགས་འབུལ་ཞུས་རྗེས་༧གོང་ས་མཆོག་གིས། ལ་དྭགས་ཁུལ་གྱི་ཆོས་གྲོགས་ཡོངས་ལ་འཚམས་འདྲི་ཡོད། གཙོ་ཆེ་ཤོས་དགའ་ལྡན་ཁྲི་རིན་པོ་ཆེ་མཆོག་འདི་གར་སྐུ་དཀྱིལ་གསལ་དྭངས་ཐོག་བཞུགས་ཡོད་པར་བཀྲ་ཤིས་བདེ་ལེགས་ཞུ་རྒྱུ་ཡིན། དེ་བཞིན་རིས་སུ་མ་ཕྱེ་པའི་བླ་སྤྲུལ་རྣམ་པ་དང་མཁན་པོ། དགེ་བཤེས་བཅས་ལ་འཚམས་འདྲི་ཡོད། ད་རེས་དུས་འཁོར་དབང་ཆེན་ཆེད་འདིར་བཅར་བ་ཡིན། ལ་དྭགས་ཁུལ་གྱི་སེར་སྐྱ་མི་དམངས་དང་ངོ་ཤེས་པ་ཆགས་ནས་ལོ་མང་པོ་ཕྱིན་ཡོད། ངོས་རང་ལ་དྭགས་སུ་ ༡༩༦༧ ལོར་ཡོང་བ་ནས་བཟུང་ཐེངས་མང་པོ་བསླེབས་ཡོད། ང་རང་ཚོ་ཚང་མ་དད་པ་དམ་ཚིག་གཡོ་བ་མེད་པར་ཧ་ཅང་ཡག་པོ་ཡིན། ད་རེས་སླར་ཡང་བསླེབས་རྒྱུ་བྱུང་བར་ཧ་ཅང་དགའ་པོ་བྱུང་། འདི་གར་ཁང་པ་གསར་པ་མང་པོ་རྒྱག་གི་འདུག གྲོང་ཁྱེར་རྒྱ་སྐྱེད་གཏོང་གི་ཡོད་པ་འདྲ་པོ་འདུག སྔོན་མ་ང་ཚོ་ཐོག་མར་འབྱོར་བའི་སྐབས་སུ་ཆུང་ཆུང་རེད། ད་ཆ་ཧ་ཅང་རྒྱ་སྐྱེད་བྱུང་འདུག སློབ་གྲྭའི་ཕྲུ་གུ་ཧ་ཅང་མང་པོ་འདུག ཁ་ཆེ་དང་ཡུལ་པ་ཚོའི་སློབ་ཕྲུག་འབོར་ཆེན་པོ་ཧ་ཅང་ཡག་པོ་འདུག

 དུས་རབས་ ༢༡ པའི་ནང་དུ་སངས་རྒྱས་བཅོམ་ལྡན་འདས་ཀྱི་ཆོས་ཉམས་པ་སོར་ཆུད་དང་མི་ཉམས་གོང་འཕེལ། ཡར་རྒྱས་ཆེན་པོ་འགྲོ་བར་སྤྱིར་བཏང་ཤེས་ཡོན་ཧ་ཅང་གལ་ཆེན་པོ་རེད་འདུག སྤྱིར་བཏང་གི་ཤེས་ཡོན་ཆ་ཚང་ཡོད་པ་གང་ཞིག་ལ་འཛམ་གླིང་གི་གནས་ཚུལ་ཡང་ཤེས་པར་བྱས་ནས་ངས་དུས་རྒྱུན་དུ་རྩེད་མོ་དང་སྦྲགས་འདི་ལྟར་ཤོད་ཀྱི་ཡོད། རི་རབ་མེད་པ། འཛམ་གླིང་ལེབ་ལེབ་མིན་པ། ཉི་མ་དང་ཟླ་བ་ཆེ་ཆུང་ཧ་ཅང་ཡོད་པ། ཐག་རིང་པོ་ཧ་ཅང་ཡོད་པ། དེ་དག་ཤེས་པའི་ཐོག་ནས་སངས་རྒྱས་བཅོམ་ལྡན་འདས་ཀྱི་བདེན་གཉིས་དང་བདེན་བཞི་སོགས་དེང་གི་ཚན་རིག་གི་ཐོག་ནས་ར་འཕྲོད་པ་དང་འགྲེལ་བཤད་རྒྱག་རྒྱུ་ཡོད་པ་ཞིག་ཆགས་ཡོད། དེ་ལྟ་བུའི་སངས་རྒྱས་པའི་ཆོས་དེ་ཤེས་ནས་དད་པ་ཐོབ་པ་བྱེད་རྒྱུ་ཧ་ཅང་གལ་ཆེན་པོ་རེད། གཞན་དེ་སྔ་ང་རང་ཚོས་སྐྱབས་སུ་མཆི་དང་། ལ་དྭགས་པ་ཚོས་ཕྱག་འཚལ་ལོ་ཟེར་བ་སྤྱིར་ཡག་པོ་རེད། མ་འོངས་པར་སངས་རྒྱས་ཀྱི་བསྟན་པ་སྲ་བརྟན་གོང་འཕེལ་ཡོང་རྒྱུར་མང་ཚོགས་ཀྱིས་ནང་ཆོས་ཤེས་པར་བྱས། ལྷག་པར་སློབ་ཕྲུག་ཚོས་སངས་རྒྱས་པའི་ཆོས་གང་འདྲ་ཡིན་པ་དེ་ཤེས་པར་བྱ་དགོས། དེ་ལྟར་གོ་རྟོགས་ཐུབ་པའི་ཐོག་ནས་ཆོས་དད་བྱུང་ན་བསྟན་པ་མུ་མཐུད་གནས་རྒྱུ་ཡོང་གི་རེད། གཞན་མང་ཚོགས་ཀྱི་ཤེས་ཚད་གང་ཡང་མེད་པའི་ཐོག་ནས་ཕྱག་འཚལ་ལོ་ཞེས་ཕྱིན་ན་དགོན་པ་སྤུས་དག་ཡོད་ནའང་ལྟག་ཆུ་ཆད་པའི་རྫིང་བུ་ལྟ་བུ་རེད།

 བོད་མི་བཙན་བྱོལ་བར་ཆ་བཞག་ན་བཙན་བྱོལ་ནང་འཚར་ལོངས་བྱུང་བའི་གཞོན་སྐྱེས་ཁྲོད་གྲྭ་སའི་ནང་ཞུགས་ནས་དཔེ་ཆ་བལྟ་མཁན་ཧ་ཅང་ཉུང་ཉུང་རེད། བོད་མིའི་གཞིས་ཆགས་ཁག་གི་ནང་ཡོད་པའི་གདན་ས་ཁག་ལ་ཆ་བཞག་ན་ཁྱེད་རང་ཚོ་ལ་དྭགས་དང་ཟངས་དཀར་བ་ཚོ་ཧ་ཅང་བཀའ་དྲིན་ཆེན་པོ་ཡིན། རྒྱ་གར་ལ་བཙན་བྱོལ་དུ་འབྱོར་ནས་དུས་ཚོད་ཁག་པོ་ཡོད་སྐབས་བོད་ནས་གྲྭ་རྒྱུན་ཡོང་རྒྱུ་མེད་པ་དང་། བྷག་སར་ཡོད་པའི་དགེ་འདུན་པ་བགྲེས་པ་རྣམས་རིམ་པས་གཅིག་རྫོགས་གཉིས་རྫོགས་ཕྱིན་པའི་སྐབས། སློབ་གཉེར་གྱི་རྐང་བཟུང་མཁན་དེ་ཧི་མ་ལ་ཡའི་རི་རྒྱུད་སྤྱི་དང་ལྷག་པར་ཁྱེད་རང་ཚོ་ལ་དྭགས་པ་རྣམས་ཧ་ཅང་དྲིན་ཆེན་པོ་ཡིན། ཞེས་སོགས་གསུངས་ཡོད་འདུག

ཟླ་འདིའི་ཚེས་ ༢༣ ནས་ ༢༥ བར་༧གོང་ས་མཆོག་གིས་ཇམ་མུ་ཀ་ཤི་མུར་ཟངས་དཀར་ས་གནས་སུ་མང་ཚོགས་ལ་༼ལམ་རིམ་བསྡུས་དོན༽ གསུང་ཆོས་དང་སྤྱན་རས་གཟིགས་ཀྱི་བཀའ་དབང་གནང་རྒྱུ་ཡིན་འདུག་ལ། ཚེས་ ༢༩ ཉིན་ལ་དྭགས་ཀླུ་འཁྱིལ་དགོན་པར་ཆིབས་བསྒྱུར་གྱིས་ཕར་ཕྱིན་དབྱར་ཆོས་ཆེན་མོ་དང་དབུ་མའི་བགྲོ་གླེང་དབུ་འབྱེད་བཅས་གནང་རྒྱུ་ཡིན་པ་དང་། ཚེས་ ༣༠ ཉིན་ཕར་ཕྱིན་མཁས་པའི་བགྲོ་གླེང་གི་ཚོགས་མགོན་དུ་ཆིབས་བསྒྱུར་དབུ་བཞུགས་གནང་རྒྱུ་ཡིན་འདུག

 ཕྱི་ཟླ་ ༧ ཚེས་ ༡ ཉིན་ལ་དྭགས་ཀླུ་འཁྱིལ་དགོན་པར་མང་ཚོགས་ལ་༼ཤེས་རབ་སྙིང་པོ༽ ཆོས་འབྲེལ་གནང་རྒྱུ་ཡིན་པར་མ་ཟད། མངའ་རིས་ཚང་དགོན་ཁག་བདུན་གྱི་དགེ་འདུན་འདུས་དམངས་དང་སེར་སྐྱ་ཐུན་མོང་གིས་༧གོང་ས་མཆོག་ལ་བརྟན་བཞུགས་འབུལ་རྒྱུ་ཡིན་འདུག ཚེས་ ༣ ནས་ ༡༤ བར་༧གོང་ས་མཆོག་གིས་ཕྱི་ནང་གི་དད་ལྡན་ཆོས་ཞུ་བར་དུས་འཁོར་དབང་ཆེན་གནང་རྒྱུ་ཡིན་འདུག

གསར་འགོད་པ། དོན་གོ